Þetta er ekki póker !

Reynsluleysi nýrrar Framsóknarforystu kristallast í atburðum undanfarinna  tveggja  daga.

Framsókn lofaði  að  veita minnihlutastjórn Samfylkingar og VG hlutleysi og  verja hana  falli fram  til  kosninga. Vildi að tekið yrði á  málum fjölskyldna og fyrirtækja. Taldi  sig ekki hafa umboð  til að  setjast í  stjórnina.

Nú er stjórn Samfylkingar og  VG tilbúin.   Hún ætlar að taka á málum  fjölskyldna og  fyrirtækja.Framsókn  beitir  fyrir  sig sérfræðingum sem segja   aðgerðirnar óraunhæfar. Man ekki til þess að  stjórnmálamenn hafi skotið sér á bak  við sérfræðinga með þessum hætti áður.

Ef Framsókn finnast tillögur  Samfylkingar á  þingi óraunhæfar , þá  greiða  þingmenn flokksins auðvitað atkvæði  gegn þeim og  gætu  fellt þær. Hinsvegar held ég að  verulega mikið þyrfti  til að Sjálfstæðisflokkurinn hjálpaði  Framsókn til að  fella  ríkisstjórn,sem  ætlað er   að  sitja rétt fram yfir  sumardaginn fyrsta. Þar er nefnilega   í forystu fólk með reynslu.

Framsóknarforystan hegðar sér eins og  hún  sé að taka sæti í  ríkisstjórn. Flokkurinn er  ekki að því. 

Bæði í Noregi og  Danmörku  hafa minnihlutastjórnir  verið  við  völd árum  saman og  samið um framgang mála  eftir því sem  verkast  vildi  hverju sinni. Það er  greinilegt að  forysta  Framsóknarflokksins  skilur ekki  eðli minnihlutastjórna og hvað  felst í loforði  um að veita þeim hlutleysi og hefur  ekki  haft  fyrir því  að kynna  sér hvernig    hlutirnir hafa gengið fyrir sig  hjá  grönnum okkar. Hér var Alþýðuflokkur í  minnihlutastjórn frá  haustdögum 1979 þar til snemma árs 1980. Sjálfstæðisflokkur  veitti þeirri  stjórn hlutleysi  frá október og  fram til mánaðamóta  nóvember  desember að kosið var. Man ekki til þess að hann hafi  sett Alþýðuflokknum nein  skilyrði, en gat að   sjálfsögðu  fellt stjórnina  ef honum  svo  sýndist. Sjálfstæðismenn stóðu við orð  sín.

Enn furðulegra verður ástandið núna  þegar þess er gætt  að þessi  stjórn á  skamma lífdaga  fyrir  höndum,, samkomulag er um að  kjósa í vor. Þetta snýst um að halda   þjóðarskútunni á  floti  þar til kosningar hafa  farið fram og    kjósendur hafa  gefið  nýrri  stjórn umboð.

Það er   bara eitt sem á að gera í stöðunni. Láta reyna á   loforð Framsóknarmanna um  að verja minnihlutastjórn  falli fram að kosningum.  Þessvegna  á  stjórnin að taka strax  til starfa og láta  Framsóknarmenn standa  við  stóru orðin. Þetta er nefnilega ekki pókerspil. Þetta er fúlasta alvara.

 

 

Voru Framsóknarmenn of fljótir á sér ?

Nýr formaður  Framsóknarflokks  var fljótur að  lýsa því yfir  að Framsókn  væri  tilbúin  til að veita  stjórn Samfylkingar og VG  hlutleysi og  verja hana  vantrausti. Því fylgdu engin skilyrði.

Þegar  stjórnarmyndunarviðræður  hófust,  byrjuðu  Framsóknarmenn  svo að  setja fram  skilyrði af  ýmsu tagi. Skilyrðislaus yfirlýsing Framsóknarmanna  um hlutleysi  eða  stuðningi  var hinsvegar  forsenda þess að  Ingibjörgu  Sólrúnu var falið  að reyna  stjórnarmyndun.

Líklega er ég ekki  einn um að þykja þetta svolítið  sérkennileg vinnubrögð. Eða hvað ?

 

Afbragðs erindi

Nýlega hlýddi ég á  erindi Jónasar H. Haralz fyrrverandi bankastjóra í Rótarýklúbbnum Görðum í Garðabæ. Hann fjallaði um  gengismál og þróun  gengis íslensku krónunnar allt  frá upphafi  síðustu aldar fram  til  vorra  daga.

Það  voru engin  ellimörk á  erindi  Jónasar. Hann verður níræður  seinna á  þessu  ári. Hann talaði  í  tuttugu mínútur,  studdist  ekki  við  neina minnispunkta,eða skrifað  efni,   endurtók sig  aldrei og  efnistök  voru  skipuleg og  flutningurinn áheyrilegur. Það  hefðu ekki margir  yngri menn leikið þetta eftir  honum.

Í  lok máls  síns  nefndi  Jónas þrjú  meginverkefni sem  sinna yrði yrði á  næstunni.

1. Við yrðum að   gerast   aðilar að  myntbandalagi með öðrum þjóðum , -  verða þátttakendur  í  myntsamstarfi , sem  byggðist  á  sterkari  gjaldmiðli  en krónunni. 

2.  Gæta þyrfti  mun strangara aðhalds í ríkisfjármálum, en  gert  hefði verið   til þessa.

3. Auka þyrfti  samræmi  í efnahagsstjórninni. Samræmdri  efnahagsstjórn hefði  ekki verið  fyrir að fara á Íslandi eftir  að Þjóðhagsstofnun var lögð niður.

Það kom fram í máli hans, að  hann  hefði verið andvígur  EES samningnum á  sínum tíma.  Hann  hefði þá  talið  að  við ættum frekar að  sækja um  beina aðild  að ESB. Það  sjónarmið hefði ekki notið  stuðnings. -  Ég bæti  við : Nú geta margir   tekið  undir að þetta   hefði verið  skynsamlegt að gera.

Ný  ríkisstjórn  gerði vel í því  að  hlusta á  ráðleggingar  Jónasar H. Haralz.

Ekki einleikið !

 Það er með ólíkindum hve margir  misskilja Ólaf Ragnar Grímsson

Stutt er  síðan  forsetaskrifstofa  skýrði frá því,að BBC  hefði misskilið Ólaf  Ragnar. Meiri  aularnir hjá BBC. Geta ekki einu sinni haft rétt eftir manni !

Nú misskilja  margir  fleiri  forsetann skv. þessari frétt Morgunblaðsins.

“Ólafur Ragnar segir að sjálfskipaðir álitsgjafar og fræðimenn sem tjáð hafi sig um orð hans síðan í gær hafi ekki réttan skilning málinu.”“Ummæli um þingrofsréttinn misskilinnÓlafur Ragnar Grímsson segist telja að það gæti einnig misskilnings með orð hans frá því í gær um þingrofsréttinn”

Það er  heint ekki einleikið hve margir  misskilja  manninn !

Ólafur Ragnar: Vildi upplýsa þjóðina

Rogastans!

Geri  ráð  fyrir fleiri en mig hafi rekið í rogastans við að  hlýða á ummæli Ólafs Ragnars  Grímssonar frá  Besstöðum í dag. Engur er  líkara en  forsetinn telji sig  hið  nýja Bessastaðavald.

Í  fyrsta  lagi  telur hann sig nú  hafa  þingrofsvaldið, en   sú túlkun gengur þvert á  skoðanir  flestra  fræðimanna,sem um þetta  hafa fjallað.

Í öðru lagi  sagði hann  stjórnmálaflokkunum  fyrir  verkum og  setti þeim skilyrði. Þetta er  auðvitað  fáheyrt og  nær  engri átt.

Starfandi  forsætisráðherra Geir H. Haarde  fór  kurteislega  mjúkum  höndum um Ólaf Ragnar í Kastljósinu. Auðvitað  eiga   forystumenn flokkanna að segja  Ólafi  Ragnari  að hann segi þeim  ekki fyrir verkum  og að þeir myndi stjórn á  eigin  forsendum, en ekki  hans.

Fyrir löngu sagði   ágætur  stjórnmálamaður: "Ólafur  Ragnar fer alltaf  alveg að línunni, --  svo  færir hann línuna."  Nú hefur    Ólafur Ragnar  fært línuna of langt. Við þetta  geta  þingmenn ekki unað.

Frumhlaup  forsetans í dag  á áreiðanlega  eftir að  draga  dilk á  eftir sér.

Jónas ruglar

  Jónas Kristjánsson  fyrrverandi ritstjóri er orðljótasti og umtalsversti  bloggari  landsins. Aðrir komast ekki með  tærnar þar sem hann hefur  hælana.  

 Hann  víkur að  mér í  bloggi sinu og  segir:

"Mér sýnist Eiður biðja um, að heiðurslaun listamanna verði tekin af Þráni" (Bertelssyni). Þetta  er  rugl í  Jónasi.   Hef  aldrei  ýjað að slíku. Benti  bara á  að  Þráinn hefði notið  atbeina  Framsóknarmanna  til að  komast í heiðurslaunaflokk  Alþingis. Þráinn hefur  svo  sjálfur  skýrt  frá því  hvernig   Framsóknarmenn komu  honum í heiðurslaunaflokkinn.  

Ég átti  sæti í menntamálanefnd   efri deildar hér í gamla  daga, en menntamálanefndir  beggja  deilda  fjölluðu í sameiningu og   oftast sæmilegri sátt um það hverjir ættu  að  skipa  heiðurslaunaflokkinn. Á sínum tíma var það  atkvæði mitt  sem  réði því  að Thor  Vilhjálmsson fékk  sæti í heiðurslaunaflokknum. Hann átti löngu að vera kominn þangað. Pólitík hafði ekkert með  afstöðu mína að gera.

Jónas  Kristjánsson er snillingur í að  fara  rangt með staðreyndir og  gera mönnum upp skoðanir.

Það  er heldur ófögur iðja þess  sem kallar sig  blaðamann.

Man ekki betur en Jónas sé margdæmdur meiðyrðasmiður. Samt hefur Háskólinn í Reykjavík. notað hann til að kenna  blaðamönnum. Það er  ekki traustvekjandi.

Toyota - tungunni spillir

 

Gamalt   slagorð  Toyota á Íslandi er  Toyota – tákn um gæði. Þessa  dagana   fer ekki mikið  fyrir gæðum í orðavali  fyrirtækisins í  auglýsingum.  Fyrirtækið  gerir  ekki miklar kröfur til þeirra sem hanna  auglýsingar þess.

Mannhæðarhátt  upplýst auglýsingaskilti  með orðskrípinu “smælaðu” blasir   við öllum sem aka  suður Kringlumýrarbraut/Hafnarfjarðarveg. Skiltinu  hefur  verið komið  fyrir á þaki  bygginga fyrirtækisins  við  Nýbýlaveg og það er sem áður  sagði engin smásmíði.

Hversvegna þarf Toyota að  nota  orðskrípið og  enskuslettuna “smæla” í staðinn fyrir  fallegu íslensku  sögnina   að brosa?  Það er ofar mínum skilningi. Unnendur  íslenskra  tungu brosa  ekki ,þegar  þessi ósköp  stinga í augu  á leið út úr  borginni. Ég efast líka um að þeir  hugsi hlýtt til  fyrirtækisins.

Toyotamenn ættu að  sjá  sóma sinn í að breyta þessu og  tala  til okkar á  góðu máli.

Á  skiltinu ætti  að standa: Brostu J.

Annað  fyrirtæki  sem  misþyrmir íslensku í auglýsingum  er  Sparisjóðurinn Byr, sem  bullar í hverri  auglýsingunni  á  fætur annari um eitthvað sem þeir  kalla “ fjárhagslega heilsu”. Að  tala um  fjárhagslega  heilsu   er  bara  bull. Í  sama  dúr mætti  segja  að  Toyota og  Byr  séu ekki  við  góða “málfarslega heilsu”. Það er  auðvitað  sama  bullið.

 Fyrirtækin Toyota  og  Byr  eru ekki vönd  að  virðingu sinni  þegar kemur að  málfari í auglýsingum.

Viðkvæmt mál

Í athugasemd  við ótrúlega ósmekkleg skrif Þráins  Bertelssonar á   Eyjunni lýsti ég þeirri  skoðun að makalaust  væri að þar skyldi halda um penna  maður, sem  væri í heiðursritlaunaflokki Alþingis.

Ummæli Þráins    um veikindi Geirs H. Haarde  og Ingibjargar Sólrúnar  voru  fádæma ósmekkleg. Ekki síður  var  það sem hann skrifaði um Björn Bjarnason dómsmálaráðherra fáséður ritsóðaskapur. Um Björn sagði Þráinn Bertelsson:"Mér finnst makalaust að maður af þessum "saur og hland-" kalíber skuli hafa geta tranað sér fram í ráðherraembætti."

Þessi  mikla heift  skýrist ef til vill af því að ég man ekki betur en Björn Bjarnason hafi  að minnsta kosti tvisvar í netfærslum sínum  beðið  Þráin Bertelsson  að  greina  frá því hvernig það bar  til að hann  komst í heiðurslaunaflokk  Alþingis.Ég veit  ekki til þess að  Þráinn hafi  svarað Birni. Ég  nefndi í  athugasemd  minni að Þráinn væri í heiðurslaunaflokki vegna  atbeina  Framsóknarflokksins. Það eru ekki ný tíðindi og  á margra  vitorði.

Líklega er þetta  viðkvæmt mál , því  heiðurslaunarithöfundurinn lét  fjarlægja athugasemd  mína af  Eyjunni. Lengi lifi  ritfrelsið  !  Það mega  greinilega ekki allir viðra  skoðanir sínar í athugasemdum  við skrif Þráins Bertelssonar .

Brennuvargar og barnamótmæli

Tiltölulega fámennur hópur  hasarfíkla kemur óorði á  mótmæli, sem  annars  væru  friðsamleg. Þetta er  samskonar lið og á árum áður taldi öllu  mikilvægara  að  kveðja  gamla árið með því að  slást  við lögregluna  í Reykjavík.Það er nú sem  betur  fer liðin  tíð.

Á mannamáli eru það  auðvitað  ekkert annað en skrílslæti  þegar brennuvargar  taka sér bólfestu á  Austurvelli og brenna meðal  annars  eigur  Reykjavíkurborgar. Til hvers þurfti að brenna  Oslóartréð ? Sýna  Norðmön num fyrirlitningu. Mest hissa  á  að  slökkviliðið skuli  ekki  hafa verið kvatt  á vettvang.   Síðan er  matvælum  af ýmsu  tagi  kastað á  Alþingishúsið og  Stjórnarráðið. Þeir  eru ekki blankir sem það gera, og  gefa  hungruðum heimi um leið langt  nef.

Ýmsar myndir af skjánum munu lengi geymjast í minni. Ekki síst mynd  af  10-11 ára gömlum dreng sem hefur verið skrýddur hjálmi .Hann  situr  úti í horni og  virðist umkomulaus og  utangátta og  varla  vita  hvar hann er  eða hversvegna. Lögreglan  forðar honum undan grjótkasti. Nú er komið fram  að móðir hans var í  20 metra  fjarlægð. Hversvegna  sótti   hún ekki barnið sitt?  Nú er  sagt að  hún ætli að kæra  lögregluna.  Ég held endilega  að barnaverndaryfirvöld hljóti að eiga  eitthvað  vantalað  við móður,sem  sendir  son  sinn ungan í fremstu  víglínu mótmæla og  stendur  bara álengdar og  fylgist með.

Svo var  viðtalið  við konuna  sem kenndi  dóttur sinni  17 ára að mótmæla og  fylgdist svo með úr  fjarlægð , að eigin sögn, þegar  dóttirin mótmælti. Dóttirin  17 ára gamla var handtekin. Vel heppnuð mótmæli. Helvísk löggan. Má maður  ekki   djöflast á þinghúsinu í  friði?  Hvurslags er þetta eiginlega? Þessari konu  tókst  svo að  koma sér  í sjónvarpið  aftur í kvöld , - út af svo sem  engu.

Fjölmiðlar hafa legið undir  ámæli  fyrir  meðvirkni með útrásarvíkingum. Þeir  dönsuðu gagnrýnilaust með þeim í kringum  gullkálfinn. Rétt  eins  og  sést á þessari  ágætu tvímynd eftir  norska málarann Håkan Gullvåg.

Nú  er eins og  fjölmiðlar séu að  freista þess að  bæta fyrir þessi brot sín með því að vera meðvirkir með  mótmælendum. Sögum um  vondu löggurnar   er kyngt  athugasemdlalaust.  Löggan er vond. Mótmælendur  eru besta  fólk. Það eru   þeir  vissulega  langsamlega  flestir . Ósköp  venjulegt  fólk, sem er  reitt  og svekkt. Hefur  misst  vinnu, tapað  sparnaði sínum  og á kannski á  hættu að missa  húsnæðið. Mín  samúð  er með því  fólki, en  ekki með þeim   fáu sem eru aðalfréttaefnið,  brenna  eigur  samfélagsins og  senda börn og  unglinga í fremstu röð  eða víglínu gegn lögreglumönnum sem eru að    gegna  skyldum sínum. Og  foreldrarnir  fylgjast með  afkvæmum sínum úr  fjarlægð. Fyrirmyndaruppeldi, -  ekki satt?

Þetta eru  heldur daprir  dagar  fyrir  svona venjulegt fólk.

Ekki að það skipti sköpum ....

Auðvitað  gerðist þetta í  hádegisverðarboði,en ekki kvöldverðarboði. Klukkan í Washington DC  er  fimm klukkustundum á undan okkar klukku.

Ekki  stórmál, en  hroðvirkni , eða kæruleysi að ekki sé meira  sagt.  -  Vonandi kemst  Kennedy  aftur á  ról.

Kennedy hné niður