Molar um málfar og miðla 344

Úr mbl.is (01.07.2010): Líkt og fram hefur komið er hvöss lægð yfir landinu nú og má búast við hvössum vindi víða á landinu í dag. Molaskrifaði minnist þess ekki  að hafa áður heyrt  talað um hvassar lægðir.  Málvenja er að tala um djúpar lægðir, eða krappar lægðir í   fréttum af veðri og vindum.

Úr Fréttablaðinu (01.07.2010) þar sem sagt  var frá vélarbilun í Vestmannaeyjaferjunni Herjólfi: Báturinn var fullhlaðinn fólki og  bifreiðum og ýttu tveir bátar skipinu upp að höfninni til að láta kafara kanna hugsanlegar skemmdir.  Hér  er Herjólfur bæði  kallaður  bátur og skip. Herjólfur er skip  eða  ferja. Kannski óljóst hvar mörkin milli báts og  skips liggja ,  en  engin vegur er að kalla Herjólf bát. Svo  voru  tveir  bátar fengnir til að ýta skipinu að bryggju. Skipinu var ekki ýtt upp að höfninni ! Þeim sem þetta  skrifaði er ekki ljós munurinn á höfn og bryggju.

Skrifað er á  dv.is (01.07.2010): Þýski auðkýfingurinn Otto Happel er staddur hér á landi þessa dagana og ætlar að renna fyrir laxi í Blöndu. Menn renna ekki fyrir laxi. Menn renna fyrir lax, þegar menn reyna að  fanga þennan,  að sögn, göfuga fisk.  Sama villa er í fyrirsögn og fréttinni sjálfri. Þeir á  dv.is eru því samkvæmir sjálfum sér í vitleysunni. Menn renna fyrir fisk, ekki fyrir fiski,segir í  Íslenskri orðabók.

   Sjónvarp íslenska ríkisins sýnir viðskiptavinum sínum meiri fyrirlitningu en nokkur önnur sjónvarpsstöð. Í gærkveldi  (02,07.2010) var klukkutíma seinkun á auglýstri dagskrá og enginn sagði svo mikið sem : Afsakið , að dagskrá skuli hafa seinkað ! Þetta er rakinn dónaskapur. Ekkert var við því að gera að leikur var framlengdur, en fimbulfambi sjálfumglaðra ,,sérfræðinga" hefði svo sannarlega mátt sleppa. Líklega fá þeir vel borgað fyrir bullið.  En það kostar hinsvegar ekki neitt að biðja hlustendur afsökunar. Það hefðu verið mannasiðir.

  Vefmiðilinn  visir.is gerði Molaskrifara  þann heiður að birta  ofangreind ummæli um Ríkisútvarpið (03.07.2010)  ásamt mynd.  Myndatextinn var svona:Eiður átti sæti á Alþingi á árunum 1978-1983 og aftur 1987-1993. Síðustu þrjú árin gegndi hann embætti umhverfisráðherra. Eiður var sendiherra á árunum 1993-1999. Mynd/GVA  Í þessum stutta texta er  rangt með farið í hverri einustu setningu !1. Átti sæti á Alþingi samfellt  frá 1978 til 1993. Var umhverfisráðherra í rúmlega tvö ár. Var sendiherra frá 1993 til 15. febrúar 2009. þetta er eiginlega mjög  vel af sér vikið hjá þeim sem skrifaði þennan stutta texta.

Molar um málfar og miðla 343

   Í íþróttafréttum  Ríkisútvarpsins (30.06.2010) var sagt: ... ákvað  að  við svo búið mætti  ekki sitja.  Molaskrifari er vanur því að sagt sé,  að við  svo  búið  megi ekki standa, þ.e. að  það ástand sem ríki sé óviðunandi. 

   Það er aldrei nein pólitík í fréttamati Morgunblaðsins. Sussu nei ! Undir fyrirsögninni: Samþykktin hörmuð var sagt frá  fundarsamþykkt  Sjálfstæðra  Evrópumanna um landsfundarsamþykkt Sjálfstæðisflokksins. Fréttin  var örstuttur eindálkur neðst á  vinstri síðu, bls.4.

  Hér standa bílarnir í stórum flotum, sagði fréttamaður Ríkissjónvarpsins (30.06.2010). Hann hefði fremur átt að segja, hér  standa tugir ( eða hundruð)  bíla.  Í  sama fréttatíma sagði fréttaþulur:  Hafa stjórnvöld lagt blessun sína yfir því.... Það fer ekki mikið  fyrir málfarslegum metnaði   hjá  stofnuninni, sem hefur lagaskyldur gagnvart íslenskri tungu.

Skrifað var á  visir.is (30.06.2010): Herjólfur er lagður aftur frá höfn í seinni ferð sína til Þorlákshafnar.  Á íslensku er talað um að leggja úr höfn, ekki frá  höfn. Dæmalaust var svo að heyra hvernig  Stöð tvö  sagði frá  vélarbilun í Herjólfi í Vestmannaeyjahöfn:  Herjólfur var dreginn aflvana í Vestmannaeyjahöfn í dag. Talið er að skipið hafi tekið tvisvar á botninn....  Þeir sem segja um skip  sem  tekur  niðri  tvisvar sinnum að það hafi tekið  tvisvar á  botninn  ættu að gera eitthvað annað en að segja okkur fréttir.

 Á biðstofu sá Molaskrifari nýlega  forsíðu  tímarits þar sem  var eftirfarandi fyrirsögn: Karlmenn eru þroskaheftir. Þetta voru orð konu.  Ekki hefur þess  orðið vart að Jafnréttisráð hafi tjáð sig um þessa orðanotkun. Ekki velkist Molaskrifari  í vafa um  að  Jafnréttisráð hefði verið fljótt að rumska , ef karlmaður hefði  sagt þetta. Eitt er Jón og annað er séra Jón. Þetta beinir   raunar huganum að því að lyfjaverslun  í Reykjavík auglýsir  ítrekað að verslunin sé kvennaapótek. Karlmenn hljóta að skilja það svo, að ekki sé óskað eftir   viðskiptum þeirra í téðri lyfjabúð í Laugarneshverfinu.

Það var góð tilbreyting í dagskrá Ríkissjónvarps (30.06.2010) að fá að heyra og  sjá Vínarfílharmóníuna á sumartónleikum við Schonbrunnhöllina í Vínarborg. Norska sjónvarpið var reyndar búið að sýna sínum  viðskiptavinum þessa tónleika fyrr í mánuðinum. Hér sátu tónleikarnir líklega á hakanum vegna  fótboltans, sem stjórnar lífi fólks í Efstaleiti.

  Ljósir  punktar gleðja í kreppunni, þótt smáir séu. Fjögur hundruð manns var boðið  til þjóðhátíðargleði  í sendiráði íslenska lýðveldisins í Svíaríki. Gott er  til þess að  vita, að bölvuð kreppan hefur ekki náð til Svíþjóðar. 

Molar um málfar og miðla 342

   Fréttir í Útvarpi  Sögu  fóru hnökralaust af stað (01.07.2010), en þar er  reyndur fréttamaður Haukur Hólm við stjórnvölinn. Einhverjum kann ef til vill að  finnast sú orðanotkun orka tvímælis  að kalla fólk á þrítugsaldri ungmenni eins og gert var í fyrsta fréttatímanum. Það  orð  finnst Molaskrifara  betur eiga  við um fólk undir  tvítugsaldri. Verið   var að  segja  frá ungum Íslendingum  sem í fylleríi ollu skemmdum  á bílum og bifhjólum á Ítalíu. Útvarpsstjóri Útvarps Sögu hélt upp á þennan áfanga í morgunþætti sinum.

Fjöldi listamanna koma fram,sagði  þrælvanur fréttamaður og  þulur í kvöldfréttum RÚv (30.06.2010). Þetta átti að sjálfsögðu að vera: Fjöldi listamanna kemur fram. Fjöldi er nefnilega  eintöluorð.

Æ algengara er að sjá og heyra  forsetningunum að og  af ruglað saman. Dæmi um þetta mátti sjá á visir.is (30.06.2010), en þar sagði: Lögreglan óskaði svo eftir vitnum af atburðinum í gær. Lögreglan óskaði sem sé eftir að hafa tal af vitnum  að  atburðinum, ekki af  atburðinum.  Maður verður  vitni að einhverju.  Sér eitthvað gerast  eða fylgist með einhverju gerast.

  Stundum á Molaskrifari erfitt með að átta sig á  rökrænu samhengi hlutanna. Í Garðabæ er Fréttablaðið borið heim til hans á hverjum morgni. Ókeypis. En ef hann ætlar að sækja  Fréttablaðið í verslun á Selfossi verður hann að borga fyrir það !

  Svo er hér að lokum örlítil leiðrétting á umfjöllun  DV um garðsláttuvélar (30.06.2010). Þar segir  Jóhann mælir með því, að fólk kaupi sláttuvélar með mótorum annað hvort  frá  Briggs  eða Stratton....   Briggs & Stratton er eitt og  sama  fyrirtækið.  Það  framleiðir  litla  bensínmótora, sem eru nánast  ódrepandi.

Molar um málfar og miðla 341

  Velunnari Mola sendi eftirfarandi:  Myndatexti á Pressunni eftir Mörtu Maríu Jónasdóttur: „Það er hrikalegt að sjá hármissirinn á Naomi Campbell.“  Ekki mikilli  ritleikni fyrir að fara á þeim  bænum og  raunar ekki heldur í þessu dæmi  af Pressunni (29.06.2010): Sérstakur saksóknari segir að þeir fyrstu sem embættið ákærði fyrir umboðssvik gefist nú tóm til þess að átta sig. Villan í þessari setningu  er flestum svo augljós að um það þarf ekki að hafa fleiri orð.

 Það varð Ríkissjónvarpinu  tilefni sérstakrar fréttar (29.06.2010) að kvöldið eftir  yrðu fréttir á réttum tíma.  Þetta var rétt  fréttamat. Engin önnur  ríkissjónvarpsstöð  misbýður  fólki með  jafnmiklum fótbolta og Ríkissjónvarp Íslendinga. Látum vera þótt sýndur  væri einn leikur á  dag meðan þessi keppni stendur yfir. En hið sjálfumglaða,endalausa og  innihaldslausa  blaður á undan og eftir öllum leikjum er  venjulegu fólki óskiljanlegt. Það er því miður ekki  hægt að segja upp áskrift að RÚV. Þetta er lögbundin nauðung  og það notfæra menn sér í Efstaleitinu. 

Úr myndatexta á forsíðu Morgunblaðsins (29.06.2010): Katlarnir hafa brætt gríðarlegt magn af ís,sem rennur nú í Skaftá og Eldvatn. Í sameiningu mynda árnar og hinn bráðni ís gríðarlegt hlaup...Nú  má vel vera að Molaskrifari sé  farinn að  ryðga í þeirri  jarðfræði, sem hann  lærði á  sínum tíma. Hann hefði þó haldið að katlarnir  bræddu ekki eitt eða neitt , heldur  safnaðist í þá vatn sem  jarðhiti  undir jöklinum  bræðir. Þá er sérkennilegt að tala um að ís  renni í  Skaftá og Eldvatn og að árnar og hinn bráðni ís myndi hlaup.  Kannski er þetta bara sérviska Molaskrifara?

Nú lifa lesendur Morgunblaðsins nýja  tíma.  Nú hirta ritstjórar blaðsins opinberlega og með myndbirtingum, þá  þingmenn sem ekki hafa skoðanir að  skapi  húsbænda í Hádegismóum. Það er líka nýlunda í íslenskri blaðamennsku að þegar  dylgjað er nafnlaust („þingmaður með víðtæka reynslu úr mörgum flokkum") er  birt mynd af þeim þingmanni,sem væntanlega er átt við og  nafn undir myndinni, svo ekkert fari nú milli mála. Um leið er  Morgunblaðið að hirta  allan þann fjölda bæði í forystusveit og grasrót  flokksins,sem hefur skoðanir í Evrópumálum,sem  ekki eiga upp á  pallborðið við austanvert Rauðavatn.

Molar um málfar og miðla 340

  

 Úr dv.is (28.06.2010): Gísli Marteinn rekur þessa prófkjörsbaráttur sem hann háði í Reykjavík á bloggi sínu á Eyjunni .... Orðið barátta er ekki til í fleirtölu í íslensku.  Hér er það blaðamaður DV sem barnar söguna, því Gísli Marteinn notar orðið barátta ekki í fleirtölu í blogginu,sem dv.is  vísar til.

  Glöggur lesandi sendi Molum eftirfarandi:  „Fimmtán kindur létust“ stendur í fyrirsögn á Pressunni. Þar er líklega kjörorðið: Kindur eru líka menn!

Skilur einhver eftirfarandi setningu úr mbl.is (28.06.2010): Hæstiréttur Bandaríkjanna hefur takmarkað komist að þeirri niðurstöðu að sömu lög og reglur eigi að gilda um byssueign í öllum ríkjum Bandaríkjanna.  Molaskrifari  játar fúslega  að hann skilur þetta ekki.

Eftirfarandi er afar skarplega ályktað hjá  mbl. is þegar fjallað var um mikla umferð í átt til Reykjavíkur : Að sögn varðstjóra hjá lögreglunni hefur ekki verið tilkynnt um nein umferðaróhöpp og er því skýringin á þessum umferðartöfum sennilega sú að höfuðborgarbúar sem hafi farið út úr borginni um helgina séu á leið til síns heim nú. Svo er  reyndar  sagt á íslensku að menn séu á leið til síns heima en ekki til síns  heim. En þetta er eftir öðru. 

Þá er þessum fréttatíma lokið að sinni,  sagði  fréttaþulur Ríkissjónvarps (28.06.2010). Fréttatímanum lauk, --   ekki að sinni.   

Umburðarlyndið heyrir sögunni til í Sjálfstæðisflokki

  

 Það er  deginum ljósara, að grundvallarbreyting hefur  orðið á Sjálfstæðisflokknum á tiltölulega fáum árum. Þar er nú ekki sem var  rúm fyrir ólíkar skoðanir eins og  áður.   Á landsfundi flokksins varð  formaðurinn  að lúta í gras fyrir öfgafólki ,sem ekki mátti heyra minnst á málamiðlanir, og  þar var samþykkt  tillaga  þar sem  valtað var yfir þá flokksmenn, sem  vildu  að þjóðin fengi  að skera úr  um ágæti þess samnings,sem  kynni að nást  við Evrópusambandið. Hvað skyldu nú  fulltrúar atvinnulífsins í flokknum (aðrir en kvótakóngar, sægreifar og  sauðfjárbændur) segja?

  Það kom í ljós fyrir landsfundinn að  Sjálfstæðismenn, sem  í sveitarstjórnarkosningum höfðu boðið sig fram á listum  sem ekki voru hreinir flokkslistar voru reknir úr flokknum. Hvað er það annað en brottrekstur, þegar  hringt er í fólk og  því tilkynnt  formlega , að það sé lengur félagar í Sjálfstæðisflokknum? Auðvitað er það brottrekstur.

 Snemma árs 1980 myndaði Gunnar Thoroddsen ríkisstjórn í óþökk forystu Sjálfstæðisflokksins. Gunnar varð forsætisráðherra þeirrar stjórnar. Tveir aðrir þingmenn  flokksins urðu ráðherrar í þessari  ríkisstjórn, þeir  Friðjón Þórðarson og Pálmi Jónsson.  Var  Gunnar rekinn? Nei. Var Friðjón rekinn? Nei.  Var Pálmi  rekinn?   Nei.   Þetta var auðvitað mjög erfið staða  fyrir Sjálfstæðisflokkinn, en flokkurinn hafði sig í gegnum það. Þá var meirihlutinn ekki styrkari en  svo, að ráðherrarnir þrír urðu að taka  sæti í þingnefndum, sem  var nær óþekkt áður.

  Sjálfstæðisflokkurinn hefur  löngum verið  fylgjandi víðtæku samstarfi  við  aðrar þjóðir einkum  lýðræðisþjóðir. Stundum hefur  flokkurinn  meira að segja  gengið svo langt að  reyna að eigna sér hluta þess  sem aðrir höfðu forgöngu um í þeim efnum.  Hinn kunni  fræðimaður Hannes Hólmsteinn Gissurarson hefur   séð um  endurritun Íslandssögunnar hvað þetta varðar fyrir hönd flokksins. Meðal annars í alræmdum sjónvarpsþáttum Ríkissjónvarpsins.

  Nú  vill Sjálfstæðisflokkurinn að við verðum að athlægi með því að  draga umsókn um ESB  aðild  til baka. Er ekki nóg að efnahagsóstjórn  Sjálfstæðisflokks með hjálp Framsóknar lengst af og  Samfylkingar í blálokin  skuli hafa gert okkur að viðundri um víða veröld, fyrir nú utan það  að leiða hörmungar yfir  tugþúsundir  heimila í landinu ?  Það  nægir þeim greinilega ekki.

  Sjálfstæðisflokkurinn hefur nú illu heilli skipað sér í sveit öfgaþjóðernisflokka yst á  hægri væg stjórnmálanna. Það er dapurlegt , ömurlegt hlutskipti flokks ,sem eitt  sinn var víðsýnn og frjálslyndur. Flokks  þar sem  var rúm  fyrir   fólk , - líka  þótt það  væri ekki sammála stefnu flokksins í öllum  greinum. Það nú er liðin tíð. Umburðarlyndið heyrir nú sögunni til.

Molar um málfar og miðla 339

 

  Á laugardaginn var (26.06.2010) lenti  Sjálfstæðisflokkurinn í alvarlegu umferðarslysi fyrir ótrúlegan klaufaskap. Það er hárrétt, að  hann hefur nú sest á bekk með örfáum öfgaflokkum yst til hægri. Verði honum og forystu hans að  góðu. Dapurleg  örlög flokks, sem eitt sinn var í fararbroddi  þeirra sem  vildu starfa sem nánast með vestrænum lýðræðisríkjum.  Nú er flokkurinn stjórnlaust rekald á úthafi stjórnmálanna og hefur enga landsýn, bara þröngsýn einangrunarsinna.

 Af AMX öfgavefnum (27.06.2020): Bjarni sýndi að það fer honum vel að tala um hugmyndir og leggja niður skýra framtíðarsýn sem byggir á frelsi einstaklinganna, lágum sköttum og tækifærum.  Af þessu verður ekki annað  ráðið ,en að formaður flokksins hafi lagt niður framtíðarsýn flokksins. Alkunna er  að Hannes Hólmsteinn Gissurarson skrifar mikið undir dulnefni/dulnefnum á  AMX vefinn. Hann hefur þó varla skrifað þetta, en einhversstaðar las Molaskrifari að  ritstjóri AMX gæti naumast kallast sendibréfsfær. Það gæti skýrt málið.

Molar um málfar og miðla 338

    Úr knattspyrnulýsingu Ríkissjónvarpsins (26.06.2010): ... fengu Suður Kóreumenn aðra sókn og hún lauk...  Þetta dæmi er kannski ekki það versta, þótt slæmt sé. Í gær  sýndi Ríkissjónvarpið  fótbolta og  kappakstur frá morgni til kvölds, nánast linnulaust.  Dagskrá seinkaði um hálftíma vegna framlengingar leiks  Bandaríkjanna og Ghana. Samt var hálftíma fótboltafroðusnakk að leik loknum látið  halda sér óstytt. Þar var lopinn teygður  og teygður. Þetta er með ólíkindum.

  Popppunktur átti að hefjast klukkan 21 05. Þegar hann loks hófst var dagskráin orðin 40 mínútum á eftir áætlun. Þá kom ein  lína á skjáinn um að dagskrá hefði seinkað um 30 mínútur. Það var rangt.  Enginn bað áhorfendur afsökunar á þessu rugli. Menn líta líklega svo stórt á sig í Efstaleitinu, að þeir þurfa ekki að biðja einn eða neinn afsökunar. Til hvers var þessari stofnun sett stjórn , -- sem þiggur   dágóð laun, --   fyrir að gera hvað? Allavega ekki til að hafa hemil á starfsmönnum og sjá um að þeir sýni af sér  mannasiði í samskiptum við hlustendur/áhorfendur.

  Fótboltinn er hin heilaga  kýr  Ríkisútvarpsins. Við honum má ekki hrófla. Skítt með þá sem  vilja  auglýsta dagskrá. Fótboltinn hefur  forgang, -- algjöran  forgang umfram allt annað.  Hjá Molaskrifara  er nú  mælirinn löngu fullur , -- og skekinn. 

    Í hádegisfréttum Ríkisútvarpsins  (26.06.2010) var einkar ,,skrautleg"  frétt um  flokksráðsfund VG. Í fremur  stuttri frétt tókst fréttamanni að segja:  ... aðildarumsókn í ESB (umsókn um aðild  að ESB),...auk orkumála og eignarhalds á þeim (...auk orkumála og eignarhalds á orku(lindum)), Fjölmargar tillögur liggja fyrir fundinn... (..liggja fyrir  fundinum)  ... umsókn Íslands í ESB verði dregin til baka (aðildarumsókn Íslands að ESB verði dregin til baka)... er einn  flutningsmaður tillögunnar (..einn flutningsmanna tillögunnar).. atkvæðagreiðslur um ályktanir fundarins verða afgreiddar í dag... ( atkvæði verða greidd um ályktanir fundarins í dag). Atkvæðagreiðslur eru ekki afgreiddar.  Geri aðrir betur !   Málfarsráðunautur RÚV hefur verk að vinna.

  Réttilega var sagt í fréttum Ríkissjónvarps (26.06.2010),  að Jón Ásgeir Jóhannesson hefði ákveðið að taka til varna  í Lundúnum. Þetta var einnig  rétt á vef RÚV, en í hádegisfréttum útvarps talaði fréttaritari um að taka til varnar,sem er ekki í samræmi við þá  málvenju, sem Molaskrifari þekkir.

,,Okkur hlakkar til að heyra í hinni nýju borgarstjórn varðandi samráð og samstarf,"segir Guðrún. (visir.is 25.06.2010). Það er bara svona!

Pétur vill formanninn,er heldur  álappaleg fyrirsögn á mbl.is (26.06.2010). Það er vandi að semja fyrirsagnir svo vel sé. Sá sem samdi þessa er ekki þeim vanda vaxinn. Þótt sumir Sjálfstæðismenn skrifi nú langar lofrollur um hve gott Morgunblaðið sé orðið, hefur það  aldrei  verið lélegra en nú að mati Molaskrifara. Málfari í blaðinu hrakar dag frá degi.

  Molaskrifara er ekki skemmt, þegar hann heyrir lesnar auglýsingar frá  veitingastað í Reykjavík,sem kallar sig   enska heitinu  Just Food. Hann þyrfti að vera  nær dauða en lífi af hungri  til að leita sér matar á slíkum stað.

   Það vantar ekki lítillætið hjá þeim á Útvarpi  Sögu.  Þar  mátti skilja  umsjónarmann þáttarins  Ísland ögrum skorið (26.06.2020) svo, að Útvarp Saga hefði  komið Icesave málinu í höfn (í þjóðaratkvæðagreiðslu,sem var óskiljanlegt rugl frá upphafi), gert Jón Gnarr að borgarstjóra og  komið Pétri Blöndal í framboð til  formennsku í Sjálfstæðisflokknum með því sem Útvarp Saga   af einstakri ósvífni kallar skoðanakönnun !   Hann ,, vann könnunina" , sagði umsjónarmaður, sem líka lét út úr sér gullkornið: ,,Okkur hefur orðið mikið áorkað".  Þá  gafst Molaskrifari upp  og skipti yfir á Bylgjuna.

Molar um málfar og miðla 337

  Í frumvarpi sem Siv Friðleifsdóttir hefur lagt fram á Alþingi er lagt til að tekin verði upp þingsköp af norskri fyrirmynd.(mbl.is 25.06.2010). Hér varð Morgunblaðinu það á að nota  ranga  forsetningu. Segja  ætti ... að norskri  fyrirmynd  ekki  af.   Þessi tillaga Sivjar er raunar eitt það skynsamlegasta,sem lengi hefur  komið fram á Alþingi. Molaskrifari  hefur lengi verið á því að þetta ætti að gera, - allar götur  síðan hann fylgdist með EES  umræðunum  í norska Stórþinginu. Þar var umræðutíminn  ákveðinn , svo og svo margar klukkustundir  sem  deildust á  tvo eða þrjá daga  dagar, man ekki hvort var. Það var gert  áður en umræðan hófst. Flokkarnir  fengu svo  ræðutíma eftir þingstyrk. Hér var  EES málið þæft vikum saman á Alþingi. Það var engum til sóma og hafði ekkert með málfrelsi að gera.  Þar fóru Alþýðubandalagsmenn fremstir í flokki. Þeir voru yfirleitt á móti  útlöndum.

 Að morgni dags (25.06.2010) var  í  Ríkisútvarpinu  talað um styrki til handa einstakra þingmanna. Þarna var orðinu  handa ofaukið.  Réttara hefði verið að tala um styrki til einstakra þingmanna.

 Gunnari Lárus Hjálmarssyni var nýverið sagt upp hjá Fréttablaðinu,segir  í   dv.is (25.06.2010). Þeim sem þetta skrifaði  er greinilega ekki ljóst að þágufall mannsnafnsins Lárus er  Lárusi, ekki Lárus.

Í skoðanakönnun frá mars, sagði fréttamaður  í tíu fréttum Ríkissjónvarps (24.06.2010) og átti líklega við,  að í skoðanakönnun  sem gerð var í mars.....  eða:  Í skoðanakönnun frá því í mars.

Kunnur bloggari og fyrrum þingmaður skrifar (25.06.2010): ...að svo gæti farið að samningar fjármálastofnana um gengislán yrðu talin ólögmæt. Hér  er það orðið samningar,sem skiptir máli. Þess vegna ætti þarna að standa: .. að svo gæti farið að samningar fjármálastofnana um gengislán yrðu taldir ólögmætir. Ótrúlega algeng villa. Líklega oftar fljótfærni, fremur en vankunnátta.

 Það er  að mati Molaskrifara meira en lítið brenglað fréttamat, þegar  myndatökulið  er  sent á vettvang, þegar tuttugu manna hópur   fer niður á Austurvöll til að afhenda  forseta Alþingis  undirskriftir 700 einstaklinga. Það er engin frétt þótt gamlir róttæklingar byrsti sig,   ef  fólk þeim nákomið  þarf að bera ábyrgð á gerðum sínum.   Það er sömuleiðis fáránlegt ,að fjölmiðlar skuli kokgleypa fréttatilkynningu  frá  einhverjum sem kalla sig  Samtök lánþega, þar sem hvatt er   til áhlaups á alla  banka og fjármálastofnanir á Íslandi. Hversvegna kannar enginn fjölmiðill hvaða  samtök þetta eru , hve  fjölmenn og svo framvegis ?  Það er svívirðilegt ábyrgðarleysi  að hvetja til áhlaups á  banka og enn verra þegar  fjölmiðlar fjalla algjörlega gagnrýnilaust um slíkt.

Tímabært frumvarp Sivjar

 Þessi tillaga  Sivjar er  löngu tímabær. Það er  skynsamlegt að gera þessa breytingu. Á sínum tíma  ræddi norska Stórþingið EES á tveimur  eða  þremur dögum, minnir mig. Það var ákveðið áður en umræðan hófst. Flokkarnir fengu ræðutíma í samræmi við þingstyrk.   Á Alþingi íslendinga var EES málið þæft  vikum saman. Þar fóru fremstir í flokki Alþýðubandalagsmenn,sem yfirleitt hafa verið á móti  útlöndum. Þetta hafði ekkert  með málfrelsi að gera. þetta var bara þinginu til skammar.

 Gott ef  Siv  fær  það  fram að þessu verði  breytt. Íhaldskurfarnir á þingi eru þó  vísir til að efna  til málþófs til að koma í veg fyrir að þetta ágæta frumvarp nái fram að ganga.

Vill útrýma málþófi