Molar um málfar og miðla 1758

 

UM NÁSTÖÐU OG FLEIRA

Sigurður Sigurðarson sendi Molum  svohljóðandi bréf:

,,Sæll,

Sendi þér þetta til að létta á mér þó tel ég mig ekkert tiltakanlega góðan í skrifum og málfari.

 

Blaðamenn virðast margir hverjir ekki búa yfir hæfileika til að segja frá sem hlýtur að skipta meginmáli. Niðurstaðan verður oftast hnoð. Punktur getur þó verið bjargvættur þess sem fellur í þá gryfju að búa til langar og flóknar málsgreinar. Hann verður þó að gera sér grein fyrir langlokunni og þá getur punkturinn verið gagnlegur.

 

Alltof algeng er að nástaðan sem svo er nefnd, það er sömu orðin eru sífellt endurtekin með örstuttu millibili. Held að þetta sé algengast meðal fréttamanna og dagskrárgerðarfólks í sjónvarpi og útvarpi. Hérna eru dæmi um afar slakar frásagnir og jafnvel vitleysur. Held að þú áttir þig á þessu.

 

Upplifði hundsun

Niðurstaða skýrslu sálfræðinga var meðal annars sú að birtingamynd eineltisins hefði verið meðal annars sú að Hjálmar átti að hafa brugðist með óviðeigandi hætti við framgöngu starfsmannsins sem trúnaðarmanns starfsmanna í launadeilunni og í kjölfarið breytt framkomu sinni og viðmóti í garð starfsmannsins á þann hátt að hann upplifði hundsun.

http://www.dv.is/frettir/2015/7/1/hjalmar-sekur-um-einelti-tharf-ad-greida-600-thusund-i-miskabaetur/

 

Málið, málið, málið málið ...

Eins og mbl.is greindi frá í dag þá hóf lög­regl­an að rann­saka málið eft­ir að sál­fræðing­ur tók að skoða málið upp á eig­in spýt­ur og benti lög­regl­unni á nokk­ur áhuga­verð atriði sem höfðu ekki verið rann­sökuð nægi­lega vel á sín­um tíma. 

Sál­fræðing­ur­inn heit­ir Clas Fredric And­er­sen og eyddi hann frí­tíma sín­um í nokkra mánuði í að skoða málið. Áhugi hans á mál­inu vaknaði eft­ir að hann vann störf fyr­ir lög­regl­una í Vest­fold fyr­ir nokkr­um árum síðan. Gat hann ekki hætt að hugsa um málið og ákvað að skoða það bet­ur.

„Ég sett­ist niður í friði og ró og renndi í gegn­um öll gögn máls­ins. Þegar hann greindi lög­regl­unni frá rann­sókn sinni var ákveðið að skipa nefnd sem myndi fara yfir niður­stöður hans. Nefnd­in skilaði síðan af sér skýrslu þar sem mælst var til þess að lög­regl­an myndi aft­ur rann­saka ákveðin atriði máls­ins, og í kjöl­farið var hinn sýknaði maður hand­tek­inn á ný, 16 árum eft­ir morðið.

http://www.mbl.is/frettir/erlent/2015/07/09/rannsakadi_malid_upp_a_eigin_spytur/

 

Lést af höndum lögreglu

Sweat virt­ist hafa nokkra ánægju af því rekja at­b­urði fyr­ir lög­reglu úr sjúkra­rúmi sínu, en þess ber að geta að fé­lagi hans, Rich­ard W. Matt, lést af hönd­um lög­reglu á flótt­an­um.

 

http://www.mbl.is/frettir/erlent/2015/07/20/vitnisburdur_um_elju_og_vanhaefi/

 

 

Hans innkoma

Hann fékk orð í eyra frá Guðmundi Benediktssyni, aðstoðarþjálfara KR, í hálfleik og var greinilegt að hann átti að koma inn á. Hans innkoma átti eftir að breyta miklu.

 

Jacop Schoop var fórnað fyrir Gary, sem var færður út á kantinn. Hinn lipri Schoop var haldið niðri af miðjumönnum FH í fyrri hálfleik og en sjálfsagt hefðu margir KR-ingar furðað sig á því að liðið væri nú að spila síðari hálfleikinn í Kaplakrika án bæði Schoop og Sören Fredriksen, sem var ekki í hóp KR í kvöld. 

 

http://www.visir.is/umfjollun,-vidtol,-einkunnir-og-myndir--fh---kr-1-3---reidur-gary-sneri-leiknum-vid/article/2015150719192

 

 

Sem … sem

Þetta er ekki í fyrsta skiptið sem McClean sem fæddist í Derry í Norður-Írlandi kemst í fjölmiðla fyrir stjórnmálaskoðanir sínar en hann hefur tvisvar neitað að leika í treyju með minningarblómi (e.Remembrance poppy) tileinkuðu látnum breskum hermönnum. 

 

http://www.visir.is/irskur-landslidsmadur-sneri-baki-i-breska-fanann-i-thjodsongnum/article/2015150729873

 

Smáviðbót:

Var að lesa mbl.is rétt áðan, segir Sigurður,  og rakst þá á þetta:

 

„Mildi þykir að ekki fór verr þegar vöru­bíll með krana klessti á brúnna milli Kópa­vogs og Garðabæj­ar á Hafn­ar­fjarðar­vegi áðan. …“ 

http://www.mbl.is/frettir/innlent/2015/07/21/kraninn_flaug_af_bilnum/

 

Hvað þýðir sögnin að klessa? Er þetta barnamál, sem fréttaskrifendur hafa ekki náð að hrista af sér eftir því sem þeir fullorðnuðust? Þegar ég var blaðamaður hefði ég fengið bágt fyrir svona og því notað orðalagið „að rekast á“ og bætt svo við „harkalega“ hafi verið tilefni til.”- Já hann klessti á brúnna!!! Ótrúlegt.-  

Molaskrifari  þakkar Sigurði kærlega þetta ágæta bréf. Vonandi lesa þeir þetta ,sem  mest þurfa á að halda.

 

 

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1757

KISI BORÐAR

Molavin skrifaði (22.07.2015): ,,Hvað má kisi ekki borða? Þannig hljóðar fyrirsögn í prentútgáfu Morgunblaðsins (22.07.2015) á grein um mataræði katta. Maður býst nú við öllu í netútgáfunni mbl.is - en trúlega eru afleysingabörn að störfum á ritstjórn blaðsins. Samt hélt ég að börn væru frædd um það í leikskóla að fólk borði en dýr éti. Nema náttúrlega á heimilum þar sem kettirnir sitja við sama borð og heimilisfólkið á matartímum”.

Molaskrifari þakkar bréfið. Þetta er réttmæt athugasemd.

.

HRUMAR?

Á baksíðu Morgunblaðsins á þriðjudag (21.07.2015) var frétt um tónleika Silju Rósar Ragnarsdóttur og Auðar Finnbogadóttur á Café Rosenberg. Í fréttinni segir: Hljómsveitin Four Leaves Left mun styðja söngkonurnar og .... þær eru greinilega orðnar hrumar, blessaðar, eða hvað? Þurfa stuðning, en syngja samt. Það er virðingarvert.

 

AÐ KJÓSA UM

Þar verður kosið um nýjan forseta sambandsins , (FIFA) sagði –íþróttafréttamaður Ríkisútvarps í hádegisfréttum (20.07.2015). Betra hefði verið: Þar verður kosinn nýr forseti sambandsins.

 

AÐ FRAMKVÆMA SVEIFLU

Í golfþætti Ríkissjónvarps (21.07.2015) var talað um að framkvæma góða golfsveiflu. Flest er nú framkvæmt!

 

ÓDULBÚNAR ÁFENGISAUGLÝSINGAR

Ríkissjónvarpið er að færa sig upp á skaftið. Á undan golfþættinum,sem nefndur er hér að ofan voru bjórauglýsingar. Ekki sá Molaskrifari að gerð væri minnsta  tilraun til að leyna því að verið væri að auglýsa áfengi.

Hve lengi á Ríkissjónvarpinu að líðast að brjóta lög? Er öllum ráðamönnum sama ?

Hvað segja Foreldrasamtök gegn áfengisauglýsingum?

 

ENN ER KLESST Á

Barnamálið er að festast í fréttaskrifum. Þ.G. sendi eftirfarandi (22.07.2015): ,,Sæll Eiður. Var að lesa í vefmogga frétt um Quirinale höllina í Róm. Hún er sögð 110 þúsund ferkílómetrar að stærð, sumsé um 7 þúsund ferkílómetrum stærri en Ísland. Ekki mikill yfirlestur þar.

Eins er frétt um, að vörubíll með krana hafi klesst á brú í Kópavogi, sumum gengur hægt að vaxa upp úr barnamálinu” Kærar þakkir Þ.G. – Ferkílómetrunum var reyndar seinna breytt í fermetra. Greinilega hefur einhver lesið yfir sem skilur muninn á fermetra og ferkílómetra.

 UNDIR VIÐGERÐUM!

AF dv.is (21.07.2015):,, Vilhjálmur segir að baðherbergin sem voru óþrifin séu undir viðgerðum og hafi verið merktar „Out of order,“ en svo virðist sem einhver hafi, „öðrum en starfsfólki okkar,“ hafi tekið þá merkingu af baðherbergishurðinni.”

Þetta er hreint ótrúlega vondur texti.

Sjá: http://www.dv.is/frettir/2015/7/21/foru-inn-i-herbergi-hja-skolasteplum-seint-um-kvold/

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

Molar um málfar og miðla 1756

BÁTASMÍÐI Á GÁSUM

Rafn sendi eftirfarandi (20.07.2015) ,,Flest er farið að nýta sem byggingarefni. Á Gásum er sagt að verið sé að smíða bát úr miðaldaverkfærum. Ég get skilið, að miðaldaverkfæri séu nýtt við slíkar smíðar, það er að smíðað sé með þeim. Hins vegar er nokkuð langt til seilst að smíða bát úr slíkum verkfærum.” Þakka bréfið, Rafn.

Sjá: http://www.mbl.is/frettir/innlent/2015/07/18/drykkfelldir_munkar_kveikja_i_husum/

,, Það eru þó ekki bara drykk­felld­ir munk­ar sem kveikja í á svæðinu. „Það er ým­is­legt annað í gangi hérna. Við erum að steypa kirkju­klukku úr bronsi og það er byrjað að smíða bát, sem er ein­göngu smíðaður úr miðalda­verk­fær­um. Það er því nóg um að vera.“

 

BISSNES OG BRANSI

Í upphafi Morgunútgáfu Ríkisútvarpsins (21.07.2015) kynnti umsjónarmaður efni þáttarins. Rætt var við mann, sem skipuleggur brúðkaup útlendinga á Íslandi, ,, ... sá bissnes er að færast í vöxt hér á landi ... fræðast um þennan ört stækkandi bransa”. Í lok þáttarins var Málskotið, sem oft er áhugavert, þar var að venju rætt við málfarsráðunaut Ríkisútvarpsins. Ekki hefði farið illa á því að víkja stuttlega að þessum óþörfu slettum umsjónarmanns. Það var ekki gert.

 

 

GULLKORN AF STÖÐ TVÖ

Í fréttum Stöðvar tvö (19.07.2015) var okkur sagt að ferðamannafjöldi hefði stigmagnast. Átt var við að ferðamönnum hefði fjölgað. Einnig var okkur sagt að öryggi ferðamanna væri víða hætt komið. Þá kom fram í fréttatímanum að Grafningsvegur væri nánast óökufær. Átt var við að vegurinn væri nánast ófær bílum. Líklega var átt við að öryggi ferðamanna væri í ýmsu ábótavant. Í íþróttafréttum sagði fréttamaður okkur, að varla hefði nokkrum manni órað fyrir! – Verður hér látið staðar numið.

 

VATN - SJÓR

Í hádegisfréttum Ríkisútvarps (19.07.2015) var sagt frá árekstri, - olíuskip sigldi á ferju við hafnarmynnið í Gautaborg. Gat kom á síðu ferjunnar og vatn lak inn. Skyldi það ekki hafa verið sjór? Á fréttavefnum visir.is var hinsvegar réttilega sagt: ,,Stórt gat myndaðist á bakborðshlið ferjunnar og lak inn sjór”.

T.H. gerði líka athugasemd við frétt um þetta á mbl.is: http://www.mbl.is/frettir/erlent/2015/07/19/oliuflutningaskip_sigldi_a_ferju/

"Talsmaður Stena sagði að ör­yggi fólks hefði ekki verið í hættu."
Eitthvað er þetta nú skrítið, segir T.H.  – Rétt er það.

 

FEISBÚKK- FÉSBÓK

Þátturinn Orð af orði, sem málfarsráðunautur Ríkisútvarpsins annast er fróðlegur og áheyrilegur. En ekki kann Molaskrifari að meta, þegar umsjónarmaður talar um feisbúkk síðu þáttarins. Hversvegna ekki fésbókarsíðu?

 

UNDIRSKRIFTIR

Forseta Íslands verður í dag (20.07.2015) afhentur þúsundir undirskrifta ..., var sagt í hádegisfréttum Bylgjunnar (20.07.2015) . Heyrir enginn? Sér enginn?  Forseta Íslands verða í dag afhentar þúsundir undirskrifta ....   

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

 

Molar um málfar og miðla 1755

STAÐSETNINGARÁRÁTTAN

Margir fréttaskrifarar hafa ofurást á orðinu staðsettur. Af mbl.is á laugardag (18.07.2015): ,,Ann­ar kran­inn verður staðsett­ur í Mjó­eyr­ar­höfn en hinn á Grund­ar­tanga og mun sá síðar­nefndi meðal ann­ars verða nýtt­ur til að þjón­usta ál­ver Norðuráls.” Kraninn verður við eða í Mjóeyrarhöfn. Hinn kraninn verður meðal annars notaður í þágu Norðuráls. Orðinu staðsettur er næstum alltaf ofaukið. Því má sleppa. Ekki hefði sakað geta þess, að geta þess að ,,Mjóeyrarhöfn er við norðanverðan Reyðarfjörð, miðja vegur á milli þéttbýlisins í Reyðarfirði og Eskifirði og heyrir dagleg umsjón hafnarinnar undir Reyðarfjarðarhöfn. Mjóeyrarhöfn er með stærri vöruflutningahöfnum landsins. Hún er staðsett skammt frá álveri Alcoa Fjarðaáls og þjónar fyrirtækinu varðandi aðdrætti og útflutning á álafurðum.” – Af heimasíðu Fjarðabyggðar. Höfnin er sem sé staðsett!

Sjá: http://www.mbl.is/vidskipti/frettir/2015/07/18/staerstu_hafnarkranar_landsins_komnir/http://www.mbl.is/vidskipti/frettir/2015/07/18/staerstu_hafnarkranar_landsins_komnir/

 

VETTVANGURINN

Úr frétt á mbl.is (18.07.2015): ,,Slökkvistarf tók um einn og hálf­an tíma að sögn Gunn­ars, en lög­regla tók svo við vett­vangi og er að rann­saka hann”. Það var og. Lögregla tók við vettvangi! Þarna hefði til dæmis mátt segja: Lögreglan rannsakar málið. Viðvaningur á vakt og enginn til lesa yfir eða leiðbeina. Sjá: http://www.mbl.is/frettir/innlent/2015/07/18/sprengingin_ut_fra_eldunartaekjum/

 

KOSNING - ATKVÆÐASGREIÐSLA

Í tíufréttum Ríkisútvarps á laugardagskvöld (18.07.2015) var talað um ( Grikkland) að kjósa gegna skilyrðum. Betra hefði verið að segja að greiða atkvæði gegn...

Í að minnsta kosti fjórum, ef ekki fimm, fréttatímum síðdegis þennan dag var fyrsta frétt löng og ítarleg frásögn um hækkun á mjólk og mjólkurafurðum. Vissulega talsverð frétt, en dálítið undarlegt verklag, samt. Að hafa þetta á oddinum allan daginn. – Hversvegna eru nýliðar, sumarfólk, svona oft látið eitt um fréttirnar um helgar? Slæleg verkstjórn.

 

PERLA

Þátturinn Söngvar af sviði, sem var á dagskrá Rásar eitt á laugardagsmorgni (18.07.2015) var sannkölluð Útvarpsperla.

Sögumaður og umsjónarmaður var Viðar Eggertsson, en þátturinn var um söngleik þeirra bræðra Jónasar og Jóns Múla Árnasona, - Deleríum Búbónis. Tónlistin stórkostlega , enda löngu orðin sígild. Takk. Oft virðist skrifara sem besta efnið á Rás eitt , - sé endurtekið efni úr fjársjóðakistu Ríkisútvarpsins. Kannski eru það ellimörk!

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1754

MIKIÐ MAGN FERÐAMANNA!

Í fréttum Ríkissjónvarps (16.07.2015) var sagt: Ferðamenn streyma hingað í áður óþekktu magni. Það var og! Magn ferðamanna er venju fremur mikið í ár!!! Hér hefði farið betur á því að segja til dæmis, að ferðamenn kæmu nú til landsins í áður óþekktum mæli. Eða, - Fleiri ferðamenn koma nú til Íslands en nokkru sinni fyrr. Ekki magn ferðamanna, takk.

 

ÍSHELLIR OPNAÐI

Í sama fréttatíma var okkur sagt að íshellir hefði opnað í Langjökli í dag. Íshellirinn var opnaður. Hann opnaði hvorki eitt né neitt. Það er kannski vonlaust að berjast gegn þessari notkun sagnarinnar að opna. Molaskrifari mun samt halda áfram að nefna áberandi dæmi af þessu tagi úr fjölmiðlum.

 

BARMAMERKI

Á Bylgjunni (17.07.2015) voru auglýst barmamerki. Tölum við ekki um barmmerki?

 

ÓTELJANDI

Molaskrifari er á því að beygingavillurnar í fréttatíma Stöðvar tvö á föstudagskvöld (17.07.2015) hafi verið óteljandi eða því sem næst, - Auknar hjólreiðar leiða til fjölgun ....Eitt dæmi af mýmörgum. Er enginn metnaður hjá fréttastofu Stöðvar tvö til að vanda sig og gera vel?

 

ÍBÚÐAEININGAR

Hver er munurinn á íbúðum og íbúðaeiningum? Í Morgunútgáfu Ríkisútvarpsins (17.07.2015) talaði bæjarstjórinn í Garðabæ aftur og aftur um íbúðaeininga. Er það ekki bara íbúðir?

 

GANGA Á EFTIR

Í fréttum Bylgjunnar (17.07.2015) var sagt: ... þar sem gengið er á eftir því að (flugbraut verði lokað) ... Hér hefði átt að sleppa forsetningunni á. Að ganga eftir einhverju er að reka á eftir því að eitthvað verði gert eða ógert látið. Hinsvegar er talað um að ganga á eftir einhverjum með grasið í skónum .. þrábiðja einhvern um eitthvað, leita fast eftir því að ná ástum einhvers ...

 

GÓÐ FYRIRSÖGN

 Góð fyrirsögn á mbl.is: Ferðamenn á flæðiskeri staddir. http://www.mbl.is/frettir/innlent/2015/07/16/ferdamenn_a_flaediskeri_staddir/

 

ÓBRIGÐUL SNILLD

Hún bregst ekki snilldin á Smartlandi mbl.is . Ekki frekar en fyrri daginn (17.07.2015): Landið er fullt af fjall­mynd­ar­leg­um, gáfuðum og klár­um kon­um í lausa­gangi. Molaskrifara grunar hvað hér er verið að reyna segja, - að fjölmargar myndarkonur séu ólofaðar. Séu ,,á lausu” eins og sagt er á slangurmáli. Vélar eru í lausagangi, þegar þær eru ekki tengdar við drif eða aflúttak. Stundum er talað um hægagang eða tómagang.

 

ENDURSÝNING?

Prýðilegur var þátturinn um Kristin Hallsson, sem Ríkissjónvarpið sýndi á sunnudagskvöld (19.07.2015). Andrés Indriðason sem annaðist dagskrárgerðina kann sitt fag. Í lok þáttarins kom fram að hann væri frá árinu 2013. Molaskrifari heyrði hinsvegar ekki né sá þess getið að verið væri að endursýna þáttinn. Eru það heiðarleg vinnubrögð? – Kannski fór tilkynning um endursýningu bara fram hjá skrifara. Það á að sjálfsögðu að segja okkur, þegar verið er að endursýna efni.

 

 

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1753

   

AÐ KOMA VIÐ SÖGU

Það skal fúslega viðurkennt, að hér er nokkuð oft minnst á sömu hlutina, það er gert  í þeirri vissu að, - dropinn holar steininn og að aldrei er góð vísa ...

Algengt er að orðtökum sé slegið saman. Í veðurfréttum Ríkissjónvarps ( 13.07.2015) sagði veðurfræðingur: Þegar hér er komið við sögu. Hefði átt að vera: Þegar hér er komið sögu, - Þegar hér er komið, eða á þeirri stundu ....  Að koma við sögu, þýðir að eiga hlut að máli, eiga aðild að einhverju. - Hann kom við sögu, þegar ákveðið var að byggja kirkjuna.   

 

GAMALDAGS?

Það kann að vera gamaldags og hallærislegt í samtímanum, en Molaskrifara var á sínum tíma kennt að byrja ekki ritgerðir eða greinar í fyrstu persónu eintölu á sjálfum sér , - með  ÉG ...

Hann hnaut þess vegna um það, þegar fréttamaður Ríkissjónvarps, sem hafði farið í kríuvarp á Seltjarnarnesi (14.07.2015) sagði í upphafi pistils síns í fréttatímanum: Ég og Vilhjálmur Þór Guðmundsson myndatökumaður ....   Eðlilegri byrjun hefði verið , til dæmis, Við Vilhjálmur Þór Guðmundsson, -  eða, - Í kríuvarpinu, sem við  .... ÉG á að vera aukaatriði í fréttum.

 

SLETT

Í Morgunútgáfu Ríkisútvarpsins (15.07.2015) var sagt frá heimsmóti íslenska hestsins sem senn fer fram í Danmörku. Hestar sem þangað fara frá Íslandi eiga ekki afturkvæmt samkvæmt ströngum reglum um smitsjúkdóma. One way ticket, sagði þá annarra tveggja umsjónarmanna Morgunútgáfunnar. Farmiði aðra leiðina. Hversvegna þarf að slá um sig með enskuslettum?  Algjör óþarfi. Hvimleiður ósiður. Einu sinni var sagt við Molaskrifara, að þeir slettu mest ensku,sem minnst þekktu til þess ágæta tungumáls. Kannski er það stundum svo.

 

SIGRUÐ DAGLEIÐ

Á miðvikudagskvöld (15.07.2015) sagði nýliði okkur í íþróttafréttum   í tíufréttum Ríkissjónvarpi frá pólskum hjólreiðakappa sem sigraði elleftu dagleiðina í dag í Tour de France hjólreiðakeppninni.  Nú er  mál að linni.  Við heyrum  þessa ambögu aftur og aftur.  Málfarsráðunautur  þarf að taka  til sinna ráða. Getur enginn leiðbeint nýliða, sem enn á ekki erindi að hljóðnema og hefur enn ekki lært að það getur enginn sigrað dagleið, - ekki frekar en keppni?

 

HRÓS

Mikið eru þær góðir fréttaþulir og fréttamenn þær Halla Oddný Magnúsdóttir og Vera Illugadóttir hjá Ríkisútvarpinu, - að öðrum ólöstuðum.

 

 

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1752

 

AÐ FURÐAST

Gamall skólabróðir skrifara, nú búsettur erlendis, sendi þessar línur (13.07.2015): ,,Sá þetta í grein á Stundinni í frétt um uppsagnir starfsmanna Ríkisútvarpsins.

Þeir starfsmenn RÚV sem Stundin hefur rætt við furðast uppsagnirnar og segja að þær hafi komið flatt upp á alla.
Mér finnst ekki að móðurmálið verði ríkara af þessu nýyrði. Hvað finnst þér? (Furða sig á uppsögnum starfsmannanna).”  Þakka þér bréfið S.O.  Sennilega áhrif frá sögninni að undrast, verða hissa. Reyndar nefnir orðabókin miðmyndina - einhver furðast eitthvað, - þannig að ekki er þetta nýtt af nálinni.

 

STÆÐISGJÖLD – BREYTT ÁSÝND !!!

Í Fréttablaðinu á mánudag (13.07.2015) var það haft eftir Ögmundi Jónassyni, alþingismanni, að þjónustugjöld (gjöld fyrir bílastæði og fyrir að nota salerni á Þingvöllum) breyti ásýnd Íslands sem ferðamannalands. Ja, hérna. Molaskrifara finnst þetta út í hött. Við greiðum nær hvarvetna fyrir samskonar þjónustu erlendis. Hvað er að því að greiða fyrir veitta þjónustu og stuðla þannig að uppbyggingu og betri umgengni? Við borgum fyrir bílastæði á Laugaveginum og miklu, miklu víðar. Nýbúið er að  stórhækka sektir  við stöðubrotum. Hvað er að því að borga fyrir bílastæði við Jökulsárlón, Gullfoss, Geysi eða þjónustumiðstöðina á Þingvöllum? Ekkert. Nákvæmlega ekkert. Ætti líka að koma í veg fyrir að menn böðlist á bílum út um móa og grónar grundir. Gjaldtaka breytir í engu ásýnd Íslands sem ferðamannalands. Útlendingar eru vanir að greiða fyrir veitta þjónustu. Það á að vera hin almenna regla í ferðaþjónustu, - samanber; þeir borga sem menga.

 

SÉÐ OG HEYRT-VÆÐING

Molaskrifara finnst fréttastofa Ríkisútvarpsins vera komin dálítið

á Séð og heyrt og Smartland mbl.is bylgjulengdina þegar farið er að hnýta orðunum hinn geðþekki og hin geðþekka við nöfn þekktra einstaklinga. Leik- og söngkonan heimsfræga, Judy Garland, var í hádegisfréttum ( í svona dæmigerðri fréttabarna ekki-frétt) kölluð hin geðþekka leikkona Judy Garland. Þetta er í besta falli kjánagangur. Hvaða tilgangi þjónar þetta? Judy Garland var gæsileg kona og mikill listamaður. Hún þarf ekkert svona viðhengi.

 

ENN UM ÁNNA

Nú er talsvert um veiðifréttir í fjölmiðlum. Þá verður ýmsum hált á gljánni og tala um ánna, þegar ætti að tala um ána. Þetta hefur áður verið nefnt í Molum. Oftar en einu sinni og oftar en tvisvar. Af fréttavefnum visir.is (12.07.2015): ,, Veiðin var erfið framan af sumri vegna mikillar snjóbráðar sem litaði ánna og þar með dró úr veiði.” Og aftur: ,, Ásta Dís Óladóttir og eiginmaður hennar, Jakob Bjarnason, áttu góðann dag við ánna í dag ...”. Um að gera að spara ekki n-in. Sjá: http://www.visir.is/eystri-ranga-er-ad-hrokkva-i-gang/article/2015150719814

Veiðifréttir í Fréttablaðinu og á visir.is eru ekki vel skrifaðar.

Enginn yfirlestur. Enginn metnaður til að vanda sig eða rita rétt mál.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1751

 

RÝR EFTIRTEKJA

Ríkissjónvarpið gerði fréttamann út af örkinni með forsætisráðherra, SDG, til Brussel fyrir nokkrum dögum. Ráðherra fór í tilgangslausa og illa tímasetta ferð. Heldur var fréttaeftirtekjan rýr og var þar ekki við ágætan fréttamann Ríkisútvarpsins að sakast. Við fengum að vita, að fundurinn með Donald Tusk forseta leiðtogaráðs ESB hefði verið ,, óvenju afslappaður og skemmtilegur”. Þetta var eiginlega það fréttnæmasta úr ferð SDG.  Það bitastæðasta, sem situr eftir úr fréttum af þessari ferð, var viðtal við Bergdísi Ellertsdóttur, sendiherra Íslands í Brussel.

Stöð tvö sendi hinsvegar fréttamann til Aþenu. Það var skynsamleg ákvörðun og eftirtekjan meiri.

 

HEIMSMEISTARAR

Hverjir eru heimsmeistarar Þýskalands, sem talað var um í íþróttafréttum Ríkissjónvarps (09.07.2015)? Þetta orðalag heyrist reyndar aftur og aftur í íþróttafréttum. Er átt við þýsku heimsmeistarana? Sennilega.

 

BORGARNES

 Einn af hraðfréttamönnum, svokölluðum, í Ríkissjónvarpi sagði áhorfendum í þættinum Sumardögum að í næstu viku yrðu þeir á Borgarnesi. Ekki virðast gerðar kröfur um að þeir sem þarna koma fram séu sæmilega að sér um íslenskt mál.

 

NAUTGRIPASMALI

Í dagskrárkynningu Ríkissjónvarpsins í Morgunblaðinu (10.07.2015) segir um persónu í kvikmyndinni Kjaftaskar úr kaupstaðnum, City Slickers: ,,..ákveður að hrista upp í tilverunni með því að gerast nautgripasmali í villta vestrinu”. Nautgripasmali? Er það ekki kúreki?

 

DAGLEIÐ

,, ... í sjöttu dagsleiðinni í dag”, sagði íþróttafréttamaður Ríkissjónvarps í seinni fréttum á fimmtudagskvöld (09.07.2015) í frétt um frönsku hjólreiðakeppnina Tour de France. Það heitir dagleið, ekki dagsleið. Fréttamaðurinn mætti einnig huga að réttum framburði á heiti frægrar borgar, Le Havre, í Frakklandi.

 

FRÓÐLEG SKILTI

Skilti,sem Faxaflóahafnir hafa látið setja upp á Miðbakka við Reykjavíkurhöfn eru um flest til fyrirmyndar. Þar eru taldir upp skipskaðar við Íslandsstrendur og við Ísland og merktir inn á kort. Það skemmir þó svolítið, að textinn hefur verið illa lesinn áður en skiltin voru gerð. Gildir það bæði íslenska og enska textann. Á móðurmálinu er sögnin að reka (á land) stundum rangt notuð. Enska orðið schooner (skonnorta, sem er að minnsta kosti með tvö möstur) er ýmist skrifað scooner eða sconner. Gott væri að lagfæra þetta.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1750

 

KARLMAÐUR EÐA KONA

Í Spegli Ríkisútvarpsins á miðvikudagskvöld (08.07.2015) var pistill um ferðamenn sem koma til Íslands. Þar sagði fréttamaður: ... þá var hinni dæmigerði ferðamaður um þrítugt, karlmaður eða kona, og kom frá ... Þetta hef sem sé verið hin merkilegasta rannsókn. Ferðamenn, sem heimsóttu Ísland, voru ýmist karlar eða konur. Þetta er mjög athyglisverð niðurstaða og hefur sjálfsagt komið rannsakendum alveg í opna skjöldu.

 

SIGRAÐI DAGLEIÐ

Íþróttafréttum Ríkissjónvarps (08.07.2015) var sagt frá hjólreiðakappa sem sigraði fyrstu dagleiðina í frönsku hjólreiðakeppninni Tour de France. Það er auðvitað mikið afrek. Í íþróttafréttum (11.07.2015) var sagt í tennisfrétt: Hún hefur nú sigrað öll fjögur stórmótin. Sigrað mót???

Í íþróttafréttum á sunnudagskvöld (12.07.2015) var okkur sagt, að Íslandsmótið í hestaíþróttum mundi klárast í kvöld. Og: Íslandsmótið er í þessu að ljúka !!! Í lok síðari hálfleiks sigu heimamenn upp... Hafþór sigraði þrjár greinar af sex .... Aftur og aftur heyrðum við talað um evvstu og evvsta í efsta. Hvaðan kemur þessi framburður? Leiðbeinir enginn nýliðum? Les enginn yfir? Er engin verkstjórn? Þetta var því miður mikill amböguflaumur á sunnudagskvöldið. Málfarsráðunautur hefur hér verk að vinna. Hvaða kröfur eru annars gerðar til nýliða, sem segja íþróttafréttir? Fara þeir í íslenskupróf ?

DV er lítið betra. Þar sigra menn einnig mót (11.07.2015): ,,Serena Williams sigraði í dag Wimbledon mótið og má segja að um sögulegan sigur sé að ræða. Bæði er Serena elsta konan sem hefur sigrað mótið, ...” Sjá: http://www.dv.is/folk/2015/7/11/jk-rowling-sneri-mann-hraustlega-nidur-twitter-ut-af-gagnryni-serenu/

 

 

AÐ GERA VEIÐI!

Úr Fréttablaðinu bls. 17 (09.07.2015): En þeir sem þekkja það (Þingvallavatn) vel og nota réttu aðferðirnar við veiðarnar eru að gera frábæri veiði dag eftir dag. Veiðimenn veiða. Þeir gera ekki veiði.

 

ÓVIÐUNANDI FRAMKOMA RÍKISÚTVARPSINS

Molaskrifara finnst það ósæmilegt og óviðunandi að Ríkisútvarpið skuli auglýsa bjór á ensku rétt fyrir fréttir (t.d. 10.07.2015). Í fyrsta lagi er bannað að auglýsa áfengi, Ríkisútvarpið gerir það engu að síður dag eftir dag. Í öðru lagi eiga auglýsingar í Ríkisútvarpinu að vera á íslensku, ekki á ensku. Sú regla hefur lengi verið í gildi. Hana ber að virða. Orðið léttöl heyrist illa og ógreinilega í niðurlagi þeirrar auglýsingar, sem hér er gerð að umtalsefni.

Annað dæmi um það, sem ef til vill mætti kalla ósvífni, var ódulbúin bjórauglýsing og slefandi bjórþamb umsjónarmanna Sumardaga á Seyðisfirði (09.07.2015). Í þættinum var viðtal á ensku og engin tilraun gerð til að endursegja efni þess. Þar að auki var því haldið fram að þýsk skip hefðu sökkt olíubirgðaskipinu El Grillo í Seyðisfirði! Rangt. Sjá til dæmis: http://www.austurfrett.is/lifid/1401-sjoetiu-ar-fra-thvi-adh-el-grillo-var-soekkt-allmikill-dynkur-er-skipidh-hvarf-i-djupidh

 Og svo var rætt við elsta búsetumanninn á Seyðisfirði !

Þetta er slæmt.

Ef stjórnendum Ríkisútvarpsins finnst þetta í lagi, þá eru þeir ekki í lagi.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG

 

 

 

Molar um málfar og miðla 1749

 

ALLT UNNIÐ FYRIR GÝG?

Þannig spyr K.Þ. í  bréfi til Molanna (08.07.2015). Hann sendir þessa tengingu: http://eyjan.pressan.is/frettir/2015/07/08/oli-bjorn-thingid-hefur-hvorki-tima-ne-thekkingu/

"Óli Björn rekur upp störf nýliðins Alþingis ... "

 Og  bætir við: ,,Þar fór í verra!”- Molaskrifari þakkar ábendinguna og nefnir að ekki væri verra  á stundum að geta rakið  upp það sem prójónað hefur verið á þinginu!

 

STAÐSETNING

Tveir björgunarbátar eru staðsettir á brúarþakinu,  var sagt í hádegisfréttum Bylgjunnar (08.07.2015). Þarna  eru orðinu  staðsettir ofaukið. Það er óþarft.  Tveir björgunarbátar eru á brúarþakinu.  Í sömu frétt var talað um áhafnarmeðlimi. Eins og svo oft. Orðið skipverji er  fallegra.

 

UPPHAF ALDA?

Frá upphafi alda var sagt í auglýsingu um kvikmynd á Stöð tvö  (08.07.2015) að því Molaskrifari best gat heyrt. Þar hefur auglýsandi eða auglýsingastofa sennilega ruglað saman tveimur orðtökum , -  frá upphafi vega, -  frá örófi alda.  Frá alda öðli. Frá ómunatíð.

 

ÁIN UM ÁNA

Úr frétt af visir.is (08.07.2015): Það er óhætt að segja að það sé góður gangur í Norðurá en mikill kraftur er í göngunum í ánna. Hér  hefði auðvitað átt að segja að mikill kraftur væri í göngunum í ána.  Þetta er býsna  algeng villa, - kemur einnig oft fyrir í orðunum brú  og skór , þegar þau eru notuð með ákveðnum greini.

 

VERÐMÆTI

Í morgunfréttum  Ríkisútvarpsins (08.07.2015) var orðið  útflutningsverðmæti notað í fleirtölu. Hefði að mati  Molaskrifara átt að vera í eintölu. Í sömu frétt var okkur  sagt að  makríl  frumvarpið, svo nefnda, yrði  ekki afgreitt  fyrr en  á næsta þingi. Liggur það ekki í augum uppi, þar sem þingfundum hefur verið frestað til hausts?

 

 

KÆRULEYSI

Í fréttum  Stöðvar tvö (08.07.2015)  var sagt: Undiskriftasöfnunin  Þjóðareign lýkur á morgun. Söfnunin lýkur ekki.  Söfnuninni lýkur.  Það   byrja ekki allar setningar í nefnifalli eins og  sumir fréttamenn virðast halda. Áhrifssagnir stýra föllum.

 

Fyrirvari: Athugasemdir frá öðrum á þessari síðu eru á þeirra ábyrgð.

Síðuskrifari áskilur sér rétt til að fjarlægja dónaleg eða meiðandi ummæli, nafnlausar athugasemdir eða athugasemdir undir dulnefni. Lesendabréf eru vel þegin. Bréfritarar eru beðnir að taka fram hvort birta megi bréf, eða ábendingar þeirra, undir nafni, - ESG