Molar um málfar og miðla 181

 

Fínn þáttur, Hrafnaþing, á ÍNN í kvöld (20.10.2009). Ragnar Önundarson talaði um efnahagsmál af skynsemi og á mannamáli. Hann setti fram athyglisverðar hugmyndir. Ingvi Hrafn spurði réttu spurninganna. Skýrar og góðar glærur. Báðum til sóma. Stjórnvöldum ber skylda til að skoða hugmyndir Ragnars ítarlega. Mæli með að  áhugasamir  horfi á endursýningu þáttarins.

 

Úr Vefmogga (20.10.2009): Þetta kemur fram í svari talsmanns konungshússins. Seinna í fréttinni segir: Það er ekkert til í þessari kenningu,“ segir Lene Balleby, upplýsingastjóri konungshússins. Þeim bregst ekki bogalistin í þýðingum á Mogga  frekar en fyrri daginn. Hér hefur verið þýtt úr dönsku og þar hefur verið talað um kongehuset. Verið var að fjalla um Margréti Danadrottningu og flugufregnir um að hún ætlaði að afsala sér völdum og setjast í helgan stein. Þetta minnir á kryddsíldina frægu. Ætli sá sem hana skóp sé enn að störfum á Mogga? Engu líkara.

 

Bjarni Sigtryggsson sendi Molaskrifara eftirfarandi (18.10.2009): Fólk, sem mótmælti Icesave samkomulagi úti fyrir Stjórnarráðshúsinu í hádeginu í dag var með "megafón" sagði í hádegisfréttum RUV.

Hvað er á móti því að nota hið gamalkunna, íslenzka orð "gjallarhorn"? Já, Bjarni, það er auðvitað hið rétta orð, en sennilega var það ekki að finna í orðaforða fréttamannsins.

 

Bjarni talar hér réttilega um Stjórnarráðshúsið. Vinur Molaskrifara benti honum nýlega á að fréttamenn kölluðu Stjórnarráðshúsið við Lækjartorg nær alltaf stjórnarráðið. Þetta fer í taugarnar mér, sagði hann því stjórnarráðið er samheiti yfir öll ráðuneytin. Þessi vinur minn vinnur í stjórnarráðinu , nánar tiltekið í utanríkisráðuneytinu.  Þessi athugasemd  hans er auðvitað hárrétt.

 

Úr Vefdv (18.10.2009) : Hún ók út af veginum nærri Skeiða- og Hrunnamannavegi sem er rétt hjá Geysi. Reynir, þessum þarftu bæði að kenna landafræði og réttritun !

 Jónas Kristjánsson tvítekur í bloggi sínu (18.10.2009) Börnum okkar mundi muna um það.   Jónas hefði átt að skrifa: Börn okkar mundi muna um það. Mig munar um, ekki: Mér munar um eitthvað.  

Samningurinn verður endurskoðaður upp á nýtt, sagði fréttamaður RÚV sjónvarps (18.10.2009). Nægt hefði að segja að samningurinn yrði endurskoðaður. Í þessum sama fréttatíma sögðu bæði fréttaþulur og fréttamaður  síðasta haust. Þetta er úr ensku og var nefnt í síðustu Molum.  Á íslensku segjum við: Í fyrra haust. Þessi baktería virðist nú eiga lögheimili  í Efstaleitinu.

Íþróttakaflinn í fréttum sunnudagskvöldið 18. okt. var óvenjulega amböguríkur. Eiginlega hneyksli. Dæmi:

Tóku þátt á mótinu. Átti að segja: Tóku þátt í mótinu.

Hala inn stigum. Átti að segja : Hala inn stig. Þú halar eitthvað inn, ekki einhverju..

Höfðu Kínverjar tögl og hagldir yfir aðra keppendur. Rugl. Hefði getað sagt: Kínverjar öfðu bæði tögl og hagldir í keppninni, höfðu algjöra yfirburði.

 Rúsínan í pylsuendanum var svo: Adam fékk ekki að vera einn í paradís nema meðan rétt svo á leikhléinu stóð! Hér var fréttamaður að nota orðtak,sem hann kann ekki. Rétt er orðtakið: Adam var ekki lengi í paradís. Það þýðir sælan var skammvinn.

Svo kann Molaskrifari ekki að meta þann framburð ,sem ýmsir í sjónvarpinu hafa tamið sér, -segja evvvst í stað efst og tveem í stað tveim.

 

Ríkisútvarpið, þjóðarútvarpið ætti að hafa meiri metnað gagnvart móðurmálinu en þetta sýnir okkur.

 

Fíflagangur á Alþingi

  Í gær og í dag hafa  þingmenn stjórnarandstöðunnar rætt Icesave málið á Alþingi undir   ýmsum  dagskrárliðum, þykjast  til dæmis vera að tala um störf þingsins eða  fundarstjórn forseta.

Þegar  kom að því dag  að því að greiða  atkvæði um  afbrigði  frá þingsköpum eins og  alsiða  er að  gera   svo  taka megi málið á dagskrá aðeins fyrr en   þingsköp  segja  fyrir um , greiðir öll stjórnaranstaðan  atkvæði á móti. Þetta er  ekki hægt að kalla annað en fíflagang. Þeir sem fara  fyrir  styjórnarandstöðunni   eru ólíkindatól og mér  segir  svo hugur um að það sé ekki  mjög  algengt í þingsögunni að neitað  hafi verið um afbrigði , þótt þess séu  sjálfsagt dæmi.

   Aldrei fyrr  höfum við hinsvegar haft  stjórnarandstöðu  sem  hegðar sér eins og  ólátabekkur í gagnfræðaskóla.  Þingmenn stjórnarandstöðunnar gjamma og gjamma úr  sal  til þess að helst heyrist  ekki í þeim sem  hefur orðið og  er í ræðustól. Þetta er allt  dálítið óraunverlegt.

Það  var annað yfirbragð á umræðum  norskra  stjórnmálamanna í NRK  Dagsnytt í  dag, - eins og  svart og  hvítt.

 

Breyting í Hádegismóahöll

 Þegar Bjarni Benediktsson tók við ritstjórn Morgunblaðsins 1956 tók hann ákvörðun um að breyta þingfréttaskrifum blaðsins í þá  veru að sagt  væri  heiðarlega frá  ræðum  þingmanna  annarra flokka. Það hafði ekki  tíðkast í Morgunblaðinu fram að því. Sagt var frá ræðum Sjálfstæðismanna  en  ræðum  þingmanna annarra flokka ekki gerð mikil skil. Þessu breytti Bjarni og á mikinn heiður skilinn  fyrir það. Þetta var skref í nútímavæðingu Morgunblaðsins

 Nú verður ekki betur séð af  Mbl. is   að verið sé  að færa þetta   aftur í gamla  formið og  flytja   þingfréttaflutning meira  en hálfa öld  aftur í tímann.  Það verður   blaðinu ekki til framdráttar. Verði þetta raunin er það óheillaskref sem enn mun  fækka áskrifendum blaðsins sem gefið er út í Hádegismóum.

Gleymdu 200 milljörðum

Molar uym málfar og miðla 180

Í tíu fréttum RÚV (16.10.2009) var sagt... áframhaldandi starf hans sem sóknarprestur á Selfossi. Hefði átt að vera: ... áframhaldandi starf hans sem sóknarprests á Selfossi.

 Úr Vefdv (17.10.2009): 45 ára gömul kona frá Big Sandy í Texas í Bandaríkjunum hefur verið gert að sæta geðrannsókn eftir að yfirvöld ... Hér ætti að standa: 45 ára gamalli konu.. hefur verið gert að sæta geðrannsókn  

 

Úr Vefvísi (17.10.2009) Lögreglan á höfuðborgarsvæðinu þurfti að hafa afskipti af ungmennum á Granda vegna hraðaksturs. Kvartað var undan hávaða. Lögreglan greip í tómt þó þegar hún kom á vettvang en segir það þekkt að ungmenni séu að aka hratt á þessum slóðum og valda ónæði. Augnablik! Það er ekki heil brú í þessu. Afskipti af ungmennum sem ekki voru til staðar. Hvernig  gerðist slíkt?  

 

Íþróttafréttirnar í lok sjónvarpsfrétta RÚV (17.10.2009) voru sannkölluð ambögunáma. Nokkur dæmi um gullkorn þaðan: Keppnin í dag innihélt sex keppnisgreinar, segja má að öll úrslit hafi verið eftir bókinni (e. by the book) , hann gerði 13 stig, leikurinn fór seint af stað (leikurinn byrjað seinna en ráð var fyrir gert), hafði klúðrað fyrir Brasilíu. Svo kom nýtt borgarheiti við sögu: Kaí- ró, í stað Kæró.

 Enn var í fréttum RÚV (17.10.2009) talað um síðasta í haust í stað þess að segja í fyrra haust eins og er málvenja á íslensku. Ekki verður sagt að fréttastofa RÚV standi dyggan vörð um tunguna.

Í Kastljósi RÚV (19.10.2009) sagði varaformaður Sjálfstæðisflokksins að  ríkisstjórnin hefði komið fram eins og málafærslumenn fyrir Breta og Hollendinga. Þetta er ásökun um landráð. Nú er líka hamrað á því að Bretar og Hollendingar treysti ekki íslenskum dómstólum. Íslenskum dómstólum gefinn fingurinn, var sagt. Ekki mjög  vandað mál. Eigum við ekki að snúa spurningunni við?  Treysta Íslendingar breskum og hollenskum dómstólum? Svari nú hver fyrir sig.

Í veðurfréttum Stöðvar tvö (19.10.2009) var sagt að útlit væri fyrir björtu veðri. Betra hefði verið að segja að útlit væri fyrir bjart veður eða bjartviðri. Molaskrifari efast um að stjórnendur Stöðvar geri sér grein fyrir því hve röng ákvörðun það var að  reka Sigurð Þ. Ragnarsson veðurfræðing, Sigga storm. Hann var hluti af andliti fréttatímans, sterkur dráttur í fámennum hópi. Erlendar sjónvarpsstöðvar skilja mikilvægi þess að vera ekki sífellt að tefla fram nýliðum í fréttum og veðurfréttum. Enn sér Molaskrifari sömu andlitin í norska sjónvarpinu sem þar fluttu fréttir og veðurfréttir á árunum 1993 til 1998. Þetta var arfavitlaus ákvörðun Stöðvar tvö um ágreining sem auðvelt hefði átt að vera að jafna. Klókt hjá sjónvarpi Moggans og Skjás eins að ráða Sigurð samdægurs. 

Upphlaup ábyrgðarmannanna

   Fyrir venjulega borgara  með sæmilegt minni er erfitt ,ef ekki útilokað, að skilja gauragang forystu Sjálfstæðisflokksins eftir að nýtt og hagstæðara samkomulag  náðist um Icesave-klúður Sjálfstæðisflokksins.  Davíð Oddsson seðlabankastjóri og  Árni Mathiesen fjármálaráðherra viðurkenndu ábyrgð Íslands í  þessu máli með undirskrift sinni.  Það var í nóvember í fyrra.  Með gildum rökum má segja  að þáverandi þingflokksformaður og  núverandi  formaður Sjálfstæðisflokksins  sé  samábyrgur. Hér  er enn verið að slá og  setja  Íslandsmet í tvískinnungi og lýðskrumi.   Tek mér það bessaleyfi að  tilfæra hér nokkrar setningar úr bloggfærslu Jóns Inga Cæsarssonar frá í  júlí í sumar:

"Nokkrum dögum áður en skrifað var undir samning um lán Alþjóðagjaldeyrissjóðsins til Íslands var gerð breyting á viljayfirlýsingu íslenskra stjórnvalda til sjóðsins og sérstaklega hnykkt á því að Íslendingar hétu að standa við allar skuldbindingar sínar á grundvelli innistæðutryggingasjóðsins.

Davíð Oddsson og Árni M. Mathiesen undirrituðu uppfærðu viljayfirlýsinguna 19. nóvember, sama dag og lánið var samþykkt, eins og þá fyrri 3. nóvember.

Eftirfarandi setningu var bætt inn í 9. lið uppfærðu yfirlýsingarinnar: „Ísland hefur heitið því að virða skuldbindingar á grundvelli innstæðutrygginga­kerfisins gagnvart öllum tryggðum innlánshöfum."

  Halda menn að stjórnarandstaðan hefði náð betri samningum ?  Að Bretar og Hollendinmgar hefðu verið  sveigjanlegri við Sigmund og Bjarna? Eða áytum við  bara að hlaupa frá því sem  Davíð og Árni skrifuðu undir? Hlaupa frá skuldbindingum okkar? Er það siðaðra manna og þjóða háttur?  Hvað vill stjórnarandstaðan gera?

 Um Framsókn er  fátt að segja.  Gamalgrónir  Framsóknarmenn eru hættir  að hlusta á  strákana sem  nú stýra flokknum. Þeim blöskrar. Reyndur  fyrrverandi þingmaður sagði við  þann sem  þetta skrifar.: Þingmennska er eins og  hvert annað  starf sem  þarf að læra. Núverandi  formaður  Framsóknar  hafði  aldrei komið nálægt landsmálum eða  sveitarstjórnarmálum, þegar hann var kjörinn formaður  og fór svo inn á þing. Hann kann ekki að  starfa á Alþingi. Noregsflandrið og öll sú  saga  er   meðal annars til vitnis um það. Það er mikið til í þessu. Formanni  Framsóknar líður betur að veifa röngu tré en öngu. Honum líður best í sviðsljósi  fjölmiðla.

 

 

 

 

 

 

Er ekki....

hægt að fá þá til að rannsaka  Seðlabanka Íslands líka?

Auknar líkur á breskri rannsókn

Molar um málfar og miðla 179

Glöggur hlustandi gerði athugasemdir við málfar íþróttafréttamanna, sem oft niðra lið sem tapa með orðalagi eins að liðið hafi verið svínburstað eða niðurlægt ef munurinn á frammistöðu liðanna er mikill. Ekki er þetta hinn sanni íþrótttaandi , sagði þessi vinur minn. Það er hárrétt. Það er nóg að segja að lið hafi sigrað, unnið tapað eða beðið lægri hlut eftir atvikum.

Nýlega heyrði Molaskrifari  sagt í íþróttafréttum RÚV að deildin hefði byrjað. Þetta er málleysa. Ekki kann Molaskrifari heldur við það þegar talað er um að gera stig.  Amböguflóði íþróttafréttamanns RÚV í fréttum í kvöld (18.10.2009) verða  gerð skil hér síðar.

 

Það er verið að skrökva að hlustendum þegar Útvarp Saga segist vera að gera eða hafa gert skoðanakannanir.  Það er hárrétt sem Guðmundur Ólafsson hagfræðingur benti nýlega á (16.10.2009)  í þætti í Útvarpi Sögu þá er það sem stjórnendur stöðvarinnar kalla skoðanakannanir, bara samkvæmisleikir. Þessi orðnotkun er því bull.

 

Í Bændablaðinu (08.10.2009) segir: ... og var þessum viðburði gerð góð skil í 15. tölublaði Bændablaðsins. Skil er fleirtöluorð. Þessvegna ætti að standa: .... og voru þessum viðburði gerð góð skil...

 

Úr Vefvísi (16.10.2009). Dómsmálaráðuneytinu barst framsalsgögn frá brasilískum stjórnvöldum vegna Hosmany í byrjun september. Gögn er fleirtöluorð.. Þarna ætti því að standa: Dómsmálaráðuneytinu bárust framsalsgögn frá.

 

Bíll fór út af veginum á Reykjanesbraut var sagt í tíu fréttum RÚV (16.10.2009). Fór ekki bíllinn útaf Reykjanesbraut? Er vegur á Reykjanesbraut ? Vinur minn, gamall vestur íslenskur  um nírætt   sagði við mig  er við vorum á  ferð í  Norður Dakota og ókum af malbikuðum vegi inn á  malarveg:  Nú  förum við inn á  mölbraut,. Það  þótti mér gott.

 

Óskiljanleg setning var í hádegisfréttum RÚV (16.10.2009) um  könnun (alvöru) Fréttablaðsins á fylgi stjórnmálaflokka. Þá sagði einn besti og reyndast fréttaþulur RÚV: Formaður Samfylkingar og Framsóknarflokks stendur nánast í stað. Þarna hefur átt að segja fylgi, en ekki formaður. Það er hættulegt, þegar þulir óvart hætta að að hlusta á það sem þeir eru að lesa. Molaskrifari veit af eigin reynslu að auðvelt er að falla í þá gryfju.

 

Í fréttum RÚV sjónvarps (16.09.2009) var talað um enn brýnari þörf. Orðmyndin brýnari er ekki til íslensku máli. Þarna átti fréttamaður að segja : ...enn brýnni þörf. Kannski má reyndar kalla þann sem hefur atvinnu af því að brýna hnífa og skæri brýnara!

 

Við munum áfrýja þessum dóm, sagði lögmaður, sem hefur á lag á að komast oft í fjölmiðla, í fréttum Stöðvar tvö (16.10.2009). Hann var að fjalla um dóm yfir handrukkara og ofbeldismanni sem var skjólstæðingur hans. Handrukkarinn hafði lamið mann í klessu .Árásin var mynduðog sýnd í sjónvarpi. Lögmaðurinn hefði átt að segja: Við munum áfrýja þessum dómi. Dómur,dóm,dómi,dóms. Skrítið að lögmaður skuli ekki ráða við að beygja þetta orð.

 

Nokkrir lesendur þessara Mola hafa orðað það að betra væri að nota ekki rómverskar tölur um Molaröðina heldur  þær tölur sem við erum vönust, þ.e. arabískar. Svo verður framvegis.

Óviðunandi ?????

  Það er nákvæmlega sama  hver niðurstaða þessa máls   hefði orðið Bjarni og  Sigmundur   hefðu alltaf talið hana óviðunandi.  Flokkar þeirra  bera  þó öllum öðrum meiri ábyrgð á því hvernig komið er fyrir  þjóðinni. Upphaf málsins var þegar  flokkar þeirra gáfu  vinum sínum  ríkisbankana. Þar eru ræturnar.  Það þarf  karlmennsku og kjark  til að  ljúka þessu máli. Vonandi  hefur  stjórnarliðið það. Lýðskrumið og ábyrgðarleysið hjá  forystu  Sjálfstæðisflokks og  Framsóknarflokks  mun halda  áfram. Vita þessir  menn ekki að  þeir eru að misbjóða þúsundum sinna  eigin flokksmanna með þessari  framkomu ? Það þarf ekki að tala  við neinn fjölda  til að komast að því.

Óviðunandi niðurstaða

Nú reynir á .....

 Nú reynir á hvort  stjórnarstaðan hefur snefil af ábyrgðartilfinningu, eða er bara í sýndar- og hræsnileik. Nú kemur í ljós hvort lýðskrumið eða ábyrgðin verða ofan á.  Fróðlegt verður að sjá. Ekki verður sagt meira að sinni.

Icesave-fyrirvörum breytt

Molar um málfar og miðla CLXXVIII

 

Úr Vefmogga (16.10.2009): Slökkviliðið kom umsvifalaust á staðinn og hafði ráðið niðurlögum eldsins á innan við 10 mínútur. Eldurinn hafði breiðst út í hálm á túninu og þurfi einnig að slökkvi í því. Við þetta er eiginlega engu að bæta !

 

Úr Vefdv 16.10.2009): Gunnari sagðist þykja vænt um alla Selfyssinga. Hér ætti að standa: Gunnar sagði að sér þætti vænt um alla Selfyssinga.  Búinn að heyra  tíu sinnum í fréttum að  fundarmenn á  stuðningsfundi við klerk  hafi í upphafi  fundar sungið Fyrr var oft í koti  kátt. Skil ekki alveg  samhengið.Af hverju sungu þeir ekki: Ó,Jesús, bróðir besti ,og  .....? Það hefði átt betur  við fundarefnið.

 

Í fréttum RÚV sjónvarps um bankamál (15.10.2009) var talað um stórar kröfur. Venjulegra og réttara, að mati Molaskrifara, er að tala um háar kröfur. Meira um bankamál. Í Fréttablaðinu (15.10.2009) segir: Lán Glitnis til fyrrverandi og núverandi starfsmanna bankans hleypur á milljörðum króna. Hér hefði betur verið sagt: Lán Glitnis til fyrrverandi og núverandi starfsmanna bankans nema milljörðum króna, eða skipta milljörðum.

 

Umfjöllun Kastljósi kvöldsins (15.10.2009) þar sem rætt var um erlendu stúlkuna, sem ekki hefur spurst til síðan á mánudagskvöld bætti nákvæmlega engu við það sem sagt hafði verið í fréttum örskömmu áður. Í Kastljósi talaði spyrill um að fólk hefði verið að spá mikið í þessu máli. Þetta heyrist æ oftar. Molaskrifara finnst eðlilegra að tala um að spá í eitthvað fremur en að spá í einhverju.

 

Í matreiðsluþætti RÚV sjónvarps (15.10.2009) var talað um niðursoðinn túnfisk og sagt að hann hefði langan gildistíma. Svolítið einkennilegt orðalag. Átt var við að túnfiskurinn geymdist lengi, hefði  langan geymslutíma ,mikið geymsluþol.

 

Alþingismaður bloggar (15.10.2009): Þar rekur hún meðal annars tilurðina að stofnun Háskólasetursins…Ekki kann Molaskrifari við orðið tilurð í þessu samhengi. Eðlilegra hefði verið að segja: .. tildrögin að stofnun... eða  að dragandann að stofnun Háskólasetursins...

 

Það var góð fyrirsögn í Vefmogga (16.10.2009) um skipskex sem bakað er á Íslandi en selt í Færeyjum , að það seldist eins og heitar lummur.

 

Í morgunþætti Rásar eitt var (16.10.2009) var spjallað við fyrrum málfarsráðunaut RÚV um daglegt mál. Fróðlegt spjall, en Molaskrifari getur hreint ekki tekið undir að orðið brotaþoli sé betra orð en fórnarlamb um þann sem sætir (saklaus) þjáningum eða dauða eins og segir þeirri útgáfu Íslensku orðabókarinnar,sem Molaskrifari hefur nærtæka þar sem hann skrifar þetta. Orðið brotaþoli finnst Molaskrifara lögregluskýrslulegt lögfræðingamál.

 Það segir sitt um stöðu mála að það skuli vera fréttaefni að forsetanum sé ekki illa tekið er hann fer um landið og ræðir við fólk. Auðvitað reynir fólk að sýna honum kurteisi, en þetta losar forsetann ekki við klappstýrustimpilinn né deyfir það minningar  um dekur hans  við spillingarliðið og veisluhöld á Bessastöðum fyrir vafasama karaktera, innlenda sem erlenda á kostnað skattborgara. Orðstír hans í þeim efnum verður líklega langlífur.