Molar um málfar og miðla 390

   Sjaldgæft er að steypireyð reki á land, var sagt í fréttum Stöðvar tvö (26.08.2010). Steypireyður er kvenkynsorð og  beygist: nf. steypireyður, þf.steypireyði, þgf. steypireyði, ef. steypireyðar.

Breskir fjölmiðlar hafa gert því skóna, að.... var prýðilega sagt í tíu fréttum  Ríkissjónvarps (26.08.2010).  Að gera  einhverju skóna  er að  gera ráð fyrir einhverju  eða  búast við einhverju.  Sjá t.d. Mergur málsins  eftir dr.  Jón G. Friðjónsson bls. 767

   Molavin sendi eftirfarandi (26.08.2010):  Á vef Ríkisútvarpsins segir í frétt ma..: "Flokksskrifstofa danska jafnaðarmannaflokksins í Frederiksberg var rýmd að hluta í morgun..."

Ég hef búið á Friðriksbergi, sem er sjálfstætt bæjarfélag, umlukið Kaupmannahöfn. Hið vinsæla danslag "Det var på Frederiksberg, det var i Maj
jeg fik en pige kær, og det var dig" staðfestir að Danir segja ekki "í" Friðriksbergi heldur "á". Enn ein ábendingin um brýna þörf á uppsláttarritum og notkun þeirra á fréttastofum".

Gott er að eiga  hauk í horni, Molavin.

   Molaskrifari hafði leyft sér að  vona að það væri liðin tíð  að  starfsmenn Ríkisútvarpsins  notuðu  aðstöðu sína til að hampa persónulegum áhugamálum sínum eins og purkunarlaust var gert hér á árum áður. Ýmsir, sem nú eru á efri árum, muna til dæmis hvernig  Ríkisútvarpið var misnotað, þegar verið var að mótmæla fyrirhugaðri húsbyggingu Seðlabankans  norðan Arnarhóls.

   Morgunþáttur   Rásar eitt, Vítt og breitt, sem alla jafna er með besta efni  Ríkisútvarpsins,   var  nýlega eins og hann lagði sig, helgaður gömlu Laxárdeilumáli (26.08.2010).  Jafnframt   var einum starfsmanni Ríkisútvarpsins send  sérstök afmæliskveðja og  flutt í heild ávarp sem sá hinn sami  hafði flutt daginn áður norður við Laxá. Sá starfsmaður,sem hér um ræðir, er  alls góðs maklegur, en Ríkisútvarpið á ekki að misnota með þessum hætti. Samkvæmt þessu ættu allir starfsmenn Ríkisútvarpsins að fá sérstakar kveðjur og umfjöllun í dagskrá, þegar þeir eiga afmæli. Hér á ekki að gera mannamun 

 Starfsmönnum þjóðarútvarpsins hættir á stundum til að gleyma því að Ríkisútvarpið er ohf ,opinbert hlutafélag, ekki ehf,einkahlutafélag.

Molar um málfar og miðla 389

 Ekki ólíklegt, að hún hafi rekið á land..... sagði  viðmælandi fréttastofu,sem rætt var  við um hvalreka  norður á Skaga.  Þessi  villa verður æ algengari.  Hér  hefði verið rétt  að segja:  Ekki er ólíklegt að hana (steypireyðina) hafi rekið  á land ...

 Að vanda blakti fáni menningar og málvöndunar við hún í morgunþætti  Rásar tvö í Ríkisútvarpinu í morgun, föstudag (27.08.2010). Þá ræddu stjórnendur  við hana Gróu sína á Leiti,sem flytur vikulegt slúður (að þeirra eigin  sögn) frá Hollywood. Þarna var hlustendum sagt frá  konu ,sem hafði orðið ólétt með ágætum dreng og einhverjum sem hafði gengið í gegnum efnameðferð. Þar  fyrir utan sagði konan hédddna ,hédddna og náttlega oftar en  tölu verður á komið. Umsjónarmenn Rásar tvö hafa greinilega ekki fengið í hendur bæklinginn um málstefnu Ríkisútvarpsins, né heldur hefur hann borist vestur að Kyrrahafi. Og svo voru hlustendur  kvaddir með : Bæ !

 Hádegisfréttatími Bylgjunnar einkum þó fyrrihlutinn,(24.08.2010) var hafsjór af ambögum. Nokkur  dæmi: ..  og óskorðaður foringi jafnaldra sinna í prestastétt.   Þarna hefði fréttamaður átt  að segja.. óskoraður  foringi. Það er ekkert til sem heitir óskorðaður foringi. Það er bara rugl. ... hafi átt rætur sínar í vina- og kunningjahóp Ólafs.  Hér hefði átt að segja ... í vina- og kunningjahópi Ólafs. ...barst alþjóðadeild lögreglunnar hér á landi upplýsingar.. Hefði átt að að vera: ... bárust alþjóðadeild lögreglunnar hér á landi upplýsingar...   Lögregla hefur ekki viljað svara því til hvort tengsl séu milli..  Í þessu setningarbroti er  orðinu til   ofaukið. Lögregla hefur ekki viljað svara því.... Talsvert af upplýsingum og ábendingum  frá almenningi hafa borist...  Ætti að vera : Talsvert af upplýsingum og ábendingum hefur borist  frá almenningi.

  Morðinginn ófundinn í níu daga, sagði í undarlegri  fyrirsögn á  fréttavef Ríkisútvarpsins (25.08.2010)

  Móðir barns eða barna í  Vesturbæjarskóla ,sem rætt var  við í  fréttum Ríkissjónvarps (26.08.2010)  sagði um skúra,  sem  settir hafa  verið niður á  skólalóðinni, að þeir væru morknir. Morkinn  þýðir úldinn, rotinn eða maltur.  Myndirnar sem   sýndar voru með fréttinni báru með sér að  það sem sást af undirstöðum skúranna var grautfúið eða feyskið.  Viður fúnar, en  berg getur  morknað af  völdum jarðhita og handrit geta morknað í hillum, segir íslensk orðabók.

Úr mbl.is (26.08.2010): Í gærkvöldi var greint frá því á mbl.is að talsverð seinkun varð á flugi flugfélagsins Astraeus til og frá Bretlandi í júnímánuði, samkvæmt nýrri skýrslu frá flugmálastjórn þar í landi, CAA. Astreus rekur flugvélarnar sem fljúga undir merki Iceland Express.  Þetta staðfestir það sem  hér hefur  áður verið sagt. Iceland Express er ekki flugfélag heldur ferðaskrifstofa. Það er því rangt, þegar  fjölmiðlar tala um flugfélagið Iceland Express.

Ónýt stjórnsýsla og Ríkisútvarpið ohf

   Í beinskeyttum  bloggpistlum hefur  Jónas Kristjánsson oft    fjallað um  handónýta stjórnsýslu íslenska ríkisins. Jón Baldvin Hannibalsson hnykkti á þessu  í ágætu viðtali í Útvarpi Sögu (25.08.2010). Hér  kemur lítil saga um hina  ónýtu stjórnsýslu.  Fimmta nóvember 2009 skrifaði ég mennta- og menningarmálaráðherra Katrínu Jakobsdóttur bréf vegna ólöglegra  áfengisauglýsinga í  Ríkissjónvarpinu. Leið nú og beið. Ekkert gerðist. Átjánda mars  2010  sendi ég  menntamálaráðherra tölvubréf og  spurðist fyrir um erindi mitt.  Hún svaraði að bragði. Embættismenn höfðu ekki haft burði til að koma  bréfinu til hennar. Hún hafði aldrei séð það. Málið lá í skúffu kansellistanna.Sem höfðu greinilega ákveðið að gera ekki neitt. 

  Skömmu  síðar  fékk ég bréf frá  ráðuneytinu þar sem mér var  tjáð að  skv. nýlegri lagabreytingu  heyrðu málefni Ríkisútvarpsins ohf undir  fjármálaráðuneytið. Erindi mitt hefði verið framsent fjármálaráðuneytinu . Menntamálaráðuneytið  sendi erindi mitt  26. mars einnig   til frú Svanhildar Kaaber   formanns stjórnar Ríkisútvarpsins  ohf, en hún er þar fulltrúi VG.  Var henni sent erindið  til „góðfúslegrar fyrirgreiðslu", eins og það er orðað.

  Áfram sat við sama. Ekkert gerðist. Frá  formanni stjórnar  Ríkisútvarpsins  heyrðist hvorki hósti né stuna. Tíunda  ágúst  skrifaði ég    frú Svanhildi Kaaber til að spyrjast fyrir um hvað liði afgreiðslu erindis míns frá   fimmta nóvember 2009.   Tíu dögum siðar, eða tuttugasta ágúst 2010, fékk  ég svo bréf frá  einum af yfirmönnum Ríkisútvarpsins um að  lögfræðingur Ríkisútvarpsins telji áfengisauglýsingarnar (kallaðar „léttölsauglýsingar”) löglegar og  að Ríkisútvarpið reyni eftir megni að leggja  rækt við íslenska tungu.  Aumt var það plagg. Bæklingur  um málstefnu Ríkisútvarpsins  fylgdi. Hann hefur sennilega ekki borist  fréttastofunni enn.  Ég skrifaði  formanni stjórnar Ríkisútvarpsins, Svanhildi Kaaber. Hún sá ekki ástæðu til að svara mér, heldur fól undirsáta að svara, seint og um síðir  eftir að  rekið hafði verið  á eftir málinu.   Það er sjálfsagt til of mikils mælst  að formaður stjórnar  Ríkisútvarpsins svari  bréfum  frá    óbreyttum viðskiptavinum stofnunarinnar.    Það  tók  stjórnsýsluna   næstum tíu mánuði að  afgreiða  þetta einfalda  erindi.

  Ef   einföldu málin  er  afgreidd með þessum hætti í stjórnkerfinu, hvað þá um hin stærri ?

   Það er satt sem  Jónas Kristjánsson   segir og  Jón Baldvin tekur undir. Þetta kerfi er ónýtt. Kerfiskerlingar og karlar  telja sig  yfir það hafin að svara erindum nema með miklum eftirgangsmunum.  

Molar um málfar og miðla 388

  Það var prýðilega að orði komist á mbl.is (24.08.2010) þegar sagt var , að fellibylurinn Danielle sæki í sig veðrið.

  Kvenkynsnafnorðið  stígandiþýðir  að eitthvað magnast  eða hækkar eftir því sem á líður, - jöfn áhersluaukning,segir íslensk orðabók. Þetta orð  vefst  á stundum fyrir   fjölmiðlamönnum.  Í fréttum Stöðvar tvö (24.08.2010) var sagt frá  fjölgun úrsagna úr  þjóðkirkjunni.  Fréttamaður sagði:  Hefur orðið vart við stíganda.Þetta er ekki rétt. Stígandi beygist:  nf. stígandi, þf. stígandi, þgf. stígandi,ef.  stígandi. Fréttamaður hefði getað  sagt: Úrsögnum úr þjóðkirkjunni hefur  fjölgað undanfarna  daga.Orðið stíogandi  fer ekki vel í þessu samhengi að mati Molaskrifara.  E.t.v hefði mátt segja: Stígandi hefur  verið í úrsögnum úr þjóðkirkjunni undanfarna daga.

 Enn skal hér vikið stuttlega að Útvarpi Sögu. Aðfaranótt þriðjudags (23.08.2010) heyrði Molaskrifari   síðari hluta þáttar, sem líklega hafði fyrst verið  fluttur að morgni föstudagsins, eða laugardagsins næsta á undan. Ekki var þess getið í þáttarlok hverjir  þar hefðu komið fram. Ekki  heyrði Molaskrifari betur  en að það versta  úr Hrafnaþingi ÍNN hefði verið  dregið að hljóðnema  Útvarps  Sögu. Molaskrifari giskar á, að þarna  hafi verið á ferðinni þáttur  verðbréfamiðlarans  og  fjármálasnillingsins alkunna, Guðmundar Franklíns Jónssonar. Það er þó  reyndar aðeins ágiskun. Bandaríska  Fox sjónvarpsstöðin er  eins og biblíulestur í sunnudagskóla miðað við það sem þarna var á borð  borið fyrir  hlustendur,sem áttu sér einskis ills von.

   Þarna var talað berum orðum um að  reka ætti alþingismenn út og skipa utanþingsstjórn eða „neyðarstjórn" eins og það var kallað. Allt   átti þetta að gerast í nafni  lýðræðis. Það átti sem sé að koma á  lýðræði með einræði ! Halda  stjórnendur þessa fjölmiðils, að allir hlustendur séu fífl ?  Víst er að suma má sæma þeirri nafnbót, en  ekki alla eins og þarna virtist lagt til grundvallar.

   Það er hættulegt, þegar sami ósannindavaðallinn er endurtekinn á hverjum degi og  oft á dag. Þá fara auðtrúa sálir  að trúa því að sannleikur sé á ferð. Stjórnendur Útvarps Sögu eru hér að leika ljótan leik, - ekki bara ljótan heldur og  óheiðarlegan. Einræði hefur áður verið komið á nafni  lýðræðis. Sagan geymir ófagrar  sögur af því. Er það það, sem þetta lið vill?

  Skylt er að geta þess að stundum er bitastætt efni í Útvarpi Sögu, ekki síst í morgunþáttum Markúsar. Hann ræddi í morgun (25.08.2010) við Jón Baldvin. Jón Baldvin  talar mannamál  og greining hans á  pólitísku stöðunni var skýr, -- að vanda.

  Í pólitík er   stundum talað um vanheilagt bandalag. Það er íslenskun á enska  orðtækinu unholy alliance.   Vanheilagt bandalag hefur nú myndast milli Morgunblaðsins og Jóns Bjarnasonar landbúnaðarráðherra.

Af fréttavef Ríkisútvarpsins (23.08.2010):  Mynd merkt Þorvaldi Skúlasyni hefur tvívegis verið skilað til gallerísins vegna grunsemda um að það sé falsað.   Hér finnst  Molaskrifara að ætti að standa: Mynd merktri  Þorvaldi Skúlasyni....   Það er annars svolítið sérkennileg vinnuregla hjá Ríkisútvarpinu að  birta  ekki morgunfréttirnar, sem  fluttar eru klukkan  fimm og sex á morgnana á netinu. Hvað veldur? Varla getur það verið kostnaður.

! 

Molar um málfar og miðla 387

 Sumir fréttamenn eiga í erfiðleikum með sögnina  að ljúka.  Fréttaþulur  Ríkissjónvarpsins  sagði í  tíufréttum (23.08.2010): ... þegar sautjánda umferð úrvalsdeildar karla í knattspyrnu lauk. Sautjánda umferð lauk ekki , heldur lauk sautjándu umferð. Á þessu er munur. Munurinn á réttu og röngu. Rétt var hinsvegar  farið með þetta  í  sexfréttum útvarps að morgni  næsta dags (24.08.2010).

Stjórnendur Stöðvar tvö eru ekki vandir að virðingu sinni ,þegar að málvöndun kemur. Íþróttafréttir Stöðvar tvö eru á stundum mikill ambögugrautur.  21.08.2010 sagði íþróttafréttamaður Stöðvar tvö okkur  , að  sveit  þeirra Bergþórs, Óskars, Benediktar og Jóns hefði borið sigur úr býtum. Sami fréttamaður sagði:.. var mikill samhugur í öllum.  Fréttamaður ,sem kann ekki að beygja mannsnafnið Benedikt á ekkert erindi á skjáinn.  Látið þennan fréttamann ekki fara  að hljóðnema, nema einhver  sem er sæmilegur í íslensku sé búinn að lesa handritin áður.

 Það er röng stefna  hjá  fréttastofu Ríkisútvarpsins að láta alla fréttamenn lesa fréttir. Sumir  eru óhæfir  fréttalesarar ,en geta verið ágætir fréttamenn. Þetta   er sagt m.a. í tilefni fréttalesturs um miðjan dag 22.08.2010. Ef þetta  á  að heita einhverskonar jafnréttisstefna, þá er hún byggð á misskilningi  og  kemur niður á hlustendum. Það á að velja fólk   til fréttalesturs sem  hefur  skýra rödd og áheyrilega.

  Það ber ekki vott um ríkan málskilning ,þegar fréttamaður  Stöðvar tvö (22..08.2010) segir: Það  er ekki spurning um hvort eða hvenær  slys muni verða. Verið var að segja frá slæmum frágangi  verktaka  á byggingarsvæðum í Hafnarfirði. Hér  hefði fréttamaður átt að segja: Það er ekki spurning um hvort, heldur hvenær  slys muni verða.

Molar um málfar og miðla 386

  Það er til marks um algjöra veruleikafirringu dagskrárstjóra Ríkissjónvarpsins,að þeir skuli halda  að þjóðin vilji þátt eins og Popppúnkt í meira en klukkutíma   klukkan rúmlega  hálf átta á laugardagskvöldum.  Þetta er besti  sjónvarpstími vikunnar. Þennan þátt ætti að sýna klukkan hálf  átta á mánudagsmorgnum. Lifi nauðungaráskriftin. Það skal í það. Í kjölfar poppþáttarins kemur svo unglingaefni sem unglingarnir í minni fjölskyldu , að minnsta kosti ,hafa ekki minnsta áhuga á.

Úr hádegisfréttum Ríkisútvarpsins (21.08.2010): .. í verklagsreglum Vestiu eignarhaldsfélagi Landsbankans.  Hefði átt að vera ...í verklagsreglum eignarhaldsfélags Landsbankans. Fréttamaður sagði: Menntaskólinn á Tröllaskaga er til húsa í gamla  gagnfræðaskólahúsinu í Ólafsfirði,sem hefur gengið í gegnum töluverður endurbætur að undanförnu. Nýr skólameistara sagði: ... það væri verið að  auka fjárveitingar þar inn,  og  ... á Eyjafjarðarsvæðinu njótum við þess að skólinn er að koma inn. Á mbl.is er haft eftir sama skólameistara: : „Við förum að sjá unga fólkið meira heimavið og menntunarstigið eykst. Samvirkni milli menntastofnunar og samfélagsins skiptir máli,“ . Ekki finnst Molaskrifara þetta lofa  góðu. Ef hann ætti heima á Tröllaskaga mundi hann sennilega senda börn sín í MA. 

 Úr íþróttafréttum Ríkisútvarpsins  í hádeginu (21.08.2010):  Leikurinn,sem fram fór í gærkvöld, lauk með   fjögurra marka sigri Póllands. Hér hefði íþróttafréttamaður  auðvitað átt að segja: Leiknum, sem fram  fór í gærkvöld, lauk með  fjögurra marka  sigri  Póllands. Eða: leiknum í gærkveldi lauk með fjögurra marka sigri Póllands.  Leikurinn lauk ekki. Líklega ætti Ríkisútvarpið  frekar átt að ráða handritalesara ,en málfarsráðunaut.

Hversvegna þurfa ágæt íslensk byggðarlög að nota í  í netfangaheitum,  þegar verið er að  auglýsa á íslensku og auglýsingunum er beint að Íslendingum? Dæmi:  visitakureyri.is og visithunathing.is. Þetta eru óþarfa slettur,sem  Ríkisútvarpið ætur dynja á okkur dag eftir dag.

visir.is (21.08.2010): Jón Gnarr, borgarstjóri Reykjavíkur, setti Menningarnótt fyrir stundu í tjaldi við Ferðamálastofu Íslands Fréttavefur Ríkisútvarpsins (21.08.2010):Menningarnótt í Reykjavík var sett í 15. sinn af Jóni Gnarr borgarstjóra klukkan 13.Germynd  á visir.is er betri óþörf þolmynd ruv.is.

   Það var eitthvað barnslega bjálfalegt við það, þegar Kjartan Magnússon  fv. stjórnarformaður Orkuveitu Reykjavíkur kom í  fjölmiðla  um helgina til að kenna öðrum um ófarir Orkuveitunnar.  Sjálfstæðismenn eru  saklausir sem ungabörn. Þetta er allt öðrum að kenna.  Það er  með ólíkindum hve  sumir  stjórnmálamenn halda kjósendur heimska.

Molar um málfar og miðla 385

  Það var vel orðað, þegar sagt var í fréttum Ríkisútvarpsins (20.08.2010) að fyrrverandi forstjóri Actavis hefði verið að bera víurnar í  fjölmarga starfsmenn Actavis, - reyna að fá þá til starfa fyrir sig. Á vef Stofnunar Árna Magnússonar er þetta orðatiltæki skýrt svona:  „Orðasambandið er að bera víurnar í einhvern eða eitthvað. Vía er egg maðkaflugunnar í fiski eða kjöti. Orðasambandið, sem þekkt er frá þessari öld, er þannig hugsað að einhver hafi ágirnd á einhverju, vilji leggja eitthvað undir sig eins og flugurnar gera þegar þær verpa í kjöt eða fisk".  Sá sem skrifaði þessa frétt fær  prik fyrir fínt orðalag.

   Sá sem  skrifaði frétt er flutt var í  morgunfréttum Ríkisútvarpsins (21.08.2010) og sagði, - þegar kjörstaðir í Ástralíu verða opnaðir, fær líka  prik. Fyrir  að segja  verða opnaðir, en ekki þegar kjörstaðir opna  eins og alltof margir  fjölmiðlungar taka til orða.

  Fyrst Molaskrifari er nú á þeim slóðum (sjaldförnu, mundu sumir líklega segja !) að hrósa fjölmiðlamönnum. lætur hann ekki hjá líða að hrósa Vísnahorni Péturs Blöndals í Morgunblaðinu. Ómissandi við upphaf dags.

Íslensk stjórnvöld höfðu vanrækt  að fullgilda ekki (samning). Þannig komst þáttastjórnandi í Útvarpi Sögu að orði (20.08.2010). Ekki mjög rökrétt hugsun. Í stíl við annað þeim bænum.

 Í Fréttabréfi Garðabæjar , 20. ágúst segir: Góð aðsókn hefur verið í Hönnunarsafn Íslands... Venja er að tala um góða aðsókn að einhverju ekki í  eitthvað.

Lengi hefur Molaskrifari látið skjáauglýsingu um gullkaup fara í taugarnar á sér. Á  skjánum segir eitthvað á þessa leið: Ég, Magnús Steinþórsson gullsmíðameistari , er að kaupa  gull, gullpeninga og gullskartgripi o.sv.frv.  Þessi auglýsing   er stundum birt með  tíufréttum Ríkissjónvarpsins og  alveg er Molaskrifari handviss um, að þá er þessi Magnús ekki að kaupa gull.  Hér ætti auðvitað að standa: Ég, Magnús Steinþórsson, gullsmiður, kaupi gull, --- ekki er  að kaupa gull.  Reyndar er þetta rétt í  þulartexta  með auglýsingunni. En það er til marks  um  málblindu þeirra, sem  stýra  birtingu sjónvarpsauglýsinga   Ríkissjónvarpsins, að þessu skuli kastað framan í okkur áhorfendur  kvöld eftir kvöld.

Visir.is (20.08.2010): Hnífurinn var beittur á annarri hliðinni og með bakka á hinni, eins og lögregla orðar það. Eins og lögregla orðar það ,segir  vefmiðillinn visir.is . Jónas Hallgrímsson orti í  frægasta ástarljóð íslenskra bókmennta:  „Háa skilur hnetti himingeimur, blað skilur bakka og egg; en anda, sem unnast, fær aldregi eilífð að skilið."  ... blað skilur bakka og egg," -  orðsins snilld í hæstum hæðum.

Molar um málfar og miðla 384

 

 Aldrei  er Molaskrifari sáttur við það orðalag, þegar sagt er að eitthvað sé komið til að vera. Finnst það enskulegt. Í  hádegisfréttum Ríkisútvarpsins ( 19.08.2010) var  sagt að hrossasóttin margumrædda væri komin til að vera. Þetta var svo endurtekið í sjónvarpsfréttum kvöldsins. Í fréttayfirliti var sagt, að veikin væri komin varanlega til landsins.  Hrossasóttin er sem sagt orðin landlæg á Íslandi.

  Í fréttum Stöðvar tvö (19.08.2010) var sagt frá hljómplötuútgáfu á Íslandi. Þar var sagt að  Svavar Gestsson hefði  gefið út plötu með  söng Fjórtán  Fóstbræðra. Það er  rangt. Svavar Gests gaf plötuna út. Hann  var tónlistarmaður og  ötull plötuútgefandi. Hann gaf  út tugi hljómplatna. Svavar Gestsson var ráðherra og seinna sendiherra. Ekki er vitað til að hann hafi gefið út hljómplötur.

  Íþróttafréttir  Stöðvar tvö (19.08.2010) voru  eins og svo oft áður mikið ambögusafn:  ... munu keppa fyrri leikinn,.....  ef Valsstúlkum takist að fara með sigur  hólmi.... Mikil meiðsli hafa verið í herbúðum íslenska liðsins... Er þá fátt eitt talið.

  Þóra Arnórsdóttir og Benedikt Ketilsson fóru á Geysi, sagði umsjónarmaður Kastljóss (19.08.2010). Ekki kann Molaskrifari að meta  forsetninguna á í þessu samhengi. Betra hefði verið að segja:  ... fóru að Geysi.

 Úr mbl.is (19.08.2010): ...fyrirskipaði að um 300 tímabundnum tjaldbúðum sígauna vítt og breytt um landið skyldi lokað. Tímabundnum tjaldbúðum ? Hér skín enskan í gegn. Hefur líklega verið: Temporary encampments. Vítt og breytt um landið. Það var og.

  Ágætur maður að nafni Eiríkur Stefánsson er einn helsti sérfræðingur Útvarps Sögu um allt milli himins og jarðar. Hann minnir  Molaskrifara um margt  á „sérfræðingana", sem í gamla daga létu móðan mása í kaffitímum, vissu allt öðrum betur,  kunnu ráð við öllu og lá stundum hátt rómur. Eiríkur vill loka öllum sendiráðum Íslands, nema þremur. Hann er með utanríkisþjónustuna á heilanum eins  fleiri á þessum fjölmiðli. Hann veit líklega ekki að þá munu önnur lönd loka sendiráðum sínum á Íslandi. Þá verða þrjú  sendiráð í Reykjavík. Við höfum örugglega meiri tekjur af sendiráðunum hér,  en sem nemur útgjöldum vegna sendiráða okkar erlendis. Enda okkar sendiráð  fámenn  og ódýr í rekstri.  Þá vill Eiríkur loka fimm íslenskum háskólum af sjö. Hann er ókunnugur þeirri staðreynd, að menntun þegnanna  er besta fjárfesting hverrar þjóðar. Auðvitað verður samt að hagræða  og  nýta fjármuni vel á öllum stigum menntakerfisins. Svona fullyrðingar eru ódýrt lýðskrum  og í ágætum stíl  við þann anda sem skapaður hefur verið í Útvarpi Sögu.

Molar um málfar og miðla 383

  Ungum blaðamanni var einu sinni ráðlagt að lesa á hverju ári  einhverja af Íslendingasögunum, ef hann vildi  taka framförum í  stíl og málnotkun. Í nokkur ár tókst að standa við þetta. Þetta  hollráð má  að skaðlausu endurtaka  og beina  til  ungs fólks sem nú fæst við skriftir í fjölmiðlum. Vaxi ungum fjölmiðlungum þetta í augum,  þá þurfa þetta ekki endilega að vera gullaldarbókmenntirnar heldur bara góðir  textar nútímahöfunda.

  Þá dettur Molaskrifara í hug að benda á  Góða dátann Svejk, eftir Jaroslav  Hasek (1883-1923)  sem hiklaust er  ein af perlum heimsbókmentanna. Þýðing Karls  Ísfelds  er hrein snilld (segi helst ekki lengur tær snilld eftir  að bankamaðurinn, höfundur Icesave, eyðilagði það orðtak). Þetta er dásamlegur texti. Konfekt (eins og góðvinur Molaskrifara segir um fína texta) orðgnóttin sjaldgæf og valdið á  tungunni traust. Ef ungu fólki vex í  augum að lesa  bókina þá er til  á 12 hljómdiskum upplestur  Gísla Halldórssonar leikara á þýðingu Karls, samtals  sextán klukkustundir. Hljóðbókaklúbburinn gaf út 1995 og á heiður skilinn  fyrir það. Lestur  Gísla  er listaverk. Magnað listaverk. Það er dauður maður,  sem Gíslí  hrífur ekki með sér  á flug og hjá Molaskrifara er skammt milli skellihlátra undir  þeirri stórkostlegu skemmtan sem það er að upplifa   Góða dátann Svejk  með Gísla Halldórssyni. 

Það er eins gott að hafa skriðstillinn við stjórnvölinn, þegar hlustað er á  Gísla lesa  Svejk í bíl  á leið  austur í sveitir.

Kjarnyrtur txti Karls Ísfelds  er  öndvegiskennari, - þeim sem vilja læra.

 Úr mbl.is (18.08.2010): Eldurinn logaði glatt í spýtuhrúgu á 2. hæð hússins þegar slökkvilið kom að. Hér hefði átt að tala um spýtnahrúgu  ekki spýtuhrúgu.

 Úr mbl.is (18.08.2010): Slökkviliðs- og sjúkrabíll eru nú á leið upp í Heiðmörk, en tilkynning barst um að heyrst hefði í mögulegu bílslysi. Alltaf heyrir maður eitthvað nýtt! Þetta orðalag hefur Molaskrifari aldrei heyrt áður.

 Blaðamaður á visir.is  skrifar (18.06.2010):Olía lak úr bílnum sem velti og var óttast að hún læki í vatnið. Bíllinn sem velti! Þetta er eiginlega  verra en smábarnamál.   Þið þurfið að bæta ykkur, Vísismenn.  Eftirfarandi er úr mbl.is  sama dag: http://www.mbl.is/mm/frettir/innlent/2010/08/18/olvun_i_heidmork/

  Úr dv.is (19.08.2010):Þeim langar að ferðast um heiminn og meðal staða sem þeim langar að fara til eru Aqaba í Jórdaníu, Kúveit, Búdapest, Marseille, Silkeborg og Baden-Baden svo einhverjir séu nefndir. Þeim langar....  Það var og.  Tuskaðu þágufallssjúklingana til, Reynir ritstjóri. Þeim langar er tvítekið  í þessari stuttu setningu !

 

Molar um málfar og miðla 382

„Ekki er kyn þótt keraldið leki, því botninn er suður í Borgarfirði", áttu Bakkabræður að hafa sagt á sínum tíma. Fréttamaður Stöðvar tvö  sagði (17.08.2010) í fréttum: ... eins og  fram hefur  komið í fréttum lak fyrirtækið seyruvökva úr rotþrónum út á vatnsverndarsvæðið á Þingvöllum. Fyrirtækið lak ekki. Starfsmenn fyrirtækisins losuðu  seyru eða seyruvökva úr  rotþróm á  vatnsverndarsvæði,  sem er  auðvitað glæpsamlegt athæfi. En heilbrigðisyfirvöld virðast ætla að taka á þessu með silkihönskum. 

  Í fréttum Ríkissjónvarpsins (17.08.2010) sagði fréttamaður: ... þá hafa  fjöldi ábendinga borist frá almenningi. Hér  hefði fréttamaður betur  sagt, -- þá hefur fjöldi ábendinga borist frá almenningi. Eða: ...þá hafa  fjölmargar ábendingar borist frá almenningi.

  Þeir sem lesa eða  segja fréttir  verða að vera skýrmæltir.  Ríkissjónvarpið sagði  frá  kóramóti (17.08.2010)  sem á vef   Ríkisútvarpsins var reyndar  kallað , 1800 manna kórmót (svo!). Ógerlegt var að  heyra hvort sá  sem flutti okkur fréttina  sagði: ... hátíðin lýkur, eða hátíðinni lýkur. Þetta var hálfgert tuldur

Eftirfarandi orðalag af pressan.is  (17.08.2010) er út í hött:... hann er grunaður um aðild við verknaðinn.  Réttara væri: .., hann er grunaður um aðild að verknaðinum.   Talað er um að eiga  aðild að einhverju, ekki aðild  við eitthvað.  

 

Makalaus er vitleysan sem  vellur upp úr fyrirferðarmestu þáttastjórnendum Útvarps Sögu, útvarpsstjóranum Arnþrúði og Pétri  Gunnlaugssyni. Dag eftir  dag tala skötuhjúin um að hér  þurfi að koma á  utanþingsstjórn og að forseti Íslands  verði að  skerast í leikinn !  Það hefur áður  verið nefnt hér  að svona bull ber vott um hyldjúpa vanþekkingu  á lýðræði, þingræði og stjórnkerfi landsins.  Það versta  við þetta er , að   til er  auðtrúa fólk,sem  trúir þessari vitleysu. Þetta er því ekki aðeins slæmt. Þetta er hættulegt.  Það er nefnilega gömul saga og ný, að sé lygi endurtekin nægilega oft,  fara margir að halda að hún sé heilagur sannleikur.

Þau Arnþrúður og Pétur  tala ævinlega  eins og á Bessastöðum sitji einvaldur,  sem  geti þegar honum svo sýnist vikið löglegri stjórn landsins frá og skipað stjórn að eigin geðþótta. Þau segja að það  væri gert í nafni lýðræðis, ef Ólafur Ragnar  tæki sig  til og skipaði utanþingsstjórn að höfðu ítarlegu samráði við sjálfan sig !

   Ólafur Ragnar hefur að vísu  haft uppi ýmsa einstæða og sérstæða  tilburði í embættistíð  sinni á Bessastöðum. En þetta vald hefur hann ekki . Guði sé lof fyrir það.

 Molaskrifari man ekki betur en Halldór Laxness hafi einhvern tíma sagt, að heimsins mesta lýgi  væri á prenti. En það var fyrir  daga Útvarps Sögu.

 Forgangsröðun stjórnenda Ríkisútvarpsins í Efstaleiti kemur  venjulegu fólki oft undarlega fyrir sjónir. Nú er  þátturinn Orð skulu standa  skorinn við trog, en fastráðnum fótboltafræðingum,sem Ríkisútvarpið svo kallar fjölgað á íþróttadeildinni.  Þátturinn Orð skulu standa  fjallar um  íslenska  tungu. Móðurmálið á ekki alltaf upp á pallborðið í upphæðum Efstaleitisins.