Molar um málfar og miðla 1749

 

ALLT UNNIÐ FYRIR GÝG?

Þannig spyr K.Þ. í  bréfi til Molanna (08.07.2015). Hann sendir þessa tengingu: http://eyjan.pressan.is/frettir/2015/07/08/oli-bjorn-thingid-hefur-hvorki-tima-ne-thekkingu/

"Óli Björn rekur upp störf nýliðins Alþingis ... "

 Og  bætir við: ,,Þar fór í verra!”- Molaskrifari þakkar ábendinguna og nefnir að ekki væri verra  á stundum að geta rakið  upp það sem prójónað hefur verið á þinginu!

 

STAÐSETNING

Tveir björgunarbátar eru staðsettir á brúarþakinu,  var sagt í hádegisfréttum Bylgjunnar (08.07.2015). Þarna  eru orðinu  staðsettir ofaukið. Það er óþarft.  Tveir björgunarbátar eru á brúarþakinu.  Í sömu frétt var talað um áhafnarmeðlimi. Eins og svo oft. Orðið skipverji er  fallegra.

 

UPPHAF ALDA?

Frá upphafi alda var sagt í auglýsingu um kvikmynd á Stöð tvö  (08.07.2015) að því Molaskrifari best gat heyrt. Þar hefur auglýsandi eða auglýsingastofa sennilega ruglað saman tveimur orðtökum , -  frá upphafi vega, -  frá örófi alda.  Frá alda öðli. Frá ómunatíð.

 

ÁIN UM ÁNA

Úr frétt af visir.is (08.07.2015): Það er óhætt að segja að það sé góður gangur í Norðurá en mikill kraftur er í göngunum í ánna. Hér  hefði auðvitað átt að segja að mikill kraftur væri í göngunum í ána.  Þetta er býsna  algeng villa, - kemur einnig oft fyrir í orðunum brú  og skór , þegar þau eru notuð með ákveðnum greini.

 

VERÐMÆTI

Í morgunfréttum  Ríkisútvarpsins (08.07.2015) var orðið  útflutningsverðmæti notað í fleirtölu. Hefði að mati  Molaskrifara átt að vera í eintölu. Í sömu frétt var okkur  sagt að  makríl  frumvarpið, svo nefnda, yrði  ekki afgreitt  fyrr en  á næsta þingi. Liggur það ekki í augum uppi, þar sem þingfundum hefur verið frestað til hausts?

 

 

KÆRULEYSI

Í fréttum  Stöðvar tvö (08.07.2015)  var sagt: Undiskriftasöfnunin  Þjóðareign lýkur á morgun. Söfnunin lýkur ekki.  Söfnuninni lýkur.  Það   byrja ekki allar setningar í nefnifalli eins og  sumir fréttamenn virðast halda. Áhrifssagnir stýra föllum.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1748

VER OG VERBÚÐ

Molavin skrifaði (08.07.2015): - ,, ,,Um svo­kallaða ver­búð er að ræða, en Eyþór tel­ur að frá miðöld­um og allt til land­náms hafi fólk komið í verið, róið þaðan til sjáv­ar og sótt fisk sem síðan var færður aft­ur í verið og verkaður." Þessi texti er úr Morgunblaðinu 8. júlí. Blaðamaður (barn?) reiknar með því að lesendur þekki ekki orðið "verbúð" né það að fara í verið. Hugulsamt hjá honum að útskýra þetta skrýtna ferli og þá kenningu Eyþórs að slíkt hafi byrjað á miðöldum og verið stundað allt fram til landnáms!”

Molaskrifari þakkar bréfið. Þetta er alveg dæmalaus texti.

 

AÐ DRÚPA OG AÐ DRJÚPA

Úr fréttum Ríkisútvarps kl 01 00 og af fréttavef Ríkisútvarps (08.07.2015): Aleksandar Vucic segir tímabært að horfast í augu við það sem gerðist og drjúpa höfði fyrir fórnarlömbum annarra þjóða. Fréttaskrifarar verða að skilja og þekkkja merkingu þeirra orða sem þeir nota. Sögnin að drjúpa þýðir að falla eða leka í dropum, í dropatali. Drjúpa, draup, drupum, dropið.

Orðtakið að drúpa höfði er að vera gneypur, sitja álútur, lúta höfði í virðingarskyni, vera hryggur. Drúpa, drúpti.

Þessum tveimur sögnum er reyndar oft ruglað saman, en fréttaskrifarar í Efstaleiti eiga að hafa þetta á hreinu.

Hvar er metnaður fréttastofu Ríkisútvarpsins? Hvar er vandvirknin sem við eigum kröfu til að sé til staðar í fréttaskrifum þessarar þjóðarstofnunar? http://www.ruv.is/frett/vucic-minnist-fornarlamba-i-srebrenica Jafnvel þótt sögnin að drúpa hefði verið á sínum stað finnst Molaskrifara orðalagið fyrir fórnarlömbum annarra þjóða orka tvímælis,, - að ekki sé meira sagt.

 

ENN OPNA KJÖRSTAÐIR

Í Ríkisútvarpinu er maður, sem betur fer, eiginlega hættur að heyra að kjörstaðir hafi opnað eða kjörstaðir hafi lokað. Þetta er orðalag er hinsvegar enn í góðu gildi á Bylgjunni (05.07.2015). Þar var sagt í fréttum á sunnudagsmorgni um þjóðaratkvæðagreiðsluna í Grikklandi, - kjörstaðir opnuðu í morgun, svo var líka talað um að markaðir opnuðu. Kjörstaðir í Aþenu opnuðu klukkan sjö í morgun, sagði fréttamaður í fréttum Stöðvar tvö um kvöldið.

Í sama fréttatíma Bylgjunnar talaði fréttamaður um stúlkunar (stúlkurnar). Hann sagði líka árásarmenninir (árásarmennirnir). Þetta ætti talkennari auðveldlega að geta lagað.

 

AÐ SNÚA AFTUR

Af mbl.is (06.07.2015): Þró­un­in var ör hjá fyr­ir­tæk­inu þar sem Shufu skipti yfir í mótor­hjóla­fram­leiðslu árið 1993 en lagði svo bíl­ana fyr­ir sig árið 1997 og hef­ur ekki snúið aft­ur. Ekki verður sagt, að þetta sé lipurlega þýtt eða orðað. http://www.mbl.is/vidskipti/frettir/2015/07/06/milljardamaeringur_med_biladellu/

 

 

ÓSKEMMTILEGT

Í útvarpskynningu á sjónvarpsþættinum Sumardögum (08.07.2015) , segir stúlkurödd, að það skemtla við þetta sé ... Það skemmtilega á hún við. Þessi framburður heyrist að vísu stundum ,en hann á ekki heima í Ríkisútvarpinu. Enda er hann óskemmtilegur.

 

HRÓSIÐ

Mikið er hún Anna Sigríður Einarsdóttir á Rás eitt, góður þulur. Leitun að betri og áheyrilegri þul.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1747

Molavin skrifaði (06.07.2015): ,,Morgunblaðið segir í fyrirsögn og frétt ( http://www.mbl.is/frettir/erlent/2015/07/06/georg_spegilmynd_fodur_sins/ ) 6. júlí að Georg prins, sonur Vilhjálms prins, hertoga af Cambridge, sé "spegilmynd föður síns." Ég sé að í enskum fjölmiðlum hefur snáðinn verið sagður vera "spitting-image" föður síns og þá er það nú málvenja hér að tala um "lifandi eftirmynd föður síns." Hins vegar hefur líka verið sagt í þarlendum miðlum að ýmsum þyki Katrín hertogaynja, móðir drengsins, vera "mirror-image" Díönu prinsessu heitinnar, tengdamóður sinnar. En þar er fremur átt við hvernig hún gegnir hlutverki sínu.”. Molaskrifari þakkar bréfið. Hann hnaut reyndar einnig um þetta orðalag.

- Molavin bætti svo við í öðru bréfi sama dag:,, Heyrði í hádeginu að Netmoggi hefði líka talað um að barnið hafi komið til kirkju í "pramma." Það nálgast að vera jafnoki kryddsíldarveizlunnar. (,,Princess Charlotte was pushed to her christening in a vintage pram the Queen used for two of her own children...). Það mun víst hafa verið leiðrétt, en sumarbörnin hafa nóg að gera á Mogganum” - Þakka bréfið. Þær bregðast ekki þýðingarnar hjá Mogga!

Orðið pram er notað um barnavagn á ensku. Það er stytting á orðinu perambulator, komin til sögu síðla á nítjándu segir orðabókin mín. Molaskrifari var einmitt að horfa eftir því hvort þessi virðulegi barnavagn, sem var greinilega ekki glænýr, væri af gerðinni Silver Cross, sem í gamla daga svona upp úr og eftir 1950  var það  fínasta fína, - kádiljákurinn meðal barnavagna. Sýndist svo reyndar ekki vera.

 

Innan við tuttugu manns ,,á annan tug” efndu til Grikklandsmótmæla á Lækjartorgi á sunnudag (05.07.2015). Í fréttum Ríkisútvarps bæði klukkan 16 00 og klukkan 18 00 var sagt frá þessum mótmælum, ekki bara með frétt heldur og viðtali. Þessi 12-14 manna hópur fékk einnig ríflega umfjöllun í fréttum Ríkissjónvarps um kvöldið. Viðmælandi viðurkenndi  að vita  lítið um ástandið í Grikklandi.   ,, Ég veit ekkert alveg hvernig ástandið er þar ....”. Einhverra hluta vegna fóru mótmælin fram á ensku. Einn mótmælenda sagði: ,,Við komum hérna saman og vonum að ísland segi nei í þessari þjóðaratkvæðagreiðslu”, haft  eftir mótmælenda á fréttavef Ríkisútvarpsins. Hafði Ísland atkvæðisrétt? Meiri þvælan.

Undarlegt fréttamat. Það þarf ekki mikið til að komast í ríkisfréttirnar.

 

Mjög gott viðtal við Salvöru Nordal í Sprengisandi Sigurjóns M. Egilssonar  á Bylgjunni (05.07.2015), Vonandi hafa þingmenn og ráðherrar hlustað, ekki síst á það sem hún sagði um valdið og aflið. Og um illa undirbúin mál sem koma inn á Alþingi. Gæti vel hugsað mér að hlusta á þetta aftur. Hef oft hugsað til þess sem Salvör sagði á blaðamannafundinum í Iðnó um rannsóknarskýrslu Alþingis. Hún sagði efnislega : Á Íslandi er landlægt virðingarleysi fyrir lögum og reglum. - Það er mikið rétt.

 

- Þeir eru einbeittir í því sem þeim langar til að gera, sagði sá sem, vill að Kínverjar reisi álver við Húnaflóa, í hádegisfréttum Ríkisútvarps á sunnudag (05.07.2015).

 

Úr frétt á mbl.is (02.07.2015) Þennan heiður, sem tímaritið veitir árlega, þykir öllum bílsmiðum eftirsóknarverður. Hér hefði fremur átt að standa: ,,Þessi heiður, sem tímaritið veitir árlega, þykir öllum bílasmiðum eftirsóknarverður”. http://www.mbl.is/bill/frettir/2015/07/02/bill_arsins_hja_auto_express/

Og enn auglýsir stórverslunin Víðir lambalærisútsölu (Bylgjan 05.07.2015) . Það virðist ganga fremur treglega að koma þessu blessaða læri út!

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1746

K.Þ. skrifaði (05.07.2015): ,,Á heimasíðu Vísis (http://www.visir.is/forsida ) er tengill á eina fréttina ritaður þessum orðum: Hnífjafnt á mununum. Þjóðaratkvæðagreiðslan í dag og niðurstöður hennar er stærsta verkefni evrusamstarfsins til þessa.http://www.visir.is/grikkir-ganga-til-atkvaeda-i-dag/article/2015150709521

Ég sé þetta orðalag ekki í fréttinni sjálfri. Ég kannast við orðalagið mjótt á mununum, en orðalagið jafnt á mununum (eða jafnvel hnífjafnt) er nýtt fyrir mér.”  Þakka ábendinguna, K.Þ. Hvorki heyrt þetta né séð áður.

 Á þriðjudag í síðustu viku (30.06.2015) birti hið svokallaða Smartland Mörtu Maríu á fréttavef Morgunblaðsins mbl.is pistil undir fyrirsögninni: Að veita karlmanni guðdómleg munnmök. http://www.mbl.is/smartland/samskipti/2015/06/30/ad_veita_karlmanni_guddomleg_munnmok/

 Er þetta nýr liður í fræðslu- upplýsingastefnu Morgunblaðsins? Ný ritstjórnarstefna? Er þetta birt með fulltingi og blessun ritstjóra blaðsins? ( Hér varð Molaskrifara næstum á að verða sekur um afar slæma innsláttarvillu, - skrifaði óvart risstjóra). Molaskrifari er ekki sérlega hneykslunargjarn, - en á hvaða leið er Morgunblaðið?

 

Hraðlestin styrki alla flugvallarkosti sagði í fyrirsögn á fréttavef Ríkisútvarpsins í sl. viku (29.06.2015). http://www.ruv.is/frett/hradlestin-styrki-alla-flugvallakosti

Enn ein sönnun þess, að sumir, sem skrifa handa okkur fréttir hafa ekki vald á notkun viðtengingarháttar. Hér var átt við að fyrirhuguðuð hraðlest milli höfuðborgarinnar og Leifsstöðvar mundi styrkja alla flugvallarkosti.

En verði það svo, að þessi fyrirhugaða lest ( sem aldrei mun geta borið sig samkvæmt trúverðugum útreikningum) eigi að stoppa á fjórum stöðum á leiðinni suður á Miðnesheiði verður vafalaust tímasparnaður í því að fara á bílnum eða taka rútu suður eftir fyrir flesta íbúa höfuðborgarsvæðisins.

 

Í hádegisfréttum Bylgjunnar (04.07.2015) var sagt frá þremur piltum sem lögreglan hafði staðið að þjófnaði. Málið var afgreitt til aðkomu foreldra, las fréttaþulur óhikað. Foreldrar piltanna voru kallaðir til hefði verið betra orða orðalag.

 

Í morgunfréttum Ríkisútvarps klukkan níu (04.07.2015) var sagt frá flóttafólki, sem reyndi að komast frá Calais í gegn um Ermarsundsgöngin yfir til Bretlands. Sagt var að fólkið hefði hópast saman við munna gangnanna. Undarlegt að fólk sem starfar við fréttaskrif skuli ekki hafa það á hreinu að fleirtalan af orðinu göng er ganga. Fleirtalan af orðinu göngur er gangna. Þetta hefur verið nefnt svona tíu sinnum og skýrt út hér í Molum. Þetta var rangt lesið þennan morgun en rétt  ( leiðrétt, væntanlega ) í skrifuðum texta á vefnum. Málfarsráðunaut Ríkisútvarpsins skortir ekki verkefni. Níu fréttirnar í morgunútvarpi eru einhverra hluta vegna ekki aðgengilegar á vef Ríkisútvarpsins.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

Molar um málfar og miðla 1745

Málglöggur Molalesandi spurði hvort skrifari hefði misst af þessari málfarslegu dvergasmíð: http://vb.is/frettir/118629/

Fyrirsögnin í Viðskiptablaðinu (03.07.2015) er svona: Skortur á efnislegum gæðum dregst saman. !!! Satt er það að þessi fyrirsögn er aldeilis óvenjuleg dvergasmíð! Það gildir raunar um alla fréttina. Enginn les yfir, -  ekki á þessum bæ, frekar en öðrum. Molaskrifari þakkar ábendinguna.

 

Rafn skrifaði (29.06.2015): ,,Sæll Eiður

Hvað skyldi „fiskiolía“ vera? Ég þykist geta ráðið í, að fiskolía sé hrá barnaþýðing á því sem enskumælandi kalla „fish oil“, en við íslendingar lýsi. Hina vegar er mér alls óljóst hvað fiskiolía (= veiðiolía) getur verið, en væntan lega er það eitthvað feitmeti, sem nýtt er til fiskjar (= fiskveiða).

Jafn torræð eru ýmis önnur ámóta orð, eins og „fiskikóngurinn“ [væntanlega =aflakóngur], „fiskisúpa“ og viðlíka orðmyndir.”

 Molaskrifari þakkar Rafni bréfið. Orðið fiskiolía er notað í þessari frétt af mbl.is (29.06.2015): http://www.mbl.is/frettir/innlent/2015/06/28/kaflarnir_ordnir_feitir_af_oliu/

 

Á fimmtudagskvöld (02.07.2015) var þátturinn Sumardagar sendur út frá Akranesi,. Einn af svokölluðum ,,Hraðfréttamönnum” Ríkissjónvarps ræddi þar við bæjarstjórann á Akranes, Regínu Ásvaldsdóttur,sem hann aftur og aftur kallaði bæjarstýru. Á heimasíðu Akranesbæjar er starfsheiti Regínu bæjarstjóri. Það var réttilega notað í fréttum Ríkisútvarps klukkan 1800 daginn eftir.

 

Í íþróttafréttum (Ríkisútvarps eða sjónvarps) 30.06. var talað um liðið sem sigraði leikinn með fimm mörkum gegn einu. Málfarsráðunautur Ríkisútvarpsins þarf að herða róðurinn. Það sigrar enginn, hvorki leik né keppni. Og svo var talað um nokkur lið í þéttum pakka. Þeir eru margir pakkarnir hjá íþróttafréttamönnum!

 

Á laugardag (04.07.2015) var á dagskrá Rásar eitt rétt strax eftir hádegið sjötti þátturinn, já, sjötti klukkutíma þátturinn af tíu um popparann Michael Jackson, sem sumum þótti merkilegur. Molaskrifara fannst hann þó aðallega vera fyrirbæri. Þetta er ansi vel í lagt. En er þetta ekki dæmigert efni fyrir Rás 2 ?  Molaskrifari hallast að því.

 

Bráðskemmtilegur þáttur Ómars frá 1995, Þegar allt gekk af Kröflunum endursýndur í Ríkissjónvarpinu á sunnudagskvöld (05.07.2015) Saga Kröfluelda og helstu atburðir áranna rifjaðir upp. Gaman að sjá Vimma, Vilmund Gylfason, í essinu sínu. Ýmislegt rifjaðist upp. Hafði ekki séð þetta áður, enda við störf erlendis 1995, þegar þátturinn var settur saman. Góð skemmtun og fróðleikur.

 

Molaskrifari er nýbúinn að heimsækja Færeyjar í fáeina daga.  Eftir þá heimsókn er honum enn betur ljóst en áður hve Ríkissjónvarpið gerði þessum frændum okkar rangt til með því að kaupa og kosta hina dæmalausu Andraflandursþætti um Færeyjar. Þeir Færeyingar sem Molaskrifari hitti og höfðu séð þættina voru ekki hrifnir. Vægt til orða tekið. – Hvað skyldi þetta annars hafa kostað Ríkisútvarpið?

 Nú þarf Ríkissjónvarpið að gera bragarbót. Best væri, ef Egill Helgason og hans ágæta dagskrárgerðarfólk færi til Færeyja, gerði nokkra þætti, sem gerðu mannlífi og menningu í eyjunum átján verðug skil. Það hlýtur að vera til svolítið fé til alvöru dagskrárgerðar. Egill og hans fólk mundu gera þetta vel. Mætti til mótvægis í peningamálum sleppa nokkrum Hraðfréttaþáttum á næsta ári. Það væri bættur skaðinn.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

Molar um málfar og miðla 1744

Hann vill ekki taka afstöðu um hvort ..., sagði nýiliði á fréttastofu Ríkisútvarpsins í tíufréttum á föstudagskvöld (26.06.2015). Hann vill ekki taka afstöðu til þess hvort .... Hvaða málfarskröfur eru gerðar til nýliða? Hvað fá þeir mikla þjálfun áður en þeir eru settir fyrir framan opinn hljóðnema?

 

Í hádegisfréttum Ríkisútvarps á laugardag (27.07.2015) sagði fréttamaður ( fréttin var um Grikkland) að engin hætta væri á að bankar lokuðu. Skyldi málfarsráðnautur hafa rætt notkun sagnarinnar að loka við fréttamenn? Hér hefði verið eðlilegra að segja að engin hætta væri talin á að bönkum yrði lokað.

 

Alltaf er gott þegar misfellur eða ambögur eru leiðréttar. Í morgunfréttum Ríkisútvarps klukkan sjö (28.06.2015) var okkur sagt að listamenn mundu stíga á stokk, þegar efnt yrði til hátíðahalda vegna þess að 35 væru liðin frá því að Vigdís Finnbogabóttir var kjörin forseti Íslands. Í næsta fréttatíma var búið að leiðrétta þetta og þá var talað að listamenn mundu stíga á svið. Stundum gengur þótt hægt fari! Menn stíga á stokk til að strengja heit, ekki til að syngja eða flytja tónlist.

Í útvarpsfréttum klukkan 2200 (28.06.2014) var okkur sagt að hátíðahöld til heiðurs Vigdísi Finnbogadóttur ( þar sem ÓRG núverandi forseti var áberandi vegna fjarveru sinnar) hefðu verið á Austurvelli. Í sjálfu Ríkissjónvarpinu sást ágæta vel að hátíðin var við Arnarhól! Ekki á Austurvelli. Það var svo endurtekið í fréttum á miðnætti að samkoman á Arnarhóli hefði verið á Austurvelli!  

 

Auglýsingastofum hefur tekist að troða ensku slettunni TAX FREE inn í auglýsingar ótaldra fyrirtækja. Þetta er í mikilli sókn og heyrist æ oftar. Engin leið virðist að standa gegn þessu. Þarna hefur verið unnið óþurftarverk. Ágæt íslensk orð eru til sem nota mætti: Afsláttur og verðlækkun eru tvö dæmi. Það er eins og verið sé koma því inn hjá fólki að það sé að versla í fríhöfn! Rangt . Önnur enskusletta sem er í sókn er outlet, verslun þar sem flest eða allt er á niðursettu, hagkvæmu verði. Meira að segja Hagkaup er farið að auglýsa outlet! Við þurfum að losna við þessar slettur.

 

Enn er það svo, að á Rás eitt er mikið af afar vönduðu og vel unnu efni. Jafnvel þótt íþróttadeildin hafi hrifsað til sín of mikið dagskrárvald í stofnuninni og virðist þar einskonar ríki í ríkinu.

Einn er þó sá ljóður á ráði Rásar eitt,sem Molaskrifara gengur illa að sætta sig við. Það eru tilgerðarlegar og stundum illa lesnar auglýsingar. Hér ekki verið að tala um auglýsingar sem starfsmenn Ríkisútvarpsins flytja okkur. Það er ekkert að þeim. Hér er verið að tala um aðsendar auglýsingar, sem sumar eru hálfgert rusl,- stundum áfengisauglýsingar, sem þar að auki eru ótvírætt lögbrot. (Og enginn gerir neitt!) Stundum er þetta hálfgert garg. Auglýsingadeild virðist gagnrýnilaust taka við öllu sem þangað er borið.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1743

Af visir.is (25.06.2015): ,, ... á meðan hópur fólks með er með áfengi við hönd á öðrum bát á í mestu vandræðum með verkefnið”.

http://www.visir.is/norsk-auglysing-gegn-olvun-a-batum-vekur-athygli/article/2015150629402

Þarna er ekki aðeins einu með ofaukið heldur er farið rangt með algengt orðatiltæki um neyslu áfengis. Talað er um að hafa áfengi við hönd. Rétt er að segja að hafa áfengi um hönd. Á öðrum báti, ekki bát, hefði Molaskrifari sagt. Enn kemur verkstjórnar og eftirlitsleysi við sögu. Metnaðarleysi , ætti kannski fremur að segja.

 

Við umferðarljós sá Molaskrifari sendibíl með auglýsingu frá Myllunni. Þar var auglýst eitthvað sem kallað var Fitty brauð.Slæmt þegar fyrirtæki velja sér ambögusmiði til að semja auglýsinginar. Fitty er ekki íslenska. Fitty er heldur ekki enska. Fitty er bara bull.

Fatty er hinsvegar enska. Er brauð ekki fitandi? Orðabókin mín segir um fatty, - e-ð sem inniheldur fitu, í sérstaklega mikla fitu eða bragðvonda. Fitty er ekki til í orðabókinni.

 

Það er undarlegt, en þó kannski ekki, hve hart DV gengur fram í að gera SDG að pílsarvotti. Skilaboðin í drottningarviðtalinu í blaðinu sem dreift var á öll heimili í vikunni eru í stuttu máli: Hér fer góður en þjakaður maður, sem allir eru vondir við. Verið góð við hann. Eigendaskiptin á þessu fyrirbæri skýra margt.

 

Oft hefur Ríkisútvarpinu verið hrósað hér fyrir stundvísi í dagskránni. Smávægilega hnökra í útsendingu er erfitt að forðast. Of oft  hefur það þó gerst, eins og um miðnættið í gærkvöldi (25.06.2015) að það vantar framan á fréttatímann. Þetta gerðist á Rás eitt. Engin skýring. Engin afsökun. Heyra menn þetta ekki í Efstaleiti eða er ekki talin ástæða til að biðja hlustendur afsökunar, þegar hluti fréttatímans skilar sér ekki í eyru hlustenda?

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1742

 

Biðjast afsökunar á tréspýtum, segir í fyrirsögn á mbl.is (23.06.2015): http://www.mbl.is/vidskipti/frettir/2015/06/23/bidjast_afsokunar_a_trespytum/

Fréttin hefst á þessum orðum: ,, Kjörís hef­ur beðist af­sök­un­ar á því að íspinn­ar hafa á und­an­förn­um vik­um verið fram­leidd­ir með tré­spýt­um en ekki plast­spýt­um líkt og aug­lýst er fram­an á ís­köss­um.” Molaskrifari hefur hvorki heyrt áður talað um tréspýtur eða plastspýtur. Spýta er ítil fjöl, eða fjalarbútur, segir orðabókin.

 

Ekkert fyrirtæki kemst með tærnar þar sem Húsasmiðjan – Blómaval hefur hælana í innleiðingu ensku slettunnar Tax Free. Maður hnýtur um þessa allsendis óþörfu slettu í næstum hverri auglýsingu frá fyrirtækinu. Hversvegna má ekki nota orðið afsláttur eða tala um verðlækkun? Tax Free - þýðir skattfrjálst eða undanþegið skatti. Þarna er ekki verið að auglýsa skattfrelsi eða tollfrelsi, heldur afslátt eða tímabundna verðlækkun. Það á að segja neytendum satt. Fleiri fyrirtæki eru reyndar undir þessa sömu sök seld.

Stundum er þess getið í klausu með örsmáu letri, næstum falinni, neðst í auglýsingunni að þrátt fyrir fullyrðinguna um skattleysi fái ríkissjóður sitt.

 

Í kvöldfréttum Ríkissjónvarps ( 24.06.2015) var sagt frá dorgveiðikeppni í Hafnarfjarðarhöfn. Sagt var um þátttakendur þeir kepptust um að veiða sem mest. Molaskrifari hallast að því að þetta hefði átt að orða á annan veg. Við keppumst við eitthvað, - til dæmis að ljúka verki. Þarna kepptu þeir, sem voru að dorga, í því að veiða sem mest.

 

Margar fréttir hafa verið fluttar af sparisjóðum að undanförnu. Ekki síst um sparisjóðinn Afl. Sveitarstjóri Fjallabyggðar hefur komið sjónvarp og sagt að fé sjóðsins ætti að nota í þágu samfélagsins á svæðinu. Í öðrum fréttum m.a. hjá aðstoðarforstjóra Fjármálaeftirlitsins hefur komið fram að sparisjóðurinn hafi ekki átt neina peninga,- fjárhagur hans hafi verið neikvæður. Sem þýðir væntanlega að sparisjóðurinn hafi átt minna en ekki neitt. Molaskrifari viðurkennir, að hann hefur ekki alveg fulla heyrn, ekki frekar en svo margir á hans aldri , en hann skildi ekki nema hluta þess sem bæjarstjórinn sagði í sjónvarpsviðtalinu. Stundum þarf að texta viðtöl, - jafnvel þótt þau fari fram á íslensku.

 

Fréttamat fréttastofu Ríkisútvarpsins kemur stundum á óvart. Fyrsta ,,frétt” í seinni fréttum á miðvikudagskvöld (24.06.2015) var um leiðsöguhunda fyrir blinda. Þetta var ekki frétt, heldur pistill, sem allt í lagi hefði verið að hafa svona aftan við miðju eða seint í fréttunum. Þetta var sem sagt ekki frétt. Heldur feature, eins og sagt hefði verið á vondu máli í blaðamennskunni í gamla daga.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1741

 

Molavin skrifaði (22.06.2015): - "Skets úr fyrsta þættinum" segir i dagskrárkynningarfrétt Stöðvar-2 á visir.is (22.06.2015). Enskuslettur af þessu tagi eru ekki aðeins óþarfar - það er til mjög gott orð, "stiklur" yfir sýnishorn af þessu tagi - heldur eru þær merki um aðhaldsleysi af hálfu ritstjórnar. Ungt fólk, sem sýnir ekki viðleitni til að skrifa gott mál eða ræður ekki við það, á ekkert erindi í fréttaskrif. Ritstjórar fjölmiðla bera mikla ábyrgð á þróun málsins. Það eru svo sannarlega engir Fjölnismenn, sem nú um stundir fara með ritstjórnarábyrgð á fjölmiðlum eða netmiðlum.- Molaskrifari þakkar bréfið og tekur undir hvert orð.

Sjá: http://www.visir.is/thaer-tvaer--skets-ur-fyrsta-thaettinum/article/2015150629753

Þarna segir líka ,, Þær Tvær eru nýir íslenskir sketsaþættir sem þær Júlíana Sara Gunnarsdóttir og Vala Kristín Eiríksdóttir leika aðalhlutverkin í og skrifa handritið að. Þátturinn fór í loftið á Stöð 2 á sunnudagskvöldið. 
Hér að ofan má sjá einn skets úr fyrsta þættinum.#

 

Í stuttri frétt í Morgunblaðinu (22.06.2015) um fræðslu fyrir ungt fólk um grunnatriði ræðumennsku er talað um að læra helstu trikkin í bransanum. Í fullri hreinskilni, þá finnst skrifara þetta orðalag í frétt Morgunblaðsins ekki vera til fyrirmyndar.

 

Er Molaskrifari einn um að vera búinn að fá upp í kok af dönskum kökuþáttum í Ríkissjónvarpinu? - Er ekki hægt að sýna þetta á einhverjum öðrum tíma en í miðri kvölddagskrá?

 

Garðbæingar eldast hratt, segir í fyrirsögn í Fréttablaðinu (22.06.2015).

Er ekki best að fara að flytja?

Svo er haft eftir formanni bæjarráðs, að leitað sé leiða til að auka jafnvægi í aldursdreifingu. - Á maður þá kannski að flýja?

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1740

Rafn benti á þessa frétt á mbl.is (18.06.2015) og spyr: ,, Hvað eru „Frönskurnar“ (samanber fyrirsögn)?? og hvað eru „franskarnar“ (samanber meginmál)??” ,,Frönskurnar seldust upp”. Í fréttinni segir: „Sal­an var bara meiri en fram­leiðslan og við þurft­um að taka okk­ur pásu til þess að út­búa meira,“ seg­ir Friðrik Dór, tón­list­armaður og einn eig­anda nýja frönsk­ustaðar­ins „Reykja­vík Chips.“ Staður­inn var opnaður í gær, á þjóðhátíðardag­inn, og fransk­arn­ar seld­ust upp á aðeins fjór­um klukkustundum

.http://www.mbl.is/vidskipti/frettir/2015/06/18/fronskurnar_seldust_upp/

 

Það er engu líkara en orðalagið fram á sumar sé að hverfa , eða eigi undir högg að sækja. Hvað eftir annað heyrist sagt inn í sumarið. Síðast heyrði skrifari þingmann nota þetta orðalag um starf þingnefndar í viðtali á Bylgjunni á fimmtudag (18.06.2015).

 

Svo virðist sem framburðurinn /evvsta/ á orðinu efsta sé í sókn. Þetta heyrist aftur og aftur, ekki síst í íþróttafréttum.

 

Í íþróttafréttum Ríkissjónvarps (20.06.2015) var sagt: Betur fór þó á en horfðist ....  Þarna hefði skrifari sagt: Betur fór þó en á horfðist. Fyrr í fréttum þetta sama kvöld var sagt: Fari svo sem á horfir ... Þarna hefði til dæmis mátt segja: Fari svo sem horfir ....

 

Stærsta tónlistarhátíð, sem haldin hefur verið hér á landi, lýkur brátt í Laugardalnum ....  Þetta las fréttaþulur Stöðvar tvö viðstöðulaust og án þess að hika í fréttatímanum á sunnudagskvöld (21.06.2015).

Stærsta tónlistarhátíðin lýkur ekki. Stærstu tónlistarhátíðinni lýkur.

Skrítið að heyra þetta ekki og leiðrétta.

 

Í fréttum af manndrápunum í kirkjunni Em­anu­el African Met­hod­ist Ep­iscopal Church í Charleston Í Suður Karólínu var ítrekað sagt að einn þeirra sem þar var skotinn hefði verið öldungadeildarþingmaður. Það hefði mátt fylgja að sá sem hér var rætt um Clementa Pinckney var öldungadeildarþingmaður í senati eða öldungadeild Suður Karólínaríkis.

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG