Molar um málfar og miðla CLXI

 

Höskuldur Þór Þórhallsson þingmaður Framsóknarflokks líst illa á .. sagði fréttamaður RÚV í hádegisfréttum (217.09.2009). Er það ekki ótrúlegt að þurfa að hlusta á svona ambögur í þjóðarútvarpinu.  Engar kröfur um gott málfar, eða hvað ? Þarna átti  fréttamaður að nota þágufall. Höskuldi Þór Þórhallssyni þingmanni Framsóknarflokks líst illa á... Mér líst illa á. Ekki: Ég líst illa á. Á vefnum AMX ( „fremsta fréttaskýringarvef landsins” að eigin sögn) segir (27.09.2009): Höskuldi Þór Þórhallsson, þingmanni Framsóknar­flokksins, líst illa á... Litlu skárra.  Hafa menn annars tekið eftir því að til þessa þingmanns heyrist næstum því í öðrum hverjum fréttatíma um þessar mundir en ekki heyrist hósti né stuna frá formanni flokksins. Hvað er á seyði ?  

Árni Páll Árnason félagsmálaráðherra situr á stífum fundarhöldum í dag til að ræða aðgerður í þágu heimilanna. Er skrifað í Vefvísi  (27.09.2009) Það er málleysa að tala um að ráðherra sitji á stífum fundarhöldum. Segja mætti: Fundar stíft, eða fundar í allan dag. Villan í orðinu aðgerðir hlýtur að vera innsláttarvilla. 

 Einhverjir velta því líklega fyrir sér hverskonar flokkur Sjálfstæðisflokkurinn sé orðinn. Frambjóðandi í formannskjöri í ungliðasamtökum flokksins tekur á leigu heila farþegaflugvél til að fljúga með atkvæði til Ísafjarðar þar sem þing samtakanna var haldið. Atkvæðin fljúgandi tóku ekki þátt í störfum þingsins. Komu bara til að kjósa. Ekki veit ég á hvað þetta minnir, en víst er að engin er kreppan á þeim bænum. Þetta hljómar eiginlega eins og frásögn úr mafíupólitík í Ameríku.  

Fimmtíu mannns  deyja vegna flóða á Fillippseyjum  segir Vefvísir (26.09.2009). Betra væri að segja: Fimmtíu manns  deyja í flóðum. Svo heitir þetta ríki ekki Filippseyjar heldur Filippseyjar.

Molar um málfar og miðla CLX

  Molar CLXRíkisútvarpið heldur áfram að leggja íslenskri tungu lið. Bröns á sunnudaginn, Hótel Hérað. Þannig hljóðaði auglýsing ,sem Ríkisútvarpið flutti okkur hlustendum (26.09.2009). Hótel Loftleiðir byrjaði að auglýsa þessa  smekkleysu. Nú glymur þetta í eyrum kvölds og morgna. Það er atlaga gegn tungunni að festa þetta orðskrípi, þessa slettu, í sessi. Samtímis er svo tönnlast á tax free helgum í Smáralind og Kringlunni. Ríkisútvarpið kann ekki að skammast sín. 

Sannarlega var ánægjulegt hve vel gekk að safna fé fyrir Grensásdeild. Molaskrifara fannst hinsvegar ósmekklegt að grínast með fólk í hjólastólum. Það var eitthvað hallærislega ófyndið við það , einmitt í þessum þætti og raunar alltaf. Gaman var að sjá myndir í fréttum frá Jan Mayen, þessari granneyju okkar. Þar hefur verið gerð ein flugbraut þar sem Herkúlesflugvélar norska hersins geta lent. Þangað kom Molaskrifari 1997. Undirlendi er þarna ekki mikið. Á Jan Mayen er líka hæsta eldfjall Evrópu, Beerenberg (2.277 m). Það minnir á sig með reglulegu millibili, síðast 1985. Á flugbrautinni eru tvær bungur. Norðmennirnir á staðnum kalla  flugvöllinn Jane Mansfield ! Segið þið svo að Norðmenn hafi ekki húmor! 

Ágætt væri ef fréttastofa RÚV gerði það upp við sig  hvernig fara skuli með fyrirtækisheitið Exista. Það er upp og ofan hvort það er beygt eður ei, jafnvel í sömu frétt hjá sama manni. Molaskrifari er á því að rétt sé að beygja orðið, en um það má auðvitað deila. 

 Illa gengur  fréttamönnum,sumum hverjum, að bera rétt fram heiti bandaríska ríkisins Arkansas. Í fréttum Stöðvar tvö (26.09.2009) var  þetta borið  fram með sterku ess-hljóði í endann. Réttur  framburður er  frjálslega skrifað arkanso. En  svo  Molaskrifari gerist  nú algjörlega  ósamkvæmur  sjálfum sér, þá saknar hann þess að  heiti borgarinnar (og knattspyrnuliðsins) Hull, skuli  nú í  íþróttafréttum borið  fram Höll, sem  auðvitað er réttur enskur framburður, en hið íslenska heiti þessarar borgar  hefur í áratugi verið Húll. Þar seldu íslenskir togara  afla  sinn á árum áður, þegar Hull og  Grimsby voru þekkt   staðarheiti á Íslandi. 

Þá er hvalvertíðinni lokið og hægt að fara að hlakka til að hafa rengi á borðum upp úr áramótunum. Gaman hefði verið að geta keypt langreyðarkjöt í verslunum. Hef hvergi séð það. Veiddar voru 125 langreyðar og það gerðist ekkert. Nákvæmlega ekkert. Engin mótmæli , og síaukin aðsókn er að hvalaskoðunarferðum, segja þeir sem  þá starfsemi stunda. Áfram Kristján Loftsson !  

Molar um málfar og miðla CLIX

 

 Það er fínt hjá fréttastofu RÚV að rifja upp atburði í aðdraganda hrunsins í fyrra. Það rímar líka ágætlega við það sem er að gerast þessa dagana.

 

 Líklega er Ríkisútvarpið eini fjölmiðillinn,sem er svo vel í stakk búinn að hafa sérstakan slúðurfréttaritara á vesturströnd Bandaríkjanna. Mikilvægt er fyrir okkur hlustendur að geta fylgst með framhjáhaldi og óléttum þar vestra. Tala nú ekki hver er að „deita” hvern eins og það var orðað (25.09.2009) í morgun. Umsjónarmenn Morgunútvarps Rásar tvö eiga heiður skilinn fyrir að rækja menningarhlutverk Ríkisútvarpsins af einstakri alúð og kostgæfni. Það er ekki öllum gefið.

 

...... auk þess sem starfsmenn tollstjórans lagði hald á nokkuð magn ólöglegs varnings.Svo segir í Vefmogga (24.09.2009). Ærið oft skort á samræmi milli frumlags og sagnar. Starfsmenn tollstjórans lögðu hald á nokkurt magn ólöglegs varnings. Meira úr Vefmogga (25.09.200): ...auk starfsmanna Carabbien Crusise Lines á Bretlandi sem munu sinna hlutverki skemmtiferðaskips sem rekst á grynningar í Norður-Atlantshafi. Molaskrifari á erfitt með að sjá það fyrir sér að starfsmenn sinni hlutverki skemmtiferðaskips, skip rekast ekki á grynningar, þau sigla upp á grynningar og síðast en ekki síst er orðið Carabbien rangt skrifað, rétt mynd orðsins er Caribbean, Crusise er líka rangt skrifað. Rétt er Cruise. Snjallir menn á Mogga. Kannski var blaðamaðurinn að hugsa um eitthvað annað, þegar þetta var skrifað.

 

Við berjum niður verðið, segir í heilsíðuauglýsingu Húsasmiðjunnar (25.09.2009) í Fréttablaðinu. Þetta er ágætt slagorð. Sömuleiðis er lagersala gott orð í þessari sömu auglýsingu. En slæmt er þegar beygingarvilla er í setningu sem nær yfir þvera síðuna: lagersala í Skútuvogi lýkur um helgina. Þarna ætti að standa: Lagersölu í Skútuvogi lýkur um helgina.

Netfangaskrá starfsmanna RÚV er ekki lengur aðgengileg á vef RÚV. Hvað skyldi valda því? Fróðlegt væri að fá svör við því. Netfangaskrá starfsmanna Morgunblaðsins er aðgengileg á netinu. Þar er þó ekki að finna netföng hinna nýju ritstjóra Davíðs og Haraldar.

Annars telur Molaskrifari að brandari dagsins í gær (24.09.2009) hafi komið frá fyrrverandi skemmtikraftinum Gísla Marteini, þegar hann tilkynnti hátíðlega að hann hefði gerst áskrifandi að Morgunblaðinu og  fleiri nýir hefðu  bæst við en sagt hefðu blaðinu upp. Ætlast hann til að fólk trúi því að borgarfulltrúi  Sjálfstæðisflokksins hafi ekki keypt  Moggann?  Ekki þætti Molaskrifara  ólíklegt að borgarfulltrúinn  hafi  fengið blaðið heimsent á kostnað borgarbúa. Meiriháttar sýndarmennska. Gísli Marteinn er einn þeirra sem ekki leyfir athugasemdir við það sem hann skrifar á netinu. 

Molar um málfar og miðla CLVIII

Það var drottningarsvipur yfir viðtali Sigmars  við Óskar Magnússon (24.09.2009) í Kastljósi. Sigmar getur gert miklu betur en þetta.  Með ólíkindum var umfjöllun Kastljóss um Ragnar Önundarson. Reynt  var að rýja hann öllu trausti og honum ekki gefinn kostur á að verja sig. Man varla  eftir að hafa heyrt  nafngreindan einstakling tekinn fyrir með þessum hætti án þess að honum gæfist tækifæri til að bera hönd  fyrir höfuð sér. Þetta voru hvorki  fagleg né vönduð vinnubrögð. Þetta var fúsk.

Uppsagnir starfsfólks hafa verið hjá Árvakri, útgáfufélagi Morgunblaðsins, í dag.Svona er tekið til orða í Vefmogga (24.09.2009): Molaskrifara finnst þetta ánalegt orðalag. Betra hefði verið að segja: Í dag hefur Árvakur,útgáfufélag Morgunblaðsins, sagt allmörgum starfsmönnum upp störfum. Seint hefði maður trúað því að Mogginn ræki út starfsmenn, sem unnið hafa blaðinu af samviskusemi og trúnaði í áratugi, fólk sem hefur helgað blaðinu meginhluta starfsævinnar eða nær alla starfsævi sína. Það er illur gjörningur, en lengi skal manninn reyna eins og þar stendur.

Það er svolítið þreytandi til lengdar að vera sífellt að fjalla um sömu hlutina í þessum Molum. Hagkaup er með opnuauglýsingu (24.09.2009) í Fréttablaðinu. Þar eru auglýstir með stríðsletri: Risa Tax freedagar. Í þremur klausum á síðunni er sagt að Hagkaup afnemi virðisaukaskatt af tilteknum vöruflokkum. Þetta eru ósannindi. Hagkaup hefur ekki leyfi til að selja vörur án virðisaukaskatts til almennra viðskiptavina. Fyrirtækið getur hinsvegar veitt afslátt sem nemur skattprósentunni. Þetta hefur verið margsagt hér. Hversvegna þarf Hagkaup að tala við okkur á ensku og hversvegna þarf þetta annars um margt ágæta fyrirtæki að segja okkur ósatt?

Ríkisútvarpið heldur áfram að brjóta sína eigin reglur, því þar glymja í hádeginu (24.09.2009) auglýsingar frá IKEA um tax free helgi. Ekki vissi Molaskrifari að virðisaukaskattur væri lagður á helgarnar.

Önnur auglýsing sem vakti athygli Molaskrifara (24.09.2009) er í Morgunblaðinu. Hún er frá fyrirtækinu Hygeu. Þar stendur stórum stöfum: Trust your eyes to the experts, og svo með smærra letri: Sérfræðingar í augnkremum. Enskan er sem sé aðalatriðið. Þetta fyrirtæki auglýsir líka Tax free daga. Það er eins og sumir íslenskir kaupahéðnar finni hjá sér sérstaka þörf til að spilla tungunni með því að festa í sessi sletturnar Tax free og outlet.  Ekki til sóma.

Svolítið meira um morgunútvarp Rásar tvö: Í löngu viðtali við Gylfa Arnbjörnsson (24.09.2009) sagði hann tvisvar og vitnaði í þrjár mismunandi kannanir að 18-20% þjóðarinnar væri í verulegum vanda og  tíu þúsund heimili í mjög alvarlegum vanda. Nokkru síðar sagði annar umsjónarmanna: Stór hluti þjóðarinnar er að verða gjaldþrota. Gylfi sagði: Það er rangt og nefndi  sömu tölur aftur. Umsjónarmaðurinn hafði greinilega ekkert hlustað á það sem Gylfi var að segja. Hinn umsjónarmaðurinn spurði Gylfa með mikilli óþolinmæði í röddinni: Hvenær ætlið þið að grípa til einhverra aðgerða?  Það kom greinilega svolítið á Gylfa því hann spurði hvort átt væri við verkföll. Svaraði síðan af yfirvegun að slíkt kæmi ekki til fyrr en í síðustu lög. Molaskrifari fékk á tilfinninguna að umsjónarmaðurinn væri eiginlega að biðja um hasar.  Ekki til fyrirmyndar. Það á að gera meiri kröfur en RÚV gerir til umsjónarmanna morgunútvarps Rásar tvö.

Molar um málfar og miðla CLVII

 Ríkisútvarpið á það til að misbjóða hlustendum með ýmsum hætti, þótt margt sé þar auðvitað ágætlega gert. Í morgunþætti  Rásar tvö (23.09.2009) skoðuðu umsjónarmenn dagblöðin og frétt á  forsíðu Morgunblaðsins um sendiráð Íslands í Japan varð þeim  tilefni til nokkurra orðaskipta.    Skemmst er frá því að segja að samtalið einkenndist af fáfræði og fordómum um utanríkisþjónustu lýðveldisins og íslensk sendiráð. Raddblærinn sagði sitt um skoðun umsjónarmanna á sendiráðum. Fyrst er það  til að taka að annar umsjónarmanna hafði greinilega ekki skilið fréttina sem um var rætt. Eða ekkert lesið nema fyrirsögnina, sem er villandi, og frétt Morgunblaðsins er illa  framsett. Sá hagaði  orðum sínum þannig að helst var að skilja að rekstur sendiráðsins í Japan kostaði hálfan annan milljarð á ári! Í fréttinni kemur fram að stofnkostnaður var 815 milljónir. Það vissu allir, að það var dýrt að festa kaup á húsnæði í dýrustu borg heims og urðu um það umræður á sínum tíma og það var gagnrýnt.  Jafnframt var viðurkennt að húsakaupin væru góð fjárfesting, og litlar sem engar líkur væru á tapi, ef seinna væri ákveðið að selja. Stofnkostnaðurinn er tiltekinn í  fjárlögum 2000- 2001 og allur kostnaður við rekstur sendiráðsins frá upphafi, í  tæpan áratug, nemur einum og hálfum milljarði. 

 Raunar er þetta álíka vitlaust og að taka stofnkostnað og rekstrarkostnað RÚV frá upphafi og  segja að RÚV sé upp á svo og svo háa upphæð. Ætli mundi ekki  heyrast hljóð úr horni í Efstaleitinu, ef slíkum reiknikúnstum væri beitt. En Ríkisútvarpið er sem kunnugt er þekkt fyrir ábyrga  fjármálastjórn og aðhald á öllum  sviðum.

    Niðurskurður verður auðvitað í  starfsemi utanríkisþjónustunnar eins og annarsstaðar hjá því opinbera. Það var óheiðarlegt að láta að því liggja að lítt væri skorið niður í utanríkisráðuneytinu nema framlög til þróunarhjálpar. Auðheyrt var og greinilegt að umsjónarmenn vissu ekkert um  hlutverk eða  störf sendiráða, en létu sig hafa að bulla um það engu að síður.  Sjálfsagt mun sendiráðum fækka og ekki mun starfsfólki fjölga.  

 Áhugamaður um utanríkismál,sem ræddi þetta samtal við Molaskrifara,  sagði að sennilega væri  ákveðin vísitala ,sem  stundum er notuð um andlegt atgervi, fyrir neðan frostmark í þessum þætti. Ekki hlustar Molaskrifari nógu oft á þáttinn til að hafa skoðun á því, en hitt er víst að samtal  af þessu  tagi, sem hér hefur verið gert að umtalsefni mundu Englendingar kalla, og nú ætlar Molaskrifari að sletta ensku: An insult to intelligence.  Móðgun  við heilbrigða skynsemi,  -  svona lauslega þýtt.  Mér fannst þetta þjóðarútvarpinu til skammar. Þetta voru óvönduð og ófagleg  vinnubrögð.

 Það kemur æ betur í ljós hvílík reginmistök það voru hjá yfirmönnum RÚV að slátra Morgunvaktinni á Rás eitt og setja þetta rugl á Rás tvö í staðinn.

Ósköp var annars að heyra talað um að versla mjólk í Kastljósi RÚV (22.09.2009) og ekki tók betra  við þegar sami fréttamaður sagði:  Er eðlilegt að málin séu að taka þetta langan tíma?  Ekki boðlegt málfar. Það eru gerðar kröfur til RÚV, sem  fellur á hverju prófinu á fætur öðru.

Meira um  Kastljós (23.09.2009). Gott viðtal hjá Helga  Seljan við landbúnaðar- og sjávarútvegsráðherra. Hef hinsvegar sjaldan séð jog heyrt jafn slaka frammistöðu ráðherra. Molaskrifara taldist til að Helgi hafi fimm sinnum spurt  ráðherra  sömu spurningar í upphafi  viðtalsins og fékk aldrei svar. Eftir stendur að landbúnaðarráðherra finnst verðsamráð framleiðenda  í góðu lagi ,ef um er að ræða bændur og kjúklingaframleiðendur (kjúklingabændur eru ekki til) . Slíkt er óleyfilegt innan ESB, enda er ráðherrann harður andstæðingur aðildar.

 Áhugamaður um málfar benti skrifara á hve einkennilega hefði verið tekið til orða í fréttum  sjónvarps (22.09.2009) af óvenju smávöxnum kálfi, sem  sá dagsins ljós  fyrir norðan. Tvívegis var  talað um dvergkú, ekki væri ljóst hvort um dvergkú yrði að ræða.  Réttara hefði verið að tala um dvergkálf eða dvergkvígu fremur en dvergkú. Undir þetta tekur Molaskrifari.

Molar um málfar og miðla CLVI

 Munir úr Pourquoi pas? ráku á land,  sagði fréttamaður RÚV í  sjónvarpsfréttum  (22.09.2009). Hann hefði átt að  segja: Muni úr  Pourquoi pas? rak á land. Ambögudeildin á  fréttastofunni er í vexti.  En hvernig má það annars ver að erlent skip  skuli geta verið  nánast uppi í landsteinum vestur við Mýrar líkast til í nokkra  daga án þess að yfirvöld á Íslandi  rumski og  athugi hvað  er á seyði?

Alþingismaður skrifar í Fésbókina (21.09.2009): Annasöm vika framundan - fundur í viðskiptanefnd í morgun og svo reka þeir sig fundirnir alla vikuna.  Ekki kannast Molaskrifari við þetta orðlag. Betra hefði verið að segja: Svo  rekur  hver  fundurinn annan alla vikuna, -  löng fundaröð   framundan.

Makalaust er að lesa  frásögn DV  af reiða útlendingnum, sem plataður var til Íslands og  sagt að hann ætti hæsta tilboð í Moggann. Neðri máttarvöld tóku í taumana og komu í veg fyrir að  hagstæðasta  tilboði væri  tekið. Byrðum var velt  yfir á skattþegna  landsins með milljarðaafskriftum lána hins raunverulega gjaldþrota Árvakurs. Góssið  afhent  sægreifum á  silfurfati. Spillingin virðist takmarkalaus.Við höfum oft  talað um kosti  smæðarinnar , en  smæðin og nálægðin  eru eldsneyti spillingarbálsins.   Það verður fróðlegt að  fylgjast með framhaldinu.

Í DV (22.09.2009) er haft eftir  viðmælanda  blaðsins:  Ef  við stöndum saman getum við kvatt niður hvaða  vitleysu sem er.  Hér  er   ruglað  saman sögnunum að kveða og kveðja. Hér  hefði átt að  standa: ... getum við kveðið niður... Sögnin að kveðja  beygist : kveðja, kvaddi, kvöddum, kvatt. Illu heilli  hefur hann nú kvatt okkur  fyrir  fullt og allt.

Um helgina festust sjö  fullir  strákar í lyftu. Sagt var frá  þessu í blöðum. Talað  var um að  piltarnir   hefðu verið í  annarlegu ástandi.  Á einum  stað , gott ef það  var ekki í Vefmogga var sagt:  Festust  fullir í lyftu. Það á að kalla  hlutina  réttum nöfnum.

Svolítil  viðbót um  staðanöfn. Í Morgunblaðinu (22.09.2009) er  sagt að Leiran sé  rétt fyrir utan Garðinn. Fyrir utan  Garðinn er  Garðskagaflös og úthafið. Leiran er  auðvitað  fyrir innan Garðinn. Í Garðinum segjum  við inn í Leiru og Keflvíkingar fara  út í Garð. Í Garðinum  skildu  allir  hvað það var  að fara inneftir, - það var að fara til Reykjavíkur. Úr Reykjavík fóru  menn suður í Garð þótt  farið  væri í hávestur. Þetta hefur verið nefnt  hér áður.

Það var fallegt á Garðskaga í dag, blankalogn og blíða. Sjórinn eins og spegill. Mér  fannst hinsvegar ekki tiltakanlega fallegt  að sjá  snurvoðarbát á  stærð  við lítinn  skuttogara skammt undan landi. Mér var sagt að hann væri næstum  eins breiður og hann  væri langur. Veiðileyfið miðaðist nefnilega  við lengd. Í gamla  daga var það þannig að þegar snurvoðarbátarnir komu  gátu allir hætt að  róa. Líklega er það  þannig enn.

Molar um málfar og miðla CLV

Merkilegt fyrirbæri Útvarp Saga. Þar vellur  bullið oft fram í stríðum  straumum. Nú vill útvarpsstjórinn fá utanþingsstjórn. Mikill barnaskapur er að halda að það breyti einhverju.Vill líka skipta út öllu þingliðinu. Víst er ekki valinn maður í hverju rúmi á  Alþingi og hefur aldrei verið. En það eru kjósendur  sem  velja  menn til  setu á  Alþingi.   Helst á að losna  við alla  stjórnmálaflokkana sem nú starfa. Athyglisverð  tillaga í ljósi   stuttrar sögu Borgarahreyfingarinnar. Þáttastjórnandi  lýsti því  yfir  nýlega að  fólk ætti að taka allt sitt  fé út úr bönkunum og   svo ætti að  stofna  nýjan  banka ,  einhverskonar „ alþýðubanka"sem hann kallaði.  Þennan  sama þáttastjórnanda heyrði ég garga  á  hlustanda ,sem  hringt  hafði  til þáttarins. Hlustandinn gargaði móti. Þegar þeir  höfðu gargað  hvor á  annan um stund   slökkti  Molaskrifari á útvarpinu. Góður takki slökkvarinn.

En engum er alls  varnað.  Sigurður  G.  Tómasson er rödd skynseminnar í Útvarpi Sögu.  Hann er   afbragðs útvarpsmaður,einn sá allra besti. Fjölfróður og kurteis við þá sem  hringja  til hans í beinni útsendingu og ekki  skemmir  Guðmundur  þegar hann situr  við hljóðnemann  hjá honum. Velkomin  tilbreyting  að heyra  aftur í þeim saman. Það var til dæmis  fróðlegt að heyra þá tala um   Framsóknarsukkið í kringum  gömlu   Símahúsin við  Austurvöll og  væntanlegt hótel þar. Það  mál er  tilvalið  verkefni  fyrir öfluga rannsóknarblaðamennsku.

Í  fyrstu jólainnkaupaauglýsingunni (of langt orð!),sem  birtist  fyrir  fáeinum dögum, er  orðið ilmur  notað í fleirtölu,ilmir.  Þetta fellir  Molaskrifari sig illa  við. Fleirtölumynd  þess orðs er ekki  til í beygingalýsingu íslensks máls  á  vef Árnastofnunar. Það  er gamalt og  gilt  að tala um  ilmvatn og þess vegna ilmvötn, eða hvað ?

Bjarndýr réðist á ferðamenn í Japan og  stórslasaði níu þeirra áður en hann var skotinn til bana í minjagripaverslun. Svona  tók  fréttaþulur  í fréttum  Stöðvar tvö  (20.09.2009) til orða.  Hefði átt að  segja... áður en það var  skotið  til bana. Þetta er   dæmi  um það  að fréttaþulur er ekki með hugann við lesturinn, heyrir ekki hvað hann sjálfur  segir. Óþarfa ambaga. Ekki hefði  heldur  skaðað að taka fram að þetta var skógarbjörn. Þegar talað er um bjarndýr  dettur  flestum  fyrst í hug ísbjörn.

Sérkennilegt  orð sá dagsins ljós  á  skjá RÚV  í fréttum (21.09.2009)og hafði nokkuð langa viðdvöl á skjánum.Það var orðið sönnunarbirgði. Skemmst er frá því að segja að þetta orð er ekki  til. Þarna átti örugglega að standa  sönnunarbyrði,   sem er  eins og segir í  Íslenskri orðabók:  Sú skylda (málsaðila) að sanna málstað sinn.Þetta eru ekki  þau faglegu og  vönduðu  vinnubrögð sem RÚV básúnar í auglýsingunni um  eigið ágæti. . Það er   til prýðileg   stafsetningarorðabók frá  JPV bókaútgáfunni sem  gott er að   styðjast við (Útg. 2006). Þetta er svona grunnskólavilla,ef þannig má að orði komast.  Það var heldur ekki af hinu góða, þótt  sumum finnist kannski smátt, að  í tíufréttum RÚV  sjónvarps (21.09.2009) heyrði ég ekki betur  en  fréttaþulur talaði um Vesturdalseyri,en fréttamaður á heimaslóð sagði  réttilega Vestdalseyri. Fréttamenn í Reykjavík þurfa helst að þekkja landið sitt  svona sæmilega.

Molar um málfar og miðla CLIV

 Gott Silfur Egils (20.09.2009).   Ágæt umræða. Prýðisþýðing á  viðtali við  formann loftslagsnefndar Sþ.  Kastljósi  RÚV hrakar hinsvegar  með hverjum þætti. Þar þarf að að breyta. Þau  Sigmar og Þóra  klikka ekki í Útsvari,sem er með allra  besta  efni  RÚV.   Meðal annars vegna þess að  allir sem á horfa verða óbeinir þátttakendur í keppni liðanna. Fréttaauki Elínar og  Boga (20.09.2009), frásögnin  af litlu stúlkunni hér á Íslandi og  ástandinu  í Lettlandi var vel unnið og áhugavert efni. Ósjálfrátt fór maður að bera  saman  í huganum Ísland og  Lettland. Það setti eiginlega að manni  hroll. Svo kom einhver  gaur og þéraði menn í hástert uppi í Hveradölum !

Afleit villa slæddist inn í sjónvarpsfréttir  RÚV (20.09.2009) þegar  sagt var  frá Októberhátíðinni í München. Þá var talað um bavarískan prins.  Sá landshluti sem  hér um  ræðir  heitir á íslensku Bæjaraland (e. Bayern) og íbúar þar  eru bæverskir. München er höfuðborg Bæjaralands.Svo  er  Bæheimur (e. Bohemia) vestasti hluti Tékklands. Þeir sem  þar búa  eru bæheimskir.  Orðið bavarískur er ekki til á íslensku. Maður var að vona að fréttastofa RÚV  væri vaxin upp úr svona villum.  Svo er greinilega ekki.

Beygingafælni sér víða  víða stað. Í auglýsingu í Morgunblaðinu (19.09.2009) segir: Aðaleign félagsins  er fasteignin að Eyrarveg 2 ..   Hér   hefði átt að  standa  Eyrarvegi 2. Ríkisútvarpið  leggur  sitt  af mörkum   í þessu  efni þegar (19.09.2009) sagt er í dagskrárkynningu:  Fylgist með  Formúla þrjú... Áhorfendur  fylgjast ekki með eitthvað,  heldur  einhverju. Hér  hefði átt að  segja :  Formúlu þrjú.

Sérlega hallærisleg auglýsing var í  RÚV sjónvarpi (19.09.2009). Hún hljóðaði  svona:  Fitness Sport alltaf inni. Hrognamál, hrærigrautur. Engin  sía  virðist til staðar í auglýsingadeild RÚV. Sem þetta er pikkað á lyklaborð tölvunnar heyrir skrifari  auglýsingu í RÚV: Taxfree af búsáhöldum, Húsasmiðjan. Þessar auglýsingar eru, annars ágætu fyrirtæki, til skammar. Taxfree er enska. Auglýsingar í íslensku útvarpi eiga  að vera á íslensku. Í  reglum  Ríkisútvarpsins  um auglýsingar og kostun  dagskrárefnis segir orðrétt í 3.gr. 2.tölulið:Auglýsingar skulu vera á lýtalausu  íslensku máli.  Þess utan er það bull að tala um taxfree af einhverju og Húsasmiðjan hefur enga  heimild  til að sleppa  virðisaukaskatti af einu eða  neinu. Fyrirtækið   getur  hinsvegar veitt viðskiptavinum  afslátt  sem nemur  virðisaukaskatti á það sem keypt  er.

Fréttamaður  Stöðvar tvö (19.09.2009)  sagði:  .. fjórir og hálfur milljarðar. Í þessu  tilviki er það  hálfur sem  ræður því  að milljarðarnir eiga  að vera í eintölu. Þessvegna  hefði átt að segja: Fjórir og  hálfur milljarður

Þingmenn Framsóknarflokksins hafa sumir hverjir  tamið sér ljótara orðbragð  en heyrst hefur í íslenskri  stjórnmálabaráttu  í  áratugi. Þannig  segir  einn  helsti  talsmaður flokksins um ummæli  forsætisráðherra sem sagði að að  stjórnarandstaðan  hefði brugðist  trúnaði, að ummælin séu  ómerkilegur lygaáróður. Gífuryrði af þessu tagi  verðfella málstað þess sem lætur  sér svona lagað um munn fara. Stjórnmálamenn sem  svona tala  eru ekki vandir að virðingu sinni. Enn sannast hið fornkveðna, að sannleikanum verður hver sárreiðastur.

Molar um málfar og miðla CLIII

  Jákvæð og athyglisverð er  fréttin um að norskur fjárfestir ætli  að leggja  1400 milljónir í MP  banka. Hann kom hingað upphaflega  fyrir  tilstilli  landa síns  Sven Haralds Øygards, sem tímabundið  gegndi  stöðu   seðlabankastjóra.  Muna menn, að  Sjálfstæðismenn  fundu honum  það  til foráttu, að hann talaði ensku með norskum hreim? Fyrrverandi  formaður Sjálfstæðisflokksins  taldi líka að hann væri  haldinn  Alzheimersjúkdómnum. Þann alvarlega sjúkdóm á ekki að hafa  í flimtingum.  Ef  til  vill  koma   fleiri  fjárfestar  til liðs  við íslenskt  efnahagslíf  fyrir  tilstilli þessa Norðmanns sem Sjálfstæðismenn sýndu svo opinskáa  fyrirlitningu. Hvað  segðum  við  ef það væri  helsta gagnrýnin á  Íslendinga sem  störfuðu erlendis að þeir  töluðu ensku með íslenskum hreim? Ýmsir ágætir íslenskir  stjórnmálamenn  hafa  á opinberum vettvangi talað  ensku með mjög  sterkum íslenskum hreim. Það var  í besta lagi.

 Þeir sem  skrifa fréttir eiga ekki að nota  orð,sem þeir vita ekki hvað merkja. Í  Vefdv (18.09.2009) var  fjallað um brottrekstur Ólafs Stephensens  ritstjóra  af Morgunblaðinu. Í fréttinni  segir: Starfsmönnum Morgunblaðsins var fyrr í dag tilkynnt um ráðahaginn og var mörgum mjög brugðið.Orðið  ráðahagur  þýðir  kvonfang ,  en  var áður fyrr notað í merkingunni  efnahagur, en í Íslenskri orðabók  segir  að sú merking sé forn  eða úrelt.  Orðið  ráðahagur er þarna  algjörlega út í  hött.  Starfsmönnum var sagt frá  brottrekstri eða  starfslokum  ritstjórans. Ekki man  Molaskrifari betur en hér  hafi áður  verið  fjallað um ranga notkun  orðsins  ráðahagur. 

Netmoggi vitnar  (18.09.2009) í samþykkt þingflokks Framsóknar og  segir: Þingflokkurinn áréttar einnig í ályktun, að einungis sé hægt að breyta lögum á vettvangi Alþingis. Á vettvangi  Alþingis?  Hversvegna ekki  segja: á  Alþingi.  Miklu best   væri auðvitað að  segja það sem  liggur í augum uppi að  aðeins  Alþingi getur breytt lögum,sem  Alþingi hefur samþykkt.

Ekki er  ráð nema í tíma sé tekið.  Byrjað var að  auglýsa  jólainnkaupin í sjónvarpi  í kvöld.  19. september !

Í fréttatíma  Stöðvar tvö var fjallað um íslenska fyrirtækið  Arctic Trucks  sem  hefur  með  góðum árangri breytt jeppum þannig að þeir  henta  betur  til aksturs  við erfiðar aðstæður.  Í fréttinni  komst  fréttamaður svo að orði ... að breyta  jeppum þannig að þeir  keyri betur í eyðimörkum (óljóst reyndar hvort hann  sagði  eyðimerkum)...  Jeppar keyra ekki. Þeir  eru  keyrðir  eða þeim er ekið. Í   þessu tilviki var verið  að breyta jeppum  svo þeir  hentuðu betur  til aksturs í  eyðimerkursandi. Í  sömu frétt  sagði þessi  fréttamaður... skaffa norska og  sænska hernum allt  að 1600 jeppum á næstu  fjórum  árum. .. Þeim sem  svona tala á  ekki  að hleypa að hljóðnema.  Arctic Trucks  tekur líklega ekki að sér að breyta  illa máli  förnum  fréttamönnum.  Stöð tvö ætti samt að kanna málið.

Molar um málfar og miðla CLII

 Það er eftirsjá að  Ólafi Stephensen úr ritstjórastóli Morgunblaðsins. Ólafur  er fagmaður, góður fagmaður og var á réttri leið með  blaðið. En hann var  nýjum eigendum ekki þóknanlegur. Það er  hinsvegar mikið  veikleikamerki hjá  nýjum eigendum  að hafa ekki   samdægurs tilkynnt hver taki við  starfi Ólafs.

 Magnað hvað menn eiga  erfitt með orðið  fé. Kunnur  bloggari skrifar  á  Eyjunni (18.09.2009):..segir að Evrópusambandið sé með fulla vasa fé og bíði eftir að kaupa auðlindirnar. Þarna hefði átt að  standa    fulla vasa  fjár,  eða fullar hendur fjár.

 Icesave líklega tekið aftur fyrir, segir í fyrirsögn (18.09.2009) á   vef RÚV. Aftur fyrir hvað? Þetta er bjálfaleg orðaröð ,að  ekki  sé meira  sagt. Betra hefði verið: Icesave líklega tekið  fyrir  aftur, eða Icesave líklega  tekið  fyrir  að  nýju eða á nýjan leik.

Á Pressunni er (18.09.2009) skrifað um húðflúr. Nánar tiltekið  persónuupplýsingar sem eru húðflúraðar á  andlit barna , - börnin eru sem sé merkt , ef þau  skyldu  týnast. Þetta  húðflúr  er þeirrar gerðar að það endist ekki nema í nokkra mánuði. Pressan segir:Aðrir hafa sagt að húðflúr séu eitthvað sem eingöngu fullorðnir eigi að nota og rangt sé að þröngva þeim upp á saklaus börn. Um þetta skal  sagt að orðið  húðflúr  er  eintöluorð og ekki til í  fleirtölu. Eftirfarandi setningu  er líka  að  finna á Pressunni: Hann mætti ekki í skólann í gær og hefur honum borist hótanir.  Sá  sem  svona  skrifar  er ekki vel að sér í  íslensku.

 Ránsþýfi fannst hjá  góðkunningja,segir í fyrirsögn á  Vefdv (17.09.2009). Það er ekkert  til sem heitir  ránsþýfi. Hér  hefði að  segja  þýfi, sem  er stolnir munir, eða  ránsfengur. Verðmæti sem hefur  verið  rænt. Í þessari sömu frétt segir: Lögreglan grunaði strax að nítján ára góðkunningi þeirra hefði framið innbrotið... Lögreglan  grunaði ekki, lögregluna  grunaði. Sá sem  skrifaði þetta þarf  tilsögn í meðferð móðurmálsins.

 Fíkniefnalögreglan í Dóminíska lýðveldinu stóðu sig vel í að lesa á milli línanna þegar þeir stöðvuðu stórfellt kókaínsmygl á leið til Spánar á dögunum.  Þetta er ágætis orðalag um kókaín,sem fannst  falið í orðabókum sem senda átti til Spánar  , nema hvað  lögreglan  stóðu sig ekki  vel, heldur  stóð lögreglan sig  vel. Svo er dálítið einkennilegt að tala um kókaínsmygl á leið  til Spánar. Í þessari sömu frétt í Vefdv (18.09.2009) er  talað  um að fela kókaín í bókarkápum eða  fóðri  bóka. Molaskrifari verður að játa að þetta skilur hann ekki  og  er þó ekki með öllu ókunnugur  bókum.  Hvað er  fóður  bóka ? Hvernig er hægt að fela  eitthvað í bókarkápu ? En Molaskrifari er reyndar  ekki vel að sér í aðferðum  við að  smygla  eiturlyfjum.

Vefvísir segir (18.09.2009): Blár gámur sem stóð við Melabraut 17 (suðurbrautarmegin) í Hafnarfirði var stolið þaðan 1.júli síðastliðinn. Blár gámur stolið? Bláum gámi var stolið. Hvar er  máltilfinningin Vísismenn?  Svo er nú líka dálítið  merkilegt að 18. september  skuli vera  sagt frá þjófnaði sem átti sér  stað 1. júlí !!