Moggabloggið kvatt

Með þessum fáu línum, sem skrifaðar eru á síðasta degi ársins 2009 ,lýkur skrifum mínum á Moggabloggi. Jafnframt hef ég sagt upp áskrift að blaðinu frá og með áramótum. Mér finnst ekki heiðarlegt að halda áfram á  skrifa á Moggabloggið eftir að hafa sagt upp áskriftinni.Það má ef til vill segja að ástæðan  að baki þessari ákvörðun sé uppsöfnuð óánægja. Ég nefni þar til  sögu  réttmæta reiði vegna ódrengilegra og óvenju rætinna skrifa  Sverris Stormskers um  veikindi Ingibjargar Sólrúnar  Gísladóttur. Það  hefur enginn maður með snefil af sómatilfinningu alvarleg veikindi fólks í flimtingum. Sami maður skrifaði grein sem Morgunblaðið birti undir  flennifyrirsögn,sem var ekkert annað en klám. Þegar við þetta bætist að pólitísk sjónarmið kvótakónga og andstæðinga Evrópusamvinnu blandast fréttum í æ ríkari mæli þá er nóg komið af svo góðu. Það er grundvallarregla í blaðamennsku að  skilja milli frétta og stjórnmála. Þessi regla hefur verið margbrotin í Mogganum að undanförnu. Þegar pólitíkin ratar inn í texta með fallegri forsíðumynd af vetrarsól tekur það út yfir allan þjófabálk. Ég er enn hissa.

Lýkur nú langri samfylgd , - um sinn að minnsta kosti.  Barn að aldri bar ég og fjölskylda mín út Morgunblaðið í Norðurmýri og upp alla Flókagötu. Það var fyrir meira en sextíu árum. Það drýgði tekjur, þegar ekki veitti af. Svo hef ég verið áskrifandi að blaðinu nær alla mína ævi og hef jafnan haft taugar til Moggans , þótt ég væri ekki alltaf  sammála pólitíkinni. Ég hef átti vini meðal blaðamanna og ritstjóra og vona að svo geti enn orðið. En Mogginn um þessar mundir er ekki minn gamli Moggi.

Ef blaðið breytist, hættir að birta sóðagreinar, hættir að blanda saman pólitík og fréttum í svona ríkum mæli  er aldrei að vita nema áskriftin verði endurnýjuð. Ég þakka öllum þeim sem tekið hafa jákvætt undir athugasemdir mínar um málfar í fjölmiðlum, en þeir pistlar nálgast nú að vera 230 talsins.En mér er ljóst að að það eru tiltölulega fáir sem  lesa Molana um málfar og miðla, því skrifi ég eitthvað um pólitík tífaldast fjöldi athugasemda miðað við málfarsmolana.

Ég mun halda áfram að birta pistla á vefritinu Eyjunni, eyjan.is og á minni eigin vefsíðu ,sem smám saman er að taka á sig mynd, www.eidur.is

Að endingu bið ég alla  lesendur þessara lína vel að lifa og óska þeim árs og friðar með þökkum fyrir samskiptin.

 Eiður Svanberg Guðnason

Athugasemdir

[Yngvi Högnason, 31.12.2009 kl. 14:50]

Ég þakka þér skrifin og óska þér gengis á nýjum stað. Hef reynt að fylgjast með fólki á þessari eyju en líkar illa viðmótið þar. Þú, sem aðrir ferð því fylgdarlaus af minni hálfu þangað. Gleðilegt nýtt ár.

[Þorsteinn Briem, 31.12.2009 kl. 15:20]

Takk kærlega fyrir liðið ár og ég óska þér og þínum alls hins besta á nýju ári, Eiður minn!

[Anna Einarsdóttir, 31.12.2009 kl. 15:40]

Takk fyrir samfylgdina og gleðilegt ár !

[Silja (IP-tala skráð) 31.12.2009 kl. 17:42]

,,En mér er ljóst að að það eru tiltölulega fáir sem lesa Molana um málfar og miðla, því skrifi ég eitthvað um pólitík tífaldast fjöldi athugasemda miðað við málfarsmolana."

Ég er á öndverðum meiði við þig hvað varðar stjórnmálaskoðanir, en hef mjög gaman af málfarsmolunum þínum. Ég les þá síðarnefndu því miklu frekar, og vona að þú haldir þeim skrifum áfram. 

[Hulda Haraldsdóttir, 31.12.2009 kl. 18:57]

Óska þér og þínum gæfu, gengi og gleði um ókomna tíð og gott gengi á Eyjunni

[Guðrún María Óskarsdóttir., 1.1.2010 kl. 02:47]

Gangi þér vel, en sjálf fer ég ALDREI inn á eyjuna, og ástæðan er of margir Samfylkingarmenn samankomnir, punktur.

kv.Guðrún María.

[Baldur Kritjánsson (IP-tala skráð) 1.1.2010 kl. 11:05]

Þakka þér samskiptin á liðnu ári og óska þér farsældar á  komandi ári. Sams konar ákvörðun og þú tók ég í nóvember, af svipuðum ástæðum, en skrifa nú lítilsháttar á bloggheimar.is og www.baldur.is  Bestu kveðjur.  Baldur

[Heimir Lárusson Fjeldsted, 1.1.2010 kl. 11:15]

Gangi þér allt í haginn Eiður. Þinn dagur kemur aftur í samskiptum við Morgunblaðið. Þú getur ekki verið án þess.

[Baldur Kristjánsson, 1.1.2010 kl. 11:27]

Baldur Kristjánsson átti þetta að vera. Kv. b

[Kristjana Leifsdóttir (IP-tala skráð) 1.1.2010 kl. 13:35]

Tek undir með Silju hér að ofan. 

[Pjetur Hafstein Lárusson, 1.1.2010 kl. 14:26]

Þakka samflotið á blogginu og óska þér gleðilegs árs.

[Eiður Svanberg Guðnason, 1.1.2010 kl. 18:00]

Sömuleiðis Pjetur. Minnist Færeyjaheimsóknar með  hlýjum huga.

[Eygló, 2.1.2010 kl. 02:17]

Far vel! (getur þetta ekki bara verið fín íslenska með sögn í boðhætti )

[Sæmundur Bjarnason, 3.1.2010 kl. 21:04]

Takk Eiður. Margir hafa áhuga á málfari en eru alls ekki eins iðnir við að skrifa um það og þú. Þín verður saknað.

[Eiður Svanberg Guðnason, 6.1.2010 kl. 15:19]

 Sæmundur, - þú getur  getur  lesið Molana mína á   eyjan.is   En  ef Eyjólfur hressist, þá er aldrei að vita , nema ég  líti aftur við á Moggabloggi. Meðan Sverrir Stormsker skrifar sína sóðapistla í blaðið,  kemur Mogginn ekki inn á mitt heimili.  Eitt það versta sem ég veit er að hafa alvarleg veikindi fólks í flimtingum eins og hann gerði. Tala nú ekki um klámfyrirsagnir, sem maður þarf að fela  fyrir   nýlega læsum barnabörnum.

[Sigurður Hreiðar, 12.1.2010 kl. 11:58]

Á eftir að sakna þín, Eiður Svanberg, og málfarsmolanna þinna. Á eyjuna.is á ég ekkert erindi og þó mér líki ekki fremur en þér allt sem kemur í Mogganum lít ég svo á, eins og ég les raunar á skjánum í hvert sinn sem ég set inn blogg sem ég geri eftir því hvernig andinn blæs mér í brjósti, að það sem ég skrifa sé frá mér komið og Mogganum óviðkomandi. En megi þér farnast sem best.

[Eiður Svanberg Guðnason, 12.1.2010 kl. 13:40]

  Sæll Sigurður Hreiðar. Þakka þér orðin.  Það er aldrei að vita nema ég birtist aftur á Mogganum einn  góðan veðurdag. Hef  vissu fyrir því núna að Mogginn er  búinn að losa sig við pistlahöfundinn Sverri Stormsker. Það er   spor í rétta átt. Kannski er Eyjólfur örlítið að hressast!

[Eiður Svanberg Guðnason, 12.1.2010 kl. 13:57]

  Svolítil  viðbót, Sigurður Hreiðar. Málfarsmolarnir  eru líka á heimasíðunni minni www.eidur.is  og á  fésbókarsíðunni minni, -- það er hvergi friður fyrir mér.