Molar um málfar og miðla 328

 

   Hennar hugur virðist hins vegar enn vera hjá Reykjavíkurborg og því myndi hún ekki gefa kost á sér.(mbl.is.13.06.2010). þessi setning er ekki í lagi.  Verið var að  fjalla um hvort Hanna Birna ,senn fyrrverandi  borgarstjóri, mundi gefa kost á sér í embætti varaformanns Sjálfstæðisflokksins á landsfundinum undir lok þessa mánaðar. Fyrri hluti setningarinnar er  getgáta blaðamanns, en seinni hlutinn  er eins og hafður eftir  Hönnu Birnu í óbeinni ræðu. Þarna  hefði annaðhvort átt að standa: Hugur hennar væri enn hjá Reykjavíkurborg og því myndi hún ekki gefa kost á sér. Eða:Hugur hennar er enn hjá Reykjavíkurborg og því gefur hún ekki kost á sér.

   Síðar í þessari sömu frétt á mbl.is segir um áform Hönnu Birnu: ...hyggst ekki gefa kost á sér í varaformann Sjálfstæðisflokksins á næstkomandi landsfundi.  Gefa kost á sér í  varaformann ! Af hverju á næstkomandi landsfundii ? Svona orðalag er Morgunblaðiðnu ekki samboðið.

  Í hádegisfréttum Ríkisútvarpsins (13.06.2010) var  sagt frá lóninu í gíg Eyjafjallajökuls Sagt var,  að vatnið ætti eftir   tuttugu til þrjátíu metra að barmbrún gígsins.  Hér hefði verið réttara að segja  að vatnið ætti eftir tuttugu til þrjátíu metra að gígbarminum. Barmur er nefnilega brún eða jaðar.

Úr dv.is (13.06.2010): Hinn tvítugi Xu, var að hella steypu ofan í hrærivélina þegar steypupokinn festist í spaða í vélinni, og dró hann ofan í vélina. Skilur einhver þetta ? Hella stepu úr poka ofan í hrærivél ???

  Í hádegisfréttum Bylgjunnar (13.06.2010) var frétt um  blóðug átök þjóðernishópa í  Kirgistan. Talað var  að veitt hefði verið  leyfi  til að drepa,  og talað um uppþot,sem tekið hefði áttatíu líf. Þarna var hver ambagan eftir aðra. Frétt um sama efni var langtum betur orðuð í hádegisfréttum Ríkisútvarpsins sama dag. Þar var til dæmis  talað um að  heimilað hefði verið að skjóta fólk til bana en ekki að gefði hefði verið leyfi til að drepa. 

   Frétt Morgunblaðsins af þessum  sömu atburðum er svo sannarlega ekki til að hrópa húrra fyrir. Þar segir meðal annars:  Að svo stöddu hefur mestöll borgin verið lögð í rúst.Múgurinn hefur stolið mestöllum mat sem í borginni var að finna og sigri hrósandi fylkingar kirgskra karlmanna tóku við stjórn borgarinnar í dag á meðan 250.000 Úsbekar sem eftir eru í borginni hafa byrgt sig inni í hverfum sínum.Þá virðist her og lögregla vera í vörn um allt suður landsins og óvíst er um framtíð stjórnvalda en Rússar hafa neitað að grípa inn í átökin.  Lesendur dæmi. Það er ekki bara að ein og ein fjóla spretti á málakri Mogga. Þar dafna nú heilu fjólubreiðurnar.

Athugasemdir

[Emil Ragnar Hjartarson (IP-tala skráð) 15.6.2010 kl. 21:16]

Fleiri eru fjólur dagsins og nú í "Vef-Mogga". Þar er talað við Dag Kára , son nýkjörins borgarstjóra, og er tekið svona til orða:Dagur Kári vinnur í garðvinnu hjá Landspítalanum í sumar.  Hann er sannfærður um að pabbi sinn  verði góður borgarstjóri.  Er hægt að  "vinna í vinnu "?  Menn eru í vinnu ,ekki satt ? Sjálfsagt  er  Dagur Kári sannfærður um að pabbi hans  verður góður borgarstjóri.

[Eiður Svanberg Guðnason, 15.6.2010 kl. 21:26]

Þetta er allt eftir hætti, Emil Ragnar. Þeir eru að hugsa um eitthvað annað en að vanda mál sitt  þessa dagana, Moggamenn.

[Jóhanna (IP-tala skráð) 15.6.2010 kl. 21:49]

Hér eru líka nokkur sumarblóm:

http://www.pressan.is/VeroldMortuMariu/Lesagrein/stjornurnar-borda-epli-med-hnetusmjori-thegar-theim-langar-i-eitthvad-gott

[Eiður Svanberg Guðnason, 15.6.2010 kl. 22:54]

 Jóhanna, - þessir pistlar Mörtu Maríu  er með því versta á pressan.is.

[Eiður Svanberg Guðnason, 15.6.2010 kl. 22:55]

... eru með því versta, -- átti þetta auðvitað að vera.

[Emil Ragnar Hjartarson (IP-tala skráð) 16.6.2010 kl. 19:32]

Ég hef nú ekki hugsað mér að  vera fyrirferðarmikill  í athugasemdum en má  þó til með að geta þess að samkvæmt fréttum  Stöðvar tvö ætla hljómsveitirnar Hjaltalín og Symfóníuhljómsveit Íslands  að leiða saman hesta sína í kvöld. Þetta orðtak,að leiða saman hesta sína, hélt ég að að þýddi að efna ætti till einhvers konar kappleiks,en það mun ekki vera ætlunin að þessu sinni.

Mál er að linni. Bestu þakkir til þín Eiður,fyrir að vaka yfir íslenskunni,-ekki veitir af.