Molar um málfar og miðla 322

 Úr dv.is (07.06.2010): Hún segist ekki hafa mætt andstöðu innan flokksins eftir úrslit kosninganna en flokkurinn hlaut afhroð í kosningunum og náði aðeins einum borgarfulltrúa inn. Á íslensku er talað um að gjalda afhroð eða bíða afhroð, bíða herfilegan ósigur,  ekki hljóta afhroð. Dv.is  fær engu breytt um það. Meir úr dv.is þennan sama dag:Meira en 22.700 þúsund manns hafa misst lífið í fíkniefnastríðum í landinu...  Á íslensku missa menn ekki lífið, menn láta lífið. Bögubósar.

Bjarni Sigtryggsson, Molavin, er iðinn við að senda Molum línu. Hann skrifar: Í fréttatíma RUV allan sunnudag fjallaði fréttamaður endurtekið um Eiðsgranda í Reykjavík. Þetta var svo ekki aðeins endurtekið í síðdegisútvarpi Rásar 2 nú á  mánudegi, heldur leiðrétti umsjónarmaður sig, sagði fyrst réttilega Eiðisgrandi, en hikaði svo og leiðrétti sig og sagði Eiðsgrandi. Svona geta rangfærslur smitað út frá sér.  Já , Molaskrifari, hefur alltaf  haldið að hið rétta heiti  væri Eiðisgrandi, dregið af  bæjarnafninu Eiði. Hann hefur ekkert á móti Eiðsgranda, en það nafn er að finna í  götuskránni í nýrri  símaskrá og raunar  virðist það vera að útrýma hinu gamla og  líklega kórrétta nafni, Eiðisgrandi.

Því má bæta við að sé orðið Eiðsgrandi slegið inn á leitarvef Google  birtast 2270  tilvísanir  en aðeins  394 ef orðið Eiðisgrand er  slegið inn. Kann einhver  skýringar á þessu ? Eiðisgrandi er hið rökrétta heiti og þar breytir engu þótt eiði þýði grandi,  eða lág og mjó landræma milli ness (höfða) og meginlands eins og segir í Íslenskri orðabók.

 Ekki heyrði Molaskrifari betur en íþróttafréttamaður RÚV (07.06.2010) segði Fylkir eiga harma að hefna. Vonandi var það misheyrn. Nýr íþróttafréttamaður  Stöðvar tvö er áreiðanlega vel að sér um íþróttir   en nokkuð  skortir á  nægilega gott  vald á móðurmálinu. Dæmi úr  íþróttafréttum (07.06.2010): ... og verður þeim gerð  skil... Hefði betur  sagt: ..og verða þeim gerð  skil.

 Þórsmörk er ekki nema  svipur hjá sjón.. sagði fréttaþulur Ríkissjónvarps (07.06.2010). Þarna finnst Molaskrifari  að nægt hefði að segja , að Þórsmörk væri ekki svipur hjá sjón.

  Falleg frétt á Stöð tvö (07.06.2010) um fimm ára telpu, sem fór í verslunarleiðangur  með sparibaukinn sinn til að kaupa  afmælisgjöf handa  pabba sínum.  Lögregluþjónn kom henni til bjargar og  hjálpaði upp á sakirnar, þegar innihald  sparibauksins reyndist of rýrt til bindiskaupa. Fréttamaðurinn, sem las fréttina, sagði stúlkuna hafa verið sjö ára ( fimm ára sagði fréttaþulur nokkrum sekúndum fyrr). Auðséð var  af myndum, að hér var ekki um sjö ára telpu að ræða. Molaskrifari veltir fyrir sér ábyrgð foreldris ,sem sendir  fimm   ára barn  einsamalt  til að versla í Haugkaupum í Garðabæ. Barnið   hefur  að líkindum þurft að fara yfir  fleiri en eina umferðargötu , - en allt  endaði þetta vel.  

Sigurður Kári svarar engu

  Af hverju  segir Sigurður Kári ekki frá því hverjir  styrktu hann, hverjir  borguðu honum og  hvað þeir borguðu honum mikið. Hvað kostaði hann? Hefur hann eitthvað að fela? Þögn hans er ærandi. Fékk  óbragð í munninn af að horfa og hlusta á hann í ræðustóli Alþingis í dag.

Vænd um spillingu og lygar

Molar um málfar og miðla 321

 Lengi morguns (07.06.2010) mátti lesa eftirfarandi fyrirsögn á visir.is : Dauði vegna vímuefnaefnaneyslu óvenju há fyrstu fjóra mánuðina. Sá sem samdi þessa fyrirsögn ætti að leita sér að annarri vinnu. En þeim er ekki alls varnað á visir.is. Seinna var fyrirsögnin leiðrétt: Dánartíðni vegna vímuefnaneyslu óvenju há fyrstu fjóra mánuðina.

Bjarni Sigtryggsson, Molavin, gaukaði  eftirfarandi að Molum (06.06.2010): ,,Smellti mynd af dv.is frétt rétt í þessu, sem sýnir annaðhvort hroðvirkni og að enn lesa menn ekki sjálfir yfir það sem þeir hafa skrifað áður en þeir setja á Netið, - eða kunnáttuleysi í beygingum nafnorða og að nota einfalt i eða tvöfalt (y).

Í upphafi: "...segir flokk sinn ekki stefnt gegn Sjálfstæðisflokknum..."
Í lok: "dæmi um mál, sem enginn skyldi." ". 

Ætli þetta sé ekki svolítið af hvorutveggja, hroðvirkni og kunnáttuleysi. Úr verður vond blanda.

...Íslandsmeistarinn síðasta ár,sagði íþróttafréttamaður Ríkissjónvarpsins (06.06.2010). Hann var að tala um Íslandsmeistarann frá í fyrra. Fjölmiðlamönnum  virðist vera að takast  festa í málinu að tala um síðasta ár, síðasta vor og  síðasta vetur í stað þess að segja í fyrra, í fyrravor og í fyrravetur. Þetta finnst Molaskrifara slæmt.

Fín heimildarmynd um sægarpinn og aflakónginn Binna í Gröf í Ríkissjónvarpinu að kveldi Sjómannadagsins. Ótrúlega mikið af áhugaverðum gömlum kvikmyndum og ljósmyndum. Vel unnið verk í alla staði. Prik fyrir það.

 Stöð tvö verður að vanda betur val þeirra sem segja okkur fréttir. Í stuttri frétt um hátíðahöld á Sjómannadaginn (06.06.2010) sagði sami fréttamaðurinn:   Við hefjum yfirreið okkar yfir  Sjómannadaginn niðri á Granda,..... sem arfleifði kvenfélagið að aleigu sinni..... og  heiðraðir fyrir  störf sín á löngum  sjómannaferli. Þessum starfsmanni ætti að fá   annað starf en að segja okkur fréttir. Til þess hefur hann enga burði. Í það minnsta ætti einhver, sem hefur tilfinningu  fyrir  tungunni, að lesa yfir það sem þessi fréttamaður ætlar að segja okkur, áður en honum er hleypt á skjáinn.

Molar um málfar og miðla 320

  Í fróðlegu og fínu Sjómannadagsblaði Morgunblaðsins (05.06.2010) segir í auglýsingu: Starfsfólk Naust Marine  senda sínar bestu kveðjur  til  allra sjómanna.... Starfsmenn senda kveðjur, en starfsfólk sendir kveðjur.

 Þegar Ríkisútvarpið segir okkur (06.06.2010), að eldur hafi logað á 400 metra löngu svæði  í Heiðmörk, erum við ákaflega litlu nær. Svo er líka  svolítið einkennilegt að heyra  fréttamann tala um að eitthvað hafi gerst á Þorlákshöfn.

 ...en engar viðgerðir hafa verið gerðar, sagði fréttamaður  í hádegisfréttum RÚV (05.6.2010). Menn gera ekki viðgerðir. Í sama  fréttatíma var sagt, að næstu  daga mundu  fleiri laxveiðiár opna. Hvað skyldu árnar opna?

 Þaulvönum útvarpsmanni varð það á  (06.06.2010) að segja í  kynningu að Ólína Andrésdóttir hefði gert textann við lag Kaldalóns, Sæmd er hverri þjóð að eiga sægarpa enn. Ólína var skáldkona, en ekki textahöfundur. Hún orti ljóð.

  Hann er jafnan seinheppinn formaður Framsóknarflokksins. Hann segir  við Morgunblaðið (05.06.2010), að fyrirtækin í landinu gangi nú á gufunni einni.  Hvað á hann við ? Ganga ekki gufuvélar fyrir gufunni einni?  Gufu sem verður  til þegar  kolum eða  olíu er brennt.

  Fréttamaður Ríkisútvarpsins spurði formann þingflokks Sjálfstæðisflokksins (05.06.2010) hvort Guðlaugur Þór Þórðarson ætti ekki að segja af sér þingmennsku, eftir   alla milljónastyrkina. Það virtist ekki hvarfla, að þingflokksformanni að svara   spurningunni, - hún  malaði bara út og suður. Enn síður hvarflaði það að fréttamanni RÚV að fylgja spurningu  sinni eftir  til að freista þess að fá svar.

  Og svo heldur þátturinn ótrauður áfram, sagði þulur  Ríkisútvarpsins (05.06.2010)

 

Molar um málfar og miðla 319

 Í íþróttafréttum Stöðvar tvö (03.06.2010) var sagt um  mann, að hann yrði ávallt í minningum stuðningsmanna Liverpool. Ankannalega að orði komist um það, að maðurinn verði stuðningsmönnum Liverpool eftirminnilegur. Í íþróttafréttum Stöðvar  kvöldið eftir sagði fréttamaður: Stjarnan sigraði leikinn.

Mistur af þessu tagi verða líklega  viðvarandi vandamál í allt sumar, sagði fréttaþulur í fréttayfirliti Stöðvar tvö (04.06.2010). Mistur er eintöluorð. Það er ekki til í fleirtölu.

 Þrátt fyrir skort á skyggni, sagði fréttaþulur Stöðvar tvö (04.06.2010). Hefði betur sagt þrátt fyrir lélegt eða slæmt skyggni.

Molaskrifari hefur ekkert á  móti því að sjá fallega skoruð mörk, en knattspyrnudekur Ríkissjónvarpsins  er löngu komið úr öllu hófi. Allar fréttirnar af  þjálfurum og  knattspyrnustjórum bera vott um hinn lokaða og sjálfhverfa heim íþróttafréttamanna.  Engin fréttastjórn  virðist  til staðar, þegar um íþróttafréttir er að ræða. Þar virðist hver fara sínu áfram. 

Það var að vanda mikil reisn yfir dagskrá Ríkissjónvarpsins á  fimmtudagskvöldið (03.06.2010). Að loknum fréttum og Kastljósi: Amerísk spennuþáttaröð, bresk barnamyndaröð, amerísk sápusería,fréttir, amerísk spennuþáttaröð,endursýndur norskur þáttur.  Er ekki annars kominn tími til að endurvekja sjónvarpslausa  fimmtudaga, - að minnsta kosti yfir sumarið? Ríkissjónvarpinu  virðist algjörlega um megn að  senda út boðlega dagskrá þessi kvöld.

 Ráðherrar verða að gæta orða sinna. Ef 2% hækkun á  greiðslum til sérfræðinga er alvarlegasta vandamálið,sem heilbrigðisráðuneytið glímir nú við, eru  erfiðleikarnir á þeim bæ ekki umtalsverðir.

Morgunþáttur Rásar tvö  heldur áfram að flytja hlustendum vikulegan slúðurpistil vestan frá Bandaríkjunum. Ef dagskrárstjórum  finnst þetta  ómissandi  efni, ættu þeir  að finna sér viðmælanda,sem  hefur  sæmileg tök á íslenskri tungu.

Molar um málfar og miðla 318

  Nýlega heyrði Molaskrifari á einhverri útvarpsstöðinni, að  talað  var  um að binda  ekki skóþvengi sína eins og  aðrir menn. Molaskrifari er á því að þetta sé mesta rugl. Í ágætri bók dr. Jóns G. Friðjónssonar, Merg  málsins, segir um skóþveng/skóþvengi : Binda  skóþvengi sína,  er að tygja sig til brottfarar. Binda ekki skóþvengi sína /skóþveng sinn lengi einhversstaðar, dveljast ekki lengi á sama stað. Vera ekki þess verður að leysa skóþveng einhvers, vera e-m öðrum langtum óæðri,  vera ekki þess verður  að gera e-m  hinn minnsta greiða. 

 Hér er væntanlega verið að rugla með orðatiltækið að binda ekki bagga sína sömu hnútum og samferðamenn,sem þýðir að vera  sérlundaður, fara sínar eigin leiðir. Í einu   kunnasta erfiljóð íslenskrar  tungu yrkir Bjarni Thorarensen svo um  séra Sæmund Magnússon Hólm:

Því var Sæmundur

á sinni jarðreisu

oft í urð hrakinn

út úr götu,

að hann batt eigi

bagga sína

sömu hnútum

og samferðamenn.

Um séra Sæmund var sagt, að hann hefði verið manna kynlegastur.

Sögnin að valda veldur mörgum  erfiðleikum, meðal annars nafnkunnum Moggabloggara,sem skrifaði (02.06.2010):Óheft íbúðalán bankanna sem ullu stórhækkun fasteignaverðs á sínum tíma.. - ollu  en ekki ullu. 

  Íþróttamenn eiga oft erfitt með að fóta sig á hálu svelli tungunnar. Íþróttafréttamaður  Stöðvar tvö  sagði (02.06.2010): .. gaf undan..  Hér er ruglað  saman tveimur  orðatiltækjum,  að láta undan  og að gefa eftir. Úr verður  ambaga.

  Algenga villu mátti heyra í  fréttum Stöðvar tvö (02.06.2010) þegar  sagt var, að  tiltekinn einstaklingur  væri  hæst launaðasti... Hér  hefði verið alveg nóg  og reyndar réttara að  segja: Hæst launaði...  eða launahæsti.

 Lögreglumaður sá stuttu síðar tölvuna í bíl sem var á ferð og handtók konuna(mbl.is 03.06.2010). Þeir eru  aldeilis fráneygir í lögreglunni !

Molar um málfar og miðla 317

 Fréttaþulur Stöðvar tvö las óhikað (31.05.2010) Landsmót hestamanna,.... hefur verið aflýst. Hér átti auðvitað að segja  að Landsmóti hestamanna hefði verið af lýst. En þetta var ekki eina beygingarvillan í þessum fréttatíma Stöðvar tvö. Þar var líka sagt: .. um er að ræða .. ( þrjá seðlabankastjóra) ..auk Jónas Fr. Jónsson.  Hér hefði  átt að segja:.. auk Jónasar Fr. Jónssonar.  Á þessum bæ ráða menn illa við réttar beygingar móðurmálsins.

Lögreglufrétt ársins er í Fréttablaðinu (31.05.2010). Hún er svona:  Enginn slasaðist í minniháttar líkamsárás sem átti sér stað í Keflavík  aðfaranótt sunnudags. Að sögn lögreglunnar á Suðurnesjum var árásin stöðvuð í fæðingu.   Það var og !

Úr mbl.is (31.05.2010): Einnig hefur borið á því að veski kvenfólks á skemmtistöðum í miðborginni hefur verið stolið að kvöld og næturlagi...  Ekki alveg skýr hugsunin í þessu.

Meira úr mbl.is (31.05.2010): ....Magnús Scheving hafi þurft að afsala sér höfundaréttinum af sköpun sinni gegn 40% hlut í félaginu. Við þetta setningarbrot má gera tvær athugasemdir. Talað er um höfundarrétt, ekki höfundarétt og um höfundarrétt að einhverju en ekki af einhverju. Upphaflega  stóð þarna:  .. gegn 40% hluts í félaginu,en það var leiðrétt.  Ennþá meira úr mbl.is : Um eitt leytið missti ung stúlka stjórn á bíl sínum í lausamöl í Miðdal og fór bílveltu. Stúlkuna sakaði ekki. Klukkustund síðar missti ökumaður lítillar vinnuvélar stjórn ávélinni á Gjábakkavegi og fór bílveltu.Má spyrja?  Hvað er að fara bílveltu ?  Viðvaningum er greinilega treyst til að skrifa  fyrir okkur fréttir á mbl.is

 

Nú eru innlendar fréttir úr  fréttum  RÚV  útvarps, endurfluttar með mynd í sjö fréttum RÚV  sjónvarps ( 31.05.2010)

Regnið sem fylgt hefur storminum hefur valdið því að á annan tug flóða hefur flætt yfir bakka sína í landinu.  Hér hefur eitthvað farið úrskeiðis hjá þeim sem skrifaði þessa frétt í mbl.is (30.05.2010)

Molar um málfar og miðla 316

 Bóndi vestan af fjörðum hafði samband við Molaskrifara og vakti athygli á að í stjórnmálaumræðum  í Síðdegisútvarpi RÚV  Rásar tvö,(28.05.2010) hefði verið  talað um Hönnu Birnu borgarstjóra sem helsta vonarpening Sjálfstæðisflokksins og  Dag B.  Eggertsson,sem helsta  vonarpening  Samfylkingarinnar. Þetta var sagt í þeirri merkingu, að þau væru  leiðtogaefni flokka sinna. Það er greinilegt, sagði þessi ágæti bóndi, að sá sem þarna talaði hefur ekki hugmynd um hvað orðið  vonarpeningur þýðir. Það er hárrétt.  Vonarpeningur er notað um eitthvað sem lítils er að vænta af, eða eitthvað sem brugðið getur til beggja vona um. Þetta er  enn eitt dæmið um að fólk á ekki að nota  orð  sem það veit ekki hvað þýða.

það er vonlaus spurningatækni að dengja þremur spurningum á  sama manninn í einni og sömu setningunni. Þetta gerði  fréttamaður Stöðvar tvö, þegar rætt var við oddvita  framboðslistanna í Reykjavík (28.05.2010). Þegar fréttamaður fellur í þessa gömlu gryfju, velur  pólitíkusinn sér  auðveldustu spurninguna, svarar henni í nokkuð löngu máli og  kemst upp með að sleppa hinum tveimur spurningunum. Þetta var nákvæmlega það sem gerðist á  Stöð tvö. Megin regla í viðtalstækni er að spyrja aldrei tveggja spurninga í senn.

Þau Bogi Ágústsson og Þóra Arnórsdóttir stóðu sig  með mikilli prýði, eins og þeirra var von og vísa, í kosningasjónvarpi RÚV, a.m.k. þeim hluta  sem Molaskrifari hafði nennu á fylgjast með.

Kjörstaðir opnuðu flestir... sagði fréttamaður RÚV í hádegisfréttum (30.05.2010). Þeir eiga erfitt með hafa  þetta rétt í Efstaleitinu.

Bygging húsanna nálgast fokheldi, segir í heilsíðu auglýsingu frá Samtökum aldraðra og  Atafli í Morgunblaðinu  (28.05.2010). Þetta  er með  því verra. Af hverju ekki: Húsin eru næstum fokheld?

Kynjaskipting á Búðardal,segir í fyrirsögn á visir.is (28.05.2010). Sá sem þetta  skrifaði  hefur  líklega  aldrei heyrt  hinn alkunna texta: Er ég kem heim í Búðardal....  

 Úr dv.is (28.05.2010) Hjálparskipin sem eru á leið sinni til Gaza með matvörur og lyf, ætlar að brjóta á inngöngubanninu sem Ísraelar hafa sett fram.Þetta er langt í frá það eina,sem er athugavert við þessa frétt á dv.is.

Meira úr dv.is: Það kemur ekki á óvart að Agnesi lýst best á Hönnu Birnu Kristjánsdóttur .. Hvar er stafsetningarorðabókin, ágætu DV menn ? Mér líst ekkert á ykkur.

 Gera verður þær kröfur  til þeirra sem ráðnir eru til að tala í útvarpi eða  sjónvarpi að þeir hafi  skýran framburð.  Í Ríkisútvarpinu mátti (28.05.2010) heyra fréttamann segja hátt og skýrt  javvvvel í stað jafnvel. Ekki gott.

Molar um málfar og miðla 315

 Það er sumum fjölmiðlamönnum erfitt að segja rétt frá opnun kjörstaða. Annar umsjónarmanna Kosningakastljóss (28.05.2010) sagði okkur að kjörstaðir opnuðu. Lét þess hinsvegar  alveg ógetið hvað kjörstaðir mundu opna. Í morgunfréttum RÚV kl 07 00 daginn eftir var hinsvegar rétt með farið og sagt að kjörstaðir yrðu opnaðir.

Ef fréttamenn RÚV gerðu sér það ómak  að  skoða beygingu orðsins prófkjör í beygingalýsingu íslensks nútímamáls á vef Árnastofnunar, sæju þeir, að  eignarfall fleirtölu er prófkjöra, ekki prófkjara eins og  þeir tönnlast nú á í sífellu. Málfarsráðunautur ætti að kenna fréttamönnum að  nota þennan ágæta  vef Árnastofnunar.

Mér finnst ákveðin eftirsjá af Steinunni Valdísi í pólitíkinni, hefur mbl.is eftir stjórnmálafræðingi (27.05.2010).  Molaskrifari er á því að hér sé  notuð röng  forsetning. E-m er eftirsjá að e-u , en ekki af e-u. Svo segir reyndar Íslensk orðabók líka.

 Í tíu fréttum RÚV  sjónvarps (27.05.2010) var talað um  skort á  afleysingu ! Í sama fréttatíma talaði fréttaritari um um utankjöratkvæðagreiðslu!. Hvernig  væri að vanda sig örlítið meira?

Lága verðið er að smita út frá sér, segir í fyrirsögn í Morgunblaðinu (27.05.2010). Af hverju ekki að segja: Lága verðið smitar út frá sér ?

 Á dögunum var birt  afar sérkennilegt viðtal í morgunþætti Rásar eitt, Vítt og breitt, við heimsspeking um mál nímenninganna, sem  ruddust ásamt fleirum  inn í Alþingishúsið  til að trufla þingstörfin eða hleypa upp þingfundi.  Svo kom  sami  dagskrárgerðarmaður með  viðtal (27.05.2010) við lagaprófessor  til að leiðrétta  ranghermi sín í  viðtalinu við heimsspekinginn. Það er  góðra gjalda vert , en  gerist of sjaldan, að  starfsmenn RÚV  viðurkenni, að þeim hafi skjöplast. Þeir mega  ekki láta samúð með  málstað leiða sig  svo langt út á þunnan ís,  að hann bresti undan þeim  eins og gerðist í þessu tilviki.

  Sjónvarpsstöðvar í Danmörku og Noregi hafa  að undanförnu minnst þess að   65 ár eru liðin frá lokum seinni heimsstyrjaldar. Hafa þær  sýnt    flokka heimildamynda um  styrjöldina. Hvernig   minnist Ríkissjónvarpið okkar þessara tímamóta? Það gerir það ekki. Það hampar hinsvegar Evróvisjón og  fótbolta öllum stundum.

Molar um málfar og miðla 314

 Það setur óhug að Molaskrifara við að hlusta á fréttir af vaxandi spennu á Kóreuskaga. Eftir að hafa heimsótt  Norður Kóreu  tvisvar og lesið sér sæmilega til um þróun mála þar, veit hann að þeir  norðanmenn eru  til alls vísir. Við hverju er að búast  af  landi þar sem  farsíminn er tekinn af þér við komuna  til landsins? Ekki það  að  hægt sé að nota hann  nema  allra nyrst í landinu í grennd við  landamærin að  Kína. Landi þar sem milljónir hafa  dáið úr hungri og deyja  enn.  Sem betur  fer á þetta  land sér engan líka í veröldinni.

Einkennilegt , að ekki sé meira sagt, var orðalag í texta  í fréttum Ríkissjónvarps  (26.05.2010). Þar var sagt: ... hver og einn hættir lífi sínu hver  fyrir  annan. Verið var að segja  frá hermönnum í Afghanistan,sem hætta lífi sínu hver fyrir annan.

 Í sama  fréttatíma sama miðils var sagt: Hún lýsti yfir  skilyrðislausum  stuðning við Suður Kóreu. Þarna hefði átt að vera  þágufall orðsins  stuðningur , en það er  stuðningi. Lýsti yfir skilyrðislausum stuðningi... Í sömu frétt um spennuna á Kóreuskaga var sagt að upphaf  deilunnar hefði verið þegar suður kóreskt herskip sprakk á hafsvæði undan  Kóreuskaga. Ekki  fellir Molaskrifari sig   við þetta orðalag.  Tundurskeyti var skotið að skipinu með þeim afleiðingum að það sökk. Tundurskeytið sprakk og sökkti skipinu.

 Það er sóun á  starfskröftum hjá Ríkissjónvarpinu að láta Sigmar Guðmundsson,ritstjóra Kastljóss,  dandalast í Ósló í meira en viku í kringum Evróvisjónvitleysuna.

 Eftirfarandi barst  frá Molavin:

"Það var unnið markvisst að því að fækka drukknunum..." sagði "forvarnafulltrúi" í kvöldfréttum RUV áðan. Ekki beinlínis rangt, en óþolandi nafnorðafíkn þegar hægt er að koma sömu merkingu til skila með betra máli. Unnið var markvisst að því að færri drukknuðu.

Í sama fréttatíma talaði fréttaritari í Bandaríkjunum um áform manns um að sprengja farþegaþotu "í loft upp" yfir Detroit borg. Þegar myndlíkingar af þessu tagi eru notaðar án undantekninga og í fullkomnu hugsunarleysi, hætta þær að hafa áhrif. Það nægir að segja "að sprengja farþegaþotu".

Takk fyrir þetta  Molavin.

Þotu frá United Airlines lenti í svo mikilli ókyrrð á Atlantshafi að þrír um borð slösuðust, segir visir.is (25.05.2010). Þetta á auðvitað að vera: Þota frá United Airlines lenti í svo mikilli ókyrrð...