Skrifað og skrafað

14.6.2010 | 09:23

Molar um málfar og miðla 327

Boðað til mótmæla vegna ráðningu bæjarstjóra í Hafnarfirði, segir í fyrirsögn (visir.is 11.06.2010). Þetta á auðvitað vera ráðningar, ekki ráðningu.

Besti sigraði umræðuna, segir í fyrirsögn á mbl.is (14.06.2010)og er þar verið fjalla um hlut Besta flokksins í fjölmiðlaumræðu fyrir kosningar. Málfar íþróttafréttamennsku ræður nú ríkjum á ritstjórninni.

Ungur og ölvaður karlmaður braust inn í banka í Ellensburg í Washington um síðustu helgi þar sem að honum vantaði stað til að leggja sig.Það er ekki ofsögum sagt af ritsnilld þeirra á dv.is (11.06.2010).

Úr kvöldfréttum Ríkisútvarpsins (11.06.2010).. Eva Joly segist vera tilbúin í framboð, ef Græningjaflokkurinn allur fylki sér að baki hennar. Að áliti Molaskrifara hefði fréttamaður átt að segja : ... að baki henni.

Þar fundust milljónir klámfengina ljósmynda, segir á mbl.is (11.06.2010). Þetta á að vera klámfenginna, ekki klámfengina.

Í Ríkisútvarpinu, Rás tvö (11.06.2010) var sagt: Við ætlum að hafa gaman. Það er orðið býsna algengt að heyra þetta orðalag, sem er hrátt úr ensku: We are going to have fun. Hreint ekki til fyrirmyndar. Þetta hefur verið nefnt hér áður.

Bjarni Sigtryggsson Molavin sendi eftirfarandi (13.06.2010):

„Fréttastofa RUV þýðir nú í kvöldfréttum enska orðið "hybrid" sem "híbrid". Mikil umfjöllun hefur samt verið hér innanlands um tvinn-bíla. Þeir eru flestir knúnir bæði olíu og rafmagni og eru til muna sparneytnari en venjulegri bílar. Þorkell Helgason keypti sér þessháttar bíl fyrir nokkrum árum þegar hann var orkumálastjóri."

Það er þreytandi að heyra í fréttum tönnlast á lýsingum samkvæmt lögreglunni, samkvæmt Guðmundi eða samkvæmt sjónarvottum (RÚV 11.06.2010). Af hverju ekki: Að sögn lögreglunnar, að sögn Guðmundar og að sögn sjónarvotts?

Það var svolítið gaman að hlusta á dellupistil Jóns Vals Jenssonar í Útvarpi Sögu (11.06.2010) þar sem hann talaði um það sem hann kallaði dellufrumvvörp á Alþingi. Hann réðist harkalega að hugmyndum um sameiningu ráðuneyta (landbúnaðar-, sjávarútvegs- og iðnaðarráðuneytis) í hagræðingar- og sparnaðarskyni , meðal annars til að fækka ráðherrum og og fækka í yfirstjórn. Var á honum að heyra að landið mundi fara á hliðina ef úr yrði, að ekki sé talað um ef Jón Bjarnason léti af ráðherraembætti. Í pistlinum kristallaðist gamaldags afturhald,sem enn virðist lifa góðu lífi hjá sumum í VG

Flokkur: Bloggar | Facebook

Athugasemdir

Óttarlega var þáttargerðamaður Útvarps Sögu, sem þið Ómar heimsóttuð, slakur í íslensku og eins sagnfræði. Margoft rákuð þið staðreyndavillur ofan í hann. Ömurlegt varð að heyra hann segja um síðuna þína: Þetta er að verða mest lesnasta vefsíðan. Er hún þá meira lestnastari en aðrar síður?

Eins var hræðilegt að heyra sletturnar hans: Blúribbon-lið, sístemið, koppí, ókei ... og ég veit ekki hvað og hvað!

Gunnar (IP-tala skráð) 14.6.2010 kl. 14:38

Ég er sammála þér varðandi orðfærið "samkvæmt". Mér finnst keyra um þverbak þegar sagt er "samkvæmt vakthafandi lækni". Ég hef stundum velt fyrir mér hvaða sérgrein "vakthafandi læknir" stundar. Af hverju ekki "að sögn læknis á vakt"?

Björn S. Lárusson (IP-tala skráð) 14.6.2010 kl. 17:57

Eiríkur Stefánsson hinn reiði og Jón Valur Jensson trúa eflaust að allt snúist um þeirra ræðu. Sjaldan er að finna eitthvað jákvætt í þeirra málflutningi sem er litaður af sérhyggju og að átrúnaðurinn sé alltaf hinn eini sanni boðskapur. Presturinn, biskupinn og páfinn. Allt dálítið þvælt og togað. Leiðigjarn til lengdar þegar önnur sjónarmið komast ekki að.

Sigurrafn (IP-tala skráð) 14.6.2010 kl. 21:27

Að sönnu er Jón Valur Jensson að margra mati hið svartasta afturhald sem fyrirfinnst. Þá talaði Helgi sálugi Hóseasson í mín eyru um alþýðubandalagsíhaldið sem hann taldi ekki skárra en það í íhaldsflokknum sáluga. Og kannski eru vg menn upp til hópa gamlir allaballar. Ekki má þó gleyma því að Jón Bjarnason bauð sig einu sinni fram í prófkjöri fyrir samfylkinguna og kannski hefur hann vitkast með árunum, eða þá ergst eftir því sem hann hefur elst. En að gefa í skyn að Jón Valur Jensson sé vinstri grænn bendir til þess að bloggari þekki nefndan Jón Val illa. Í flestum málum liggur himinn og haf milli sjónarmiða vg og Jóns Vals.

En kannski á bloggari við að stjórnmálaskoðanir séu ekki línulegar heldur liggi í hring og mun styttra sé frá hægri til vinstri en frá vinstri til hægri; Jón Valur sé að nálgast skoðanir vg frá vinstri. Satt að segja hefur mér stundum dottið þetta í hug, sérstaklega þegar fornkunningi minn eikarinn (eða trotskistinn ég man það ekki svo glöggt lengur enda stundum býsna óljós munurinn á smákommaflokkunum í denn) Matthías Viðar Sæmundsson gekk í Sjálfstæðisflokkinn og dó svo trúaður katóli. Blessuð sé minning hans.

Þorvaldur Sigurðsson (IP-tala skráð) 14.6.2010 kl. 22:31