Að æra óstöðugan

Að telja upp allar ambögurnar í þessari frétt mundi líklega æra óstöðugan.  Hvernig á að vera  hægt að taka mark á  fjölmiði  þar sem  slíkir  bögubósar  böðlast   óbeislaðir um ritvöllinn og misþyrma tungunni ?

Heimilar landnemabyggðir

Molar um málfar og miðla CVII

Úr Vefdv (18.07.2009): ...og er með 24 áhafnarmeðlimi um borð. Fréttin er um sómalska  sjóræningja,sem  rænt hafa  flutningaskipi.  Lífseig ambaga áhafnarmeðlimir. Af hverju ekki : Um borð  eru  24 skipverjar  , eða ,á  skipinu er 24 manna áhöfn? Í kynningu á  efni þáttarins Íslands í  dag var í liðinni viku á   Stöð  tvö  sagt : hljómsveitin inniheldur meðlimi..  Það er aldeilis  merkilegt innihald. Þetta eru  ambögur  sem   sjást og heyrast  aftur og  aftur  rétt eins og ársgrundvölllurinn gamalkunni,sem kom við  sögu (16.07.200) í hádeghisfréttum  RÚV.

Úr Vefvísi (18.07.2009)...þegar sumarbústaður sem þau dvelja í fór að nötra. Fréttin var um þrumuveður á  Suðurlandi. Þarna  hefði Molaskrifara þótt  eðlilegra  að  segja: sem þau  dveljast í.  Í orðabókum er  aðalmerking  sagnarinnar að dvelja að  tefja, hindra, draga á langinn, sbr. hvað dvelur Orminn langa.

Þeim greindi á, sagði varaformaður  Borgarahreyfingarinnar í fréttum (19.07.2009). Einhverja  greinir  á,  ekki einhverjum.

Í  Kastljósi RÚV  var Anna Ólafsdóttir  Björnsson kynnt  sem  fulltrúi Heimssýn. Beygingafælni enn á   ferð.  Konan var  fulltrúi  Heimssýnar, sem  mér  finnst  raunar að  ætti að skrifa  með  einu   essi.

Vafalaust  hefur  Þorgerður  Katrín Gunnarsdóttir  breitt  bak og  sterkt,enda  stæðileg kona.  Stjórnmálafræðingur sagði í fréttum Stöðvar tvö (19.07.200)  að Evrópusinnar mundu þjappa sér að baki hennar.  Betra hefði mér fundist að  tala um  að standa  þétt   við  bakið á henni. En kannski er þetta sérviska í mér.

 Í fréttum Stöðvar tvö  (15.07.2009) sagði fréttaþulur: .. þar sem  skipið  tók niður.  Skip taka niðri, þegar  kjölur þeirra  snertir  botn eða þau  steyta á  skeri.  Að taka niður er  notað um skepnur, sem  bíta  glefsu  eða kroppa lítið eitt.

Í fréttum  Rúv  (18.07.2009)  Var  sagt: Þyrlan lenti á  Borgarsjúkrahúsinu.  Sem  betur   fer  lenti  þyrlan ekki á  sjúkrahúsinu, heldur  hjá  sjúkrahúsinu.Og  svo hélt ég   að  Borgarsjúkrahúsið  væri  ekki  lengur  til. Það sem áður  hét   Borgarsjúkrahús er nú  yfirleitt kallað  Landspítalinn í Fossvogi.

Í fréttum RÚV  þennan  sama  dag var fjallað  illt  hlutskipti  fólks í  tilteknu landi  þar sem  tveir af  hverjum þremur  býr  við  sult og  seyru. Einn býr, en tveir búa.

Áfram (20.07.2009) tönnlast  svokölluð  Morgunfrú á  Rás eitt, RÚV,  á því að  kirkjuklukkur   tilheyri tiltekinni  kirkju. Molaskrifara finnst þetta ótækt  orðalag. Rismeira og  fallegra mál  væri  að segja: Hringt var  klukkum Víðmýrarkirkju, í stað þess að   segja klukkurnar tilheyra  Víðmýrarkirkju.

Molaskrifari er   samkvæmt  auglýsingu RÚV  einn af  tæplega 320 þúsund eigendum Ríkisútvarpsins. Þessvegna  er   auðvitað  ástæðulaust  að hlusta á hvað hann hefur  fram  að  færa  eða  svara  vinsamlegum ábendingum sem  sendar eru í  tölvupósti.  Það er líka starfsfólkið sem  ræður, líklega kemur  þessum  svokölluðu  eigendum  þetta bara ekkert við.

 

 

Pólitískt hugrekki

John F. Kennedy , seinna  forseti  Bandaríkjanna,   skrifaði fræga bók, Profiles in Courage.Hún fjallaði um pólitískt  hugrekki og heiðarleika. Mesta  pólitíska hugleysi sem hugast getur  er að  sitja hjá, - þora ekki að taka afstöðu í  erfiðum málum. Þetta sáum við á  Alþingi í dag.  Þráinn Bertelsson og  Ragnheiður Rikharðsdóttir eiga mikinn heiður skilinn. Ég tek ofan  fyrir þeim.

 

Molar um málfar og miðla CVI

 Úr Vefvísi (12.07.2009) : Mennirnir komu heilir höldnu niður. Hér notar  skrifari orðatiltæki, sem hann kann ekki með að  fara. Rétt hefði verið að  segja: Mennirnir komust heilu og höldnu niður, það er  án óhappa.

Í DV (14.07.2009) er frétt um mann sem  dæmdur var fyrir kynferðisbrot  gegn 14 ára stúlku.  Fréttinni fylgir mynd  af ungri  stúlku sem heldur  fyrir augu.  Á myndinni er texti þar sem  segir: Mynd tengist fréttinni ekki beint. Réttara  væri að  segja : Mynd  tengist fréttinni  alls ekki, því það sannleikurinn í málinu.  Í sama blaði  eru gefin 30 ráð  til að spara í kreppunni. Gott og vel, en í inngangi  segir: Með ríku hugmyndaflugi og  dassi  af dugnaði ..   Dass af  dugnaði  er ekki íslenska.Það er   hrognamál.  Á ensku er talað um a dash of, -  í merkingunni skvettu  af , eða slurk  af. Dash hefur  annars býsna margar og ólíkar merkingar í ensku.

Rætt var við þingmann  Borgarahreyfingar í hádegisfréttum RÚV (15.07.2009). Í viðtalinu  talaði þingmaðurinn um attitjúd  e.  attitude.  Þetta er  ekki  íslenska. Þetta er enska. Er  til of mikils mælst að  þingmenn sýni  móðurmálinu verðskuldaða  virðingu ? 

Meira um  enskuslettur: Í fyrirsögn í Morgunblaðinu (15.07.2009)  stendur: Damian Taylor túraði Voltu með Björk - Vinnur nú með henni að nýju efni - Algjör stúdíónörd að eigin sögn ek45b Vann  við að „leiðrétta" raddir.  Í fréttinni er líka  ýmislegt  skrítið  eins og: .... ferðalagið  hafi verið  skipulagt með það að markmiði að enginn átti á hættu að brenna út.  Fyrirmyndarmálfar,  ekki satt ?

Líklega er það sérviska mín að fella mig  ekki við orðalag umsjónarmanns  morgunútvarps Rásar  eitt eftir morgunbæn.  Á undan og  eftir  morgunbæn heyra  hlustendur  kirkjuklukkum hringt og fer  vel á því.  Ekki fer eins  vel á því, að mínum dómi, að  umsjónarmaður  segi klukkurnar  tilheyra  Hafnarfjarðarkirkju eins og  sagt var i morgun. Miklu fallegra væri að  segja:  Hringt var klukkum Hafnarfjarðarkirkju,  eða: Þetta   voru klukkur  Hafnarfjarðarkirkju.    Með  vaxandi  vinsældum leikskólamáls í  Ríkisútvarpinu  megum   við líklega   þakka  fyrir  meðan  ekki er talað um  dingla  klukkunum sem  tilheyra Hafnarfjarðarkirkju !

Svo er einhvernveginn eins og  Kastljós  ríkissjónvarpsins viti ekki hvort það er í sumarfríi eða ekki !

Léttvæg gífuryrði

 Gífuryrði Þórs Saarisverða ákaflega léttvæg þegar  hann  segist  tvityngdur og kunna ensku til hlítar  en  hefur aldrei heyrt orðið  subrogate. Þeir  lögfræðingar íslenskir sem ekki þekkja  það orð  eru  heldur illa að sér í ensku lagamáli. Það  þarf ekki að leita  dauðaleit í orðabókum til að komast að merkingu þessa tiltölulega algenga orðs í lagaensku. Nafnorðið  subrogation :  The  substitution of  one claim for another, especially the transfer of  the right to receive payment of  a debt  to somebody other than the original creditor. - Að  ein  krafa  komi í stað annarrar, sérstaklega  það að  flytja  rétt til að  taka  við greiðslu skuldar til annars   aðila  en hins upprunalega lánardrottins eða  skuldareiganda.

  Gífuryrði  Þingmannsins   eru  beint út í bláinn.

Svavar fullkomlega vanhæfur

Þeir eiga að biðja þjóðina afsökunar

 Þingmenn  Sjálfstæðisflokksins  koma nú í ræðustól á Alþingi í hverri  viku og  heimta afsökunarbeiðnir frá þingmönnum úr  stjórnarflokkunum vegna einhvers sem  skiptir  afa rlitlu máli í því ógnarásatandi sem nú ríkir. 

  Hvernig  væri nú að Sjálfstæðisflokkurinn bæði íslensku þjóðina afsökunar  á því  hvernig  staðið var að einkavæðingu  ríkisbankanna á sínum tíma. Framsóknarflokkurinn mætti  gjarnan  standa að þeirri  afsökunarbeiðni líka.

Spillingin í kringum  einkavæðingu  bankanna á  ríkan þátt í því  hvernig  komið er í samfélaginu og  hve margir eiga nú  um sárt að  binda.

Ég minnist þess ekki að  þessir  tveir  flokkar sem   einkavæddu  bankana með hneykslanlegum hætti hafi  beðið nokkurn mann afsökunar á siðspilltum vinnubrögðum..

Krefst þess að Árni Þór biðjist afsökunar

Bull

 Þessi  endemis  ræða míns ágæta kunningja, er bara bull og meira bull. Hvernig í ósköpunum á  þjóðin að bera virðingu  fyrir  löggjafarsamkomunni, þegar þar  er talað með þessum hætti ?

Sá sem  svona talar veit  ekkert um   gömlu Sovétríkin og enn minna um  Evrópusambandið. 

Eigum ekkert erindi í hið nýja Sovét

Molar um málfar og miðla CV

 Það er einkar vafasöm fagmennska hjá Ríkisútvarpinu, þegar það er fyrsta frétt (11.07.2009) í hádegisútvarpi, að  þingmaður  Sjálfstæðisflokks segi kostnaðaráætlun (990 milljónir á þremur árum) vegna aðildarumsóknar að ESB  sé brellupólitík og blekkingar, marklaust plagg. Þetta hefði  verið frétt, ef þingmaðurinn hefði  stutt  fullyrðingu sína  rökum, - það gerði þingmaðurinn ekki. Þetta var venjubundinn pólitískur sleggjudómur og  RÚV féll í pyttinn. Það er  svo hinsvegar annað mál, að með þessari  fullyrðingu er þingmaður  Sjálfstæðisflokksins að segja að  starfsfólk utanríkisráðuneytisins,sem  gerði umrædda kostnaðaráætlun, kunni ekki til verka og sé  að  búa til brellupólítík fyrir  ríkisstjórnina. Það finnst mér vera  alvarleg ásökun.

 Svolítið meira um RÚV

 Engu er líkara þar á bæ  sé  markvisst verið að efla ensk áhrif á  tunguna. Í Molum  CIV var að því  vikið að  talað  hefði verið um  síðasta  föstudag, þegar segja hefði átt á  föstudaginn var. Í hádegisfréttum (11.07.2009)   var á sama hátt talað um  síðasta haust ,(e.. last  fall.) Á íslensku segjum  við í fyrrahaust, -  ekki síðasta haust.

Af rælni og til reynslu  hef ég  gerst áskrifandi  að DV. Það er ekki vegna þess að DV sé  fullt af  góðu efni. Í DV er fullt af rusli sem ég hef ekki minnsta áhuga á. Í DV  eru hinsvegar oft fréttir,sem  aðrir  fjölmiðlar hafa ekki birt, ekki sist  fréttir af sukkinu og spillingunni  meðal  útrásarvíkinga og  um höfuðpaurana ,sem  réðu ríkjum þegar útrásin  stóð sem  hæst.  Svo er líka skemmtiefni í DV. Í helgarblaðinu (10.-12.07.2009) eru álitsgjafar, svokallaðir,  fengnir til að velja  tuttugu gáfuðustu Íslendingana.

 Það var gaman að sjá að í hópnum þessir voru líka nefndir voru Bogi Ágústsson, gamall  samstarfsmaður og vinur og annar fréttamaður  Broddi Broddason hjá RÚV. Báðir stólpagreindir. Ekki var síður skemmtilegt að sjá að í hópi álitsgjafanna , sem völdu gáfuðustu landana  voru  Ágúst Bogason útvarpsmaður og Þorbjörn Broddason, prófessor fyrrum samstarfsmaður og sumarmaður á  Alþýðublaðinu hér í eldgamla daga.  Ég saknaði þess hinsvegar  að Jónas Kristjánsson skyldi ekki vera í hópnum  líka nefndir,  en  svo sá ég  að Pálmi Jónasson,fréttamaður, var ekki í hópi álitsgjafanna.  En þetta er nú kannski  svolítið ótuktarlegt !

Molar um málfar og miðla CIV

 Beyingakerfi tungunnar á í vök  að verjast. Um það ber vitni  fyrirsögn fréttar í Vefvísi (09.07.2009): Frá Reykjavík til Akureyri á tólf tímum. Meira af Vefvísi þar sem aðilar lifa  góðu lífi:  ... en þar rétt hjá búa nokkrir aðilar af austur-evrópskum uppruna.

Aftur og aftur falla fréttamenn í  sömu, gömlu pyttina. Í hádegisfréttum RÚV (09.07.2009) var sagt: .. það gerðu þeir síðasta  föstudag. Þetta er enskt orðalag, - last  Friday. Á íslensku segjum  við á  föstudaginn var.

Skemmtileg frétt um  nýja áhorfendastúku  og knattspyrnuvöll í Sandgerði var í Mogga (09.07.2009): Þar segir:  Um leið var tekinn í notkun endurbættur grasvöllur. Völlurinn var færður til suðurs og grasið endurnýjað. Stúka og völlur  reyndust vel í fyrsta leik því  Reynir sigraði Tindastól. Ekki er öldungis víst að  lið Tindastóls taki undir þetta  !

Blogg Jónasar Kristjánssonar er yfirleitt á mjög  góðu máli, þótt orðbragðið sé  á  stundum  í það grófasta. En  Jónas er ekki óskeikull frekar en við hin. Þannig skrifar hann á  bloggi sínu (10.07.2009): Tímafrekt, innihaldsrýrt og óráðlegt er að hafa tvær kosningar, hér á auðvitað að standa tvennar kosningar. En innihaldinu er  ég sammála.

 Notkun  ensku í  auglýsingum í íslenskum  blöðum fer vaxandi. Í  Fréttablaðinu (09.07.2009) er auglýsing  frá versluninni Birnu að Skólavörðustíg  2 , sem  segist vera  concept shop, - hvað sem það nú er ! Í auglýsingunni  er   risafyrirsögn , -- á  ensku: SALE UP TO 70%. Vísað er á  vefsíðu fyrirtækisins, sem er  á  ensku.  Það er eins og þessi verslun  sé  ekki ætluð Íslendingum.  Hversvegna þá  að  vera  að eyða peningum í að  auglýsa í íslensku  dagblaði?  Þetta  er bara enn eitt  dæmið um hallærislegt enskusnobb.

Leyfi mér að birta hér  ágæta  athugasemd  Árna Gunnarssonar við  síðustu Mola:

Og nú í kvöldfréttatíma ríkissjónvarpsins kom innsláttur frá spjalli fréttakonu við Ólaf Guðmundsson frá Umferðarstofu (held ég). Þau voru stödd á þjóðv. 1 í Svínahrauni og ræddu um vegriðið: "Nú kalla ökumenn mótorhjólanna þetta fyrir ostaskera" sagði fréttakonan á máli leikskólabarnanna. Dálítið merkilegt málfar sem tíðkast á þessum fréttastofum núorðið.

Já, það er rétt ,Árni,  barnamál verður æ algengara í fréttum. Aftur og  aftur  sér maður eða heyrir  orðfæri smábarna  eins og  að klessa á í fréttum.   

Hið hyldjúpa spillingarfen

 Með hverjum deginum kemur  betur og betur  í ljós hið hyldjúpa, eða öllu heldur botnlausa, spillingarfen í kring um  einkavæðingu  ríkisbankanna. Tveir stjórnmálaflokkar bera höfuðábyrgðina á þessu  og þar með  hvernig  komið  er fyrir okkur, þegar  búið er að  setja  heilt samfélag á hliðina. Þessir sömu tveir  stjórnmálaflokkar, Sjálfstæðisflokkur og  Framsóknarflokkur, að  vísu með  nýja  foringja,   ganga  nú berserksgang gegn öllu því  sem  ríkisstjórnin   reynir að  bjarga úr  brunarústunum eftir  brennuvargana úr  flokkum þeirra. Þetta er ótrúlegt upp á  að horfa. Þeir eru ekki að hugsa um þjóðarhag.  Aldeilis ekki.

  Sú var tíðin  að  státað var af því  að  hér  væri engin  spilling  og Ísland með þeim efstu á lista yfir  fyrirmyndarþjóðfélög. En það var aldeilis ekki rétt mynd. Undir  lítt  gáruðu yfirborðinu  kraumaði  stórfelldari spilling  en í  flestum öðrum samfélögum í okkar heimshluta.  Það er eins og samansúrraðar, innmúraðar smáklíkur  íhalds og  Framsóknar hafi hér  ráðið lögum og lofum og   farið sínu  fram fram í einu og öllu.

  Þetta er eiginlega  þannig, þegar allt kemur  til alls að bankarnir voru ekki seldir. Þeir  voru gefnir og  svo var þeim stolið. Það er erfitt  að hugsa þá  hugsun  til enda  að  það  hafi  verið  fámennur, kannski  20 -30 manna  hópur,  sem  rústaði hér  öllu og olli því að  tugir þúsunda  eiga nú um sárt að binda.  Skelfilegt.