Styrmir og Hallgrímur

Margt athyglisvert kom fram í fróðlegu og  skemmtilegu samtali þeirra  Styrmis Gunnarssonar og Hallgríms Thorsteinssonar í þættinum „Í  vikulokin" á Rás eitt (21.11.2009). Eitt var þó skrítið við umræðuna: Ekki var minnst einu orði á  hvernig staðið var að  einkavæðingu bankanna, en þar er rótin  að því hversu illa  fór og hve  fáir menn  gátu sett íslenska þjóðfélagið á hliðina.  Við komumst aldrei framhjá þeirri  staðreynd  að hin pólitísku helmingaskipti Sjálfstæðisflokks  og  Framsóknarflokks um að  afhenda  ríkisbankana  sérvöldum skjólstæðingum sínum  eru ein  megin orsök hrunsins á Íslandi.

  Þegar Styrmir  Gunnarsson ber   ráðningu Davíðs Oddssonar í Seðlabankann  saman  við  ráðningu Geirs Hallgrímssonar, Steingríms Hermannssonar, Tómasar Árnasonar, Jóns Sigurðssonar og Finns Ingólfssonar og segir  að þar hafi menn bara verið að fylgja hefð, er það ekki rétt nema að mjög litlu leiti. Enginn þessara manna var  umdeildur  neitt í líkingu við   Davíð Oddsson. Enginn. Það reyndi ekki á neinn þeirra að marki, því  við sigldum lygnan sjó.  Jón Sigurðsson hafði bankareynslu (hafði lengi setið í bankaráði  Norræna  fjárfestingabankans og verið fulltrúi  Norðurlandanna hjá  Alþjóðabankanum) og  fór úr  Seðlabankanum til að  stýra  einum öflugasta banka  Norðurlanda , Norræna  fjárfestingarbankanum.Aldrei hefur heyrst nein  gagnrýni á  störf  hans á þeim vettvangi. Þessi rökstuðningur Styrmis  styðst ekki við rök , þegar betur er að gáð.

 Styrmir tók Hallgrím hressilega á beinið fyrir að  sjá ekkert nema  Davíð Oddsson í þessari umræðu. En fjölmiðlamönnum er nokkur vorkunn  því  Davíð Oddsson er  svo  sterkur persónuleiki að hvar sem hann fer eða  er  snýst umræðan um  hann. Davíð verður af sjálfu sér miðpunkturinn , meira en  nokkur annar maður sem ég þekki. Það er bara þannig.

 Það er rétt hjá Styrmi  að návígið og  smæðin eru  meðal  helstu vandamála  okkar, en ekki nauðvelt að komast undan þeim. Það er hinsvegar grundvallarmisskilningur að almenningur hafi nú aðgang að öllum sömu upplýsingum og  kjörnir  fulltrúar. Þjóðaratkvæðagreiðslur   eru  ágætar um   afmörkuð  og  skýr efni. Það er bara bull að vera með þjóðaratkvæðagreiðslur um  mál sem   almenningur hefur  takmarkaða möguleika á að taka  upplýstar ákvarðanir um.

 Ágætur fulltrúi utanríkisráðuneytisins átti hinsvegar lítið  erindi í  umræðuna um þessi  mál. Eins og  hún sagði sjálf. Hún  tók hinsvegar  ágætlega upp hanskann fyrir  starfsmenn utanríkisþjónustunnar. Auðvitað á að  spara og  gæta aðhalds í  utanríkisþjónustunni eins og  annarsstaðar. En við  verðum  líka að halda reisn okkar og vera þjóð meðal þjóða. Það er hægt   að gera án þess að bruðla. Það er mikill misskilningur að Internetið geti komið í staðinn  fyrir sendiráð. Það er gott hjálpartæki en kemur aldrei í staðinn fyrir fólk.

Hlakka til að lesa bók Styrmis.

PS Það  er svolítið  skemmtilegt að gömlu vinirnir og  skólabræðurnir Styrmir og Ragnar Arnalds skuli vera orðnir pólitískir samherjar á efri árum í andstöðunni við inngöngu Íslands í ESB!

Athugasemdir

[Guðmundur 2. Gunnarsson (IP-tala skráð) 21.11.2009 kl. 15:19]

Svar sem þetta telur síðuhaldari vera "ómálaefnalegt raus." - Eðlilega.  Ætla mér samt að stunda slíkt, meðan hann telur sig hafa leyfi til að halda uppi sínu "málefnalega rausi" sem spunakerling Samfylkingarinnar.  Augljóslega mörgum til ama og það í boði Davíðs Oddssonar, - hins alvonda.  Styrmir benti efnislega á að fréttamenn og aðrir sem þykjast vera að skilgreina hrunið að þeir sjái ekki trén fyrir skóginum, og síðuhaldari er glöggt dæmi um slíkan.  Afsökunin er hversu sterkur Davíð er sem persóna, sem hlýtur að vera í beinu samhengi við hversu aðrir eru afskaplega litlir og aumir og sér í lagi aðrir stjórnmálamenn.  Þessi sífellda rugl um helmingaskiptireglu Sjálfstæðis - og Framsóknarflokks er svo kauðsk að hálfa væri nóg.  Það er þetta með að stunda grjótnám í glerhúsi hvað suma varðar. Eftir hvað flokkaskiptireglu fékk Samfylkingarmaðurinn Eiður Guðnason sendiherrastöðu og hvað flokkar voru við stjórn?  Hvað með Jón Baldvin Hannibalsson, Kjartan Jóhannsson, Guðmund Árna Stefánsson, Benidikt Gröndal, Sighvatur Björgvinsson og Svavar Gestsson?  Ekki stinga uppá óumdeilanlegt hæfi og að þar voru á ferð bestu mögulegu aðilar og að allt hafi verið eðlilegt með ráðningarnar.  Gæti verið að einmitt þarna er ma. að leita pólitíska spillingargrunnsins, eina ástæðu hvers vegna fór sem fór?  Held að það þurfi ekki mjög merkilega græju sem gæti auðveldlega sparað gríðarlegar upphæðir í sendiherra og sendiráðarekstri þjóðarinnar út um allan heim, ekki mikið á skoðun síðuhaldara að græða í þeim efnum.

Síðuhaldara finnst Davíð Oddsson vera svo mikið meiri að hann er ekki sambærilegur til að njóta friðar og hvíldarstóla fjórflokksspillingarreglna (embætti til að losna við allskonar stjórnmálamenn sem ekki eru nothæfir í þjóðkjörin störf) eins og nánast allir aðrir forverar í stóli Seðlabankastjóra. Td. hefur þessi landlæga spillingarskiptiregla komið glögglegast og oftast fram í skipun sendiherra, oft þjóðinni til mikils óþurftar á erlendri grundu, kostnaðarlega og margir hverjir vegna persónulegrar framgöngu í starfi og jafnvel afglapa eins og nýjasta dæmi í Icesave samninganefndarvinnu sem ekki var nennt að inna af hendi.  Síðuhaldari er eins og flestir sem eru að reyna að moka yfir eigin ábyrgð og flokksómynda sinna, (spunakerlingar allra flokka) að reyna að klína allri ábyrgð á einn mann, - Davíð Oddsson.  Miðað við þessa kenningu er augljóslega hægt að senda Evu Joly heim og henda öllum skýrslum rannsóknanefnda og sérstak saksóknara.  Dómur Eiðs eins æðstadómara götunnar (allir meira og minna Samfylkingartegundar) er falinn.  Davíð ber ábyrgð á öllu sem miður hefur farið, og gott ef ekki svínaflensunni líka.  Styrmir tók afar vel á þessum málflutningi slíkra aðila í viðtalinu og þá helst frétta og bloggara, sem er ekkert annað en forheimska og minnimáttarkennd í besta falli.

Eiðs rök standa ekki neina nánari skoðun.  Eiður segir: "Jón Sigurðsson hafði bankareynslu (hafði lengi setið í bankaráði  Norræna  fjárfestingabankans og verið fulltrúi  Norðurlandanna hjá  Alþjóðabankanum) og  fór úr  Seðlabankanum til að  stýra  einum öflugasta banka  Norðurlanda , Norræna  fjárfestingarbankanum.Aldrei hefur heyrst nein  gagnrýni á  störf  hans á þeim vettvangi. Þessi rökstuðningur Styrmis  styðst ekki við rök , þegar betur er að gáð."

Jón Sigurðsson var í hrunsbankastjórna Seðlabankans fyrir Samfylkinguna.  Kom meint bankasnilli hans og hæfi þar í berlega ljós?

Jón Sigurðsson var formaður stjórnar Fjáramáleftirlitsins fyrir Samfylkinguna.  Kom meint bankasnilli hans og hæfi þar berlega í ljós?

Jón Sigurðsson (sá sami og hér að ofan) var aðal kynningar - og talsmaður Icesave herferð Landsbankans erlendis allt fram að hruni, í allslags kynningarefni og bæklingum sérstaklega myndskreyttum með ljósmyndum þessa "trausta" bankamanns.  Þar sem Seðlabanka - , ráðherra - , seðlabankastjórnar - og stjórnarformaður Fjármálaeftirlitsins var og allra hinna tiginnar innan bankamála ávegum þjóðarinnar, hafi gagnast honum vel Icesave reikningnum til upphafningar og dýrðar. Sennileg kom meint bankasnilli hans þar að mati Eiðs best í ljós?

Núna getur hann réttilega svarað því að Icesave var og er algerlega löglegur gjörningur og þess vegna ekkert óeðlilegt við framgöngu þessa mætasti sonar Samfylkingarinnar.  Í framhaldi af hruninu hefur Jón Sigurðsson verið í fullu starfi fyrir Samfylkinguna og stjórnvöld að blanda sér í allskonar samninga varðandi afleiðingar hrunsins, módelstarfana og Icesave, og lánamála eða deilna.

PS.  ESB og Icesave andstaða hefur ekkert að gera með flokkspólitík annarra flokka að gera nema Samfylkingarinnar, og nákvæmlega ekkert "skemmtilegt" eða undarlegt að þegar mikill meirihluti þjóðarinnar er á einu máli að skoðanir mismunandi flokksstuðningsmanna mætist í að hafna ofbeldinu sem hefur fylgt Samfylkinginnar í garð þjóðarinnar.

[Haukur Kristinsson (IP-tala skráð) 21.11.2009 kl. 16:26]

Algjörlega ósammála því að Davið Oddsson séu sterkur persónuleiki. Ef hann skyldi verða miðpunkturinn í hverri umræðu, þá er er það mikið „Armutszeugnis“ fyrir þá hina sem viðstaddir eru.

Er staddur erlendis og er að lesa bókina „Män som hatar kvinnor“, eftir Stieg Larsson á þýsku. Þar er lýsing á Lisbeth Salander sem mér virðist smellpassa fyrir Davíð Oddsson.

Mangel an Emphatie, egoistisch, psychopathisches und asoziales Verhalten, Schwierigkeiten bei der sozialen Zusammenarbeit und Lernunfähigkeit.

[Sigurður Sigurðsson, 21.11.2009 kl. 17:25]

Merkilegt hvað þú skautar yfir EES væðinguna sem átti sér stað, að mig minnir, á þinni vakt.  Enda eðlilegt að þið kratar viljið sem minnst um hana tala, sennilega er hún einn af þeim þáttum sem leiddu til hrunsins á endanum. 

En að Jóni Sigurðssyni, eðalkrata og samflokksmanni og samstarfsmanni þínum til langst tíma: Eiður,  ber hann  nú ekki svolitla ábyrgð sem bankaráðsmaður Seðlabankans og stjórnarformaður Fjármálaeftirlitsins á þeim tíma sem hrunið verður ?? Mun það koma í ljós að hann og fleiri hafi jafn kröftuglega varað við því ástandi sem upp var komið eins og Davíð ??

Hvernig væri nú að þú bloggaðir aðeins um ábyrgð hans, svo ég tali nú ekki um samstarfið á sínum tíma við Jón Baldvin, ekki var það nú gæfulegt fyrir mann að sjá þann mann eitt kvöldið,  starfandi utanríkisráðherra, í kappdrykkju fyrir utan Naustkjallarann á sínum tíma, tala nú ekki um þegar hann henti bjórkrúsinni afturfyrir sig svo að hún splundraðist á Vesturgötunni ??

Hvernig væri að þú upplýstir okkur aðeins um innanbúðarmál ykkar kratanna á sínum tíma og létir af þessari þráhyggju þinni gagnvart Davíð Oddssyni, sem er þó sá stjórnmálamaður sem gersamlega ber af í okkar samtímasögu, og þá sérstaklega í samanburði við ykkur smápeðin, samferðamenn hans á sínum tíma !!!