Molar um málfar og miðla 438

  Í fréttum Stöðvar tvö (20.10.2010) sagði fréttamaður: ....    en tæplega helmingur þess fjárhæðar var veittur að láni... Þeirrar fjárhæðar, -  að sjálfsögðu. Fréttamönnum,sem skrifa  svona texta á ekki að hleypa að hljóðnema,  nema  einhver sæmilegur íslenskumaður hafi  áður lesið textann.  

 Hingað eru að streyma fjórir milljarðar fjár, sagði Ásmundur  Einar Daðason stórfjárbóndi og  Alþingismaður í Kastljósi (21.10.2010). Honum er fé hugleikið. Í umræðum um arfavitlausa og gallaða tillögu um  þjóðaratkvæðagreiðslu um að slíta aðildarviðræðum fór hann mjög  halloka  fyrir Jóni Steindóri Valdimarssyni.  Enda hafði Ásmundur Einar vondan  málstað að verja. Hann vill fríverslun við  Bandaríkin, en  varla  þó með landbúnaðarvörur! Sigmari  umsjónarmanni  tókst hinsvegar að komast hjá því að nefna að tillagan um þjóðaratkvæðagreiðsluna var ekki þingtæk  vegna forgalla, sem  Vigdís Hauksdóttir, tillöguhöfundur, svo stórmannlega kennir starfsfólki Alþingis um.

  Úr  Íslandi í dag (21.10.2010):... segir  mýmörg  dæmi um að velstæðir Bandaríkjamenn ferðist til þróunarlanda til að versla sér líffæri, sagði fréttamaður. Enn eitt  dæmi um  fjölmiðlamann ,sem getur  ekki greint muninn á sögnunum  að versla og  að kaupa. Hér átti auðvitað að nota sögnina að kaupa,  en kannski má segja að glæpamenn versli  með líffæri.

 

Endalausar fréttir  íþróttadeildar í Efstaleiti af  þjálfaramálum  íþróttafélag,a smárra og  stórra,   benda til þess að  ráðamenn þar á  bæ  trúi því að þjóðin geti ekki lagst  til svefns að kveldi  nema vita allt um hin merkilegu þjálfaramál. Að ekki sé nú minnst á ítarlegar vangaveltur um einhvern Wayne Roonie, kvöld eftir kvöld.

 Morgunblaðið  olli Molaskrifara svolitlum vonbrigðum, þegar það  birti  ekki dagskrár norrænu sjónvarpsstöðvanna á sunnudeginum í laugardagsblaðinu  eins og  venjulega.  Oft er nefnilega  úrvalsefni á  boðstólum hjá  frændum okkar  á sunnudögum, fram til þessa hefur verið fátt um fína drætti á  ríkiseinokunarrásinni íslensku.

  Litla flugan hennar Lönu Kolbrúnar Edddóttur  var  fín  á föstudagskvöldið  (22.10.2010). Haukur Morthens  söng  lög, sem maður  heyrði fyrir  60 árum eða  svo og hefur  sum varla heyrt síðan. Vandaðar kynningar. Haukur bregst ekki , -  og Lana Kolbrún ekki heldur.  

Molar um málfar og miðla 437

  Útvarp Saga hefur um langt skeið  einbeitt sér að rangfærslum og óhróðri um íslensku utanríkisþjónustuna. Stjórnendur leggja sig í líma við að varpa rýrð á utanríkisþjónustuna og það fólk sem þar starfar. Það er bót í máli, að flestir sæmilega viti bornir hlustendur láta Sögubullið sem vind um eyru þjóta.

 Það er verra og alvarlegra mál, að Ríkisútvarpið ohf skuli nú taka þátt í því að rægja utanríkisþjónustuna. Ríkisútvarpið er eign þjóðarinnar og  til þess  eru gerðar kröfur. Utanríkisþjónustan á auðvitað að þola gagnrýni eins og aðrar stofnanir ríkisins, en gagnrýni verður að vera málefnaleg, byggð á rökum og  staðreyndum. Í morgunþætti Rásar tvö í  Ríkisútvarpinu (20.10.2010) fóru  umsjónarmenn mikinn vegna  kaupa  á sendiherrabústað í London, sem kostar  rúmlega 800 milljónir króna.  Þeir fengu til  skrafs við sig þingmann Sjálfstæðisflokksins Kristján Þór Júlíusson,sem sæti á í fjárlaganefnd.

 Umsjónarmennirnir höfðu ekkert kynnt sér það mál, sem  þeir voru að ræða og  Kristján Þór Júlíusson  kaus að þegja yfir því sem hann hlaut að vita, sem fulltrúi  flokks síns í  fjárlaganefnd. Þeir fjösuðu fram og til baka um hversu dýrt hús væri  verið að kaupa, - líkt og  fasteignaverð í London væri  á sömu nótum og á Akureyri eða í Breiðholtinu ! Meiriháttar hneyksli !

   Staðreyndir málsins eru hinsvegar þær,  að  utanríkisráðuneytið seldi gamlan sendiherrabústað  við Park Street í London fyrir 1700 milljónir króna og keypti annan bústað  fyrir meira en helmingi lægri upphæð. Með þessum  viðskiptum skilaði utanríkisráðuneytið íslenska  ríkinu um 900 milljónum króna í hreinar tekjur. Örugglega var þetta stærsta hagræðingaraðgerð í öllum  ríkisgeiranum  árið 2009.  Þetta höfðu umsjónarmenn ekki haft fyrir að kynna sér, eða vildu ekki nefna, enda hefði það spillt málinu frá þeirra sjónarhóli séð. Þeir höfðu nefnilega persónulegar skoðanir á málinu,sem þeir lágu ekki á.  Kristján Þór Júlíusson alþingismaður kaus að  þegja rosalega þunnu hljóði. Hann vissi betur en þagði þó.

   Þá má  bæta því við, að áður  hafði utanríkisráðuneytið  skilað íslenska ríkinu  400  milljónum króna  með því að kaupa minni og ódýrari  sendiherrabústað í Kaupmannahöfn í stað  húss, sem ríkið hafði átt í áratugi. Og enn mætti segja frá því, að fyrir nokkrum ætlaði eigandi sendiherrabústaðarins í Peking að hækka húsaleiguna verulega. Samningur  við hann var ekki endurnýjaður. Minna og ódýrara hús var tekið á leigu. Slíkt þykir  auðvitað ekki fréttnæmt.

     Svona vinnubrögð eiga að vera brottrekstrarsök á alvöru fjölmiðli. En auðvitað gerist ekkert hjá Ríkisútvarpinu,  sem er  fyrir löngu orðið stjórnlaust rekald í íslenska fjölmiðlahafinu.

 Umsjónarmenn morgunútvarps Rásar tvö  (þessa sem grátbiðja Leitis Gróu Ríkiútvarpsins í Hollywood á hverjum föstudagsmorgni um meira slúður) á að leysa frá störfum. Þeir valda ekki starfinu. Kristjáni Þór Júlíussyni þingmanni Sjálfstæðisflokksins er hinsvegar  bara hægt að vorkenna.

  Hvað þýðir: Samkvæmt fyrstu heimildum fréttastofu? Þannig var tekið  til orða í  áttafréttum Ríkisútvarpsins (20.10.2010) Er þá líka  til eitthvað sem heitir   til dæmis  þriðju heimildir?

 Í fréttum Ríkissjónvarpsins (20.10.2010) var sagt, að Austurbæjarskólinn,(þar sem Molaskrifari stundaði nám frá 1947 til 1952)  væri  fyrsta húsið í Reykjavík ,sem  tengt hefði verið  hitaveitunni. Molaskrifari hefur jafnan heyrt að Hnitbjörg á Skólavörðuholti ,Listasafn  Einars Jónssonar, hafi fyrst  húsa fengið  yl frá  hitaveitunni.  Á netinu er að finna fullyrðingar  um þetta sem  stangast á . Gaman væri að vita hvort er rétt.

Þegar þessi skóli opnaði , sagði umsjónarmaður   morgunútvarps Rásar tvö (20.10.2010) í viðtali  vegna  afmælis Austurbæjarskólans í Reykjavík. Skólinn opnaði ekki neitt. Hann var opnaður, eða kennsla hófst í skólanum. Seint  holar dropinn steininn.

Molar um málfar og miðla 436

  Fréttir eiga  gefa lesendum/hlustendum/áhorfendum  rétta mynd af því ,sem um  er fjallað.  Í fréttayfirliti Stöðvar tvö (19.10.2010) var sagt:  Nýtt frumvarp ríkisstjórnarinnar útilokar ekki að lánastofnanir geti  elt  skuldara út yfir gröf og  dauða. Þarna skolaðist eitthvað til. Þeir sem um þetta fjölluðu hafa  ekki skilið um hvað málið snerist. Í fréttinni kom svo fram, að í frumvarpinu  verður gerð tillaga um  að skuldir  fyrnist almennt  tveimur árum eftir gjaldþrot, þannig að ekki  sé verið að elta skuldara út yfir  gröf og  dauða , eins og  forsætisráðherra sagði.  Málinu var alveg snúið á haus.  Umsjónarmaður  Rásar tvö í  Ríkisútvarpinu (20.10.2010) sagði hinsvegar: .. út fyrir gröf og dauða !

   Annað dæmi:  Í fréttum Ríkissjónvarpsins (19.10.2010) var sagt frá  fundi borgarstjórnar  Reykjavíkur og sagt: Starfsmenn Orkuveitu Reykjavíkur gengu út.  Starfsmenn Orkuveitunnar  eru nokkur  hundruð. Á myndskeiðinu sem  sýnt var með  fréttinni   sáust 6-8 manneskjur ganga  út. Er það frétt?  Nei. Þarna var kannski  ekki beinlínis verið að segja okkur  ósatt, en  engu að  síður  gaf þetta  ekki rétta mynd  af  því sem myndin  sýndi og því sem gerðist. Hið talaða orð gaf meira í skyn en í rauninni  gerðist. Ófaglegt . Rétt er þó að halda því  til haga ,  að seinna  var í  útvarpsfréttum  sagt,  að nokkrir starfsmenn  Orkuveitunnar hefðu gengið af  fundi.

  Athygli Molaskrifara hefur verið vakin á því að Fréttastofa Ríkisútvarpsins  hafi  „afturkallað frétt"  eða dregið til baka  frétt, þar sem  skuldari lýsti því yfir , að hann teldi sig hafa  fengið sanngjarna  meðferð í kerfinu samkvæmt þeim úrræðum,sem  ríkisstjórnin hefur beitt sér  fyrir. Molaskrifari  hefur ekki  fundið  fróðleik um þetta, en  varla getur það verið að  fréttastofan hafi dregið frétt  til baka  vegna þess að viðmælandi hélt fram skoðunum,sem ekki voru mönnum að skapi í Efstaleitinu. Því verður seint trúað.  Fróðlegt væri að fá  frekari upplýsingar um þetta.

 Fréttamatið í Efstaleiti er stundum undarlegt.  Það var   fréttaefni  tvö kvöld í röð , að ekki skuli gefið til baka í strætó í Reykjavík. Ótrúlegt. Svo fengum við líka  ítarlega frétt um að gamall   söluturn  hefði verið á ýmsum stöðum í borginni. Stórfrétt.

Gísli Marteinn Baldursson borgarfulltrúi mælti fyrir tillögunni og sagði hann að heildstæður stígur af þessu tagi myndi auka verulega umhverfisgæði íbúa svæðisins.(mbl.is 19.10.2010) Heildstæður stígur!  Nútíma kansellístíll. Stígur  er  þröngur vegur , slóði,  afleggjari, vegur eða leið. Að tala um heildstæðan stíg er bara bull. Heildstæður vegur?   Þarna  hefði  nægt að  segja  stígur. Sumum pólitíkusum  finnst  ef til vill meiri reisn yfir því að um heildstæðan stíg, en bara stíg. Svo er ekki.

Í frétt á mbl.is (20.10.2010) segir: Allar námsbækur verði nú á Mandarín,..   Það sem átt er við  er , að allar námsbækur verði nú á kínversku. Það sem á ensku er kallað Standard Mandarin, er  hið opinbera tungumál Kína og Taiwan.  Þýðingarsnilld moggamanna er  fræg að endemum, allar götur síðan á dögum Staff hershöfðingja, general staff.

 Það er ekki öfundsvert hlutskipti fréttaþula í  sjónvarpi að  þurfa að lesa í mynd fréttir á borð  við  fréttina  um slysið átakanlega í Tyrklandi. Ég fann til með þeim. Og öll finnum við til með þeim sem eiga um sárt að binda eftir þetta slys.  

Molar um málfar og miðla 435

   Hvenær ætla  fjölmiðlamenn að spyrja  hina sjálfskipuðu talsmenn svokallaðra Hagsmunasamtaka heimilanna beittra og  meitlaðra spurninga um samtökin  og starfsemi þeirra ? Við eigum að fá að vita  fulltrúar hverra þeir  eru og fróðlegt væri að þeir gerðu almenningi grein fyrir eigin skuldastöðu. Eins og  er gleypa fjölmiðlar allt hrátt, sem frá þessu fólki kemur og marklaus gífuryrðin falla dauð.

  Í morgunfréttum Ríkisútvarps (18.10.2010) var sagt:  Bílaeigendur hamstra nú  eldsneyti sem best þeir geta.  Eðlilegra hefði verið að segja: ... hamstra nú eldsneyti,sem mest þeir mega.

  Umsjónarmaður  Rásar tvö í Efstaleitinu (20.10.2010) sagði okkur,  að í  DV  væri viðtal við þriggja barna faðir ! Hvernig  væri að  málfarsráðunautur kenndi þessu fólki  hvernig orð  eins og  faðir, móðir, systir,og bróðir beygjast ? Kannski leyfir hið alkunna  umburðarlyndi  í Efstaleiti svona  villur.

 Í spjalli við Kristján Þór Júlíusson (20.10.2010) meðal annars um utanríkisþjónustuna opinberuðu umsjónarmenn Rásar tvö fáfræði sína með eftirminnilegum hætti. Þeir höfðu ekkert kynnt sér  málið.  Einkaskoðanir  umsjónarmanna koma okkur hlustendum ekki við.   

  Vinsamleg ábending til fréttastofu Ríkisútvarps: Höfnin á  suðurströndinni  heitir  ekki Landeyjarhöfn, eins og  ritað  er á  fréttavef  Ríkisútvarpsins  og  sagt var (heyrði ekki betur) í sjónvarpsfréttum (18.10.2010). Höfnin heitir Landeyjahöfn. Þetta er ekki mjög flókið.

   Fróðlegt var að heyra Gunnar Kvaran fréttamann spyrja  viðmælanda sinn  í umfjöllun um Sigtúnshópinn svonefnda  1983:  Ertu með  stóra íbúð?  Já,  ég er með 110 fermetra  íbúð var svarið. Þetta var rifjað upp í  Vítt og breitt, morgunþætti Rásar eitt (18.10.2010) . 110  fermetra íbúð þykir frekar lítil íbúð  á Íslandi árið 2010!

 Molaskrifari hefur lítið hlustað á Útvarp  Sögu að undanförnu. Heyrði endurtekið viðtal við umboðsmann skuldara (18.10.2010). Það sem Molaskrifari heyrði  nægði til að sannfæra hann  um að umboðsmaður skuldara er ekki líklegur  til stórafreka og   þetta sýnist   ekki öflugt  embætti  eftir málflutningi  umboðsmannsins að dæma. Malflutningurinn var  ósannfærandi,- ekki skal minnst á málfarið. Það er skaði. Þarna virðist ekki vel hafa tekist til.  Útvarp Saga heldur annars  áfram bulli sínu um neyðarstjórn og utanþingsstjórn. Þar breytist ekkert.  

 Fínir þættir Árna Blandon á rás eitt á  sunnudagskvöldum um Niflungahringinn.  Hversvegna  getur   Ríkissjónvarpið  ekki sýnt okkur   sígild verk, óperur eða tónleika einu sinnin eða  tvisvar í mánuði? Norrænu ríkisstöðvarnar NRK2 og SV2 bjóða  skyldugreiðendum  sínum slíkt efni að minnsta kosti vikulega.  Líkleg skýring er að dagskrárstjórar  Ríkisútvarpsins þori ekki að  bjóða okkur slíkt efni vegna gagnrýni frá  hinu háværa fótboltaliði,sem  fær allar sínar óskir uppfylltar í Efstaleitinu.  Nú skal enn aukið vægi íþrótta í dagskránni með sérstökum vikulegum handboltaþætti  með  sérstökum umsjónarmanni og  sérstökum álitsgjafa. Handbolti er ágætur, en íþróttir eiga ekki að hafa algjöran forgang í dagskránni eins og nú er. 

Molar um málfar og miðla 434

   Það er  óvönduð fréttamennska, þegar meira er fullyrt í fyrirsögn eða  inngangi  fréttar, en   fram kemur í fréttinni sjálfri. Ríkissjónvarpið gerði sig sekt um þetta (17.10.2010) Sagt var í fréttayfirliti og inngangi  fréttar um fyrirhugaða  fjölgun  áfangastaða og stækkun flugflota Icelandair ,  að þessi áform væru í uppnámi vegna áætlana um  gjaldahækkanir á Keflavíkurflugvelli.  Síðan var rætt við framkvæmdastjóra Icelandair, sem  sagði að ef til þessara hækkana kæmi gæti það hleypt þessu í uppnám. Á þessu  er meginmunur.  Þetta eru  vinnubrögð ,sem fréttastofa  Ríkisútvarpsins getur ekki leyft sér.  Ófaglegt.  Fullyrðingin var svo endurtekin í hádegisfréttum  daginn eftir .

Hver fjölmiðillinn át  upp eftir  öðrum um sl. helgi að uppi  væri áætlanir um að gera  embætti   ríkislögreglustjóra  að strípaðri  stjórnsýsluskrifstofu.  Ríkislögreglustjóri er líklega  borðalagðasti embættismaður landsins.  Svona  borðar  eru á slangurmáli  stundum kallaðir   strípur.  Var átt við það? Líklega ekki. Annars þýðir það að vera  strípaður auðvitað að vera nakinn, allsber.  Allsber stjórnsýsluskrifstofa?

  Fram kom í fréttum Ríkissjónvarps (17.10.2010), að kostnaður vegna  starfa Evu Joly  fyrir  sérstakan  saksóknara væri 27.5 milljónur  króna. Skömmu áður heyrði Molaskrifari Ingva Hrafn  Jónsson  fullyrða á ÍNN  að kostnaður  vegna  Joly næmi milljónum dollara , hundruðum milljóna  króna.  Það er eitthvað, sem  er ekki alveg í lagi á ÍNN. Í þessu tilviki hafði Ríkissjónvarpið örugglega á réttu að standa . Molaskrifari  treystir sér ekki til að  hafa eftir þau orð ,sem Ingvi Hrafn notaði um Evu Joly, - þau voru  neðan við allt velsæmi og honum ekki sæmandi.

  Í  fréttum Ríkissjónvarps (17.10.2010) var sagt að  fimleikahús hefði verið vígt á Akureyri. Það láðist hinsvegar að geta þess hvaða  prestur  hefði vígt  húsið. Mannvirki  geta vígðir menn einir vígt.

...hefur verið slydduél og frostúði, sagði fréttamaður í hádegisfréttum Ríkisútvarpsins (18.10.2010). Hafa verið slydduél og frostúði, -- betra.

   Frétt Ríkissjónvarpsins um að  ekki væri gefið til baka í strætó var  klaufaleg og hálfhugsuð.  Að ekki er gefið  til baka  hefur í för með sér að vagnstjórar eru ekki með neina  peninga og þurfa ekki að standa skil á uppgjöri. Sparar mikið í eftirliti og endurskoðun.  Er einhversstaðar á Norðurlöndunum gefið  til baka í strætó? Held ekki. Það er ekki flókið að verða sér úti um miða.  Einfaldast er að hafa ókeypis í strætó  eins og er á  Akureyri og í Þórshöfn í Færeyjum. Það mundi draga úr bílaumferð.

Góðir fréttamenn og þulir eiga að venja sig  af þeim ósið á  segja álit  sitt á  tölum í fréttum með áherslum og  raddblæ.  Í hádegisfréttum (Ríkisútvarps  (18.10.2010) var  sagt um framboð til stjórnlagaþings:.... talið er að meira  en  F I M M  hundruð framboð hafi  borist.  Þótt  fréttmanni /fréttalesara finnist þetta há  tala,  þá kemur  hlustendum nákvæmlega ekkert við hvað honum  finnst. Fréttaþulur lét þessa skoðun sína í ljós við okkur hlustendur , ekki einu sinn,i heldur  tvisvar. Það er  okkar, sem hlustum að  meta það hvort þetta eru margir frambjóðendur  eða fáir. Þetta er óþolandi plagsiður. Mér kemur ekki hætishót við hvað  fréttalesara  finnst.    Fréttin um framboðin var ekki eina  fréttin þar sem  þulur  tjáði okkur hug sinn um  tölur. Hann gerði það líka skýrt og skilmerkilega í frétt um verðmun á  vetrarhjólbörðum.

Löghlýðin þjóð

  Virðingarleysi  fyrir lögum og reglum  er landlægt á Íslandi. Einn nefndarmanna í rannsóknarnefnd  Alþingis  sagði þetta  afdráttarlaust á blaðamannafundi nefndarinnar í Iðnó  fyrr á árinu. Þetta eru orð að sönnu.

Þetta virðingarleysi blasir  við vegfarendum við vegamót Hringvegarins og  Biskupstungnabrautar við Selfoss. Við þröskuldinn hjá  lögreglunni á  Selfossi.

 Þar  voru í morgun (18.10.2010)  sex  auglýsinga skilti og  það sjöunda á bíl skammt undan. Samt  setur löggan  kíkinn fyrir blinda augað, -  sér  þetta ekki.

   Á vef  Umhverfisstofnunar segir:

„ Samkvæmt 43. gr. náttúruverndarlaga, nr. 44/1999, er óheimilt að setja upp auglýsingar meðfram vegum eða annars staðar utan þéttbýlis. Aðeins er heimilt að setja upp látlausar auglýsingar um atvinnurekstur, þjónustu eða vörur á þeim stað þar sem slík starfsemi eða framleiðsla fer fram.

Umhverfisstofnun berst töluvert af ábendingum um skilti sem sett eru upp meðfram vegum fjarri þeirri starfsemi sem um ræðir. Umhverfisstofnun telur að fjarlægja beri slík skilti.

Lagaákvæðið:

43. gr. Auglýsingar utan þéttbýlis.

• Óheimilt er að setja upp auglýsingar meðfram vegum eða annars staðar utan þéttbýlis. Þó er heimilt, að uppfylltum ákvæðum annarra laga, að setja upp látlausar auglýsingar um atvinnurekstur eða þjónustu eða vörur á þeim stað þar sem slík starfsemi eða framleiðsla fer fram.
• Umhverfisráðherra setur í reglugerð nánari ákvæði um efni greinarinnar og úrskurðar um vafaatriði. "

       Og lögreglan gerir ekki neitt.

Þegar skýlaus lögbrot eru látin óátalin  glatast virðingin  fyrir lögum og  reglum.

Lögreglan telur telur þetta kanski of ómerkilegt til að þörf sé á að sinna því. En lögbrot er lögbrot.

 

Molar um málfar og miðla 433

   Markið hefði ekki að telja vegna rangstöðu,var sagt í íþróttafréttum Stöðvar tvö (17.10.2010). Betra hefði verið: Markið var ógilt vegna rangstöðu.  Í sama  fréttatíma var sagt um tiltekinn leikmann: .... lék á öll hljóðfærin og skoraði  tvö mörk. Hverskonar rugl er þetta eiginlega?  Lék á öll hljóðfærin ???

 Í fréttatíma Stöðvar tvö (17.10.2010) var sagt að  tíðni krabbameins væri algengara...Molaskrifari hefði  talið eðlilegra að segja  að tíðnin væri hærri  (sbr. hátíðni) eða  meiri.

Nokkur  gömul og  gild orð hafa öðlast  alveg  nýja merkingu í munni ungmenna. Ógeðslega  skemmtilegt  merkir mjög skemmtilegt og  sjúklega gott merkir  afar  gott. Eins  er talað um eitthvað  sé  fáránlega skemmtilegt, mjög skemmtilegt.  Dæmi um þetta heyrðust reyndar í sömu setningunni hjá  viðmælanda fréttamanns í fréttatíma  Ríkissjónvarps (17.10.2010)  Við þessu  er ósköp lítið að segja. Þessi þróun er orðin staðreynd  fyrir  löngu.

  Útvarpsþáttur þeirra Berglindar Baldursdóttur og Ásgríms Angantýssonar (16.10.2010)  þar sem  rifjuð var upp umfjöllun í Ríkisútvarpinu um daglegt mál  var fróðlegur um margt.  Óþarft var þó að gera lítið úr  þeim ágæta  fræðimanni  prófessor Halldóri Halldórssyni. Samúðin með  hinni  svokölluðu reiðareksstefnu fór ekki dult.  Hún virðist  nú vera hin opinbera málstefna Ríkisútvarpsins.

  Molaskrifari horfði á endursýningu heimildarmyndar  Hans Kristjáns Árnasonar  um Holger Cahill eða Svein Kristján Bjarnarson, Vestur Íslending,sem átti sér ævintýralegt lífshlaup. Áhugaverð mynd og  ágætlega gerð,- samhengi þó  svolítið ábótavant á  stöku stað. Margt er ósagt, sýnt og skrifað  af  sögu landa vorra í Vesturheimi.

  Rétt er að ljúka þessum Molum með tilvitnun í grein eftir Helga Hálfdanarson úr Morgunblaðinu  23. febrúar 1977. Helgi segir þar:  „Það varðar að sjálfsögðu  við lög  að vinna spjöll á landi voru, hvort heldur spillt er nytjagæðum þess eða náttúrufegurð. Hinsvegar getur víst hver sem er unnið hvaða skemmdarverk sem vera skal á móðurmálinu óátalið, enda þótt  þar sé í húfi vor  dýrmætasta eign." 

Es: Svo er hún alveg ægileg þessi Ægisíða! Skilti við gangstíg í Reykjavík. Molaskrifara finnst að gatan ætti að heita Ægissíða.

Molar um málfar og miðla 432

  Úr mbl.is (14.10.2010): ....að það þyrfti fyrst og fremst að huga að fólki á aldrinum frá 25 til 40 ára, sem keyptu sér húsnæði á árunum fyrir hrun .  Fólk keyptu sér ekki húsnæði. Fólk keypti sér húsnæði.  Ef sagt hefði verið  - þeim sem keyptu sér húsnæði, væri setningin rétt.

Prýiðlegur er  pistill í Lesbók Moggans (16,10.2010)  eftir Baldur Sigurðsson,; Smámál eða stórmál. Kærar þakkir fyrir það.

 Ég ætla að drepa á því helsta,  þagði þingmaður í ræðustóli  Alþingis.  Molaskrifara  þykir það  réttara mál og  betra áð tala um  drepa á   það  helsta ( í málinu sem verið er að ræða) Einnig hefði þingmaðurinn getað sagt, -- Ég ætla að tæpa á því helsta...í merkingunni að minnast aðeins á,  eða fjalla lauslega um. 

  Oft hafa verið nefndar hér forsetningar með  íslenskum staðaheitum. Í hádegisfréttum Ríkisútvafrpsins (16.10.2010) talaði fréttamaður um   eitthvað gerðist í Hólmavík. Molaskrifari  er vanur því talað sé   atburð sem gerist á  Hólmavík. Kannski er   hvort tveggja málvenja þar slóðir. En  það hefur svo  sem áður vefið nefnt á þessum vettvangi að  til var  á   fréttastofu Ríkisútvarpsins listi  með  forsetningum og  íslenskum  staðaheitum.  Kannski hefur  honum verið kastað  fyrir róða á þessum tímum  hins mikla umburðarlyndis  varðandi tunguna okkar. Kannski varð listinn eftir á  Skúlagötu 4. Kannski  liggur hann einn og  ótruflaður í hillu Éfstaleiti. Kannski vilja menn  ekki opinbera  fáfræði sína með því  að styðjast við hann.

  Í helgarútgáfu Fréttablaðsins sagði frá  finnskum sjónvarpsfréttamanni, sem var rekinn úr starfi fyrir að drekka bjór í beinni útsendingu.   Síðan gerðist það í fréttum Stöðvar tvö á  Íslandi að fréttamaður  þambaði bjór í fréttatímanum. Fréttablaðið segir síðan á þessa leið:     Sagt   er  að þessi gjörningur fréttamannsins  virðist  „ekki hafa farið  fyrir brjóstið á mörgum þó að sjálfskipaði málfarsráðunauturinn  Eiður Guðnason, sem  bloggar á  Eyjan.is  hafi sagt bjórdrykkju fréttamannsins orka  tvímælis". Það gerði ég  vissulega,  en líklega hefði ég  mátt taka dýpra í árinni.

     Birting   bjórþambs    var alvarlegur dómgreindarbrestur  hjá  fréttamanninum og  yfirmönnum hans. Það er bannað að  auglýsa áfengi.  Fréttamaðurinn smjattaði á  bjórnum og  lýsti ágæti hans. Hvað er það annað en  dómgreindarleysi.  Stöð tvö braut lög.

      Hitt er svo auðvitað frétt að  notað skuli alíslenskt  bygg í þessa  framleiðslu og ekkert óeðlilegt við að segja frá því. En það ´tti að sleppa drykkjunni.

  Molaskrifari   fær  svo   í lokin skot frá  fréttamanninum  ,um að það sé  nú „frekar erfitt að gera honum (Eiði Guðnasyni)  til geðs".  Það er mjög  auðvelt að  gera mér til geðs,   en  ambögur  sem  á okkur dynja í   fjölmiðum eru mér ekki að skapi , - hvað þá þegar lögbrot  eru framin í beinni útsendingu eins og þarna var.

Molar um málfar og miðla 431

  Gaman var að hlusta  Árna Þórarinsson í Kiljunni (13.10.2010).  Hann er einstaklega vel máli farinn.  Fáðu fleiri slíka til þín, Egill.

 Fékk  hún og dóttir hennar... sagði fréttamaður Stöðvar tvö (13.10.2010).  Molaskrifari hefði hér  talið eðlilegra að segja: Fengu hún og  dóttir hennar...  Í sama   fréttatíma var sagt: Í hverju lífeyrissjóðir  mega fjárfesta í..  Þarna  var einu í  ofaukið. Nægt hefði að   tala um hverju lífeyrissjóðir mættu fjárfesta.   Bjórdrykkja fréttamanns  Stöðvar í fréttatímanum orkaði tvímælis, að ekki sé meira sagt.

 Í skjáauglýsingu í Ríkissjónvarpinu (13.10.2010) var talað um góð verð, en  þulur   sagði hinsvegar réttilega gott verð. Óalgengt er að leikmenn gefi ekki kost á sér í viðtöl , sagði íþróttafréttamaður Ríkissjónvarps. Ekki  er hægt að segja að þetta sé lipurlega orðað.

Hallærisleg samtöl fréttamanna í fréttatímum  eru gervileg,  enda eru  þau  sviðsett. Til hvers?

 Visir.is (13.10.2010): Skrifstofa umboðsmanns skuldara opnar aftur í fyrramálið.  Hvað  skyldi skrifstofan opna í fyrramálið. Enn ein ambagan.

Úr mbl.is (13.10.2010): „Það þarf varla að taka fram fólkið var ölvað og viðkomandi kúreki utanbæjarmaður," segir á heimasíðu lögreglunnar á Sauðárkróki.   Allsstaðar eru þessir utanbæjarmenn til ama og óþurftar ! 

...mun áfram sitja í gæsluvarðhaldi samkvæmt úrskurði héraðsdóms frá í dag til 22. októbers.  (Fréttavefur Ríkisútvarpsins  13.10.2010)Á vefnum Beygingarlýsing íslensks nútímamáls, segir að  eignarfallsmyndin októbers komi   fyrir í 19. aldar textum,  en í nútíamáli sé  hefð fyrir því að  hafa eignarfallið endingarlaust, þ.e. október.

Seint sættir Molaskrifari sig  við að heyra íþróttafréttamenn  tala um að annað liðið steli sigrinum frá hinu eins og gert var í íþróttafréttum Ríkissjónvarps (13.10.2010).

Feigðarflan

  Það er hverju orði sannara, að flöt niðurfærsla skulda allra  er feigðarflan og hjálpar ekki þeim sem helst þurfa á hjálp að halda. Þá eru settir  við sama  biorð sá sem hefur  250 þúsund á mánuði og sá sem hefur   800 þúsund eða meira. Er það réttlæti?   Þessi leið   skerðir lífeyri  þeirra sem fá greiðslur úr lífeyrissjóðum og setur Íbúðalánasjóð lóðbeint á hausinn. Veltir byrðunum yfir á ríkissjóð og þar með  alla  skattgreiðendur.  Hversvegna eigum við að borga skuldirnar hans Bubba Morthens og hans líka ? 

 

Líst illa á almenna niðurfærslu skulda