Molar um málfar og miðla 560

    Það hefur  orðið svolítið hlé á Molaskrifum og kemur þar einkum tvennt til. Skipt var um  innvols  í tölvu skrifara og  um  skeið var þar  allt á tjá og tundri, en komst í lag  með góðra mann hjálp  hérlendir os  erlendis.  Þá  bættist það  við  að vegna  annarra  verka og áhugamála  fóru   fréttatímar  að mestu   framhjá skrifara í 2-3  daga.  Smám saman  ættu   hlutir að færast í samt  horf.

Vert er að vekja athygli á prýðilegum Tungutakspistli  Svanhildar Kr. Sverrisdóttur  í  Sunnudagsmogga. Hún skrifar af yfirvegum  um slanguryrði og  notkun þeirra.

  Hann var svolítið sérkennilegur áttafréttatíminn í Ríkisútvarpinu (19.03.2011). Þar var prýðilegt  sagt frá því sem var að gerast í umheiminum, en  svo var eins og ekkert hefði gerst á Íslandi. Ein innlend  körfuboltafrétta ( að sjálfsögðu) og   yfirlit um veður. Ekkert var sagt frá   færð. Hafði þó  snjóað talsvert á   Suður og Vesturlandi og í höfuðborginni var óvenju mikill snjór.  Vafalaust hefur  einhverja fýst að  vita  svolítið um  færð á  vegum´, þó ekki væri nema í nágrenni  stærstu  byggðakjarna landsins.  Það hafði sem sagt ekkert  gerst á Íslandi  , nema hvað leikinn hafði verið einn körfuboltaleikur.

 Úr mbl. is (17.03.2011): Bíllinn var hlaðinn mysu og lak hún út úr bílnum og mynduðust býsna miklir mysupollar,... Það er ekki mjög vel að orði komist  að segja að bíllinn  hafi verið  hlaðinn mysu.  Betra hefði  verið að  segja að  þetta hefði  verið tankbíll að flytja mysu.

 Es. Eftir  tölvubreytinguna hjá Molaskrifara  hefur verið kvartað yfir  smáu letri á  þessum pistlum. Er svo enn?

Óheiðarleg fjölmiðlun

  Það er óheiðarleg fjölmiðlun, þegar   fjölmiðill vísvitandi  gefur  rangar upplýsingar, segir  rangt  frá  eða segir aðeins frá því sem  fjölmiðillinn telur  henta sínum málstað.  Þeir  sem hlusta á útvarp Sögu kannast við þetta. Það er  hinsvegar nýtt að   Morgunblaðið skuli nú vera  orðið óheiðarlegur  fjölmiðill. Ýmist þegir  það  yfir  staðreyndum , sem  koma  skoðunum  stjórnenda blaðsins illa eða  það ástundar að  segja  lesendum sínum hálfsannleika ,sem  gefur  alranga mynd að því sem um er fjallað.Gott  dæmi um þetta er  forsíðufyrirsögn og   frétt inni í blaðinu (18.03.2011) um  að fé  fáist til  Íslands að nýju og  erlend fjármögnun íslenskra fyrirtækja  nái skriði á ný. Tilefnið er að Norræni fjárfestingarbankinn ætlar að lána   þriðjung af framkvæmdakostnaði við Búðahalsvirkjun að því tilskyldu að takist að  fjármagna  verkið  allt.  Í umfjöllun  blaðsins er  þess látið  rækilega ógetið,sem  forstjóri  Landsvirkjunar   sagði kvöldið áður  en   Ef  Icesavesamingurinn yrði felldur, mundu lán líklega fást, en  þau yrðu  dýrari og til skemmri  tíma  en  ef samningurinn yrði samþykktur.  Í þessu tilviki ber blaðið  hálfsannleik á  borð fyrir lesendur sína  vegna þess að  hentar málstaðnum.  Þetta er óheiðarleg fjölmiðlun.   Það er  svo  líka dæmi einkennilega fjölmiðlum  í Hádegismóum þessa daga,  að  yfirlýsingu  sjö hæstaréttarlögmanna  gegn  Icesave  var hampað sem stórasannleik í blaðinu, en  þegar  átta hæstaréttarlögmenn leggja til  að Icesavesamningurinn verði samþykktur er þeim einstaklingum fundið flest til foráttu og  leiðarahöfundur  gerir  gys að málflutningi þeirra og  sakar þá  um þýlund.  Talandi um þýlund er það  svo athyglisvert að  við hlið  leiðarans  skrifar einn af blaðamönnum blaðsins pistil  til að lofsyngja  skoðanir húsbænda sinn á  á Icesave. Morgunblaðið  situr nú í innilegum faðmlögum á bekk með Útvarpi  Sögu.  Það  fer ekki illa á því..     

Molar um málfar og miðla 559

  Dyggur lesandi og velunnari Molanna sendi eftirfarandi:

Núna á allra síðustu árum, jafnvel misserum, að því er mér virðist, hefur það færst í vöxt í fjölmiðlum, einkum þó vefmiðlum, að notað sé nefnifall þegar annað fall ætti að vera samkvæmt framhaldinu. Þetta er orðið svo algengt, að helst virðist mér þetta vera annað hvort ný stefna í framsetningu ellegar faraldur. Eiginlega botna ég ekkert í þessari þróun. Mér finnst þetta ákaflega hvimleitt, að ekki sé nú meira sagt. Mjög oft er hér um að ræða nafn í upphafi málsgreinar.  Hann nefnir svo eftirfarandi dæmi:  Íranskur blaðamaður .... hefur verið bjargað úr klóm yfirvalda í  Líbíu.    (mbl.is)Það er hverju orði sannara að  dæmi um svona málfar í fjölmiðlum eru orðin óþægilega mörg og nálgast vera  daglegt brauð.  það er slæm þróun.

Fréttamaður á Stöð tvö tók svo til orða að eitthvað skipti lykilmáli  (15.03.2011). Það finnst Molaskrifara ekki vel að orði komist. Betra: Skiptir meginmáli, skiptir öllu máli,skiptir miklu máli.

 En verð á tunnu af Norðursjávarolíu til afgreiðslu í næsta mánuði seldist á rúma 110 dali við lokun markaða. Ótrúlegt að þrautreyndur þulur  skuli lesa svona  rugl í  kvöldfréttatíma Ríkisútvarpsins (15.03.2011). Verð selst ekki fyrir tiltekna upphæð. Það er út í hött að taka þannig til orða. Hér hefði  til dæmis mátt segja:  Tunna af Norðursjávarolíu til afhendingar í næsta mánuði kostaði  rúma 110 dali við lokun markaða. 

   Úr mbl.is (16.03.2011): Rekstraraðilar í samgöngumálum milli lands og Eyja telja ástæðu til bjartsýni. Allsstaðar eru   þessir   aðilar ! Rekstraraðilar í samgöngumálum. Það var og.

 Lesendum Morgunblaðsins er í auglýsingu (17.03.2011) boðin þjónusta  stóðhests. Í  fyrirsögn segir: Kveikur frá  Varmaland.Hér er bæjarnafnið Varmaland notað óbeygt. Fyrirsögin hefði átt að vera: Kveikur frá Varmalandi. 

Molar um málfar og miðla 558

  Fyrirtækið Iceland Express  fer mikinn í auglýsingum í sjónvarpi og lætur sem það sé flugfélag. Iceland Express er ekki flugfélag, það hefur ekki flugrekstrarleyfi og  það er ekki heldur  ferðaskrifstofa. Fyrirtækið er skrásett  hjá Ferðamálastofu sem „ferðaskipuleggjandi".  Það er ekki á skrá yfir  ferðaskrifstofur hjá  Ferðamálastofu. Það er heldur ekki á skrá Flugmálastjórnar Íslands yfir þá aðila sem hafa flugrekstrarleyfi. Réttindi neytenda gagnvart  svokölluðum „ferðaskipuleggjanda"  eru miklu minni en gagnvart ferðaskrifstofu eða  flugfélagi.  Neytendasamtökin ættu að láta þetta mál  til sín taka, því   það er engu líkara en Iceland Express  sé viljandi að villa á sér  heimildir. Þykjast vera það sem það er ekki. Það getur komið illa niður á  neytendum, til dæmis  ef  rekstur fyrirtækisins stövast skyndilega.

 Orðið áhafnarmeðlimur er eilíf afturganga í íslenskum fjölmiðlum. Nýjasta dæmið er  úr mbl.is (14.03.2011) : Áhafnarmeðlimum tókst að hindra tvo drukkna mexíkóska flugmenn í að fljúga flugvél, með 101 farþega innanborðs. Þarna hefði mátt tala um flugliða í stað áhafnarmeðlima.

Það er hallærislegt , að Ríkissjónvarpið skuli  í dagskrárkynningum halda því leyndu fyrir  áhorfendum við hvern  er rætt í  þættinum Í návígi. Það er eiginlega óskiljanlegt og  dónaskapur við hlustendur.

Lesandi Mola   sendi línu og gerði að umtalsefni, það sem hann  kallað „það málfarið". Hann segir: „Dæmi úr fréttum undanfarið um þetta: Fréttamaður Rúv að tala við börnin „þegar það var sleginn kötturinn úr tunnunni“, í stað „þegar kötturinn var sleginn úr tunnunni. Dæmin er mýmörg á hverjum einasta degi.  Þetta er þörf ábending. Og taki þeir nú til sín,sem eiga !

 Síðastliðið sunnudagskvöld (13.03.2011) sýndi norska sjónvarpið NRK2  hátíðartónleika  Berlínarfilharmóníunnar í þættinum Hovedscenen. Upptakan var frá í fyrra.  Tónleikarnir voru sannkallað eyrna- og augnakonfekt.  Hljómsveitinni stjórnaði Gustavo Dudamel og lettneska  mezzósópran söngkonan Elina Garanka flutti okkur hvern gimsteininn á fætur öðrum. Hún verður  aftur á skjánum í sama þætti á sunnudaginn kemur og þá í Carmen ásamt  ítalska tenórnumRoberto Alagna í frægri uppfærslu Metropolitan óperunnar í New York frá í fyrra.  Hversvegna fá íslenskir áhorfendur  aldrei að sjá  neitt þessu líkt?  Það getur ekki verið kostnaðarins vegna.  Þetta efni kostar áreiðanlega minna  en lélegur fótboltleikur. Meðan áhuginn er ekki fyrir  hendi í Efstaleiti  er það borin von að við fáum að sjá  menningarefni af þessu tagi. Menningin verður ærið oft undir íþróttunum hjá núverandi stjórnendum í Efstaleitinu.

Molar um málfar og miðla 557

    Hér hefur oftlega verið vikið að mikilvægi þess að þulir  og fréttamenn hlusti á það sem þeir lesa.  Ekki er síður mikilvægt, að  fréttamenn og þáttastjórnendur hlusti á það sem viðmælendur þeirra hafa fram að færa. Í  morgunþætti Rásar tvö (15.03.2011) var  rætt við Ágúst Valfells kjarnorkuverkfræðing um   hættuástandið í kjarnorkuverinu í  Fukushima. Ágúst   sagði að  nýjar fréttir  hermdu, að búið væri að  ráða niðurlögum hins ógnvekjandi elds  sem  logað hafði í geymslu  fyrir úrgangseldsneyti í orkuverinu.  Það var eins og  hvorki umsjónarmenn  né fréttastofan heyrðu hvað hann sagði. Fréttin um þetta  kom ekki fyrir  eyru hlustenda  fyrr en alveg  í lok áttafrétta  í morgunútvarpinu.  Þegar fylgst er með erlendum fréttamiðlum  skynjar maður að í fréttaflutningi  frá Japan  gætir hér ekki sömu yfirvegunar og hjá  fagfólki erlendra fjölmiðla. Það  gilti um  morgunþátt Rásar tvö  í morgun(15.03.2011). Þar er löngu  tímabært að  skipta um áhöfn.

  Í  sexfréttum Ríkisútvarps  og í sjöfréttum  Ríkissjónvarps 13.03.2011) var talað um rafmagnsskammtanir í Japan.  Orðið skömmtun er ekki  til í fleirtölu. Hér  hefði því átt að tala um  rafmagnsskömmtun.   Samvinna um útvarps- og sjónvarpsfréttir leiðir,  þegar verst lætur, til samnýtingar á ambögum.

 Úr mbl.is (14.03.2011): Atvikin sýni hinsvegar að geislavirk efni berist með vindstraumum frá kjarnorkuverinu.  Með  vindstraumum ?   Af hverju ekki  með vindi ?

  Í fréttum Stöðvar tvö (13.03.2011) var ítrekað talað um innkaupaverð á olíu. Málvenja er að tala um innkaupsverð.  Meira úr fréttum Stöðvar tvö (14.03.2011): Lýsingin á honum svipar þó til... las þulur  án þess að hika.  þetta er gott dæmi um fallbeygingafælni, sem nú verður æ meira áberandi. Þulur hefði átt að segja:  Lýsingunni á honum svipar  þó til ..... ...Í  morgunfréttum Ríkisútvarps  (15.03.2011) sagði fréttamaður:  Talið er að geislun geti gætt.... Þarna átti  orðið  geislun  að vera í eignarfalli, geislunar. Einhvers gætir ... geislunar gætir.

  Í  Daglegu máli í morgunþætti Rásar eitt var haldið áfram að fjalla um  Laka og Lakagíga (14.03.2011). Verið var að reifa  skýringar og  tilgátur um uppruna og merkingu  orðsins  Laki.  Umsjónarmaður hafði fengið ábendingu ,sem   tengdi orðið við eldvirkni og  sagði:  Það er  svona tekin  eldfjallafræðin á þetta.  Undarlegt orðalag. Að taka eitthvað á eitthvað. Þetta orðalag er   ekki hluti af daglegu máli Molaskrifara. Málfar í Daglegu máli á að vera til  fyrirmyndar.

Molar um málfar og miðla 556

  Sitthvað hefði mátt betur fara  í fréttatíma Stöðvar tvö á laugardagskvöld (12.03.2011).  Í fréttum af náttúruhamförunum í Japan   talaði fréttamaður um Íslendinga,sem dveldu í landinu.Betra hefði verið að tala um íslendinga  sem dveldust í landinu.  Sögnin  að valda veldur  mörgum fréttamönnum erfiðleikum. Í þessum fréttatíma sagði fréttamaður: ... flóðbylgjan, sem hefur ollið gífurlegri eyðileggingu. Hér hefði  auðvitað átt að segja. ... sem valdið hefur  gífurlegri eyðileggingu. Þá var í þessum fréttatíma talað um ævintýralega há verð á minkaskinnum.  Betur hefði farið á að tala um ævintýralega hátt verð á minkaskinnum.

    Í áttafréttum Ríkisútvarpsins  (12.03.2011) var  sagt að  minnst 1300 manns hefðu misst lífiðí náttúruhamförunum í Japan. Á íslensku tölum við um að láta lífið, ekki missa lífið. Að missa lífið er enskættað orðalag.

   Úr mbl.is (13.03.2011): ... vegna stórrar sprengingar í verinu...  Málvenja er að tala um öfluga sprengingu fremur en stóra sprengingu.

  Það er eins og  stjórnendur  fréttastofu  Ríkisútvarpsins átti sig ekki á því að það fer ekki endilega saman  að vera góður fréttamaður og að vera  góður fréttalesari eða þulur. Þetta hefur  verið einkar áberandi í   Ríkissjónvarpinu undanfarna daga.

 Í  Fréttablaðinu (12.03.2011) eru  þeir sem bera líkkistu úr kirkju kallaðir  kistuberar. Það er  rangnefni. Þeir sem, bera  kistu við jarðarför heita líkmenn á íslensku. Það er engin ástæða  til að kasta því orði fyrir  róða.

 Skrifað er á pressan.is (12.03.2011): Fundurinn var þétt setinn og þeir foreldrar sem voru mættir byrjuðu á því að kjósa nýjan ritara og fundarstjóra.  Það er út í hött að  tala um að fundur sé þétt setinn.  Fundur getur  verið vel  sóttur, fjölmennur. Salur getur verið þétt setinn.

Molar um málfar og miðla 555

  Eftirfarandi er úr nýrri samþykkt Búnaðarþings: :„Búnaðarþing telur að fæðuöryggi þjóðarinnar verði því aðeins tryggt að fullu með því að Ísland standi utan sambandsins".  Sambandið sem hér er talað um er auðvitað Evrópusambandið,ESB. Þessi fullyrðing  er  hinsvegar svo gjörsamlega sambandslaus  við veruleikann og almenna, heilbrigða  skynsemi  og svo utangátta að með ólíkindum er.  Meira að segja Staksteinahöfundur  Moggans, sem lítur á flestar samþykktir bændaforystunnar gegn ESB sem guðlegar opinberanir, hefur  ekki haft kjark til að nefna þessa firrusamþykkt.  Enginn íslenskur  fjölmiðill, að því Molaskrifari best veit, hefur  beðið  forystu  bændasamtakanna að  reyna að útskýra  þessa dæmalausu vitleysu. Metnaðarleysi  fjölmiðlamanna er stundum alveg makalaust.

Í Fréttatímanum (11.-13.03) segir: Velgengni myndarinnar Okkar eigin Ósló, ríður ekki við einteyming. Það þykir hvorki gott né  gæfulegt að ríða við  einteyming.  Þess vegna er þetta orðtak  í íslensku jafnan notað um það sem  þykir  slæmt eða ógæfulegt, t.d.  lánleysi þessa manns ríður ekki  við einteyming, þegar einhver  ítrekað  verður   fyrir  einhverri ógæfu.

 Í kynningu á  efni  Kastljóss  (11.03.2011) var sagt: ... tefldi blindandi  við...  Ástæðulaust  er að láta hið ágæta orð  blindskák, að tefla blindskák, falla í gleymskunnar dá. Það gerir málið  fátæklegra.

 Ekki   virðist um auðugan garð að gresja, þegar kemur að því að velja þáttastjórnendur í Ríkissjónvarpinu. Sigmar Guðmundsson stjórnar Kastljósi og Útsvari. Egill Helgason stjórnar Kiljunni og  Silfri Egils. Þórhallur  Guðmundsson stjórnar  Í návígi  á þriðjudagskvöldum og Hvert stefnir Ísland  , en sá þáttur er sýndur á miðvikudagskvöldum.  Þetta  er ágætisfólk, en  hér sakaði ekki  að hafa örlítið meiri breidd.

 Þjófar strípuðu einbýlishús á Suðurnesjum, segir á   vef Ríkisútvarpsins (11.03.2011). Þjófar hirtu allt innan úr  einbýlishúsi á Suðurnesjum hefði verið betra. Þannig var raunar tekið  til orða annarsstaðar á vefnum.

 Í  fréttum Ríkissjónvarpsins (11.023.2011) var sagt : Jóhanna segir þessar aðgerðir svipa til..... Hér  hefði átt að segja: Jóhanna segir þessum aðgerðum svipa til....  Einfalt.

Molar um málfar og miðla 554

  Í fréttum Ríkissjónvarps (09.03.2011) sagði fréttamaður: ... ekki að taka á innflytjendum neinum vettlingatökum.  Molaskrifari hefði kunnað því betur, ef  fréttamaður hefði sagt: ... ekki taka innflytjendur neinum vettlingatökum.

  Það var gott framtak hjá Ríkissjónvarpinu að sýna okkur útsendingu japanska sjónvarpsins NHK  frá hinum hrikalegu  hamförum,sem gengið hafa yfir  Japan. 

 Í tengslum við handtökur  Kaupþingsmanna í Bretlandi  talaði fréttamaður Stöðvar tvö  (09.03.2011) um stórar aðgerðir. Betra hefði verið að tala um umfangsmiklar aðgerðir.  Í sama fréttatíma  sagði fréttaþulur: ... kostnaður við  ferðalög  forsetahjónanna til útlanda voru samtals  tíu milljónir.... Kostnaður  voru ekki , kostnaður var. Undarlegt að reyndur  þulur skuli ekki heyra sig   lesa    svona ambögu.

 Í morgunútvarpi Rásar eitt (11.03.2011) var  rætt  við  mann,sem  titlaður var frumkvöðull , en  hann hafði  komið á fót  fyrirtæki  sem  annast milligöngu um leigu á  sumarbústöðum.  Hefur  ekki slíkt  fyrirtæki verið  starfandi hér í nokkur ár? Molaskrifari man ekki betur, en ef til vill er það misminni.

 Vinstri græn  vilja  tækla ofurlaun með sköttum, segir í fyrirsögn á  dv. is.  Þetta er  ekki  boðleg íslenska í fyrirsögn á íslenskum  vefmiðli.  Fyrirsögnin er blaðsins. Hún er ekki frá  vinstri grænum.  Að tækla er slangur hjá íþróttafréttamönnum. Sögnin á ekkert erindi  í okkar daglega mál. 

 

 Það á að  vera hægt að treysta því að  fjölmiðlar segi    satt og  rétt frá. Útvarp Saga  getur ekki einu sinni  sagt hlustendum sínum rétt frá því hvað klukkan er, hvorki hér á landi  né  annarsstaðar. Í morgunútvarpi Útvarps  Sögu  (11.03.2011) var sagt að klukkan  væri  að verða hálf níu. Þá var klukkan að verða  hálfátta. Örstuttu  síðar var verið að  fjalla um jarðskjálftana í Japan og  sagt: Nú er  nótt þar. Þá var klukkan í Japan  16 30  eða hálf  fimm síðdegis.  Meira ruglið.

 Molaskrifari þykist ekki vera nein pempía, en bæklingur sem   stungið var inn um póstlúguna á heimili hans  frá  Fjölbrautaskólanum í Garðabæ reyndist  við skoðun langt handan  við velsæmismörkin. Í bæklingnum er  verið að kynna  söngleik  sem  nemendur skólans setja á svið og þar eru birtir  textar úr  söngleiknum.  Í sem skemmstu máli eru textarnir að uppistöðu subbulegt klám á hrognamáli. Bæklingurinn verður endursendur  til skólans.  Hann ætti ekki að liggja á glámbekk (Klámbekk?) á heimilum þar sem börn eru.  

Molar um málfar og miðla 553

  Íþróttafréttamaður  Ríkisútvarps , sagði í sjónvarpsfréttum (08.03.2011) : .. segir að stjórn Bayern bíði erfitt hlutverk. Fréttamaðurinn hefði átt að  segja: ... segir að stjórnar Bayern bíði  erfitt hlutverk.

 Í Útvarpi Sögu var rætt við mann,sem þýtt hefur bók um mannsheilann. Hann ræddi þróun mannsins og  sagði:  Og  svo kemst maðurinn  á tvær fætur !. Ekki lofar það góðu um þýðinguna.

Slúðurvefurinn amx birtir (09.03.2011)  nöfn nokkurra hæstaréttarlögmanna ,sem  eru sagðir  andvígir  Icesave  samningnum. Á  eftir  nöfnunum stendur: Við þetta er ekkert að bæta.  Það var og !

 

 Molaskrifari kann Birgi Erni Birgissyni  bestu þakkir  fyrir  eftirfarandi:

„Þegar þyrlan kom að japanska skipinu sáu sjóræningjarnir sína  sæng útbreidda": „http://visir.is/sjoraeningjar-gafust-upp/article/2011110308889

Sjá má umfjöllun um þetta hér:
http://www.mbl.is/mm/gagnasafn/grein.html?grein_id=602543

,,Jón Ísberg bekkjarbróðir minn sendi mér klippu héðan úr Mbl., alþingissíðunni 31. mars. Þar er orðalag sem við Jón kunnum ekki við. Verða nú hjá umsjónarmanni nokkrar málalengingar. Sæng merkti áður fyrr hvíla, hvílurúmið allt, ekki aðeins yfirbreiðslan eins og nú. Að reiða upp sæng merkti að búa um rúm. Stundum notuðu með orðið sæng í merkingunni banasæng eða að minnsta kosti kör og sögðu um þann sem átti ekki annað eftir en vanlíðan og dauða, að hann sæi sína sæng upp reidda. Vandlega er um þetta fjallað í marglofaðri bók próf. Jóns G. Friðjónssonar (Mergur málsins).

Alkunna er að orðtök breytast oft vegna misheyrnar, og svo fór um orðtakið að sjá sína sæng upp reidda. Það breyttist í að "sjá sína sæng út breidda" eða í einu orði "útbreidda". Síðan átti merkingin eftir að breytast. Menn áttuðu sig ekki á að þetta þýddi að "horfast í augu við endalokin", eins og próf. Jón orðar það. Menn fóru jafnvel að halda að merkingin væri góð og þetta þýddi að sjá sér gott færi á einhverju. Ég held að vitleysan hafi byrjað í lýsingum á knattspyrnuleikjum. Þá var stundum sagt, ef menn komust í gott marktækifæri, að þeir hefðu séð sína sæng "útbreidda". Merkingarbreytingin gat varla verið gertækari.

Þá komum við Jón Ísberg aftur að Morgunblaðsgreininni frá 31. mars. Þar sagði um tiltekinn þingmann, að hann hefði greinilega séð sína "sæng útreidda", þegar skýrsla Þjóðhagsstofnunar kom út og miklum viðskiptahalla spáð. Þetta er sama öfugnotkunin og hjá knattspyrnumönnum. Nær lagi hefði verið að segja, að ríkisstjórnin hefði séð "sína sæng upp reidda", af þessu tilefni"

 

Molar um málfar og miðla 552

  Molaskrifari spáði því í gær í  Fésbókarfærslu (09.03.2011), að  fréttin um Gallup-könnun ,sem sýndi 63% stuðning við Icesave  yrði eindálkur neðst á áttundu síðu í Mogganum í dag (10.03.2011). Ekki fjarri lagi. Fréttin er  á áttundu síðu, neðst, tvídálkur   (6sm). Mogginn bregst ekki.  Faglegt fréttamat fyrirfinnst ekki í Hádegismóum. Nú er aðalmálið í leiðara blaðsins, ekki efni Icesave samningsins, heldur hvað samninganefndarmenn fengu greitt  fyrir vinnu sína !   Nú skiptir það öllu máli. Það er illa komið fyrir gamla Mogga.

  Af pressan is (08.03.2011): Sigmundur Ernir segir að mönnum greini á um hvort um fyrirmæli eða tilmæli hafi verið um að ræða af hálfu forsætisráðherra.  Þrálát sýki, þágufallsýkin.  Hér hefði átt að standa: Sigmundur  Ernir segir að menn greini á um .....

    Nú sagði Ríkissjónvarpið okkur  frá seinkun  seinni frétta (09.03.2011) með  skjáborða og baðst velvirðingar á seinkuninni í upphafi  fréttatímans. Batnandi manni er best að lifa. Prik fyrir það.

 Fínt  viðtal  Egils  við níræðan dr. Pétur M. Jónasson í Kiljunni (09.03.2011). Pétur hefur eiginlega  ekkert breyst  síðan við  vorum að drekka kaffi saman í Þórshamri svona í kringum 1983-4.

Í  fréttum Ríkisútvarpsins (07.03.2011) var vitnað í skýrslu starfshóps um sameiningu tveggja skóla í Breiðholti. Í skýrslu starfshópsins  sagði: ... að jafna samfélagsleg viðhorf til skólanna. Molaskrifari játar að  hann hefur  ekki minnstu hugmynd um hvað þetta þýðir og grunar  reyndar að svo sé um fleiri.

  Íþróttafréttamaður  Ríkisútvarps , sagði í sjónvarpsfréttum (08.03.2011) : .. segir að stjórn Bayern bíði erfitt hlutverk.Fréttamaðurinn hefði átt að  segja: ... segir að stjórnar Bayern bíður  erfitt hlutverk.

 Það vantaði  einhvern neista, einhvern kraft , einhverja gleði,  í  afhendingu   Íslensku tónlistarverðlaunanna  sem Ríkissjónvarpið sýndi í beinni útsendingu úr Þjóðleikhúsinu (08.03.2011). Þunnskipað var í salnum, - það er lítið mál að  fylla ekki stærri sal en Þjóðleikhúsið. Það krefst bara svolítillar skipulagningar.   Margir verðlaunaþegar voru fjarstaddir.   Mikið vantaði á að   viðstaddir  sýndu  viðburðinum  virðingu í klæðaburði.  Við  eigum  gríðarlega mikið af  frábærum listamönnum á  sviði  tónlistar og tónlistarlíf  í landinu er í blóma, þótt Besti flokkurinn og Samfylkingin  reyni að  skaða  tónlistarmenntun í Reykjavík. Þarna er  hægt að gera  miklu betur og  gera þessa  verðlaunaafhendingu að alvöru viðburði. Það sem við sáum í sjónvarpinu var það ekki.

 Morgunblaðið lifnar við með Símanum auglýsir  Morgunblaðið (09.03.2011). Bragð er að þá barnið finnur. Var blaðið þá  dautt eða hálf dautt, fyrst það er að lifna  við?  Endur fyrir löngu  hélt  Alþýðuflokksfélag Reykjavíkur  árshátíð í Lídó, þar sem er  er aðsetur  365 við  Skaftahlíð.  Alþýðublaðið  birti mynd  af   árshátíðargestum á dansgólfinu í Lídó  undir fyrirsögninni: Líf í tuskunum í Lídó. Þetta fannst Mogganum skemmtilegt. Líf í kratatuskunum í Lídó, sagði Mogginn, sem  nú er að lifna úr einhverskonar dái, - eða hvað ?