Molar um miðla og málfar 189

Molaskrifari las athyglisverða frétt á fréttavefnum AMX um umfjöllun annarra fjölmiðla um hin furðuleg  milljónalán sem Glitnir veitti ungum börnum til kaupa á stofnfjárbréfum í BYR , sparisjóði, (þessum sem sí og æ gortar af fjárhagslegri heilsu).

Samkvæmt því sem AMX skrifar var Viðskiptablaðið  fyrst með þessa frétt  Stöð tvö fjallaði  um málið samdægurs og gat þess rækilega að Viðskiptablaðið hefði flutt fréttina fyrst. RÚV, þjóðarsjónvarpið  flutti þetta sem fyrstu frétt,þennan sama dag, en lét þess rækilega ógetið ,hvaða fjölmiðill hefði verið  fyrstur með fréttina. RÚV skreytti sig með stolnum fjöðrum eins og AMX   segir.  Ekki verður betur séð, þó skal ekki fullyrt,  að þetta sé brot á siðareglum blaðamanna. Allavega er þetta brot á mannasiðum og hroki.  Svo ein spurning: Hvaða  erindi átti tilgangslaust rölt  fréttamanns Rúv yfir götu  inn í fréttina?  Og að  endingu: Fréttamaður Rúv talaði um fleiri, fleiri milljónir. Það er  langt síðan Molaskrifara var kennt að svona orðalag  væri  ekki boðlegt.  Þar að  auki  eru þetta  óvönduð  vinnubrögð Hvað eru fleiri, fleiri milljónir margar milljónir  margar milljónir að mat fréttastofu ríkisins?  Fimm, tíu, fimmtán, tuttugu , eða hvað ?   Og  svo mál líka  spyrja:   Fleiri en hvað?  Þeir sem  svona  vinna   og  svona tala eiga ekkert  erindi á  fjölmiðil,sem vill vera vandur að  virðingu sinni.  

  Í sex fréttum  RÚV (31.10.2009) var talað um sýnarannsóknir og sagt niðurstöður  í sýnum. Venjulegra málfar, þegar verið er að rannsaka sýni til að komast að rót eða orsök sjúkdóma, er að tala um niðurstöður úr sýnum.  

 

 

   Í tónlistarþættinum Bláar nótur í bland í RÚV (31.10.2009) , var fjallað um tvo fiðlumeistara jassins, þá Svend Asmundssen og Stephane Grappeli. Um þá félaga var sagt í þættinum að þeir hefðu á sínum tíma verið hæst skrifuðustu fiðluleikarar jassheimsins. Hér hefði átt að segja hæst skrifuðu, ekki hæst skrifuðustu. Í þættinum var leikið hið undur fallega lag, þeirra Fats Wallers og Andys Razafs, Honeysuckle Rose. Þetta lag er perla. Best  er það þegar Fats Waller spilar það einn og syngur. Skil ekki af hverju umsjónarmaður þurfti að kalla lagið númer. Númer hvað?  

 

 

 Ýmislegt athugavert var í íþróttafréttum RÚV sjónvarps (31.10.2009) Þar var t.d. talað um 52 keppnir. Molaskrifari á alltaf erfitt með sætta sig við fleirtölunotkun þessa orðs. Kannski er það sérviska. Betra hefði honum þótt að heyra talað um 52 kappleiki. Síðan var talað um allan ágóða leiksins. Eðlilegra hefði verið að tala um allan ágóðann af leiknum.  Leikurinn græddi ekkert.  

 

Í íþróttafréttatímanum var einnig talað um  ökukeppni, svo kallaða  formúlu,  ( sem RÚV hefur alveg sérstakt dálæti á) og  tekið svo  til orða að rétt fyrir tímatökuna hefði byrjað að rigna á brautinni (svo!) í Barcelona, en það varð til þess að hún varð mjög blaut.  Það rigndi hressilega og það varð til þess að brautin varð mjög blaut! Það var auðvitað nauðsynlegt fyrir okkur  hlustendur að skýra það út að brautin hefði orðið blaut í rigningunni. Svo skyni skroppnir sem við upp til hópa erum.   

 

PS Getur einhver snillingur skýrt fyrir Molaskrifara hversvegna greinaskil falla  út  þegar ég flyt  skjal  skrifað  í Word  yfir á  bloggið? Þetta gerist stundum og  stundum ekki.   

Molar um Málfar og miðla 188

  Þrátt fyrir góðan ásetning og annir við annað gengur enn fremur illa að fækka  bloggpistlum !

Það er til lengdar   þreytandi að vera alltaf að klifa á sömu atriðunum hér í þessum Molum um málfar og miðla. En segir ekki einhversstaðar að dropinn holi steininn?

  

Í íþróttafréttum Stöðvar tvö sagði íþróttafréttamaður (30.10.2009) að  tiltekið lið hefði verið niðurlægt.  En liðið tapaði fyrir  mótherjum með miklum mun. Að þessu var vikið hér fyrir skömmu.  Er það markmiðið kappleikja að annað liðið niðurlægi hitt ? Þá er hinn sanni íþróttaandi víðsfjarri, ekki satt?

  

Ekki verður betur séð en allar verslanir á  svonefndu Korputorgi,sem stundum er þó kennt við kreppu fremur en Korpu, hafði tekið sig  saman um  að nota enskuslettuna Tax Free í nýrri sjónvarpsauglýsingu. Meiri plágan, sem erfitt virðist að uppræta  

  

Það var  gaman að sjá og heyra (30.10.2009) jákvæða, vel unna  og  ánægjulega frétt á Stöð tvö. um fiskeldisstöð með fimmtán starfsmenn norður í Öxarfirði sem gengur prýðisvel og mun skila 300 milljóna gjaldeyristekjum í ár. Vel af sér vikið. Enginn barlómur þar. Greinilega dugnaðarforkar sem fyrirtækinu standa og þar starfa. Kristján Már Unnarsson, sem fréttina vann, er einn besti sjónvarpsfréttamaður okkar.

 

Það er leiðindasiður þeirra sem kynna dagskrá  RÚV sjónvarps. Að segja að kvikmyndir t.d. frá árinu 1993 (30.10.2009) séu frá árinu 93. Svo var  kynnt kvikmynd frá árinu 2004, - þá var ekki sagt að myndin væri frá árinu 4 heldur réttilega að hún væri frá árinu 2004. Þessar dagskrárkynningar Rúv  sjónvarps í  núverandi  formi  eru  sér löngu til húðar gengnar.

  

Í sex fréttum RÚV (30.10.2009) talaði fréttamaður um ársbirgðir af lyfum. Orðið lyf beygist; lyf, lyf, lyfjum lyfja. Ársbrigðir af lyfjum hefði hann átt að segja.

  Og svo er það blessuð  sögnin að valda ,sem  verður skriffinnum DV sífellt að  fótakefli Úr  Vefdv ( 30.10.2009)Verið var að  segja  var tjóni,sem varð er vatn flæddi inn  í kjallara húss.  ... það hafi ollið töluverðu tjóni.  Hér  hefði mátt segja: Vatnið olli töluverðu tjóni, Eða, vatnið hafði valdið töluverðu tjóni  

Frétt Stöðvar tvö  (30.12.2009) um upphaf rjúpnaveiða fannst  Molaskrifa ekki fagmannlega unnin. Samtalið var ekki merkilegt og eiginlega innihaldslaust. Óviðkunnanlegt var að sjá mann veifandi skotvopni og svo gat  litið út sem byssunni væri miðað á félaga mannsins , vön skytta  sagði Molaskrifara að svo hefði þó ekki verið  ef grannt væri  skoðaði en  byssuhlaupinu var vissulega beint í áttina til hans. Frágangur fengsins,fuglanna, í bílnum var  subbulegur.   Hámarkinu var hinsvegar náð er fréttamaður spurði: Og hver er svo kúnstin við þetta , að finna fuglinn eða hitta hann.? Það var auðheyrt að það kom á þann sem spurður og hann svaraði að líklega væri það nú hvorutveggja!

Skyttan sem  Molaskrifari  ræddi  við  spurði: Af hverju ræddu þeir ekki alvöruveiðimenn?

PS:  Ef allir sem heita Davíð fá ókeypis hamborgara, - af hverju fáum við   hin þá ekki Diet Coke?

 

Molar um málfar og miðla 187

 Úr  Vefvísi (24.10.209): Betur fór en á horfðist þegar fólkbíll velti ofan í djúpan skurð á Suðurlandsvegi og hafnaði á hvolfi, Hverju velti fólksbíllinn? Velta ,velti,valt, ultum oltið.Hverju velti fólkbíllinn  ofan í læk ?  Hvað segja Molalesendur um eftirfarandi úr Vefmogga (2. 4.10.2009): Bandarískur karlmaður komst í kast við lögin á mánudag þegar hann hellti upp á kaffi heima hjá sér nakinn. Hann á von á því að verða kærður fyrir að afhjúpa sig með ósæmilegum hætti.  Molaskrifari er vanur því að heyra talað um að hella upp á könnuna,eða hella upp á en ekki hella upp á kaffi.Og að afhjúpa sig með ósæmilegum hætti, er ekki gott mál.  Á haustin er það einkum sjóbirtingur sem heillar stangveiðimanna... var sagt í hádegisfréttum RÚV ( (25.20.2009) Sögnina að heilla tekur ekki með sér eignarfall heldur þolfall. ... sjóbirtingurinn heillar stangveiðimenn. Enn ein aula villan í RÚV.  Leikurinn verður spilaður í Frakklandi .. var sagt í íþróttafréttum RÚV. Af hverju ekki: Leikurinn fer fram í Frakklandi. Að spila leik, er ekki gott mál.Í háhegisfréttum RúV ( 25,10. var talað um um píanósnillinginn Glenn Gould, Sem ítreakað var kallaðir Glenn Gold. Þetta minnar á þegar þula sjónmvarpsins talaði  hvað efiri anað um tónskáldið  Richard WOOOgner.

Molar um málfar og miðla 186

   Í hádegisfréttatíma RÚV (24.10.2009)var sagt: ... sem er eitt af höfuðvígum... Hér var ruglað saman orðum. Víg er bardagi eða dráp. Vígi er hinsvegar er hinsvegar varnarstaður eða víggirðing. Þágufall fleirtölu af vígi er vígjum (borið fram víjum). Í sama fréttatíma var sagt: Þá fara ekki sögur af... Molaskrifari er vanari því að sagt sé: Þá fer ekki fer sögum af....    Það er ágætt að RÚV skuli flytja okkur sígilda tónlist á Rás eitt frá miðnætti til morguns. Það er hinsvegar afleitt að tónlistin skuli flutt ókynnt. Það er svona eins og birta landakort án nokkurra staðaheita eða örnefna. „Landslag væri lítils virði,ef það héti ekki neitt“ .  Ef RÚV hefur ekki ráð á að kynna verk hinna miklu meistara  þá er Molaskrifari viss um að hægt væri að fá hóp 30-40 sjálfboðaliða til að kynna þessa tónlist og skiptast á um að vaka yfir henni  eina nótt í mánuði. Það væri bara gaman.  Ef þetta snýst um peninga, mætti líka hugsanlega spara eitthvað í bílarekstri stofnunarinnar.  

  Í Reykjavíkurbréfi hins nýja sunnudagsmogga (23.10.2009) (breytingin sýnist í fljótu bragði heldur til bóta) segir: Snemma á ráðherraferli Hannesar Hafstein fóru góðbændur í hópreið til höfuðstaðarins og mótmæltu fyrirhuguðum síma með tilþrifum. Hér er ýjað að langlífri sögufölsun með smjörklípuaðferðinni.. Rétt er þess vegna að vitna orðrétt í það segir á vefnum heimastjorn.is :

 „Um fá mál frá tíð heimastjórnar hefur ríkt jafn mikill misskilningur samtímans og símamálið. Þegar mikið liggur við, vitna menn gjarnan til reiðar bænda af Suðurlandi til Reykjavíkur til þess að mótmæla sæstrengnum sem dæmi um þröngsýni; baráttu gegn tækni og framþróun. Það er mikil einföldun. Símamálið var mikið deilumál þar sem tekist var á um sæstreng eða loftskeyti. Hannes Hafstein hélt fram sæstreng og bar málið fram til sigurs, Einar Benediktsson talaði fyrir loftskeytum.“    Nóg eru bændur níddir , þótt höfundur Reykjavíkurbréfs bætist ekki í kórinn.  

MolAr um málfar og miðla 185

 Í Morgunblaðinu segir (23.10.2009): Eiginfjárhlutfall Byrs sparisjóðs er langt undir leyfilegum mörkum eða á bilinu 2-3% samkvæmt heimildum Morgunblaðsins. Hlutfallið þarf að vera a.m.k. 8% samkvæmt lögum.....  Er ekki kominn tími að þetta fyrirtæki hætti að bulla í auglýsingum um eitthvað sem það kallar fjárhagslega heilsu?  Fyrirtækið er meira en lítið heilsutæpt og er þá vægt til orða tekið.

Dæmi um afar vandaða fréttamennsku er að finna á bls. 2 í Morgunblaðinu (23.10..2009) þar sem fullyrt er að sala stærsta eigenda Morgunblaðsins á milljarðahlut í Glitni á síðasta vinnudegi fyrir hrun hafi verið fullkomlega eðlileg. Eigandinn var einstaklega heppinn með tímasetningu sölunnar. Hver trúir Mogga, þegar hann skrifar svona fallega um aðaleiganda sinn? Málið er í rannsókn hjá Fjármálaeftirlitinu. Einhverjar ástæður hljóta vera fyrir því.     

 

Molaskrifari veltir því fyrir sér hvort fjölmiðlum sé illa við þingmanninn Tryggva Þór Herbertsson. Fyrst eru birtar í sjónvarpi myndir af honum að tala í farsíma á þingfundi. Svo birtir Morgunblaðið mynd af honum geispandi í þingsal og daginn eftir  birtir  Moggi mynd þar sem verið er að bólusetja þingmanninn gegn svínaflensu og grettir sig   eins og smákrakki. Maður næstum heyrir hann hrína. Næst verður líklega birt mynd af honum þar sem hann er að bora í nefið á sér.  Þess verður líklega ekki langt að bíða. Auðvitað verður að bólusetja þingmenn, sérstaklega þingmenn stjórnarandstöðuflokkanna þeir eru nefnilega með undirliggjandi sjúkdóma, sem heita, lýðskrum,tvískinnungur og hræsni. Ekki er hinsvegar talið að bólusetning bæti gullfiskaminni. 

   Skrambi getur bloggið hans Jónasar Kristjánssonar annars verið gott, þegar hann er ekki of orðljótur. Annars er þegar búið að benda mér á eina villu í frásögnum af efni bókari hans. Vona hans vegna að þær séu ekki fleiri.

Vitur eftir á

   

  Þegar þeim  sem þetta ritar var skipað  í flokk  sendiherra í  „eldri kantinum“ ,sem  væru orðnir of margir,  eins og  sagt var úr ræðustóli Alþingis, var   honum svona sæmilega kurteislega  þrýst til að hætta  ellefu  mánuðum fyrir sjötugt  og  fékk  við starfslok greitt  sex vikna ótekið sumarleyfi. Enginn starfslokasamningur þar.

  Ef ég hefði hinsvegar haft  vit á að standa í vafasömum  hlutabréfaviðskiptum væri ég kannski enn á launum hjá ríkinu.  En þetta er allt í góðu lagi. Ég nenni eiginlega ekki að hugsa um þetta lengur og er í ljósi aðstæðna prýðilega sáttur. En svona getur maður verið rosalega  vitur eftir á !

 

Molar um málfar og miðla 184

 

    Einkennilega var til orða tekið  í Fréttablaðinu (22.10.2009) þar sem sagt  var frá jeppadekkjum sem eru framleidd í Kína. Þar var sagt að dekkin séu smíðuð í Kína. Mola skrifari á mjög erfitt að sjá fyrir sér hvernig dekk eru smíðuð. Hann hefur meira að segja heimsótt dekkjaverksmiðju í Kína. Þar voru engir smiðir að störfum, heldur verkamenn, sem mótuðu eða steyptu dekkin.    

 Úr Vefvísi (22.10.2009)... vegna 200 tonna netabáts sem er aflvana um 18 sjómílur vestan Skagastrandar,... Venja er undir slíkum kringumstæðum að tala um að bátur sé vélarvana eða með bilaða vél. Ekki aflvana. Í sömu frétt segir: Um 6-8 manns eru um borð. Ósköp er þetta klaufalega orðað. Um er þarna algjörlega ofaukið.  

 

Meira úr Vefvísi. Úr frétt um slys í Kópavogi: Karlmaður slasaðist alvarlega þegar hann fékk bílskúrsdyr í höfuðið í morgun... Sá sem þetta skrifaði þekkir ekki muninn á dyrum og hurð. Dyr, eru eins og orðabókin segir: Inngangur í hús eða herbergi, oftast með umbúnaði svo hurð geti fallið fyrir. Rétt orðnotkun var hinsvegar í fyrirsögninni. Þar var talað um bílskúrshurð.   Í þessari sömu frétt segir: Maðurinn gekkst undir aðgerð vegna meina sinna. Sá blaðamaður sem þessa frétt skrifaði þarf að setjast á skólabekk og læra móðurmálið betur. Hann veit ekki, að mein þýðir meinsemd eða sjúkdómur. Maðurinn sem slasaðist hlaut alvarlega áverka.

   Enn meira úr Vefvísi sama dag. Verið var að fjalla um bruggara. Þar sagði: ...og átt sérhæfð áhöld til að eima áfengi í byrjun sumars. Lögreglan lagði hald á áfengið, 5 hvítar tunnur og suðupott í húsnæði að Hraunbæ aðfararnótt 18 júní síðastliðinn. Sérhæfð áhöld til að eima áfengi heita eimingartæki og lok fréttarinnar ættu að vera svona: .. aðfaranótt 18. júní síðastliðins. Ekki aðfararnótt.    Þegar hér var komið sögu, hafði Molaskrifari hreinlega ekki nennu til lesa meira í Vefvísi Menn sem umgangast móðurmálið svona, eiga ekki að ganga lausir þar sem lyklaborð eru innan seilingar.

  Molaskrifari lagði það á sig á hlusta á morgunþátt Rásar tvö (23.10.2009) frá því fyrir klukkan sjö fram yfir átta fréttir.Fluttur var pistill um kvikmyndir og leikara vestanhafs. Textinn var óboðlegur hrærigrautur íslensku og ensku. Málgrautur, sem RÚv á ekki að  bjóða okkur. Umsjónarmenn morgunþáttarins eru ekki vel talandi. Í viðtali töluðu oft báðir í senn, þannig að ekkert skildist. Þau Ögmundur Jónasson alþingismaður og  fv. ráðherra og Lára Hanna Einarsdóttir, þýðandi og  bloggari  voru eina fólkið sem kom við sögu í morgunútvarpinu sem var prýðilega máli farið. Hvorugt þeirra starfar hjá RÚV eins og flestir sjálfsagt vita.

Í þessum þætti  var (23.10.2009) sagt:... í gærkveldi lenti á Keflavíkurflugvelli hæsti maður heims. Auðvitað lenti maðurinn ekki, þótt langur sé. Hann kom með  flugvél , sem lenti á Keflavíkurflugvelli. Eðlilegt hefði verið að segja: Í gærkveldi kom til landsins... Síðan sagði annar þeirra, sem rætt var  við,að maðurinn væri tveir metrar og 465 sentimetrar!   Skyldi vera hætt að kenna grunnaskólanemum muninn á desimetrum, sentimetrum og millimetrum? Umsjónarmönnum datt ekki í hug að leiðrétta þetta. Seinna sagðist annar umsjónarmanna vera um 180 cm á hæð og  þessi tyrkneski bóndasonur ( sem á alla mína samúð, því hann hlýtur að eiga erfiða ævi)  væri því um það bil helmingi hærri en hann. Þá ætti hann að vera um 3 metrar og 60 cm. Meira ruglið.  

 

Niðurstaðan og ráðlegging til dagskrárstjórnar RÚV er þessi: Skiptið um umsjónarmenn og  breytið efnistökum.Hafið líka í huga, að umsjónarmenn þurfa að hafa góðar útvarpsraddir.  Raddir útvarpsmanna mega ekki ekki vera rámar og fráhrindandi.  Gerið þetta sem fyrst. Það er búið að gera tilraun. Hún heppnaðist ekki.

 

Molar um málfar og miðla 183

 

 Umsjónarmaður Kastljóss RÚV (22.10.2009) talaði um Rokkhátíð til heiðurs íslensku sauðkindarinnar. Átti að segja: .... til heiðurs íslensku sauðkindinni. Ríkisútvarpið á ekki að senda svona villur í eyru hlustenda.  

 

Hálandavaktin aldrei haft jafnmikið að gera (21..10.2009) sagði í fyrirsögn á Vefvísi.

Í fréttinni kom í ljós að verið var að fjalla um hálendisvakt lögreglu og björgunarsveita inni á hálendi Íslands. Hálöndin voru hinsvegar í Skotlandi síðast þegar til fréttist.

 

Í litlum smábæ í Noregi , var sagt í kynningu á efni Kastljóss RÚV (20.10.2009). Eru ekki allir smábæir litlir?

 

Í Víðsjá RÚV (21.10.2009) var talað um þrjár nóvellur. Í  landsprófsbekknum 3-X í Gagnfræðaskóla Austurbæjar veturinn 1954-55 kenndi dr. Guðrún P. Helgadóttir  okkur íslensku. Í námsefninu var  sagan Tilhugalíf eftir Gest Pálsson. Guðrún kenndi okkur að stuttar skáldsögur eða langar smásögur væri tilvalið að kalla bóksögur.

 

Í fréttum Mogga og  Skjás eins (20.10.200) var sagt: Hljómar of gott til að vera satt. Hér gætir sterkra áhrifa frá ensku. Eitthvað hljómar vel  en ekki gott. Þarna hefði þulur mátt segja: Þetta virðist of gott til að geta verið satt.

 

Í fréttum í Útvarpi Sögu (20.10.2009) var sagt: Fyrir því hafði hann óskað leyfis... Klaufalegt orðalag. Betra hefði verið að segja til dæmis: En hann hafði óskað eftir leyfi til þess...

 

Í fréttum RÚV sjónvarps (20.10.2009) var talað um að fá úrskurð dómsmálaeftirlitsins. Hlýtur að hafa verið mismæli. Kannski er þetta ný stofnun,sem Molaskrifari hefur ekki heyrt um.

 

Er hægt að skila tapi? spurði málglöggur maður Molaskrifara og vitnaði til þess að oft væri talað um að fyrirtæki skiluðu arði eða hagnaði. Nú væri hinsvegar orðið býsna algengt að talað væri um að fyrirtæki skiluðu tapi. Hann kvaðst ekki alveg átta sig á hvernig það gerðist. Molaskrifari tekur undir það. Fyrirtæki eru rekin með tapi. Þau skila ekki tapi.

Ólátabekkurinn við Austurvöll

   þeir sem horfðu á fréttir  RÚV í kvöld  af umræðum á  Alþingi í dag um Icesave hafa örugglega tekið eftir því að  formaður Sjálfstæðisflokksins,Bjarni Benediktsson,  fékk  gott hljóð er hann flutti ræðu sína. Sigmundur Davíð Gunnlaugsson formaður Framsóknarflokksins fékk líka gott hljóð er hann flutti sína ræðu. Þannig á þetta  auðvitað að vera á Alþingi Íslendinga.

  Sjónvarpsáhorfendur  komust hinsvegar ekki hjá því  að heyra að þegar  Steingrímur J Sigfússon  fjármálaráðherra flutti sína   ræðu  fékk hann ekki hljóð og það heyrðist illa til hans  og er Steingrímur þó ekki raddlaus maður. Stjórnarandstaðan, þar sem Sjálfstæðismenn og  Framsóklnarmenn eru fjölmennastir, gjammaði,  gargaði og gólaði undir   ræðu ,Steingríms J. væntanlega til að koma í veg fyrir að  fólk heyrði hvað hann væri að segja.   Stjórnarandstaðan er eins og   stjórnlaus bekkur ólátabelgja í gagnfræðaskóla. Því verður ekki trúað að þjóðinni finnist þetta sæmandi framkoma í þingsal. Þingmenn eiga að sýna Alþingi  virðingu. Það eru forréttindi að  vera kjörinn Alþingismaður.  Þetta er til háborinnar skammar.

Molar um málfar og miðla 182

 

Halló,halló Stöð tvö ! Í fréttum ykkar (21.10.2009) var sagt:...vegna þess fjárhagstjóns,sem málið hefur ollið honum... Hvað á að gera við fólk,sem tekur svona til orða? Ekki láta það koma fram í fréttum, í guðanna bænum.

 

Í fréttum Stöðvar 2 (19.10.2009) var sagt ,.. öll spjót standa að...Rétt er orðtakið: Öll spjót standa á. Hinsvegar mætti segja spjótin beinast að... Í sama fréttatíma var talað um kamra austur við Kárahnjúka,sem skiptu um eigendur ! Valdamiklir kamrar austur þar.

 

Í fréttum RÚV sjónvarps sama kvöld var sagt: Myndatökumenn fjölmiðla voru útilokaðir. Ekki finnst Molaskrifara þetta vel orðað. Eðlilegra hefði verið að segja til dæmis: Myndatökur voru ekki leyfðar, þegar skrifað var undir.

 

Molaskrifara fannst skrítið að heyra tvo þingmenn tala um að við værum með blóðbragð í munninum eftir Icesave klúður Sjálfstæðisflokksins í Kastljósi RÚV (19.10.2009). Þeir hljóta að hafa átt við að við værum með óbragð í munninum. Sé ekki alveg hvernig þetta, þótt ljótt sé, tengist blóði. Nema hvað þjóðinni blæðir vegna  sukks Framsóknar og Sjálfstæðisflokks í landsstjórninni á sínum tíma. Áttu konurnar við það ?

 

Molaskrifari var ósáttur við orðanotkun umsjónarmanna morgunútvarps Rásar tvö (20.10.2009). Fjallað var um niðurskurð fjárveitinga til kvikmyndagerðar og sagt að kvikmyndagerðarmenn væru ekki á eitt sáttir  varðandi niðurskurðinn, - með öðrum orðum; það væri ágreiningur innan  raða kvikmyndagerðarmanna um niðurskurðinn. Ólíklegt er að svo sé. Hér hefði átt að segja að kvikmyndagerðarmenn væru ósáttir við niðurskurðinn eða  á eitt sáttir um að niðurskurðurinn væri óviðunandi.  Þá  sagði annar umsjónarmanna að fólk væri að hrynja niður úr svínaflensu hér landi. Þegar talað er um að fólk hrynji niður er átt við að það deyi unnvörpum. Hrynja niður segir Ísensk orðabók að þýði að deyja í hrönnum. Sem betur fer er ástandið ekki þannig. Þetta er heldur vond dæmi um að útvarpsfólk notar orð og orðtök sem, það kann ekki með að fara. Gera verður meiri kröfur um móðurmálskunnáttu til þeirra sem annast þætti í Ríkisútvarpinu. Vont mál og ambögur í útvarpi eru smitandi.

En, - nú er RÚV  byrjað að senda út fréttir á Rás eitt á miðnætti að nýju. Eftir lítt skiljanlegt hlé. Batnandi mönnum er best að lifa.

Einkennilegt er orðaval  sumra andstæðinga  núverandi  ríkisstjórnar og um þá  sem   er hlynntir aðild Íslands að ESB. Þar er mikið talað um landráð og föðurlandssvik.  Fyrrverandi þingmaður Sjálfstæðisflokks líkti þeim sem þetta skrifar nýlega við „lítinn  föðurlandssvikara“. Algengar eru Júdasar líkingar, oft er notast  við norska  föðurlandssvikarann Quisling, nú eða  ýmsa helstu leiðtoga  þriðja ríkisins eins og   Göbbels. Þetta minnir  mjög á málflutning  gamla Þjóðviljans um miðja síðustu öld gegn  foringjum lýðræðisflokkanna á Íslandi, Sjálfstæðisflokks, Alþýðuflokks og  Framsóklnarflokks , sem vildu starfa á alþjóðavettvangi með vestrænum lýðræðisríkjum.

Það er ekki hátt risið á þessum málflutningi.