Leikhús fáránleikans við Austurvöll

  Stjórnarandstaðan er búin að breyta Alþingi Íslendinga í leikhús fáránleikans.  Sá sem  þetta ritar trúði  eiginlega hvorki augum né  eyrum, þegar hann sá þingmenn í ræðustóli vælandi um hungur, að  þeir  fengju ekki  fundarhlé til að raða í sig réttunum úr hinu ágæta ( og líklega niðurgreidda) mötuneyti þingsins. Fáránleikanum og fíflaganginum virðast engin takmörk sett. Þið misbjóðið þjóðinni með þessari framkomu.

Athugasemdir

[Ben.Ax. (Benedikt Jóhannes Axelsson), 28.11.2009 kl. 23:56]

Steini, vinur minn, er ekki sammála þér í þessu efni. Hann lítur á þingmenn sem guðlegar verur sem þurfi ekki að nærast á öðru en því sem fram gengur af munni þeirra sjálfra. Hann segist hafa fastað í tvo daga með góðum árangri árið 1978 og hvetur alla til að gera slíkt hið sama.

[Gunnar Skúli Ármannsson, 29.11.2009 kl. 00:32]

Eiður, ég er ósammála þér.

[Eygló, 29.11.2009 kl. 01:15]

Kunningjakonu minni var algjörlega ofboðið:  "Kunna þessir and.... dru.... ekki að panta pítsu? Hlýtur að mega narta í þær í þingsal, eins og að senda sms, lesa blöðin og stara dauflegum augum fram fyrir sig..."

Þeir verða nú að fá eitthvað í gogginn greyin, gæti komið blóðstreymi til heilans væri það hollustufæða.
Það varð, líkt og þú skrifar, þvílík móðursýki sem kom upp (kannski af blóðsykurfalli) Hefði mátt bera fram "kók og prins"

[Lilja (IP-tala skráð) 29.11.2009 kl. 12:56]

Eiður, þú segir ...þingmenn í ræðustóli? Er ekki þágufall þessa orðs ræðustóll?

[Lilja (IP-tala skráð) 29.11.2009 kl. 13:01]

Aðeins of fljót að senda þetta! Spurning um hvort þágufallið sé ekki ræðustól.

[Eiður Svanberg Guðnason, 29.11.2009 kl. 14:11]

 Þakka  þér ábendinguna Lilja,

Á vef Árnastofnunar sló ég einhverntíma upp beyginu orðsins stóll til að vera viss. Hún er þar gefin svona:

EintalaFleirtala
	án greinis	með greini		án greinis	með greini
Nf.	stóll	stóllinn	Nf.	stólar	stólarnir
Þf.	stól	stólinn	Þf.	stóla	stólana
Þgf.	stól / stóli	stólnum	Þgf.	stólum	stólunum
Ef.	stóls	stólsins	Ef.	stóla	stólanna

   Þannig að þágufallið af orðinu  stóll getur verið á hvorn veginn sem  er.  Ef hinsvegar  er spurt um  beygingu orðsins ræðustóll   þá er ekki gefin þágufallsmyndin  ræðustóli, þannig að um það hefur þú rétt fyrir þér.  Sama gildir um prédikunarstól. Þannig  að  þágufallsmyndin stóli  virðist ekki  til í samsetningum þó hún sé  til í orðinu stóll, sbr.  það sem segir  hér að ofan.