Molar um málfar og miðla 209

   Á Morgunvakt Rásar tvö (25.11.2009) var fjallað um hangikjöt. Þá sagði umsjónarmaður: Það er ekki sama hvernig hangikjöt er gert. Þá vaknar spurningin: Gera menn hangikjöt? Spjallað var við starfsmann RÚV eins og alsiða er á þeim bæ, enda óþarfi að leita langt yfir skammt og vera að tala við utanhússfólk, nema í neyðartvikum.  Sá sagði um lyktina af tvíreyktu hangikjöti, að hún ætti að vera það sterk að hún leggi yfir alla sveitina. Molaskrifari er á því að hann hefði átt að segja um lyktina: að hana leggi yfir alla sveitina. Í norðanátt leggur reykinn frá loðnubræðslunni yfir bæinn. 

 

Þegar lögreglumaður lítur svo á að hann haldi ekki utan um ástandið getur það þó gerst að hann nái ekki að vara við. Þetta er haft eftir lögreglumanni (25.11.2009) á mbl.is . Að halda utan um ástandið er ekki vel að orði komist, mildilega orðað. Þarna hefði mátt segja , til dæmis: Þegar lögreglumaður telur, að allt sé að fara úr böndunum, 

 ... sem stelpunum langar í, sagði fréttamaður Stöðvar tvö (25.11.2009) og var þá að tala um forláta kaffivél  fyrir nýja kaffistofu á Akranesi.. Ef hann hefði verið laus við þágufallssýkina hefði hann sagt: .. sem stelpurnar langar í. Örstuttu síðar sagði sami fréttamaður:  ... þeim sem langar... Sjálfum sér samkvæmur í vitleysunni.

 Kynnir Kastljóss tóka svo til  orða (25.11.2009): Gasið spilar einmitt stórt hlutverk í að fyrirbyggja hjartasjúkdóma.  Mætti  Molaskrifari   biðja um minni áherslu á hárgreiðslu en meiri á málvöndun ?

 

   Ekki kunni Molaskrifari að meta að heyra seðlabankastjóra  (25.11.2009) tönnlast á að draga á lán og svo tala menn um að draga á lánalínur.  Sjómenn á línubátum draga línu, oftar þó línuna , með ákveðnum greini en um þessi margumtöluðu lán ætti að nota sagnirnar að nýta  eða taka.

 

 Rás tvö, Ríkisútvarpsins auglýsir nýjan útvarpsþátt undir  nafinu Bergson (með einu s ) og Blöndal. Molaskrifari vissi ekki betur en sá sem fyrra nafnið vísar til sé Bergsson. Það segir símaskráin að minnsta kosti.   Í tíufréttum RÚV sjónvarps (25.11.2009) talaði stjórnmálafræðingur um að hafa sínu fram. Ruglaði saman orðtökunum að fara sínu fram, halda fast við sína stefnu án tillits til annarra og að hafa sitt fram, fá vilja sínum framgengt.

 

 Nýlega var í Molum rætt um það að sum orð eru aðeins til í eintölu, önnur aðeins í fleirtölu. Blaðamaður Morgunblaðsins flaskar á þessu (26.11.2009) og skrifar: Mistök starfsmanns velferðarsviðs varð til þess...  Mistök er fleirtöluorð og þess vegna hefði blaðamaðurinn átt að skrifa: Mistök starfsmanns velferðarsviðs urðu til þess.... 

 

 Ríkisútvarpið hefur í áraraðir fylgt þeirri ágætu reglu að byrja ekki að flytja jólalög í dagskránni fyrr en eftir 1. desember.Umsjónarmenn Morgunvaktar Rásar tvö töldu rétt að brjóta þessa reglu (26.11.2009) og verja löngum tíma í að auglýsa nýja jólaplötu tiltekinnar hljómsveitar. Reglur Ríkísútvarpsins eru líklega bara til að brjóta þær.  

Molar um málfar og miðla 208

  Eftir mikla leit fann hann loks móðir sína, en.. (visir.is 24.11.2009) Greinilegt er að slakað hefur verið á í íslenskukennslu  í grunnskólum landsins. Það var svo staðfest í fréttum Stöðvar tvö sama dag, þegar fréttamaður talaði um lögfræðing föðursins. Í  sama fréttatíma sagði fréttamaður: .. þegar hann kemst í leitirnar. Hann hefði átt að segja : Þegar hann kemur í leitirnar. Ég kemst ekki í leitirnar í haust, hefur allt aðra merkingu, eins og flestir vonandi vita.

   Þegar efni Kastljóss RÚV (24.11.2009) var kynnt í upphafi þáttarins, talaði kynnir um að björgunarafrek hefði verið framkvæmt. Afrek eru unnin , ekki framkvæmd. En kaflinn í Kastljósi um björgunarafrekið við Látrabjarg var fínn.

 

  Það var sögulegt ranghermi í Kastljósi, þegar Toppstöðin, eða varaflstöðin við Elliðaár var nefnd gamla rafstöðin við Elliðaár. Toppstöðin, ömurlega ljótt kassahús á þessum fallega stað,  var reist um eða upp úr 1948  fyrir Marshallfé. Hún var olíuknúin og henni var ætlað að koma til skjalanna, þegar orkunotkun væri hvað mest í Reykjavík. Kölluð Toppstöð af því að henni var ætlað að mæta  svokölluðum  orkutoppum. Gamla rafstöðin við Elliðaár er allt önnur bygging, annarsstaðar við árnar. Hún var tekin í notkun 1921 og hefur síðan malað gull. 

 Hefði ekki verið við hæfi að Síminn kynnti nýja markaðsherferð  á Degi íslenskrar tungu fyrr í þessum mánuði ?  Herferðin er farin undir orðinu ring, sem er ekki íslenska heldur enska. Síminn hefur af þessu lítinn sóma, en talsverða skömm hjá þeim sem unna móðurmálinu. 

Oft hefur hér verið amast við auglýsingum  sparisjóðsins Byrs um eitthvað sem þeir hafa kallað fjárhagslega heilsu. Vonandi er yfirstjórn sparisjóðsins við góða heilsu eftir húsleit og yfirheyrslur (24.11.2009).

 Morgunblaðið birti langa grein (24.11.2009) á besta stað í blaðinu, leiðaraopnunni, eftir Karl Axelsson , lögmann Baldurs Guðlaugssonar fv. ráðuneytisstjóra. Sérstakur saksóknari sendi frá sér yfirlýsingu vegna greinarinnar.  Molaskrifari  vænti  þess að yfirlýsing  saksóknarans mundi birtast á sama stað í blaðinu. Ég fann yfirlýsinguna ekki í Morgunblaðinu (25.11.2009) Það er vegna þess að hún er ekki í blaðinu. Hlýtur hún þó að hafa borist á ritstjórn Morgunblaðsins eins og hún barst öðrum miðlum.  Yfirlýsing sérstaks saksóknara hefur sennilega ekki verið ritstjórum Morgunblaðsins þóknanleg og því ekki birt. Fornaldarblaðamennska í þessum dúr er vísasta leiðin til að ganga af Morgunblaðinu dauðu. Sennilega tekst núverandi ritstjórum það á tiltölulega skömmum tíma, enda leggja þeir sig alla fram. Þeir keppast við  að breyta  Morgunblaðinu í íslenska Prövdu. 

 Í Morgunblaðinu (25.11.2009) er sagt frá slagsmálum á slysavarðstofu. Í fréttinni er þessi setning: Hann segir árásina hafa verið með öllu tilhæfulausa. Orðið tilhæfulaus, þýðir ósannur, rangur. Frétt er tilhæfulaus, ef ekki er fótur fyrir henni, ef hún styðst ekki við staðreyndir. Hér hefur blaðamaður  ruglað saman orðunum tilhæfulaus og tilefnislaus. sem er allt annað.

Molar um málfar og miðla 207

   Í fréttum Stöðvar tvö (22.11.2009) var sagt: Hún segir algengt að menn sem grunaðir séu um nauðgun sé sleppt. Fréttamaðurinn hefði átt að segja: .. að mönnum sem grunaðir séu um nauðgun sé sleppt.

 

  Oft er ástæða til að gera athugasemdir við málfar í auglýsingum.Í Útvarpi Sögu glymja nú auglýsingar um meltingarlyf sem er að hjálpa mörgum og  nafngreindan gullsmið sem er að kaupa gull.  Betur  færi á að tala um lyf sem hjálpar mörgum og  gullsmið sem kaupir gull.... ekkert er að... sem alltof algengt er að heyra tönnlast á. Þá er í sama miðli auglýsing um einhverskonar Kínalífselexír, lyf sem sagt er að  talið sé allra meina bót. Gæti líklega haft verulegan sparnað í för með sér í heilbrigðiskerfinu, ef satt er ! 

 

Umsjónarmenn Morgunvaktar Rásar tvö hjá RÚV halda áfram að bjóða hlustendum upp á gullaldarmálfar. Í morgun (24.11.2009) var sagt: ... og ef maður er böstaður... Átt var við það ef maður væri staðinn að verki við að setja í heimildarleysi litaða olíu á eldsneytisgeymi bifreiðar, - olíu sem ætluð er fyrir  vinnuvélar. Fólk sem svona tekur til orða á ekkert erindi að hljóðnemunum í Efstaleitinu.

 

 Molaskrifari tekur undir með Eiríki Jónssyni, sem  gerir að umtalsefni hið hlægilega ráp  sumra sjónvarpsfréttamanna  fyrir framan myndavélina. Ef þeir halda, að þjóðinni þyki þetta fagmannlegt og flott, þá er Molaskrifari næsta viss að þeir hafa rangt fyrir sér. Þetta er fyrst og fremst hallærislegt og tilgangslaust og dregur athyglina frá því sem verið er að segja og beinir henni að fréttamanninum, sem er líklega tilgangurinn. En í öllum fréttum er fréttamaðurinn aukaatriði. Þá staðreynd skilja ekki allir í Efstaleiti.

 

Netmiðillinn visir.is segir í fyrirsögn (24.11.2009): Lögmanni Baldurs ofbýður vinnubrögð sérstaks saksóknara. Hér er þess að gæta að orðið vinnubrögð er fleirtöluorð, - ekki til í eintölu. Þess vegna hefði fyrirsögnin átt að vera: Lögmanni Baldurs ofbjóða vinnubrögð sérstaks saksóknara. Ef um hefði verið að ræða framkomu sérstaks saksóknara hefði verið rétt að segja: ...ofbýður framkoma sérstaks saksóknara vegna þess að  framkoma er eintöluorð og ekki til í fleirtölu. 

 Úr sama netmiðli , sama dag: Benedikta Jónsdóttir, heilsuráðgjafi, segist aldrei hafa liðið betur... Sá sem þetta skrifar er reyndar samkvæmur sjálfum sér, því hann segir líka: Benedikta segist alltaf hafa verið umhugað um heilsuna. Hér segir Molaskrifari, að betur hefði farið á því að segja: Benedikta Jónsdóttir segir að sér hafi aldrei liðið betur, og: Benedikta segir að sér hafi alltaf verið umhugað um heilsuna.

Hverja verndar Persónuvernd ?

  Einhver undarlegasta frétt, sem  lengi hefur birst, er að  lögreglunni sé óheimilt að nota myndir úr  eftirlitsmyndavélum á  bensínstöðvum til að hafa hendur í hári þjófa. Til hvers  eru  eftirlitsmyndavélarnar, ef  ekki  til að koma upp um lögbrjóta ?  Þjófarnir sem  hér  um ræðir   setja litaða  díeselolíu á  bíla sína. Litaða olían er eingöngu til nota á vinnuvélar og  hver lítri er  60 krónum  ódýrari en olían sem  er ætluð bílum. Þeir sem  þetta gera eru að  stela  frá  ríkinu. Þeir  eru að stela  frá samborgurum sínum.

 Það er alveg  stórmerkilegt,ef  Persónuvernd lítur á það sem hlutverk sitt að halda hlífiskildi yfir þjófum. Þeir halda þá  bara  áfram að stela. Þrælöruggir um að  ekki verður snert hár á höfði þeirra.  Þeir eru skjólstæðingar  Persónuverndar. Þetta er auðvitað fáránlegt.

Molar um málfar og miðla 206

    Í gegnum sögu Íslands hafa ....    Á  þessum orðum hefst  blaðagrein eftir varaformenn fjögurra stjórnmálaflokka. Í skóla var  Molaskrifara kennt  að  svona ætti ekki að taka  til orða. Hér hefði til dæmis mátt byrja á orðunum: Í aldanna rás.... Svo er fjallað um áföllin sem  dunið hafa á þjóðinni og  sagt: Sum hafa verið af völdum náttúru og önnur hafa verið efnahagsleg.  Hér  hefði að mati Molaskrifara verið   eðlilegra að  segja  af  völdum náttúrunnar , ekki náttúru. Í greininni segir ennfremur: Sú efnahagskreppa sem við erum nú stödd í ...  Þetta finnst  Molaskrifara  ekki vera til  fyrirmyndar. Að vera staddur í kreppu ! Eitt í viðbót: Í þessari viku verða haldnir yfir 100 viðburðir á Íslandi... Að halda  viðburð?  Þau  dæmi sem hér hafa verið tilgreind  staðfesta þá gömlu skoðun  Molaskrifara að því  fleiri sem greinarhöfundar eru , því  lakari verður afurðin.

 

 Í fréttum Stöðvar tvö  (20.11.2009) var  sagt  frá mikilli úrkomu í Bretlandi og  talað um úrkomumagnið á 24 klukkustunda  tímabili.  Í fréttum  RÚV  sjónvarps var  talað um sólarhringsúrkomu, sem Molaskrifara finnst ólíkt betra  orðalag.

   
 Málfarsráðunautur Ríkisútvarpsins ætti að taka  sig  til og  kenna þeim sem  kynna  dagskrána í sjónvarpi hvernig  orðið dóttir  fallbeygist. Aftur  og  aftur  heyrir maður að  dagskrárkynnar vita ekki að  nafnorðið  dóttir  beygist: dóttir,dóttur,dóttur,dóttur.

Þægilegt var  (21.11.2009) að hlusta  á  tónlist úr þularstofu milli klukkan   sjö og átta að morgni laugardags á Rás eitt. Vandaðar kynningar, þægileg rödd og  vel valin tónlist. 

Mikil er hugmyndaauðgi  dagskrármanna  sjónvarpsstöðvanna. Stöð tvö (20.11.2009) Ísland í dag = Jón Gnarr. RÚV sjónvarp (20.11.2009) Kastljós=Jón Gnarr. Svo var þetta ekki einu sinni fyndið !  

„Það var aldrei krafist þess að sjá listann," hefur visir.is eftir umboðsmanni barna (20.11.2009). Þess  var  aldrei krafist að fá að sjá  listann , hefði verið betra orðalag.

  Hverju eiga hlustendur að trúa, þegar prófessor við   virtustu menntastofnun þjóðarinnar setur fram  tölur  um launahækkun sjómanna  og  aukinn hagnað útgerðarfyrirtækja og kvöldið eftir kemur  svo  talsmaður útgerðarmanna  og segir  allar tölurnar tómt  rugl eins og annað sem frá þessum prófessor komi?

 

 Molaskrifari verður að  játa  að hann er  svolítið  ruglaður.

Molar um málfar og miðla 205

       Góður vinur og gamall skólabróðir, Sigurður Oddgeirsson,  sem nú dvelst með  Jótum , sendi mér eftirfarandi. Sigurður hefur farið vítt um veldi Dana  og raunar veröldina  , en ekki hefur það dregið úr áhuga hans á  mikilvægi móðurmálsins. Kærar þakkir fyrir sendinguna, Siggi: 

„Ekki veit ég hversu oft þú hlustar á sjónvarps- og/eða útvarpsfréttir. En í hvert skipti sem ég hlusta (og reyndar líka þegar ég les í blöðum) á lögreglumenn segja frá innbroti eða slysförum eða hvers kyns óáran, þá virðist einföld þátíð algerlega gleymast. Framsetningin verður sem sé einhvers konar praesens historicum eins og það var kallað í tímum hjá Magnúsi (Finnbogasyni) og Kristni (Ármannssyni) í MR fyrir heilum mannsaldri síðan. Fylgdi sú skýring þeirra lærifeðra, að gripið væri til þessa stílfyrirbrigðis í latínu til að auka spennu í frásögnina.

   Annað "löggu" fyrirbæri er að gefa allt of nákvæman tíma í blaða- eða sjónvarps fréttum um atburði næturinnar. "tilkynningin barst kl. 03:28 í nótt". Mér finnst þetta fáránlegt. Ber þó meira á þessu í danska sjónvarpinu, enda glæpir næturinnar algengari í þvísa landi. Algengt er, að lögreglumenn segi frá á eftirfarandi hátt: Um þrjúleytið síðast liðna nótt kemur bíll akandi að vörugeymslunni og næturvörður verður var við, að innbrotsþjófarnir fara inn um glugga á bakhlið hússins. Hann hringir á lögregluna og  kemur hún á vettvang..... o.s.frv. o.s.frv. 

Ég hef heyrt þýzkan kennara (frá Sviss) ræða móðurmál sitt og halda því fram, að einföld þátíð væri dauð og horfin í nútíma þýzku, leyst af hólmi af samsettri þátíð. Er eitthvað slíkt að gerast með íslenskuna ?  Þetta ruglar hlustendur og lesendur, því menn  leggja ósjálfrátt framtíðarmerkingu í orðalagið, (nt. með framtíðarmerkingu). Það er algerlega úti á túni (góð þýðing á e. out of tune), að láta nt. leysa þt. af hólmi! Eða hvað? 

Þá er þriðja fyrirbrigðið, sem veldur mér miklu hugarangri, en það er meiningarlaus notkun smáorðins að.  Nokkur dæmi af mörgum:  Það verður fróðlegt að sjá hvert að Eiður Smári muni fara gangi salan eftir. (Blogg Stefáns Friðriks Stefánssonar um Eið Smára 12. júní 2007) 

well.. þar sem eigendurnir vildu hafa þetta af tékkneskri pilsnerfyrirmynd að þá efastég um að við sjáum eitthvað tilþrifameira, þrátt fyrir að doppelbock og hveitibjór væru flott múv (Ókunn athugasemd við KALDA bjór frá Árskógssandi).   

Skv. upplýsingum að þá á verkefnið að skila ca 1 ma.kr. per anno næstu 25 árin(Skýrsluhluti saminn af cand.jur) Skv. upplýsingum sem ég hef fengið munnlega frá ÁÞÁ. að þá verður ekki  annað sagt en að verkefnið líti vel út.(Sami höf.) Eftir samtal við ÁÞÁ. að þá legg ég til að við hittumst í húskynnum …..(Sami höf.) 

Væri ekki gráupplagt fyrir höfunda að nota hér blekklessuna öhö eða hm eða eitthvað álíka? Hvers vegna að láta þetta ganga útyfir smáorðið að, sem hefur miklu hlutverki að gegna í málinu okkar? 

Jæja, ekki meir að sinni. S “

Kærar þakkir fyrir sendinguna, Siggi.      

Saga Sjálfstæðisflokksins á uppboði !

  Þegar Sjálfstæðisflokkurinn setur  fágæta muni úr sögu sinni á uppboð, er það ekki merki þess að hann vilji gleyma sögu sinni ?   Það er  svolítið einkennilegt að setja  minjar um sögu flokksins á uppboð og selja hæstbjóðanda.  Kannski er þetta einmitt   kjarni þeirrar frjálshyggju sem  sett hefur svip á flokkin undanfarin ár. Allt er falt  , ef nógu hátt er boðið.

Það er ofur skiljanlegt að Sjálfstæðismenn séu ekki stoltir af sögu  flokks síns síðastliðna  tvo áratugi. En auðvitað er það  „tær snilld" að selja  sögu flokksins  á uppboði !

Uppboð í Valhöll á morgun

Tíu manns og tvö-þrjú börn

 Það er nú ekki mikil frétt ,að samkvæmt  myndum Vefmogga skuli  tíu manns og  tvö, þrjú börn standa fyrir  framan stjórnarráðshúsið við Lækjartorg og mótmæla. Af þessum tíu  sýnist mér að tveir séu fréttamenn. Þetta er einna  helst  frétt vegna þess  fámennur hópurinn er 

Mótmæla Icesave

Styrmir og Hallgrímur

Margt athyglisvert kom fram í fróðlegu og  skemmtilegu samtali þeirra  Styrmis Gunnarssonar og Hallgríms Thorsteinssonar í þættinum „Í  vikulokin" á Rás eitt (21.11.2009). Eitt var þó skrítið við umræðuna: Ekki var minnst einu orði á  hvernig staðið var að  einkavæðingu bankanna, en þar er rótin  að því hversu illa  fór og hve  fáir menn  gátu sett íslenska þjóðfélagið á hliðina.  Við komumst aldrei framhjá þeirri  staðreynd  að hin pólitísku helmingaskipti Sjálfstæðisflokks  og  Framsóknarflokks um að  afhenda  ríkisbankana  sérvöldum skjólstæðingum sínum  eru ein  megin orsök hrunsins á Íslandi.

  Þegar Styrmir  Gunnarsson ber   ráðningu Davíðs Oddssonar í Seðlabankann  saman  við  ráðningu Geirs Hallgrímssonar, Steingríms Hermannssonar, Tómasar Árnasonar, Jóns Sigurðssonar og Finns Ingólfssonar og segir  að þar hafi menn bara verið að fylgja hefð, er það ekki rétt nema að mjög litlu leiti. Enginn þessara manna var  umdeildur  neitt í líkingu við   Davíð Oddsson. Enginn. Það reyndi ekki á neinn þeirra að marki, því  við sigldum lygnan sjó.  Jón Sigurðsson hafði bankareynslu (hafði lengi setið í bankaráði  Norræna  fjárfestingabankans og verið fulltrúi  Norðurlandanna hjá  Alþjóðabankanum) og  fór úr  Seðlabankanum til að  stýra  einum öflugasta banka  Norðurlanda , Norræna  fjárfestingarbankanum.Aldrei hefur heyrst nein  gagnrýni á  störf  hans á þeim vettvangi. Þessi rökstuðningur Styrmis  styðst ekki við rök , þegar betur er að gáð.

 Styrmir tók Hallgrím hressilega á beinið fyrir að  sjá ekkert nema  Davíð Oddsson í þessari umræðu. En fjölmiðlamönnum er nokkur vorkunn  því  Davíð Oddsson er  svo  sterkur persónuleiki að hvar sem hann fer eða  er  snýst umræðan um  hann. Davíð verður af sjálfu sér miðpunkturinn , meira en  nokkur annar maður sem ég þekki. Það er bara þannig.

 Það er rétt hjá Styrmi  að návígið og  smæðin eru  meðal  helstu vandamála  okkar, en ekki nauðvelt að komast undan þeim. Það er hinsvegar grundvallarmisskilningur að almenningur hafi nú aðgang að öllum sömu upplýsingum og  kjörnir  fulltrúar. Þjóðaratkvæðagreiðslur   eru  ágætar um   afmörkuð  og  skýr efni. Það er bara bull að vera með þjóðaratkvæðagreiðslur um  mál sem   almenningur hefur  takmarkaða möguleika á að taka  upplýstar ákvarðanir um.

 Ágætur fulltrúi utanríkisráðuneytisins átti hinsvegar lítið  erindi í  umræðuna um þessi  mál. Eins og  hún sagði sjálf. Hún  tók hinsvegar  ágætlega upp hanskann fyrir  starfsmenn utanríkisþjónustunnar. Auðvitað á að  spara og  gæta aðhalds í  utanríkisþjónustunni eins og  annarsstaðar. En við  verðum  líka að halda reisn okkar og vera þjóð meðal þjóða. Það er hægt   að gera án þess að bruðla. Það er mikill misskilningur að Internetið geti komið í staðinn  fyrir sendiráð. Það er gott hjálpartæki en kemur aldrei í staðinn fyrir fólk.

Hlakka til að lesa bók Styrmis.

PS Það  er svolítið  skemmtilegt að gömlu vinirnir og  skólabræðurnir Styrmir og Ragnar Arnalds skuli vera orðnir pólitískir samherjar á efri árum í andstöðunni við inngöngu Íslands í ESB!

Molar um málfar og miðla 204

 

  Úr vefmogga (18.11.2009): Forvarsmenn bandaríska álrisans Century Aluminum segja að stefnt sé að því að hefja fullar framkvæmdir við álverið í Helguvík. Fullar framkvæmdir ?  Af hverju nægði ekki að segja: .. að hefja framkvæmdir ? 

Meira úr vefmogga (19.11.2009): Eftirfarandi er úr frétt um nýjan utanríkisstjóra ESB: Hún var stjórnarformaður heilbrigðisyfirvalda í sýslu einni frá 1998 til 2001. Hverju erum við nær ?  Þessi frétt er annars með ólíkindum illa skrifuð og hefur viðvaningur greinilega haldið hér á penna. 

  Sérkennilegt var heyra háskólaprófessor (Spegillinn,  RÚV 19.11.2009) tala um tvö áhrif.  Eðlilegra og réttara hefði verið að  tala um tvennskonar áhrif.  

 

Íþróttafréttamaður RÚV (19.11.2009) talaði um að innbyrða þriggja stiga sigur. Alveg nýtt fyrir Molaskrifara að hægt sé að innbyrða sigur. 

 

Kristján Már Unnarsson fréttamaður Stöðvar tvö á hrós skilið fyrir að vera fundvís á áhugaverðar fréttar utan  höfuðborgarsvæðisins. Hann hefur líka staðið sig vel í að fjalla um olíuleit og orkumál á norðurslóðum. Kristján Már er naskur með næmt fréttanef. 

 

Það er heldur leiðigjarnt að vera sífellt að nöldra um það sama. Enn heldur Ríkisútvarpið , þessi stofnun sem við eigum öll, áfram að brjóta landslög með því að auglýsa áfengi. Tvær bjórauglýsingar fyrir tíu fréttir (19.11.2009) og ein eftir fréttir. Makalaust er að enginn þingmaður skuli hafa döngun í sér til að taka þetta mál upp á Alþingi. Fyrir rúmlega hálfum mánuði sendi Molaskrifari menntamálaráðherra, formanni stjórnar RÚV og varaformanni stjórnar RÚV bréf  um áfengisauglýsingarnar, sem RÚV hellir yfir okkur á hverju kvöldi. Svör hafa ekki borist. Koma vonandi með jólapóstinum, -  í síðasta lagi.