Molar um málfar og miðla 328

 

   Hennar hugur virðist hins vegar enn vera hjá Reykjavíkurborg og því myndi hún ekki gefa kost á sér.(mbl.is.13.06.2010). þessi setning er ekki í lagi.  Verið var að  fjalla um hvort Hanna Birna ,senn fyrrverandi  borgarstjóri, mundi gefa kost á sér í embætti varaformanns Sjálfstæðisflokksins á landsfundinum undir lok þessa mánaðar. Fyrri hluti setningarinnar er  getgáta blaðamanns, en seinni hlutinn  er eins og hafður eftir  Hönnu Birnu í óbeinni ræðu. Þarna  hefði annaðhvort átt að standa: Hugur hennar væri enn hjá Reykjavíkurborg og því myndi hún ekki gefa kost á sér. Eða:Hugur hennar er enn hjá Reykjavíkurborg og því gefur hún ekki kost á sér.

   Síðar í þessari sömu frétt á mbl.is segir um áform Hönnu Birnu: ...hyggst ekki gefa kost á sér í varaformann Sjálfstæðisflokksins á næstkomandi landsfundi.  Gefa kost á sér í  varaformann ! Af hverju á næstkomandi landsfundii ? Svona orðalag er Morgunblaðiðnu ekki samboðið.

  Í hádegisfréttum Ríkisútvarpsins (13.06.2010) var  sagt frá lóninu í gíg Eyjafjallajökuls Sagt var,  að vatnið ætti eftir   tuttugu til þrjátíu metra að barmbrún gígsins.  Hér hefði verið réttara að segja  að vatnið ætti eftir tuttugu til þrjátíu metra að gígbarminum. Barmur er nefnilega brún eða jaðar.

Úr dv.is (13.06.2010): Hinn tvítugi Xu, var að hella steypu ofan í hrærivélina þegar steypupokinn festist í spaða í vélinni, og dró hann ofan í vélina. Skilur einhver þetta ? Hella stepu úr poka ofan í hrærivél ???

  Í hádegisfréttum Bylgjunnar (13.06.2010) var frétt um  blóðug átök þjóðernishópa í  Kirgistan. Talað var  að veitt hefði verið  leyfi  til að drepa,  og talað um uppþot,sem tekið hefði áttatíu líf. Þarna var hver ambagan eftir aðra. Frétt um sama efni var langtum betur orðuð í hádegisfréttum Ríkisútvarpsins sama dag. Þar var til dæmis  talað um að  heimilað hefði verið að skjóta fólk til bana en ekki að gefði hefði verið leyfi til að drepa. 

   Frétt Morgunblaðsins af þessum  sömu atburðum er svo sannarlega ekki til að hrópa húrra fyrir. Þar segir meðal annars:  Að svo stöddu hefur mestöll borgin verið lögð í rúst.Múgurinn hefur stolið mestöllum mat sem í borginni var að finna og sigri hrósandi fylkingar kirgskra karlmanna tóku við stjórn borgarinnar í dag á meðan 250.000 Úsbekar sem eftir eru í borginni hafa byrgt sig inni í hverfum sínum.Þá virðist her og lögregla vera í vörn um allt suður landsins og óvíst er um framtíð stjórnvalda en Rússar hafa neitað að grípa inn í átökin.  Lesendur dæmi. Það er ekki bara að ein og ein fjóla spretti á málakri Mogga. Þar dafna nú heilu fjólubreiðurnar.

Molar um málfar og miðla 327

  Boðað til mótmæla vegna ráðningu bæjarstjóra í Hafnarfirði, segir í fyrirsögn  (visir.is 11.06.2010). Þetta á auðvitað vera ráðningar, ekki ráðningu.

Besti sigraði umræðuna, segir í fyrirsögn á mbl.is (14.06.2010)og  er þar verið fjalla um hlut Besta flokksins í fjölmiðlaumræðu fyrir kosningar.  Málfar íþróttafréttamennsku ræður nú ríkjum á ritstjórninni.

  Ungur og ölvaður karlmaður braust inn í banka í Ellensburg í Washington um síðustu helgi þar sem að honum vantaði stað til að leggja sig.Það er ekki ofsögum sagt af ritsnilld þeirra á dv.is (11.06.2010).

Úr kvöldfréttum Ríkisútvarpsins (11.06.2010).. Eva Joly segist vera tilbúin í  framboð, ef  Græningjaflokkurinn allur  fylki sér að baki hennar. Að áliti Molaskrifara  hefði fréttamaður átt að segja : ... að baki henni.

Þar fundust milljónir klámfengina ljósmynda, segir á mbl.is (11.06.2010). Þetta á að vera klámfenginna, ekki klámfengina.

Í Ríkisútvarpinu, Rás tvö (11.06.2010) var sagt: Við ætlum að hafa gaman. Það er orðið  býsna  algengt að heyra þetta orðalag, sem er  hrátt úr ensku: We are going to have fun.  Hreint ekki til fyrirmyndar. Þetta hefur verið nefnt hér áður.

Bjarni Sigtryggsson Molavin sendi eftirfarandi (13.06.2010):

„Fréttastofa RUV þýðir nú í kvöldfréttum enska orðið "hybrid" sem "híbrid". Mikil umfjöllun hefur samt verið hér innanlands um tvinn-bíla. Þeir eru flestir knúnir bæði olíu og rafmagni og eru til muna sparneytnari en venjulegri bílar. Þorkell Helgason keypti sér þessháttar bíl fyrir nokkrum árum þegar hann var orkumálastjóri."

Það er þreytandi að heyra í fréttum tönnlast  á lýsingum samkvæmt  lögreglunni, samkvæmt  Guðmundi  eða  samkvæmt  sjónarvottum (RÚV 11.06.2010).  Af hverju ekki: Að sögn lögreglunnar,  að sögn Guðmundar og að sögn  sjónarvotts?

  Það var svolítið gaman að hlusta á dellupistil Jóns Vals Jenssonar í  Útvarpi Sögu (11.06.2010) þar sem hann talaði um það sem hann kallaði dellufrumvvörp á Alþingi. Hann réðist harkalega að hugmyndum  um   sameiningu  ráðuneyta (landbúnaðar-, sjávarútvegs- og iðnaðarráðuneytis) í hagræðingar- og sparnaðarskyni , meðal annars til að fækka ráðherrum og og fækka í yfirstjórn. Var á honum að heyra  að landið mundi fara á hliðina  ef úr yrði, að ekki sé  talað um ef Jón Bjarnason léti af ráðherraembætti.  Í pistlinum kristallaðist  gamaldags afturhald,sem enn virðist lifa góðu lífi hjá sumum í VG 

Þetta verður að stöðva

  Svanur Sigurgeirsson læknir á þakkir skildar fyrir að vekja   athygli á Keflavíkurkukli Jónínu Benediktsdóttur. Þessa starfsemi verður að stöðva áður en hún verður einhverjum að fjörtjóni. Það leggur enginn íslenskur læknir nafn sitt við þessar skottulækningar, sem eru í besta falli meinlausar ,en í versta falli lífshættulegar.

 Þegar  sagt er  að Jónína  sé að draga úr kostnaði heilbrigðiskerfisins er það út í hött og órökstutt.  Hún sendi fólk sem borgaði henni fyrir detox meðferð  til heimilislækna    til þess að  biðja um að tekin væri blóðprufa. Þannig  misnotaði hún heilbrigðiskerfið. Þetta mun hafa verið stöðvað, þegar upp komst.

Bloggpistill Gylfa Gylfasonar til varnar Jónínu er svo  fullur af rangfærslum að engu tali tekur. Allir sem hafa farið í ristilspeglun vita að sá sem spegla á fastar og  tekur hægðalosandi  lyf. Hreinsar sinn ristil sjálfur.  Það dælir  enginn vatni í lítravís inn í afturendann á þeim sem fara í speglun.

En meðan Jónína á vini eins og Gylfa þarf hún enga óvini.

Ristilskolun og sníkjudýr í görnum

Sólheimasöngur

  Menningarveisla Sólheima í Grímsnesi ( Þar sem sólin á heima)  hófst í dag og þar var gaman að vera. Veislan stendur  fram í miðjan ágúst. Við upphaf menningarveislu  söng  Sólheimakórinn í kirkjunni. Þar ríkti hin sanna söngvagleði , sem ræður ríkjum ofar  sorgum þessa heims. Hvert sæti í kirkjunni var   skipað og kórnum  og kórstjóra forkunnarvel tekið. Eftirminnileg stund.

  Ferðamenn,sem eiga leið um  Grímsnes, mega ekki  láta undir höfuð leggjast á líta  við á Sólheimum. Það er þess virði.  Það opnast  nýr heimur, þegar  komið er niður í kvosina þar sem Sólaheimabyggðin  er. Þar er unnið  einstakt  starf og  þar  eiga  góð heimili og athvarf fjölmargir, sem minna mega sín og ættu erfitt einir og óstuddir  í hörðum heimi samkeppni og hraða nútímans. Sólheimar eru  vin, sem  veitir skjól, þeim sem mest þurfa á á að halda. 

  Nú,  þegar  yfirvöld munda niðurskurðarhnífinn verður að gæta þess, að  hið beitta  blað skerði ekki kjör  og aðstöðu  heimafólks að Sólheimum. Sólheimar sæta þegar tvöfalt meiri niðurskurði en aðrar stofnanir á þessu sviði (sambærileg stofnun er ekki til, Sólheimar eru nefnilega einstakir.) Niðurskurður   væri ekki aðeins ósanngjarn, heldur bitnar hann á þeim sem síst skyldi.  Það má ekki gerast.

Molar um málfar og miðla 326

    Það þarf að taka ýmsa í Efstaleitinu í tíma í beygingarfræði tungunnar og það þótt margir  þar séu prýðilega máli farnir. Fréttaþulur í hádegisfréttum (11.06.2010)  las: Þeir prestar ,sem andvígir eru lögunum er þó heimilt að neita að gifta samkynhneigða. Hann hefði auðvitað átt að segja: Þeim prestum, sem.... Það er alltof algengt, að þegar komið er fram í miðja setningu ,muni menn ekki hvaðan lagt var upp. Í sama fréttatíma  heyrði Molaskrifari  ekki betur en íþróttafréttamaður  segði, að tiltekið lið hefði sigrað fjórða leik liðanna... Íþróttafréttamenn verða að hætta að sigra leiki.

   Fyrir nokkru byrjaði eitt olíufélaganna að  auglýsa að það veitti afslátt alveg vinstri, hægri. Veitti sem sagt ríflegan afslátt í allar áttir , - eða þannig.  Takið eftir, lesendur góðir, hvernig þetta  orðalag að gera  eitthvað vinstri, hægri smitar nú út frá sér í allar áttir og heyrist æ oftar af ýmsu tilefni og í ýmsu sambandi.

   Alltaf er skemmtilegt og uppbyggjandi að hlusta  á umsjónarmenn  morgunþáttar Rásar eitt spjalla við Aðalstein Davíðsson fyrrum málafarsráðunaut Ríkisútvarpsins á  föstudagsmorgnum. Vonandi hlusta sem flestir fjölmiðlamenn á  þessa þætti.

      Ein af leiðunum til sparnaðar í Rekstri Ríkisútvarpsins gæti verið að loka fyrir slúðurlúðurinn að vestan, sem  er vikulegur  þáttur morgunútvarps Rásar tvö. Þá þyrftu hlustendur  heldur ekki að heyra af fólki í passportvandræðum og  fólki sem borgar beil. Að ógleymdri þágufallssýkinni. Í  Efstaleiti er líklega litið á þessi þætti,sem merkilegt framlag til menningar í landinu, og því verður þeim örugglega ekki slátrað.

      Landlæknisembættið hefur gert athugasemdir við skottulækningar Jónínu Benediktsdóttur á Miðnesheiði, kenndar við detox. Þessvegna vill  útvarpsstjóri Útvarps Sögu láta leggja   landlæknisembætti niður (það var stofnað 1760). Embættið er nefnilega  að böggast á Jónínu eins og útvarpsstjórinn orðaði það. Í staðinn vill útvarpsstjórinn   að komi einn maður  í heilbrigðisráðuneytinu, sem geti verið  ráðherranum til ráðunautar, eins og útvarpsstjórinn komst að orði (11.06.2010). Molaskrifari hafði lúmskt  gaman af að hlusta á útvarpsstjóra Sögu kveina yfir því að  ekki væri hægt að panta tvöfaldan vodka  í Noregi. Molaskrifara finnst nú reyndar að bættur sé skaðinn, en henni hefur ekki dottið í hug að panta tvo einfalda?

   Athygli Molaskrifara verið vakin á því, að ein af ástæðunum fyrir hrakandi  málfari á mbl.is geti verið sú , að svo mikið af orku ritstjórnar fari nú í að leggja Jóhönnu Sigurðardóttur forsætisráðherra í einelti, að ekki sé  lengur tími til að  sinna  því að vanda málfar.

Molar um málfar og 325

Úr mbl.is (10.09.2010):  Jón Gunnarsson, Bjarni Benediktsson og Unnur Brá Konráðsdóttir kváðu sér einnig hljóðs .. Hér er ruglað saman sögnunum að kveða og kveðja. Að kveðja sér hljóðs  er að biðja um orðið eða taka til máls. Kveðja, kvaddi, kvöddum kvatt. Þau kvöddu sér  hljóðs. Ræður þeirra kváðu  (ku) hafa verið arfaslakar,  voru sagðar hafa verið arfaslakar. Kveða, kvað,kváðum, kveðið.

 Viðvaningar sinna nú nú fréttaskrifum í vaxandi á mbl. is  eins og þetta setningarbrot  (10.06.2010) sýnir: ...en mikill mannfjöldi var staddur á svæðinu á vegum skemmtiferðaskipsins MSC Poesia. Molaskrifari  hefði haldið  að fólkið hefði verið farþegar á skipinu en  ekki á vegum þess.

Landlæknisembættið hlýtur að grípa til viðeigandi ráðstafana eftir  viðtal við lækni á Stöð tvö (10.06.2010) um alvarlegar afleiðingar svokallaðrar detox-meðferðar hjá Jónínu Benediktsdóttur á Miðnesheiði. Fram kom í viðtalinu, að fólk hefur  þurft að leita til bráðamóttöku  Landspítalans eftir að  því var sagt í detox-meðferð hjá Jónínu að hætta að taka lyf, sem læknar höfðu ráðlagt gegn verkjum og háum blóðþrýstingi. Ekki er vitað til þess ,að nokkur læknir leggi nafn sitt  við  þessar skottulækningar á Miðnesheiðinni. Ef heldur, sem horfir, er það ekki spurning um hvort, heldur hvenær, það kann að leiða  til dauðsfalls, að fólki er ráðlagt að hætta  lyfjanotkun, sem er að læknisráði. Yfirvöld  eiga að  stöðva þessa starfsemi áður en hún verður einhverjum að fjörtjóni

Í fréttum Stöðvar tvö (09.06.2010) var sagt  frá tveimur telpum ,sem seldu límonaði og  góðgæti  til  styrktar  Kattholti. Fallega hugsað og gert. Fréttamaður sagði. .... hafa  staðið hér tímunum  saman án þess að una sér hvíldar.  Eitt er að una einhverju  eða una  við eitthvað, sætta sig við eitthvað, -    annað er að  unna sér  ekki hvíldar, - gefa sér ekki tóm til að hvílast.

Í íþróttafréttum Stöðvar tvö (10.06.2010) var sagt frá  innbroti   í hótelherbergi í Suður Afríku. Stolið var  tvö þúsund dollurum, en íþróttafréttamaður Stöðvar tvö tók  svo til orða, að  þjófurinn hefði numið brott  tvö þúsund  dollara!  Auðvitað skildist þetta og reiðareksmönnum um málnotkun þykir þetta líklega  gott og gilt. Það  finnst Molaskrifara ekki.

Loks vekur Molaskrifari athygli á óvenjulegri grein í Morgunblaðinu bls.19 (10.06.2010). Greinin er eftir Guðrúnu Guðmundsdóttur, móður dauðvona drengs. Greinin er sannarlega þess virði, að hún sé lesin.

Molar um málfar og miðla 324

  Úr  mbl.is (09.06.2010): ...vegna kostnaðar sem félagið hafði lagt í vegna markaðssetningar sem nýttist ekki vegna úthlutun á sérleyfisakstri á Vestfjörðum árið 1997.  Hér ætti auðvitað að standa : .. vegna úthlutunar. Ekki vegna úthlutun, sem er  ambaga. Meira úr  mbl.is (09.062010): Um er að ræða upplýsingar í dag, ekki gögn frá fyrri tíma.Ekki verður  sagt,að þetta sé snilldarlega orðað ! Og enn meira úr mbl.is (09.06.2010) : Félag í eigu útgerðarmannsins Jakobs Valgeirs Flosasonar, var í Héraðsdómi Reykjavíkur í dag gert að greiða Landsbankanum 17.923.930 svissneska franka... Félag var ekki gert að greiða, heldur var félagi gert að  greiða. Og þessu til viðbótar (10.06.2010): Einn fréttamaður lést er hann stóð við hraunelfur og lýsti hitanum. Orðið elfur beygist: elfur, elfi,elfi,elfar. Hvað er eiginlega á seyði á mbl.is ?

 Gott viðtal  Boga Ágústssonar við Göran Persson fv. forsætisráðherra Svíþjóðar   í  sex fréttum RÚV (09.06.2010).

 Í sjöfréttum Ríkissjónvarps var sagt frá gjaldeyrisskiptasamningi milli Íslands og Kína, sem undirritaður var í Reykjavík (09.06.2010). Í fréttinni  var samningsupphæðin tiltekin í kínverskri mynt, júan.  Hið opinbera heiti  gjaldmiðils Kína,sem réttara  hefði verið að  nota í fréttinni ,er Renminbi (RMB ¥). Í talmáli er  gjarnan talað um  kvæ, en  við Íslendingarnir í   Beijing töluðum ævinlega um  rimba.

Þetta kemur fram í nýjum gögnum,sem kynntar voru í dag, las fréttaþulur Ríkissjónvarpsins í tíufréttum (09.06.2010). Hlusta, hlusta. Fréttaþulir verða á  hlusta á  sig lesa. Grundvallarregla.

Þáttur Maríu Sigrúnar Hilmarsdóttur og Guðmundar Bergkvists í Ríkissjónvarpinu (09.06.2010) Börn til sölu  var óhugnanlegur og  áreiðanlega mörgum umhugsunarefni. Þátturinn var vel gerður í hvívetna , en hefði þolað nokkra styttingu. María Sigrún er vaxandi fréttamaður og góður fréttalesari.

Málþóf, málþóf....

  Þettta er auðvitað einkar skýrt dæmi um málþóf og  ekkert annað en málþóf. Sjálfstæðismenn þora ekki að nefna  hlutina  réttum nöfnum.  Eins og fjármálaráðherra   sagði  í fréttum í gær, þá er ekki  eftirspurn  eftir málþófi og rugli í  samfélaginu um þessar mundir.  Það skilja  Sjálfstæðismenn hinsvegar ekki. 

Athugasemd við fréttir mbl.is

Molar um málfar og miðla 323

 

Það er ennþá 2007 hjá Orkuveitu  Reykjavíkur, þegar  þetta fyrirtæki í almannaeigu  kaupir  átta milljón króna Benz handa fjármálastjóranum, að sögn DV (09.06.2010).  Þeir voru kannski aðeins of  fljótir á sér.  Í dag (09.06.2010) auglýsir Bílabúð  Benna  14 milljón króna Porsche jeppa.   Sá  bíll  hefði örugglega farið þessum embættismanni vel. Maður verður að komast fljótt  og greiðlega í vinnuna til að hækka heita vatnið um 37% og rafmagnið um 27% til viðskiptavina fyrirtækisins. Skilið þið bílnum og kaupið Skóda, ef þessi embættismaður  þarf svo nauðsynlega á bifreiða að halda. Skódinn skilar umræddum starfsmanni  jafnörugglega í vinnuna og Benz.

 Í DV (08.06.2010)   segir frá flugi Iceland Express til Bandaríkjanna. Þar segir að  flogið verði til og  frá  Newark flugvelli, sem   sé nýlegur flugvöllur. Þetta er eins og hver annar þvættingur. Newark flugvöllur (Newark Liberty International Airport)  var  tekinn í notkun  1. október 1928, en hefur  auðvitað verið margstækkaðir og  mikið byggt þar síðan.  Kennedy flugvöllur,sem Icelandair notar, hét áður Idlewild. Byrjað var á gerð hans 1943.  Þriðji flugvöllurinn á þessu svæði er La Guardia. Hann var tekinn í notkun 1939.

Mögnuð var dagskrá Ríkissjónvarpsins að kveldi  þriðjudagsins 8. júní. Að loknum fréttum og Kastljósi, Landsleikur í handknattleik, HM 2010, Leiðin á HM , endursýning, sextándi þáttur af sextán svo tíu fréttir og veður.  Íþróttaunnendur hafa algjöran  forgang   hjá Sjónvarpi ríkisins. Þar  ræður íþróttadeildin kvölddagskránni. Og svo seinkaði íþróttadekrið  tíu fréttum um tíu mínútur, en það þykir hreint ekki tiltökumál í Efstaleiti.

 Í Ríkisútvarpinu var í morgun (09.06.2010) sagt að uppboð hefði verið frestaðí stað þess að segja, að uppboði hefði verið frestað. Æ algengara er að heyra þessa málvillu , nú þegar  oft er fjallað um nauðungaruppboð  í fréttum.

Forseti Eistlands kemur í heimsókn til Íslands, segir  DV (09.06.2010) og birtir mynd af Ólafi Ragnari Grímssyni !

Hatursherferð Moggans gegn Jóhönnu

  Morgunblaðið er nú lagst í hatursherferð gegn Jóhönnu Sigurðardóttur, forsætisráðherra. Þetta er líklega fordæmalaust,  líkist þó einna  helst  því hvernig gamli kommúnistaþjóðviljinn lagði Bjarna Benediktsson, Guðmund Í. Guðmundsson, Stefán Jóhann Stefánsson og fleiri sómamenn í einelti á sínum tíma,  sem jaðraði við geðsýki.

  Þau ferðalög  eru ekki til góðs  þar sem þær systur hatur og hefnigirni  haldast í hendur og ráða för. Þær  eru vondir  fararstjórar.