Framsókn finnur leið í fjölmiðla

  Formaður  Framsóknarflokksins hefur fundið leið til að  koma sér í fréttirnar.  Vera nógu stórorður, taka nógu stórt upp í  sig,  ryðja úr sér  verðbólgnum orðum. Segir  þjóðina  komast á  vonarvöl verði   samið um Icesave. Sá ágæti maður mætti hafa  hugfast að þær  raunir sem íslenska  þjóðin hefur  ratað í má  ekki síst  rekja  til hans  flokks, sem  nú er sakleysið uppmálað. Aftur og  aftur  láta fjölmiðlar blekkjast  af   gífuryrðunum, - þá er  gleymdur  einstæður  spillingarferill Framsóknar í íslenskum  stjórnmálum.  Helimingaskipting bankann þar sem  vildarvinir flokksin fengu þjóðareignir á  silfurfati, nú eða  Gift þar sem   sjálfkjörnir  Framsóknarforkólfar sólunduðu milljörðum. Það þarf meira en nokkra  stráka, enn  með barnaspikið í andlitinu og hortugar stelpur til þess að  tekið  sé  mark á   Framsókn þesa dagana

Miðstjórn Framsóknar: Þingmenn styðji ekki Icesave samninginn

Molar um málfar LXXXVI

 Velkomin um borð í varðskipið Óðinn, segir í  heilsíðuauglýsingu (10.06.09.) í Morgunblaðinu. Þarna ætti að standa  Velkomin um borð í varðskipið Óðin.  Ef  varðskipið  héti Jökull, væri auðvitað  sagt  velkomin um borð í Jökul, ekki Jökull. Óðinn beygist: Óðinn, Óðin, Óðni, Óðins. 

 Mér hnykkti  við, þegar útvarpsstjóri  tvílas   í  tíufréttum  RÚV sjónvarps (09.06.09.)  að verið  væri að leita  báts  austur af Reykjanesi.  Austur  af Reykjanesi  er  nefnilega inni í landi. Seinna kom   í ljós  að   leitin  var norðaustur  af Garðskaga. Garðskagi  og  Reykjanes  er   ekki það  sama, þótt Garðskaginn sé  auðvitað hluti af Reykjanesi. Það er  synd og  skömm að hætt  skuli að kenna  landafræði og sér  þess ósjaldan  stað í fréttaflutningi  fjölmiðla.

Í hádegisfréttum RÚV (10.06.09.)  talaði fréttamaður um síðasta  sumar. Það er  er ekker til á  íslensku sem heitir   síðasta  sumar.  Við segjum í  fyrrasumar. Síðasta sumar  er    hrátt úr ensku.

Fjölskyldumeðlimir  komu við sögu (10.06.09.) í fréttum Stöðvar tvö. Þetta er lífsseig  ambaga,sem erfitt  virðist að uppræta.  Í þessum sama   fréttatíma  var  talað um að þvo pening(a), þegar átt var  við  peningaþvætti, það að þvætta peninga, að  koma illa fengnu fé í umferð.

Aðstoðarmenn landsbyggðarþingmanna hafa verið lagðir  niður, var sagt (11.06.09.) á  Morgunvaktinn á  Rás 1 . Störf  eru lögð niður, ekki menn.

Í undirfyrirsögn í  Morgunblaðinu (11.06.09.) segir: Sjeikinn sem keypti í  Kaupþingi skaut  skjólshúsi undir   konu Saddams.   Hér  slær  fyrirsagnahöfundur um sig   með orðatilæki,sem hann  ekki kann.  Talað  er um að  skjóta  skjólshúsi yfir, - ekki undir.

Ríkissaksóknari dæmir sig úr leik

Með ummælum sínum um Evu Joly og þriggja mánaða töf við að koma  gögnum milli embætta  innan  borgarmarkanna er það  deginum ljósara  að  ríkissaksóknari hefur  dæmt  sig úr leik. Líklega er hann er ekki bara vanhæfur,  heldur óhæfur. Þetta er  að verða skrípaleikur hjá honum.Hann  hlýtur  að biðjast lausnar  eftir  það sem á  undan er gengið    og  vegna fjölskyldubandanna sem  hnýta hann við  Exista.

Valtýr vill ráða Evu Joly

Kastljósið dofnar

  Oft er Kastljós  RÚV  sjónvarps gott. Það var hinsvegar  með  endemum   dauft í kvöld. Lélegt. Samtal þeirra Ólínu Þorvarðardóttur  alþingismanns og Ólafs  Arnarsonar var  bætti ekki nokkrum sköpuðum hlut við   Icesave umræðuna.  Það komst eiginlega aldrei  af stað. Ólína var  fyrst kölluð þingkona og  svo  alþingismaður. Vona  að hún haldi  sig  við  síðarnefnda heitið.

  Seinni hluti  Kastljóssins þótti mér einstaklega lítið áhugaverður og vandséð hvaða  erindi þetta samtal átti í  sjónvarp. Naflasýning  og  fatafígúrugangur eiga  ekki heima  í alvörusjónvarpsþætti.  Þarna  báru umbúðirnar innihaldið ofurliði, -  ekki í fyrsta  skipti,sem það gerist. Búningur eins og  við  sáum í kvöld á kannski heima í skemmtiþætti,  en alls ekki í  fréttaskýringa-  eða  dægurmálaþætti.

 

 

 

Molar um málfar LXXXV

  Álpaðist  til að  taka þátt í  könnun, er ég var að leita  að  símanúmeri á ja.is . Hætti þátttökunni af skiljanlegum ástæðum, þegar ég kom  að setningunni, versla föt  eða  fylgihluti.  Það er nefnilega þannig með mig, að ég kaupi  föt. Ég versla aldrei  föt. Það  verslar enginn maður  föt, en  til eru  búðir sem  versla með  föt og þar er hægt að kaupa föt.

  Sama  snilldin  á  Vefdv,sem  skrifar (08.06.09.): Fólk er farið að grýta einnar krónu myntpeningum í Alþingishúsið.  Myntpeningar ! Það var og.  Ekki er ég  ég hissa á að þeir  séu  illa staddir fjárhagslega  sem  þannig  fara með fé.

Úr Vefmogga, mbl.is, (08.06.09.)  Átta líkum af farþegum frönsku flugvélarinnar sem hrapaði í síðustu viku náðust úr Atlantshafinu í dag að sögn brasilískra yfirvalda.  Fastir liðir eins og venjulega, var sagt í útvarpinu í gamla daga. Þetta er ótrúlega illa skrifað.

Meira úr vefmogga (09.06.09.) : „ ... Þess vegna teljum við rétt að banna birtingu skoðunarkannana og útgönguspá áður en kjörstöðum lokar,“ segir Lene Hansen. Kjörstöðum lokar ekki.  Kjörstaðir loka  heldur ekki. Betra  væri  að  segja: .. fyrr en eftir  lokun kjörstaða  eða  fyrr en  kjörstöðum hefur   verið lokað. Svo er líka talað um skoðanakannanir, ekki skoðunarkannanir.

Salvör Kristjana Gissurardóttir  Framsóknarbloggari   skrifar  um  það er  fólk  braust inn í húsið  við Fríkirkjuveg 11 og  segir: Núna í kvöld var húsið heimtað aftur úr helju . Hér er  ruglingur  á ferðinni. Sögnin að heimta  beygist heimta, heimtaði  heimtað, þegar  hún  þýðir  að krefjast.  Þegar  sögnin að heimta þýðir að bjarga, oftast nauðuglega,  úr háska beygist hún heimta  heimti  heimt. Það var  væntanlega það  sem  bloggarinn átti við. Í nýlegum bloggpistli kallaði þessi   sami bloggari alla  ríkistjórn íslands landráðamenn.  Framsóknarmenn  kunna sér ekki hóf í orðum og því verða  stóryrði  þeirra um menn og málefni marklaus, verðbólgin orð.

Annar Framsóknarbloggari, Hallur Magnússon skrifar (09.06.09.): Það er eftirsjá af Þorsteini Pálssyni sem ritsjóri Fréttablaðsins.  Hann  á  við að það sé  eftisjá að Þorsteini Pálssyni sem ritstjóra  Fréttablaðsins. Undir  það  get ég vissulega  tekið, en ekki mundi ég orða það með þeim hætti sem Hallur  gerir.

Eva Joly hefur ...

..lög að mæla. Vonandi bera  stjórnvöld, -  ríkisstjórnin, - gæfu  til að hlusta og  fylgja  ráðum hennar. Það er  til lítils að ráða ráðgjafa  ef ekki er farið að   þeim ráðum sem  gefin eru.

  Það er er annars  makalaust  að  heyra  fjölmiðlamenn ( þar á ég ekki  sérstaklega við Þóru Arnórsdóttur  sem  ræddi við Evu Joly) beint og óbeint    æsa upp gegn   Icesave  samkomulaginu. Fjölmiðlamenn  sem  sváfu á verðinum og  dönsuðu  kringum útrásarvíkingana  að  hætti  forsetans.  Þetta  hefur verið einna mest  áberandi  í leiðandi spurningum eins og  við sáum og heyrðum í  sjónvarpi fyrir  einu eða  tveimur kvöldum, þegar þeim  sem  rætt  var við  voru nánast  lögð orð í munn.

Ólæsi á DV

 Það er greinilegt að  DV menn, að minnsta kosti  sá  sem skrifar  nafnlaus  Sandkorn ,er  ekki bara treglæs  heldur með öllu ólæs.

Ég skrifaði  hér á  dögunum um kranaviðtal   Jóhanns Haukssonar við Ólaf Ragnar Grímssonar í Mannlífi. Þar segir í  flenni fyrirsögn á  forsíðu  blaðsins, þvert yfir mynd af Ólafi Ragnari :  Forsetanum  hótað.  Ég sagði,  að í viðtalinu kæmi ekki fram að Ólafi Ragnari hefði verið  hótað , né hverjir  hefðu  hótað  hverju. Sú  fullyrðing  stendur  óhögguð.

Í viðtalinu  segir :,,Stundum hefur gætt tilhneigingar af hálfu ráðamanna, í þessari ríflega 60 ára sögu lýðveldisins, til að setja forsetanum skorður, jafnvel beita hótunum þannig að hann ætti erfitt með að uppfylla þær skyldur gagnvart þjóðinni sem honum ber ...".

Ef menn lesa það út úr þessum línum,að Ólafi  Ragnari hafi  verið hótað, þá  eru þeir   ekki treglæsir , heldur ólæsir.  Þarna segir bara ,að  á  sextíu  ára  tímabili hafi gætt  tilhneigingar  til að setja  skorður, jafnvel beita  hótunum.  Þessum orðum er  ekki fundinn neinn staður. Það segir  hreint ekki að Ólafi Ragnari  hafi verið  hótað. Það er ómögulegt að lesa það út úr þessu. Þessvegna   er  fyrirsögnin á  forsíðunni,  Forsetanum hótað,  röng og til þess fallin að blekkja lesendur. Þegar þessi  fyrirsögn er sett  þvert  yfir  mynd af ÓRG  dylst engum , að það er verið að segja  að Ólafi Ragnari hafi verið hótað. Það kemur  ekki fram í  viðtalinu.

  Það er    misskilningur hjá DV, að  sá sem þetta  skrifar hafi óbeit á  forsetanum.  Svo er   ekki.  Mér finnst  bara að hann  eigi að segja þjóðinni satt og hef  gert  athugasemdir, þegar hann  víkur af vegi  sannleikans.

 Vitað var að ýmsir  sem  skrifa fréttir á     vefdv  eru ekki mjög  vel  skrifandi, en að þar séu  menn líka ólæsir, kemur  svolítið á óvart.

En þetta er  það sem   vefdv   skrifaði  og  svo  geta lsendur  dælmt um hver  er  treglæs og hver  er ólæs:

Treglæs sendiherra

Eiður Guðnason, fyrrverandi sendiherra, fer á bloggi sínu nokkrum orðum um viðtal Mannlífs við Ólaf Ragnar Grímsson, forseta Íslands. Sendiherrann segir að viðtalið sé kranaviðtal. Skrif Eiðs bera með sér blæ þeirrar óbeitar sem hann hefur haft á forsetanum. Athyglisvert er þó að Eiður segir þess ekki sjást merki í viðtalinu að forsetanum hafi verið hótað. ,,Hún er röng vegna þess að hún á sér enga stoð í viðtalinu," bloggar sendiherrann fyrrverandi. Í viðtalinu kemur eftirfarandi fram: ,,Stundum hefur gætt tilhneigingar af hálfu ráðamanna, í þessari ríflega 60 ára sögu lýðveldisins, til að setja forsetanum skorður, jafnvel beita hótunum þannig að hann ætti erfitt með að uppfylla þær skyldur gagnvart þjóðinni sem honum ber ...". Að lestrinum loknum er nokkuð augljóst að sendiherrann hlýtur að vera treglæs.

 

Molar um málfar LXXXIV

  Ábyrgð þeirra sem semja  auglýsingar er ekki minni en  þeirra sem  skrifa fréttir í  fjölmiðla.  Oft hefur verið á það bent í þessum  Molum hvað  enskuslettur og   ambögur vaða uppi í auglýsingum. Alltof margir   textahöfundar eru ekki  starfi sínu vaxnir.

  Fleiri   fyrirtæki   bætast nú í hópinn og  auglýsa brunch.Nýjasta  auglýsingin með þessar slettu er frá IKEA, sem  auglýsir óeypis  brunch og  notar ekki einu  sinni gæsalappir, eða leturbreytingu,  til að    gefa  til kynna  að þetta er erlent orð. Í sama blaði og þessi  auglýsing  birtist er   boðið upp á  brunch með  brúðhjónunum. Þar   skammast   skrifari til að hafa orðið innan  gæsalappa.

  Húsasmiðjan og Hagkaup  halda áfram  með  slettuna tax-free í auglýsingum.  Hagkaup  býður  vörur án  virðisaukaskatts. Það eru ósannindi. Fyrirtæki  geta ekki boðið viðskiptavinum sínum  skattfrjálsar  vörur. Þau   geta  hinsvegar  boðið viðskiptavinum vörur   með afslætti, sem  nemur  jafn hárri  prósentutölu og  virðisaukaskatturinn.

 Ríkisútvarpið og  Skíðaskálinn í Hveradölum  halda  áfram að  tönnlast á enska  orðinu Reunion í auglýsingum. Þar þverbrýtur   Ríkisútvarpið eigin reglur um auglýsingar.  Skíðaskálinn í Hveradölum bætir  svo  gráu ofan á  svart með því að  segja  í skjáauglýsingu á RÚV: Heitir hlutir  gerast hjá okkur.  Ætli  við heyrum ekki næst:  Heitir  hlutir gerast á    reunion hjá okkur ! Kæmi ekki á óvart.

Meira um ensku: Í Fréttablaðinu (06.06.09.)  er  grein á íslensku  eftir  Íslending.  Fyrirsögn greinarinnar er: I love this  game. Hversvegna  í ósköpunum  fyrirsögn á  ensku á  grein á íslensku í íslensku dagblaði ? Er höfundurinn að sýna okkur að kunni pínulítið í ensku ? Þykir honum þetta flott?  Hefur  Fréttablaðið enga sómatilfinningu gagnvart móðurmálinu ?

  Hallærisleg ritvilla er í heilsíðuauglýsingu  frá   Rekkjunni,  fyrirtæki  sem  selur  rúm. Þar  stendur stórum stöfum: Líkur í dag. Þar ætti að  standa: Lýkur í dag.   Fyrir nokkuð löngu sendi ég þessu  sama  fyrirtæki  athugasemd, þegar í  auglýsingu   frá því  var sagt  annaðhvort  mér langar eða  vantar þér. Það  hlaut  litlar undirtektir. Fékk allt  að því skæting í  svari.    Rekkjan ætti að sænga með annarri  auglýsingastofu.

 Úr Vefvísi (08.06.09.): Ökumaður hinnar bifreiðarinnar stöðvaði rétt aðeins samkvæmt lögreglu en hélt síðan áfram för án þess að setja sig í samband við nokkurn mann.

Engar upplýsingar eru um hver var þar á ferð og enginn tók niður skráningarnúmer bifreiðarinnar samkvæmt lögreglu.  

Eins og  hér  hefur verið nefnt áður  er  orðlagið  samkvæmt  lögreglu ambaga.

Kranablaðamennska Mannlífs

 Það var, held ég, Jónas Kristjánsson sem  bjó til orðið  kranablaðamennska. Þá er átt  við það  fyrirbæri  þegar blaðamaður   er bara vélritari og lepur upp gagnrýnilaust  það sem   honum er  sagt.  Fínt orð.

  Dæmigert kranaviðtal er  í  nýjasta hefti  tímaritsins Mannlíf, þar sem Jóhann Hauksson  ræðir við Ólaf Ragnar Grímsson forseta Íslands.

Flennifyrirsögn á   forsíðu blaðsins er: Forsetanum hótað. Þetta er dæmigerð  sölufyrirsögn. Hún er  röng   vegna  þess að  hún á  sér enga  stoð í  viðtalinu.  Hverju var  forsetanum hótað ? Hver hótaði ?   Það kemur hvergi fram. Sjálfsagt   selur þessi  fyrirsögn blaðið,  -  til þess er leikurinn gerður. Þetta er óheiðarlegt gagnvart lesendum.

   Talað er um  samræðu forsetans  við  við  þúsundir íbúa  þessa lands ... . Það er  hinsvegar  ekki   sagt frá því að stundum  urðu  þessir  samræðufundir   svolítið endasleppir. Margir  vildu nefnilega  ræða  Hrunadans  forsetans   við útrásarvíkingana. Það  vildi  forsetinn hinsvegar ekki. Ekki frekar en hann vildi  svara  spurningum blaðamanns um þátt hans í  kaupum katarska  sjeiksins á hlutabréfum í Kaupþingi á  sínum  tíma.

Auðvitað  er sjálfsagt og eðlilegt að öryggisvörður  fylgi  forsetanum. Ekki  viljum við að veist sé að honum eða  honum unnið mein. Hann á  bara  að  viðurkenna þetta. Ekki bera það af sér  eins og  gert  er í viðtalinu. Ekki fara á  svig  við sannleikann.  Hversvegna  beið maður  með  gormasnúru úr eyranum niður í hálsmálið  ásamt   bílstjóra  forsetans  við forsetabílinn  fyrir utan Þjóðleikhúsið föstudagskvöldið  22.  maí, þegar  sýningu  lauk ?

Ég ætla  bara rétt að vona að það hafi verið öryggisvörður.

 

Hálfvitar með gullfiskaminni

 Eftir umræðunum á  Alþingi í gær að dæma  mætti halda að  stjórnarandstaðan teldi okkur kjósendur vera hálfvita með gullfiskaminni.  Raunar efast ég um að uppákoma   eins og  Framsóknarflokkurinn og  Sjálfstæðisflokkur  stóðu að á  Alþingi í gær  gæti  átt sér  stað á löggjafarsamkomunni  í nokkru  grannlandi okkar.

Verið  er að reyna að fá  botn í Icesave málið. Það  er liður í því að hreinsa upp eftir  langa óstjórn   Sjálfstæðisflokks og  Framsóknarflokks. Það er líka liður í því að lappa upp á  skaddað álit okkar í samfélagi þjóðanna, - gleymum því ekki.  Það er  verið að moka flórinn eftir  Framsókn og  íhald. Hversvegna   segi ég það?   Ég segi það vegna þess að Icesave  er bein og  óbein  afleiðing af subbulegri  sölu  ríkisbankanna  sem  Framsókn  og  Sjálfstæðisflokkur  skiptu milli vina sinna með   einstaklega ógeðfelldum hætti.

Ég minnist þess  ekki að hafa í umræðum á  Alþingi  heyrt  viðlíka orðbragð  og  viðhaft var í þinginu í gær.    Fóru þar fremstir  þingmenn  Framsóknar  með Eygló Harðardóttur í broddi  fylkingar.  Stjórnarþingmenn  sem  tóku þátt  í umræðunum fengu  ekki hljóð  fyrir  hávaða  stjórnarandstæðinga.  Þegar stjórnarandstæðingar  nota orð  eins og   landráð og lygarar, þá er tímabært  að  staldra við.

Kannski mundi  ólátum og uppákomum fækka í þingsölum, ef hætt yrði  að sjónvarpa úr þinginu. Ég held það væri athugandi.