Molar um málfar og miðla CLIV

 Gott Silfur Egils (20.09.2009).   Ágæt umræða. Prýðisþýðing á  viðtali við  formann loftslagsnefndar Sþ.  Kastljósi  RÚV hrakar hinsvegar  með hverjum þætti. Þar þarf að að breyta. Þau  Sigmar og Þóra  klikka ekki í Útsvari,sem er með allra  besta  efni  RÚV.   Meðal annars vegna þess að  allir sem á horfa verða óbeinir þátttakendur í keppni liðanna. Fréttaauki Elínar og  Boga (20.09.2009), frásögnin  af litlu stúlkunni hér á Íslandi og  ástandinu  í Lettlandi var vel unnið og áhugavert efni. Ósjálfrátt fór maður að bera  saman  í huganum Ísland og  Lettland. Það setti eiginlega að manni  hroll. Svo kom einhver  gaur og þéraði menn í hástert uppi í Hveradölum !

Afleit villa slæddist inn í sjónvarpsfréttir  RÚV (20.09.2009) þegar  sagt var  frá Októberhátíðinni í München. Þá var talað um bavarískan prins.  Sá landshluti sem  hér um  ræðir  heitir á íslensku Bæjaraland (e. Bayern) og íbúar þar  eru bæverskir. München er höfuðborg Bæjaralands.Svo  er  Bæheimur (e. Bohemia) vestasti hluti Tékklands. Þeir sem  þar búa  eru bæheimskir.  Orðið bavarískur er ekki til á íslensku. Maður var að vona að fréttastofa RÚV  væri vaxin upp úr svona villum.  Svo er greinilega ekki.

Beygingafælni sér víða  víða stað. Í auglýsingu í Morgunblaðinu (19.09.2009) segir: Aðaleign félagsins  er fasteignin að Eyrarveg 2 ..   Hér   hefði átt að  standa  Eyrarvegi 2. Ríkisútvarpið  leggur  sitt  af mörkum   í þessu  efni þegar (19.09.2009) sagt er í dagskrárkynningu:  Fylgist með  Formúla þrjú... Áhorfendur  fylgjast ekki með eitthvað,  heldur  einhverju. Hér  hefði átt að  segja :  Formúlu þrjú.

Sérlega hallærisleg auglýsing var í  RÚV sjónvarpi (19.09.2009). Hún hljóðaði  svona:  Fitness Sport alltaf inni. Hrognamál, hrærigrautur. Engin  sía  virðist til staðar í auglýsingadeild RÚV. Sem þetta er pikkað á lyklaborð tölvunnar heyrir skrifari  auglýsingu í RÚV: Taxfree af búsáhöldum, Húsasmiðjan. Þessar auglýsingar eru, annars ágætu fyrirtæki, til skammar. Taxfree er enska. Auglýsingar í íslensku útvarpi eiga  að vera á íslensku. Í  reglum  Ríkisútvarpsins  um auglýsingar og kostun  dagskrárefnis segir orðrétt í 3.gr. 2.tölulið:Auglýsingar skulu vera á lýtalausu  íslensku máli.  Þess utan er það bull að tala um taxfree af einhverju og Húsasmiðjan hefur enga  heimild  til að sleppa  virðisaukaskatti af einu eða  neinu. Fyrirtækið   getur  hinsvegar veitt viðskiptavinum  afslátt  sem nemur  virðisaukaskatti á það sem keypt  er.

Fréttamaður  Stöðvar tvö (19.09.2009)  sagði:  .. fjórir og hálfur milljarðar. Í þessu  tilviki er það  hálfur sem  ræður því  að milljarðarnir eiga  að vera í eintölu. Þessvegna  hefði átt að segja: Fjórir og  hálfur milljarður

Þingmenn Framsóknarflokksins hafa sumir hverjir  tamið sér ljótara orðbragð  en heyrst hefur í íslenskri  stjórnmálabaráttu  í  áratugi. Þannig  segir  einn  helsti  talsmaður flokksins um ummæli  forsætisráðherra sem sagði að að  stjórnarandstaðan  hefði brugðist  trúnaði, að ummælin séu  ómerkilegur lygaáróður. Gífuryrði af þessu tagi  verðfella málstað þess sem lætur  sér svona lagað um munn fara. Stjórnmálamenn sem  svona tala  eru ekki vandir að virðingu sinni. Enn sannast hið fornkveðna, að sannleikanum verður hver sárreiðastur.

Molar um málfar og miðla CLIII

  Jákvæð og athyglisverð er  fréttin um að norskur fjárfestir ætli  að leggja  1400 milljónir í MP  banka. Hann kom hingað upphaflega  fyrir  tilstilli  landa síns  Sven Haralds Øygards, sem tímabundið  gegndi  stöðu   seðlabankastjóra.  Muna menn, að  Sjálfstæðismenn  fundu honum  það  til foráttu, að hann talaði ensku með norskum hreim? Fyrrverandi  formaður Sjálfstæðisflokksins  taldi líka að hann væri  haldinn  Alzheimersjúkdómnum. Þann alvarlega sjúkdóm á ekki að hafa  í flimtingum.  Ef  til  vill  koma   fleiri  fjárfestar  til liðs  við íslenskt  efnahagslíf  fyrir  tilstilli þessa Norðmanns sem Sjálfstæðismenn sýndu svo opinskáa  fyrirlitningu. Hvað  segðum  við  ef það væri  helsta gagnrýnin á  Íslendinga sem  störfuðu erlendis að þeir  töluðu ensku með íslenskum hreim? Ýmsir ágætir íslenskir  stjórnmálamenn  hafa  á opinberum vettvangi talað  ensku með mjög  sterkum íslenskum hreim. Það var  í besta lagi.

 Þeir sem  skrifa fréttir eiga ekki að nota  orð,sem þeir vita ekki hvað merkja. Í  Vefdv (18.09.2009) var  fjallað um brottrekstur Ólafs Stephensens  ritstjóra  af Morgunblaðinu. Í fréttinni  segir: Starfsmönnum Morgunblaðsins var fyrr í dag tilkynnt um ráðahaginn og var mörgum mjög brugðið.Orðið  ráðahagur  þýðir  kvonfang ,  en  var áður fyrr notað í merkingunni  efnahagur, en í Íslenskri orðabók  segir  að sú merking sé forn  eða úrelt.  Orðið  ráðahagur er þarna  algjörlega út í  hött.  Starfsmönnum var sagt frá  brottrekstri eða  starfslokum  ritstjórans. Ekki man  Molaskrifari betur en hér  hafi áður  verið  fjallað um ranga notkun  orðsins  ráðahagur. 

Netmoggi vitnar  (18.09.2009) í samþykkt þingflokks Framsóknar og  segir: Þingflokkurinn áréttar einnig í ályktun, að einungis sé hægt að breyta lögum á vettvangi Alþingis. Á vettvangi  Alþingis?  Hversvegna ekki  segja: á  Alþingi.  Miklu best   væri auðvitað að  segja það sem  liggur í augum uppi að  aðeins  Alþingi getur breytt lögum,sem  Alþingi hefur samþykkt.

Ekki er  ráð nema í tíma sé tekið.  Byrjað var að  auglýsa  jólainnkaupin í sjónvarpi  í kvöld.  19. september !

Í fréttatíma  Stöðvar tvö var fjallað um íslenska fyrirtækið  Arctic Trucks  sem  hefur  með  góðum árangri breytt jeppum þannig að þeir  henta  betur  til aksturs  við erfiðar aðstæður.  Í fréttinni  komst  fréttamaður svo að orði ... að breyta  jeppum þannig að þeir  keyri betur í eyðimörkum (óljóst reyndar hvort hann  sagði  eyðimerkum)...  Jeppar keyra ekki. Þeir  eru  keyrðir  eða þeim er ekið. Í   þessu tilviki var verið  að breyta jeppum  svo þeir  hentuðu betur  til aksturs í  eyðimerkursandi. Í  sömu frétt  sagði þessi  fréttamaður... skaffa norska og  sænska hernum allt  að 1600 jeppum á næstu  fjórum  árum. .. Þeim sem  svona tala á  ekki  að hleypa að hljóðnema.  Arctic Trucks  tekur líklega ekki að sér að breyta  illa máli  förnum  fréttamönnum.  Stöð tvö ætti samt að kanna málið.

Molar um málfar og miðla CLII

 Það er eftirsjá að  Ólafi Stephensen úr ritstjórastóli Morgunblaðsins. Ólafur  er fagmaður, góður fagmaður og var á réttri leið með  blaðið. En hann var  nýjum eigendum ekki þóknanlegur. Það er  hinsvegar mikið  veikleikamerki hjá  nýjum eigendum  að hafa ekki   samdægurs tilkynnt hver taki við  starfi Ólafs.

 Magnað hvað menn eiga  erfitt með orðið  fé. Kunnur  bloggari skrifar  á  Eyjunni (18.09.2009):..segir að Evrópusambandið sé með fulla vasa fé og bíði eftir að kaupa auðlindirnar. Þarna hefði átt að  standa    fulla vasa  fjár,  eða fullar hendur fjár.

 Icesave líklega tekið aftur fyrir, segir í fyrirsögn (18.09.2009) á   vef RÚV. Aftur fyrir hvað? Þetta er bjálfaleg orðaröð ,að  ekki  sé meira  sagt. Betra hefði verið: Icesave líklega tekið  fyrir  aftur, eða Icesave líklega  tekið  fyrir  að  nýju eða á nýjan leik.

Á Pressunni er (18.09.2009) skrifað um húðflúr. Nánar tiltekið  persónuupplýsingar sem eru húðflúraðar á  andlit barna , - börnin eru sem sé merkt , ef þau  skyldu  týnast. Þetta  húðflúr  er þeirrar gerðar að það endist ekki nema í nokkra mánuði. Pressan segir:Aðrir hafa sagt að húðflúr séu eitthvað sem eingöngu fullorðnir eigi að nota og rangt sé að þröngva þeim upp á saklaus börn. Um þetta skal  sagt að orðið  húðflúr  er  eintöluorð og ekki til í  fleirtölu. Eftirfarandi setningu  er líka  að  finna á Pressunni: Hann mætti ekki í skólann í gær og hefur honum borist hótanir.  Sá  sem  svona  skrifar  er ekki vel að sér í  íslensku.

 Ránsþýfi fannst hjá  góðkunningja,segir í fyrirsögn á  Vefdv (17.09.2009). Það er ekkert  til sem heitir  ránsþýfi. Hér  hefði að  segja  þýfi, sem  er stolnir munir, eða  ránsfengur. Verðmæti sem hefur  verið  rænt. Í þessari sömu frétt segir: Lögreglan grunaði strax að nítján ára góðkunningi þeirra hefði framið innbrotið... Lögreglan  grunaði ekki, lögregluna  grunaði. Sá sem  skrifaði þetta þarf  tilsögn í meðferð móðurmálsins.

 Fíkniefnalögreglan í Dóminíska lýðveldinu stóðu sig vel í að lesa á milli línanna þegar þeir stöðvuðu stórfellt kókaínsmygl á leið til Spánar á dögunum.  Þetta er ágætis orðalag um kókaín,sem fannst  falið í orðabókum sem senda átti til Spánar  , nema hvað  lögreglan  stóðu sig ekki  vel, heldur  stóð lögreglan sig  vel. Svo er dálítið einkennilegt að tala um kókaínsmygl á leið  til Spánar. Í þessari sömu frétt í Vefdv (18.09.2009) er  talað  um að fela kókaín í bókarkápum eða  fóðri  bóka. Molaskrifari verður að játa að þetta skilur hann ekki  og  er þó ekki með öllu ókunnugur  bókum.  Hvað er  fóður  bóka ? Hvernig er hægt að fela  eitthvað í bókarkápu ? En Molaskrifari er reyndar  ekki vel að sér í aðferðum  við að  smygla  eiturlyfjum.

Vefvísir segir (18.09.2009): Blár gámur sem stóð við Melabraut 17 (suðurbrautarmegin) í Hafnarfirði var stolið þaðan 1.júli síðastliðinn. Blár gámur stolið? Bláum gámi var stolið. Hvar er  máltilfinningin Vísismenn?  Svo er nú líka dálítið  merkilegt að 18. september  skuli vera  sagt frá þjófnaði sem átti sér  stað 1. júlí !!

Brandari ársins !

Lokasetning fréttatilkynningar þingflokks Sjálfstæðisflokksins  hlýtur að vera  brandari ársins:

En þingflokkur Sjálfstæðisflokksins mun eftir sem áður vinna af heilindum og málefnalega að þeim úrlausnarefnum sem fyrir liggja með hagsmuni þjóðarinnar að leiðarljósi.

Hafna því að hafa rofið trúnað

Enn einu sinni...

....hefur fagmennsku verið fórnað á altari þröngra sérhagsmuna hinna  fáu.

Ólafur lætur af starfi ritstjóra

Molar um málfar og miðla CLI

 Ágætis aukablað um sögu Hagkaups  fylgir  Morgunblaðinu (17.09.2009). Saga þessa fyrirtækis  err  stórmerk og  sorglegt til þess að  vita  hvernig  glannaskapur hefur nú leitt  fyrirtækið í  fjárhagslegar ógöngur.

Var það ekki   Vilmundur Gylfason  sem  sagði að  Pálmi í Hagkaup   hefði bætt kjör launþega á Íslandi meira en verkalýðsforingjum  hefði  tekist? Orð að sönnu  Saga  Hagkaups og  stofnandans  Pálma Jónssonar er gagnmerk, og segir  frá  ferðalagi  fyrirtækisins á   fimmtíu árum úr fjósi og hlöðu við Miklatorg til  glæstustu  salarkynna  samtímans. Í blaðinu  segir  frá  hvernig   einokun heildsala  var brotin niður, mjólk komið í matvöruverslanir, opnunartími lengdur, einokun á    sölu á  kartöflum lögð  af (  með  dyggum  stuðningi Hafskips  sem fór í farnmgjaldastríð  við Eimskip,sem einokað hafði kartöfluflutninga  til landsins með okur farmgjöldum)  Í öllum þessum málum hafði  Pálmi  Jónsson sigur  gegn rótgrónum hagsmunum hinna  fáu gegn  fjöldanum og lækkaði  vöruverð neytendum til hagsbóta. Tvímælalaust er Pálmi  Jónsson merkasti kaupsýslumaður liðinnar  aldar á Íslandi.

Molaskrifari getur  hinsvegar ekki setið á sér að finna að  eftirfarandi setningum í blaðinu: .. þar sem hægt var að versla  allar helstu nauðsynjar á sama  stað... og Viðskiptavinurinn  verslar vörurnar..  Í báðum  tilvikum hefði átt að nota  sögnina að kaupa. Molaskrifari  verslar stundum  í Hagkaupi og kaupir það sem  hann fær ekki í Bónusi. 

Hefur þú gætt þér á Freyja konfekti, eða  borðað Freyja staur?  Fyrirtækið  66° Norður  auglýsir (17.09.2009) í Fréttablaðinu: Freyja pollagalli. Þarna  ætti  auðvitað að standa  Freyju pollagalli. Ekki man Molaskrifari betur en Sælgætisgerðin Freyja  noti rétta   fallbeygingu  og  tali um Freyju konfekt og  Freyju staura. Auglýsing fyrirtækisins 66° Norður  er ekki til fyrirmyndar.

Úr Vefmogga (17.09.2009): Sveinn Friðfinnsson, sem sagður er tengist fjársvikamáli í Svíþjóð, hefur dvalið langdvölum að undanförnu á æskuslóðum sínum í Grundarfirði.  Við þessa setningu hefur Molaskrifari tvennt að  athuga:  Í  fyrsta lagi  hefði átt að skrifa:...  sem  sagður er  tengjast.. Í öðru lagi hefði farið betur á því að skrifa: ...hefur  dvalist langdvölum .. . Meginmerking sagnarinnar  að  dvelja er að tefja  eða  hindra,( Hvað dvelur Orminn langa?) að  dveljast einversstaðar er  hinsvegar að vera (staddur) einhversstaðar. Ekki í fyrsta skipti ,sem þetta er  nefnt.

Ekki er sá sem skrifar  eftirfarandi í Vefmogga (17.09.2009) vel að sér í beygingafræðum: Elísabetu Englandsdrottningu og móðir hennar, Elísabetu drottningamóður, hryllti við því...  og...   Þar kemur fram að móðir Elísabetu drottningar hafi verið með ristilkrabbamein.. Í fyrra  tilvikinu  ætti auðvitað að  standa  móður og  svo er eignafall nafnsins Elísabet  Elísabetar. Það er einfalt á netinu að fletta upp beygingum íslenskra orða.

 

Molar um málfar og miðla CL

 Áskorun  forsetans stóð á  skjánum í RÚV  sjónvarpsfréttum (16.09.2009) með mynd  af Obama.Fyrst  hélt molaskrifari  að Obama hefði verið að skora á einhvern. Nei ,verið  var að  fjalla um erfið og ögrandi verkefni í heilbrigðismálum  sem  bíða úrlausnar.   Hef aldrei  getað sætt  mig   við að  enska orðið  challengesé alltaf þýtt áskoruná íslensku.

Nú ætlar  fulltrúar kínverska álrisans Chinalcoa ð heimsækja  Húsavík. Eigum  við ekki að  íslenska  heitið og  kalla  fyrirtækið Sinalco ?

Í  Vefdv er fréttum um Íslending sm talinn er hafa  svikið fé út úr  Svíum. Fréttin er full af ambögum:  Dæmi: Heimildamaður DV.is segir Sveinn hafi verið umfangsmikill í fasteignaviðskiptum í bænum. Hann hafi keypt fjölda íbúðarhúsnæða á Grundarfirði ... Hér  hefði átt  að   segja: Heimildarmaður  DV.is  segir  Svein hafa verið umsvifamikinn í fasteignaviðskiptum og keypt íbúðarhúsnæði stórum stíl. Í fréttinni er  ýmist  sagt í Grundarfirði eða á  Grundarfirði.

Mannslát í höfninni, segir í fyrirsögn á  Eyjunni (13.09.2009). Þetta er fremur klaufalegt orðalag um  það er  maður finnst drukknaður í  Reykjavíkurhöfn.

Fróðlegt var í fréttum RUV  að  heyra um lögrfræðinginn  sem kallaður hefur verið  til í öllum fréttaskýringaþáttum  allra miðla öðru hverju undanfarna  mánuði. Eftir fréttinni að  dæma ,er hann bara  venjulegur íslenskur  kennitöluflakkari.

Tekið skal undir með Jónasi Kristjánssyni sem  segir (17.09.200) á  bloggsíðu sinni:Sízt má fórna fé til að leysa vanda fólks, sem keypti húsnæði fyrir meira en þrjátíu milljónir og bíl fyrir meira en þrjár milljónir. Það er ekki hlutverk stjórnvalda að afnema eðlileg gjaldþrot í þjóðfélaginu. Sama hugsun hefur verið orðuð á  þessari síðu. Hversvegna eiga hinir varkáru  að  bjarga þeim sem  keyptu sér glæsivillur og  stöðutáknsbíla sem þeir höfðu ekki  ráða á, en keyptu samt ?

Það er  auðvitað  fjarstæða. Þeir sem kunnu  ekki  fótum sínum forráð í fjármálum  eiga  sjálfir að borga  skuldir  sínar. Þeir  veðjuðu á að  gengið mundi þróast þeim í hag.  Þeir töpuðu og geta ekki ætlast til að  aðrir  borgir óhófsskuldirnar fyrir þá.

Vegna  athugasemdar sem Molaskrifari birti um áskriftarsölumennsku  DV í gærkveldi.  Er rétt og skylt að geta þess að  Reynir  Traustason  ritstjóri  DV hafði  samband  við  Molaskrifara og baðst  afsökunar   á  framkomu þessa  sölumanns. Það er   þakkað og að  sjálfsögðu tekið  til greina.

Þótt hér  sé mikið um aðfinnslur, sem  sumir kalla  tuð og  nöldur, þá er auðvitað mikið  af   prýðilega skrifuðuðum  fréttum í öllum miðlum. Molaskrifari er ekki sérlega  iðinn við að lesa  íþróttafréttir, en  Bjarni Sigtryggsson, áhugamaður um gott málfar, sendi  eftirfarandi frétt úr Morgunblaðiðinu  (16.09.2009). Að hans  mati er þetta  vel skrifuð frétt:

Jamaíkamaðurinn Powell kom fyrstur í mark í 100 metra hlaupi á móti í Póllandi í gærkvöld. Powell rann skeiðið á 9,82 sekúndum en heimsmetið í greininni á landi hans, Usain Bolton, 9,58 sek en hann var ekki á meðal keppenda.Nesta Carter var annar í 100 metra hlaupinu á 10,10 sekúndum og Michael Frater þriðji á 10,23 sek.Tyson Gayákvað að keppa í 200 metra hlaupinu og hann varð hlutskarpstur á tímanum 20,21 sek. - Molaskrifari getur  tekið undir það að þetta  er að mestu hnökralaus frétt .

Ræð einhverra hluta  ekki við að breyta letrinu á fréttinni hér að ofan í  tölvunni minni.

Sölufrekja DV

 Í kvöld var hringt  heim tíl mín og  spurt eftir mér með nafni. Í símanum var  ungur maður  svo kumpánlegur að það  var eins og hann væri  að tala  við yngri  bróður sinn eða mann sem hann hefði  þekkt í  fimmtíu ár  eða  svo.

 Erindi hans  var að  bjóða mér áskrift að  DV með  sérstökum kostakjörum.

Ég  sagði honum að ég  væri þegar þegar  áskrifandi að DV. - Ég  sé það nú  ekki hjá mér,  svaraði hann. - Ég fékk blaðið  síðast í  morgun.

Þá  benti ég honum á að í símaskránni  væri  rauður kross  við nafnið mitt,  sem  táknar að handhafi  númersins  vill ekki  hringingar frá símsölumönnum.  Aftur  sama  svar: Ég sé það  nú ekki  hjá  mér  !

  Þetta þykir mér dónaskapur  af  hálfu DV og eitthvað er áskrifendabókhaldið ekki í góðu lagi. Líklega verður niðurstaðan sú að ég segi upp áskriftinni  að  blaðinu.

Molar um málfar og miðla CXLIX

 Tækju á móti sendinefndinni opnum örmum,  sagði fréttamaður í  sjö fréttum RÚV sjónvarps(12.09.2009). Þetta  er auðvitað ekki  rangt, en   Molaskrifara hefði þótt  fallegra að  segja: Tækju sendinefndinni opnum örmum. Í sama  fréttatíma  var sagt: lesa sig í gegnum skýrslu, betra hefði verið að segja: Lesa skýrslu.

Í fréttum  Stöðvar tvö var  sagt frá öflugri öryggisgæslu við sumarhöll  Bakkabróður í Fljótshlíðinni (13.09.2009). Þar tók fréttamaður svo  til  orða   að höllin  væri í 100 kílómetra akstursfjarlægð  frá  Reykjavík.  Dugað hefði að segja í   100 kílómetra  fjarlægð frá Reykjavík.  Akstursfjarlægð er bara bull.

Í sex fréttum RÚV (13.09.2009)  var  sagt  frá  afrekum ungra íslenskra  skákmanna erlendis.    Sagt var að þeir  hefðu  sigrað mótið. Þeir sigruðu velflesta  andstæðinga  sína og  fóru með sigur af hólmi. Menn sigra ekki mót.

Þegar talað  er um korn á íslensku er átt  við „mjölvisauðugt fræ af  sumum plöntutegundum (af grasætt) notað til matar" (Ísl. orðabók) Þannig   er korn samheiti  yfir hveiti  rúg, bygg og maís og raunar fleira.  Á  ensku er orðið  corn  fyrst og fremst notað um maís. Á þessu flaska  fréttamenn stundum.  Hér á landi er  talsverð kornrækt , þótt ekki sé  ræktaður  maís. 

Molar um málfar og miðla CXLVIII

 Á Bolungarvík,sagði  fréttaþulur  RÚV sjónvaps (10.09.2009) í  tíufréttum. Þeir  Bolvíkingar ,sem Molaskrifari þekkir, segja  í  Bolungarvík, jafnvel bara í Víkinni. Hvað  segja lesendur Mola ?

Hún er háskalega smitandi nútíðar-nafnháttarsýkin. En þessi ríkisstjórnin er ekki að standa sig. Þetta skrifar bloggari, (10.09.2009)   hæstaréttarlögmaður og fyrrverandi þingmaður. Hann ætti að vita  betur. 

Það  er óþarft latmæli, eins og nefnt hefur verið hér áður,  að tala um árið  níutíu og  sjö eins  og gert var í sex fréttum  RÚV . Í kynningu á  efni  Spegilsins var okkur sagt að unnið  væri  hörðum höndum að  fjárlagagerð. Molaskrifari á  alltaf  erfitt með að sjá  fyrir sér  að  skrifstofustörf  séu unninn hörðum höndum.  En  fátítt   er orðið að heyra  sögnina vinna  notaða í fréttum án þess að tekið sé  fram að unnið sé  hörðum höndum. Í Helgarsportinu í RÚV sjónvarpi var sagt frá ungum hollenskum hjónum, sem  eru að endurbyggja,  eða gera upp gamalt hús á Þingeyri. Þau vinna að því hörðum höndum. Þar var  vel til orða  tekið að mati Molaskrifara. (11.09.2009).

 Áfram heldur  RÚV purkunarlaust  að  auglýsa  bjór undir  yfirskini léttöls.Í kvöld (10.09.2009)  voru  bjórauglýsingar á undan og eftir  tíu fréttum. Það er  til skammar  að  fyrirtæki í þjóðareigu  skuli með þessum hætti  fara á  svig  við lögin og  misbjóða stórum hópi  eigenda sinna.

Ekki linnir aulaflissinu í morgunútvarpi Rásar tvö. Þar segja menn líka:  Ég vill ! (11.09.2009) Annars  færði  Molaskrifari sig yfir á  Rás eitt , þegar umsjónarmenn tilkynntu að  hringt yrði  til Los  Angeles og þaðan yrði lesið upp úr slúðurblöðum. Ef fréttaþáttur RÚV að morgni dags hefur ekki verðugri viðfangsefni, þá er ástæða  til að ræða hvort hann á rétt á sér. Skrifara skildist að sá  lestur  ætti meðal annars  að  fjalla  um óléttur. Seint  verður sagt að mikil reisn sé  yfir  Rás  tvö á morgnana.