Molar um málfar og miðla 362

 Hér kemur Gomis. Hann er að stökkva átta metra. Úr íþróttalýsingu í Ríkissjónvarpi (25.07.2010). Betra hefði  verið: Hann stekkur átta metra  , eða: Hann stökk átta metra.

 Í hádegisfréttum Ríkisútvarpsins (25.07.2010) var sagt: Þá  voru skemmdir unnar á rúðu. Nú er þetta auðvitað ekki rangt.  En var ekki rúðan brotin? Hefði  ekki  verið skýrara að taka þannig til orða?

 Fyrir helgina var hér fjallað um enskættaðar og ósmekklegar auglýsingar  Símans. Molaskrifari reyndi  að hafa samband  við þann starfsmann Símans er bæri ábyrgð á þessu. Það gekk illa. Fékk  tölvubréf  frá  starfsmanni Símans þar sem spurt var: Hvað var málið?

 Tölvubréfinu  svaraði Molaskrifari  svona: Sæll Einar,

 Málið er, að mér er misboðið þegar  Síminn notar enska  orðið  ring í auglýsingaherferð,sem beint er að íslenskum neytendum. Ring er ekki íslenska. Af hverju þurfið þið að sletta á okkur ensku ?

   Mér er svo enn meira  misboðið, þegar þið sýnið ungan pilt í skátabúningi,  sem látinn er koma fram   eins og fáviti. Hvað hefur  skátahreyfingin gert Símanum ?

  Ég er búinn að vera  viðskipavinur Símans í næstum 50 ár og  mundi fara annað með mín viðskipti ,ef þess væri  kostur , en í veröld  íslenskrar  fákeppni og samráðs samkeppnisaðila er ekki um margt að velja.

    Eiður Guðnason

 Es  Á það  að hvetja fólk til viðskipta við  Símann að  sjá leikara velta sér upp úr drullu og  maka ís í andlit hvers annars ?   -  Þú undirritar  tölvubréfið Markaðs-Sökker.  Er þetta nýtt stöðuheiti hjá Símanum ? Hvað er  sökker?   Markaðs sökker  er ljót  sletta og   eins og þú skrifar það er það ekki í samræmi við íslenskar réttritunarreglur.   ESG 

Hér hefði mátt bæta  við spurningu um auglýsingagildi þess að sjá menn sprauta yfir sig  bensíni eða díselolíu og taka síðan upp  eldspýtur.  Er  Síminn algjörlega  greindarsneytt fyrirtæki ?

  Svar hefur ekki borist frá Símanum.

Molar um málfar og miðla 361

  Enn eitt  dæmi þess að fréttaskrifarar nota orðatiltæki,sem þeir kunna  ekki með að fara , má  finna á  mbl.is (24.07.2010): Þegar þyrlan var að nálgast vettvang bárust hins vegar fregnir af því að maðurinn væri fundinn. Hann var á heilu og höldnu. Hér er átt við að maðurinn hafi verið heill á húfi.  Það er ekkert til sem heitir að vera á heilu og höldnu.  Menn geta hinsvegar náð heilu og og höldnu  í áfangastað, óskaddaðir, í góðu ásigkomulagi. Og enn kemur  vettvangurinn við  sögu. Það er ekkert að því  ágæta orði , en  nú er farið  að ofnota það og  misnota. Hér hefði til dæmis  mátt segja: Þegar þyrlan nálgaðist leitarsvæðið.  

   Glöggur Molalesandi sendi eftirfarandi: „ Á DV-vefnum í dag  (23.07.2010) er svohljóðandi fyrirsögn: Fallnir þingmenn boða endurkomu. Þarna finnst mér alrangt komist að orði, fyrirsögnin verður gildishlaðin. Satt er að þessir þingmenn hafa ekki setið á þingi undanfarna mánuði, en þeir féllu hvorki í kosningum né í bindindi eða af öðrum orsökum heldur hættu þingsetu sjálfviljugir og flestir tímabundið, sem kunnugt er.
Hæpin málnotkun þetta." Hárrétt athugasemd. Kærar þakkir.

Í fyrirsögn á dv.is segir (23.07.2010):  Jóhannes  Karl með neglu að hætti hússins. Negla er eins og flestir vita tappi í neglugat á báti.  Í fréttinni segir einnig :   Jóhannesi hefur á ferlinum ekki leiðst það neitt sérstaklega að negla í tuðruna... Ekki fellir  Molaskrifari  sig   þessa  notkun á nafnorðinu negla og ekki heldur  sögninni að negla. Oft er  að vísu  talað uim  að  leikmaður hafi neglt í  vinstra hornið.  Skorað með  föstu skoti í vinstra horn marksins.  Nær  væri að tala um neglingu en  neglu. Orðið neglingu er að  finna í Íslenskri orðabók (óformlegt), fast  skot.  Líklega skortir  Molaskrifara umburðarlyndi í þessu  tilviki, að einhverra mati. Í fréttinni er talað um bylmingsskot. Það  finnst Molaskrifara ágætt,  sbr. bylmingshögg, öflugt eða fast högg.

 Það er mikill misskilningur hjá stjórnendum  fréttastofu ríkisins ,að allir geti  lesið fréttir. Sá sem las fréttir klukkan  17 00  sl. föstudag (23.07.2010) er ekki vel til þess verks fallinn. Honum lætur annað betur.

  Í kvöldfréttum  Ríkisútvarpsins (23.07.2010) var  ítrekað sagt á  helginni , þegar verið var að gera grein fyrir atburðum af ýmsu tagi um  komandi  helgi. Af  hverju  á helginni en ekki um helgina  eins og málvenja er að segja?

 Í íþróttafréttum Stöðvar tvö (23.07.2010) var  talað um að  forystumaður hefði hlekkst  á. Þetta er rangt. Maður hlekkist ekki á. Manni hlekkist á. Því hefði átt að segja að  forystumanni hefði hlekkst á.

Molar um málfar og miðla 360

  Í fréttum Stöðvar tvö  var sagt frá  einkar heimskulegum athugasemdum á  vef Sky-sjónvarpsins  við  frétt af nýfundinni ofurbjartri stjörnu.  Um þann sem  gerði athugasemdina  sagði reyndasti  frétthaukur Stöðvar tvö: Ekki kannski skarpasti hnífurinn í skúffunni. Ekki er hægt að hrósa þessu orðalagi. Það er of enskulegt til að geta kallast  vandað íslenskt mál.  Það var hinsvegar  hnyttið  ( Molaskrifara fannst það að minnsta kosti) þegar þessi  sami  fréttahaukur  sagði fréttir að því að Shackleton landkönnuður og  menn hans  hefðu verið orðnir  vistalitlir á leið að  suðurpólnum, en áttu þó  fjóra kassa að  viskíi ! Var á honum að heyra að  menn með slíkar birgðir  væru hreint ekki vistalitlir.  Svolítið spaug er gott með með öðru, - meira að segja í fréttum.

   Í fréttum Ríkissjónvarpsins sagði  fréttaþulur (23.07.2010): ... og furðar sig á hve illa hefur gengið fyrir  fyrirtækið að kaupa kvóta hér á landi.  Að tala um að  eitthvað gangi illa  fyrir einhvern er  barnamál.  Rétt hefði verið að segja: ... og furðar sig á því hve illa fyrirtækinu hefur gengið að kaupa (eða fá keyptan) kvóta  hér á landi.

 Umsjónarmaður  morgunútvarps Ríkisrásar tvö  sletti á okkur  ensku í viðtali um  eplatré (22.07.2010). Hann talaði um sexual partners.  Slæmt er ,að  stjórnendur í Efstaleiti skuli ekki hafa metnað til  málvöndunar. Stundum sletta þeir mestri ensku sem minnst kunna fyrir  sér  í því ágæta tungumáli.

 Í tíu fréttum Ríkissjónvarpsins (21.07.2010) las fréttaþulur: Bróðurpartur úthafsrækjukvóta þessa fiskveiðiárs var úthlutað til fimm útgerða...  Hér  hefði  þulur átt að segja:  Bróðurparti  úthafsrækjukvóta  þessa fiskveiðiárs var úthlutað til fimm útgerðarfyrirtækja ... Einhverju er úthlutað, Eitthvað er ekki úthlutað. En  í ljósi umburðarlyndis  reiðareksstefnunnar í Efstaleiti  þykir þetta líklega gott og  gilt. Molaskrifari er á öðru máli.

Sjónvarpsauglýsingar  Símans  í enskættuðu auglýsingaherferðinni Ring fara  hríðversnandi. Það nýjasta er að sýna  pilt  sem klæðist skátabúningi og er látinn koma fram  eins og hann sé þroskaheftur eða greindarskertur. Hvaða  tilgangi á  svona  rugl að  þjóna?  Síminn misbýður okkur áhorfendum,  ekki síst þeim sem hafa starfað innan skátahreyfingarinnar. Af hverju  gerir Síminn lítið úr Skátahreyfingunni?

Í hádegisfréttum Ríkisútvarpsins (21.07.2010) var sagt: ... skipaði bráðabirgðastjórn yfir félaginu. Ekki  finnst Molaskrifara þetta eðlilegt orðalag. Betra hefði  verið að tala um að  skipa félaginu bráðabirgðastjórn. Þessi  ambaga hefur svo sem heyrst áður í Ríkisútvarpinu.

Molar um málfar og miðla 359

 

 Á vef Ríkisútvarpsins (22.07.2010) stóð: Á stjórnarheimilinu láta menn reka í reiðanum. Þetta orðalag kannast Molaskrifari  ekki  við. Sá sem  svona tekur til orða  skilur sennilega ekki orðið  reiði en það er siglutré með seglabúnaði ( Íslensk orðabók). Á íslensku er talað um að láta  reka á  reiðanum, að láta fara sem vill. Vonandi  kristallast hér ekki reiðareksstefna Ríkisútvarpsins hvað málfar varðar. Vonandi  nær umburðalyndi málfarsráðunautar ekki  yfir  svona  fráleit mistök,  eða hvað ?

Í fréttum fjölmiðla (21.07.2010) neituðu  talsmenn slökkviliðsmanna,sem boðað hafa verkfall á  föstudag, ítrekað að  segja  hlustendum hverjar kröfur  slökkviliðsmanna væru. Þannig kjarabarátta er ekki trúverðug. Ef launakröfurnar eru sanngjarnar hversvegna fáum við ekki að  vita hverjar þær  eru?

 Eftirfarandi athugasemd barst  frá  Molalesanda: „ Ummæli dagskrárkonu RÍKISútvarpsins í gærmorgun eftir viðtal við Einar Sv. veðurfræðing: „Veðurblíðan mun haldast til fimmtudags en þá mun ÞAÐ snúast við" . Ég skildi þetta hins vegar svo að á miðvikudag myndi vindur snúast í vestlægar áttir og þá hlýnaði á norður og austurlandi. Er RUV bara svæðisútvarp fyrir höfuðborgarsvæðið eða sér dagskrárgerðarfólk útvarpsins bara út fyrir gluggann í Efstaleiti? Hrynjandin hefur stundum pirrað mig  í málfari auglýsingalesara á Bylgjunni og einnig í svæðisútvarpi Akureyrar (RUV), við erum kannski að eignast nýja mállýsku eftir að hinar gömlu hafa þynnst út."

  Úr dv.is (20.07.2010): Lögreglumenn á eftirlitsferð um Eyrarbakka í gærkvöldi fannst hann finna kannabislykt og að hana mætti rekja að tilteknu húsi.   Það var og.  Lögreglumenn fannst hann finna !

  Í kvöldfréttatíma Ríkissjónvarpsins (19.07.2010) var okkur  sagt að Landeyjahöfn yrði vígð daginn eftir. Rétt reyndist það, að  höfnin var vígð, þótt  þessi  væri aðeins  stuttlega  getið í framhjáhlaupi að prestur hefðu komið við sögu. Öðru vísi verða mannvirki nefnilega ekki vígð. Það var  vel til fundið að blessa þetta mannvirki og biðja  þeim blessunar ,sem um höfnina  eiga eftir að  fara.   Það var hinsvegar ranglega sagt sumstaðar ,að  Kristján Möller samgönguráðherra hefði vígt höfnina. Hann vígir ekki eitt né neitt, enda  ekki vígður maður.

    Alltaf öðru hverju  heyrist í fréttum talað um  að taka þátt á  íþróttamóti. (Stöð tvö  20.07.2010). Hvimleitt. Við tölum um að taka þátt í einhverju, ekki á einhverju.  Í  Ríkissjónvarpinu var sagt um íþróttakonu, að hún kæmi frá Kópavogi. Betur hefði farið á því að segja að hún væri úr Kópavogi. Nema að hún hafi verið að koma úr Kópavogi.

Molar um málfar og miðla 358

 Ljósmynd RAX á forsíðu Morgunblaðsins (21.07.2010)  er  listaverk.  Loftmynd sem  sýnir Herjólf sigla inn í  Landeyjahöfnina nýju.

Úr dv. is (18.07.2010): Fimmtán ára drengur á Englandi lét lífið þegar klesst var á hann á M23 hraðbrautinni í Vestur Sussex, Englandi. Þetta er  óboðlegt orðalag. Barnamál. Í fréttinni kemur  fram  að ekið var á drenginn. Síðan óku margir bílar yfir lík drengsins  á hraðbrautinni.

 Í hádegisfréttum Ríkisútvarpsins (19.7.2010)  var rætt við  mann sem var fróður um veiðar á laxi og silungi, þá var sagt: .. kennir ekki miklar breytingar  frá í fyrra. Átt var við að  veiði  væri svipuð og í fyrra. Molaskrifara þykir þetta einkennilegt orðalag.

 Í fréttum Stöðvar tvö (19.07.2010) var sagt:... og er  nú farinn að  gera tónlist  með pabba sínum. Nú er spurt: Hvað er að  gera tónlist? Er það að  spila tónlist?  Spyr sá sem ekki veit.  Sennilega er hér um  áhrif   frá ensku ræða, ( e. make music.).

Ekki heyrði Molaskrifari betur  en  fréttamaður Ríkissjónvarps  talaði um þar síðasta  sumar í frétt um  þá ákvörðun sjávarútvegsráðherra að gefa  veiðar á úthafsrækja frjálsar. Molaskrifari  veit  ekki   hvað þar síðasta  sumar er. Er það sumarið í fyrra , fyrra sumar ? Í fréttum um veiðar á  úthafsrækju voru  eingöngu sýndar myndar  af  rækjuveiðum inni á fjörðum, líklega  Vestfjörðum.

 Úr frétt um blaðamannafund í Norræna Húsinu mbl. is (19.07.2010):  Í máli Oddnýjar Eirar Ævarsdóttur rithöfundar í upphafi fundar kom fram að ekki verður tekið við spurningum blaðamanna á fundinum.  Ekki verður  tekið við spurningum, -- einkennilegt orðalag.  Skýrara hefði verið að segja að blaðamenn mættu ekki  spyrja spurninga á fundinum.  Í fréttum Stöðvar tvö var sagt að fullt hefði verið út úr dyrum á fundinum í Norræna húsinu. Myndirnar með fréttinni báru það nú reyndar ekki með sér.  Reyndar er  það óvenjulegt, að ekki sé meira  sagt, að   fundarboðandi lesi  spurningalista yfir blaðamönnum, en blaðamönnum sé  bannað að spyrja. Þetta er örugglega  einn sérkennilegasti blaðamannafundur í  fjölmiðlasögu landsins. 

 Íslendingur,sem lengi hefur búið vestan hafs, lætur sér annt um móðurmálið. Hann sendi Molum  eftirfarandi: 

„Ég rakst á þetta í Silfri Egils á Eyjunni: "Tyrkir og Grikkir hafa lengi barist á banaspjótum"

Algengt er að misnota svona þetta orðatiltæki - oftar er talað um að "berast á banaspjót", eða jafnvel "berast á banaspjótum". Hér er smáfróðleikur um upprunann, sem er ekki alveg augljós, en hefur þó ekkert að gera með að "berjast": http://visindavefur.hi.is/svar.php?id=23884 "

 

Molar um málfar og miðla 357

   Úr mbl.is (17.07.2010): Mikil aukning hefur verið í þjófnaði á fellihýsum og tjaldvögnum undanfarið. það verður ekki aukning í einhverju, heldur á  einhverju, samkvæmt íslenskri  málvenju.

    Það kom svona moment  of clarity var sagt á Rás tvö (17.07.2010) og, þetta er svona new generation. Á ekki að tala íslensku í íslensku útvarpi.  Þátturinn var á hrognamáli.

Visir.is (17.07.2010) Að sögn varðstjóra mun þyrlan sækja vatn í sjóinn. Mikinn reyk leggur frá svæðinu, en það er aðalega gróður sem er að brenna. Enginn byggð er nálægt. Ein stöð fór í verkefnið. Þyrlan sækir vatn í sjóinn. Það var og ! Tvær stafsetningarvillur eru hér feitletraðar. Og   setningin ein stöð fór í  verkefnið, - er málleysa.  Það er á sinn hátt  afrek að koma  svo  mörgum villum  í svo fáar línur.  Margt bendir  til þess að sá sem þetta skrifaði, ætti að  fást  við  önnur verkefni en að skrifa fréttir.

  Úr dv.is (18.07.2010) Greinir mönnum þó á af hvaða tegund flugfarið á að hafa verið ... Menn greinir á um  eitthvað. Ekki þágufall. Hér hefði því betur staðið: Menn greinir á um hverrar tegundar flugfarið hafi verið.

 Ég er að loka þættinum, sagði dagskrárgerðarmaður á Bylgjunni (18.07.2010). Hann átti  við að hann væri að ljúka  þættinum, þættinum væri að ljúka.

  Þegar hér er komið við sögu, sagði  fréttamaður í   fréttum Ríkissjónvarpsins (18.07.2010). Þarna  var smáorðinu  við ofaukið. Þegar hér var komið sögu, hefði þetta átt að vera. Ómar Ragnarsson  fjallði um þetta á  bloggi sínu 17. nóvember 2007.

Molar um málfar og miðla 356

  Andlega lágkúran í dagskrá Ríkisútvarpsins  kristallast á föstudagsmorgnum á  Rás tvö. Þá hringja umsjónarmenn, og mega vart vatni halda yfir tilhlökkun,  til  Dídíar í Hollywood, sem segir hlustendum fyllerís- og framhjáhaldssögur   af  fræga  fólkinu í kvikmyndaborginni. Þetta hefur  hefur svo sem verið nefnt hér áður og er svartur blettur á morgunútvarpi Rásar tvö. Það kemur vel í ljós í þessum þætti  að umburðarlyndi Ríkisútvarpsins gagnvart vondu máli og slettum er nánast óendanlegt.

 Ef allt  væri með felldu ætti  Orkuveita Reykjavíkur að vera gullmalandi fyrirtæki og skila eigendum sínum miklum arði. Svo er hinsvegar ekki. Viðskiptavinir OR geta nú  vænst verulegra gjaldskrárhækkana vegna þess að misvitrir stjórnmálamenn hafa komið þessu áður trausta fyrirtæki á kaldan klaka. Væntanlegar gjaldskrárhækkanir eru í boði Sjálfstæðisflokksins.  Engin von er til þess að  þessir fjármálamisindismenn verði látnir sæta ábyrgð. Slíkt tíðkast ekki á Íslandi.

 Moggasnilldin bregst ekki (17.07.2010): Lögreglan segir hins vegar að nóttin hafi gengið ágætlega. Fimm ökumenn voru teknir ölvaðir á bak við stýri í nótt... Nóttin gekk ágætlega og fimm voru fullir  bak við stýrið !

Allar  sjónvarpsstöðvar endursýna efni yfir hásumarið. Það mun hinsvegar leitun að sjónvarpsstöð þar sem endursýnt efni er jafn hátt hlutfall dagskrár og hjá skylduáskriftarsjónvarpinu okkar, Ríkissjónvarpinu. Ef endursýningar þurfa að vera svona stór hluti dagskrárinnar,  hversvegna er þá ekki endursýnt gamalt íslenskt efni úr gullkistu Ríkissjónvarpsins ?

 Í hádegisfréttum Ríkisútvarpsins (17.07.2010). var fiskvinnsla á Patreksfirði kölluð verksmiðja. Það er  ekki rangt, en  til þessa hafa fiskvinnslufyrirtæki ekki heitið verksmiðjur í fréttum.

 Menn skoða ekki skipsflök á Eystrasalti, eins og sagt var í hádegisfréttum RÚV (17.07.2010). Hér hefði átt að segja :... í Eystrasalti.

 Einn af þeim sem er fastagestur á öldum ljósvakans í Útvarpi Sögu, fáraðist  í dag (17.07.2010) yfir lágum launum í unglingavinnu. Hann vitnaði  til þess að hann hefði unnið fyrir góðu kaupi hjá Tryggva Ófeigssyni á Kirkjusandi í gamla daga. Það rifjaði upp að þegar Molaskrifari var  15 ára vann hann um skeið  á Kirkjusandi hjá Tryggva Ófeigssyni. Þegar að útborgun kom  komst hann að því , að hann var á unglingakaupi, af því  að hann var ekki orðinn fullra 16 ára. Vann  við hlið fullorðinna og  vann sömu verk og þeir.  Hætti umsvifalaust, þegar þetta kom í ljós. Hefur aldrei litið Tryggva og Kirkjusand réttum augum eftir þetta.En auðvitað hafði Tryggvi réttinn sín megin. Eimskipafélag  Íslands fór á þeim árum  öðru vísi að gagnvart unglingum sem unnu við hlið fullorðinna við uppskipun eða í vörugeymslum.

Molar um málfar og miðla 355

  Fínn þáttur  Á bláum nótum í bland  hjá Ólafi Þórðarsyni á Rás eitt (17.07.2010) með Mills bræðrum. Ólafur hefur líklega fundið diskana Mills Brothers Chronological (Vol.1-5).  Takk fyrir þáttinn, Ólafur. Þeir bræður heyrast alltof sjaldan á öldum ljósvakans. Molaskrifari á rúmlega 20 geisladiska með söng þeirra bræðra  og fær seint , - aldrei nóg af þeim. Ríkisútvarpið á  reyndar í fórum sínum tvo  þætti, sem  Molaskrifari gerði um Millsbræður fyrir 8-9 árum. Þeir verða  auðvitað aldrei endurfluttir meðan Molaskrifari gagnrýnir  RÚV.   Það er auðvitað í besta lagi.

 Það var svolítið óvenjulegt (15.07.2010) að heyra talsmann  slökkviliðsmanna neita að svara spurningu  fréttamanns um hverjar kröfur slökkviliðsmanna væru í yfirstandandi kjaradeilu. Varla getur kröfugerðin verið  trúnaðarmál. Eða hvað ?

Aftur og aftur sér þess stað í fréttum að ekki er lengur kennd landafræði í skólum á Íslandi: Þrjú hjólhýsi hafa fokið í kvöld á þjóðveginum vestan við Höfn í Hornafirði, að Djúpavogi.  (af heimasíðu RÚV 16.07.2010). Í fréttinni kom fram að öll höfðu hjólhýsin fokið austan við Höfn. Í Efstaleitinu eru menn svolítið áttavilltir.

  Ríkissjónvarpið sýndi ágætt inskot frá Umferðarstofu (15.07.2010)  um hjólreiðamenn í umferðinni. Þar hefði  að skaðlausu mátt koma fram að hjólreiðamenn eiga ekki réttinn á gangbrautum yfir  götur, nema  þeir leiði hjólið, - það er að segja séu gangandi vegfarendur, en ekki hjólreiðamenn.

  Molaskrifari hefur lengi haldið því fram að  íþróttadeild  og auglýsingadeild  Ríkisútvarpsins réðu miklu um dagskrá  útvarps og  sjónvarps. Þetta hefur nú verið staðfest. Í helgarblaði DV (16.-18.07.2010) kemur nefnilega fram að auglýsingastjóri RÚV  situr í dagskrárráði Rásar 2 og markaðsstjóri RÚV  situr í dagskrárráði Sjónvarpsins.  Þarf frekar vitnanna við ?  Nú skilur fólk betur  af hverju  Sigmar Guðmundsson Kastljóssstjóri fékk bágt fyrir að tala um  auglýsingahórarí m.a. á Rás tvö.   Kannski verður Ríkisútvarpið bráðum eins og Útvarp saga  þar sem mörkin milli dagskrárefnis og auglýsinga eru löngu horfin.

   Merkilegt fyrirbæri  er annars Útvarp Saga.  Þar  er talað um hugmyndir  AGS í skattamálum  eins og þegar sé  búið að samþykkja þær og matarverð hækki á  morgun og  eldsneytisverð daginn þar á eftir. Hvílíkt rugl. Svo er of mikið um óhróður og ósannindi hjá  afkastamestu þátttastjórnendum.

  Úr dv.is (16.07.2010): Báðar lofa þær Jónína og Þórdís Jóna fögrum fyrirheitum um lengra líf án erfiðra sjúkdóma og aukið hreysti þátttakenda. Þannig geti þeir átt til að mynda von á því að losna við alzheimer, athyglisbrest, krabbamein, sykursýki og þunglyndi með því að ganga í gegnum meðferðina. Í grunninn sé það einfalt að halda sé heilbrigðum með því að fylgja ráðum þeirra Jónínu eða Þórdísar Jónu.

  Um málfar: Í fyrsta lagi: Það er ekki hægt að tala um að lofa fögrum fyrirheitum. Við tölum um að gefa fögur fyrirheit eða lofa einhverjum einhverju. Í öðru lagi:  Orðið hreysti er kvenkynsorð, ekki hvorugkynsorð. Þessvegna á að tala um aukna hreysti.  Aukið hreysti er bara bull.

 Loks er rétt að nefna að ef  þessar konur þykjast geta læknað  Alzheimersjúkdóminn, athyglisbrest, krabbamein, sykursýki og þunglyndi ætti  embætti landlæknis að kanna málið.  Ef þær fullyrða þetta eru þær að  að blekkja   veikt   fólk. Það er ljótt.

Molar um málfar og miðla 354

   Ágætlega var að orði komist í fréttum Ríkisútvarpsins (16.07.2010) er sagt var frá nýjum lögum um banka og  fjármálastofnanir í  Bandaríkjunum. Sagt var að frumvarpið mundi valda straumhvörfum og  verða vatn á myllu efnahagslífsins. Fleira  var vel sagt í þessari frétt.

 Molaskrifari grunar fréttastofu ríkisins og mbl.is ( 15.07.2010) um að hafa  búið til nýja götu í Reykjavík. Í fréttum  RÚV var sagt, að barn hefði orðið fyrir  bíl á  Reykjavíkurvegi í Laugardal. Á mbl. is  var einnig talað um Reykjavíkurveg. Molaskrifari þykist nokkuð viss um, að Reykjavíkurvegur sé í Hafnarfirði, vegurinn til Reykjavíkur. Í Laugardalnum  er hinsvegar  Reykjavegur. Hann liggur milli Sundlaugavegar og Suðurlandsbrautar. Og það er allt önnur Ella. dv.is  skrifar einnig um Reykjavíkurveg. Svona fljóta villur milli miðla. Kannski á villan upptök sín hjá lögreglunni ?

Á mbl.is var sagt frá  eldsvoða um borð í skipi í Hafnarfjarðarhöfn (15.07.2010). ...eldur kviknaði í vélarrúmi frystitogara í höfninni. Reyk leggur frá togaranum. Allar stöðvar hafa verið sendar á vettvang.Allar stöðvar sendar á vettvang, einmitt það! Molaskrifara grunar að hér sé á ferðinni aulaþýðing úr ensku, all stations call.Það er að segja,  þegar lið frá öllum slökkvistöðvum á svæðinu  er  sent á vettvang. Stöðvarnar fara hinsvegar hvergi. Úr annarri brunafrétt á mbl.is sama dag: Slökkvilið höfuðborgarsvæðisins er á staðnum en ekki fengust frekari upplýsingar um eldsumbrot. Það hafði kviknað í rafmagnstöflu í íbúð. Orðið eldsumbrot þýðir  eldgos. Sem betur fer varð ekki eldgos á  Leifsgötunni í Reykjavík. Ótrúlega snjallir Moggamenn ! Kannski ætti þó að setja nýjan mann í eldsvoðafréttirnar.

Í fréttum Stöðvar tvö (13.07.2010) var beðist afsökunar á að hljóð var ekki í lagi á viðmælanda! Nær hefði verið að segja að  ólag hefði verið á hljóðinu í viðtalinu næst á undan. Í sama  fréttatíma var sagt:... það sem af er þessa árs. Hér hefði farið  betur á að segja: Það sem af er þessu ári.

Í morgunfréttum Ríkisútvarpsins (16.07.2010) var skýrt og skilmerkilega talað um háttarlag. Molaskrifari er  vanur því að talað sé um háttalag. Hvað segja lesendur ?

Ritsnilldin blómstrar að venju á pressan.is (13.07.2010): Jordan er komin heim úr brúðkaupsferðalagi sínu sem fór fram í Tælandi.

 Mesta gúrkufrétt, sem Molaskrifari hefur lengi lesið var á visir. is (14.07.2010). Þar  sagði frá því að Bjarni Benediktsson   formaður Sjálfstæðisflokksins  hefði verið farþegi í  díselbíl, sem óvart var sett svolítið bensín á.  Magnið var svo lítið að  ekkert  gerðist. Samt þótti  Vísismönnum þetta vera  fréttnæmt.  Ótrúlegt !

Stórfyrirtækið Síminn heldur áfram að misþyrma íslenskri tungu. Nú í auglýsingu , þar sem sagt er: Vertu  ekki sökker !  Molaskrifari er ekki viss um að allir Íslendingar skilji  þetta hrognamál. En það skiptir sjálfsagt ekki máli.

  Morgunblaðið er nú á barmi örvæntingar. Daglegar kveinar blaðið hástöfum yfir að fá  ekki  fleiri auglýsingar frá þeim sem  blaðið  kallar Baugsveldið og  hefur ekki  viljað hafa  mikið saman við að sælda fram til þessa. En auðvitað  væri gott  að fá nokkrar heilsíður frá þeim, tala nú ekki um opnur.  Annað sem ætti að vera  Morgunblaðinu mikið áhyggjuefni, þótt enn sé ekki haft hátt um það á síðum blaðsins er að   umræðan öll og greinaskrif  hafa nú að mestu flust á  síður Fréttablaðsins. Hversvegna?  Líklega vegna þess að langtum fleiri lesa Fréttablaðið en Morgunblaðið.

Molar um málfar og miðla 353

  Leiðbeiningar og ábendingar Umferðarstofu, Vegagerðar og Landsbjargar til ökumanna og ferðalanga, sem sýndar eru sjónvarpi ,eru prýðilega gerðar. Gott og þarft efni,sem ætti að sýna sem oftast, því ekki veitir af.  Hún hefði haft gott af sjá þetta  stúlkan sem var að  reyna að komast inn á Hafnarfjarðarveginn af Vífilsstaðavegi í dag (15.07.2010). Hún var með  aðra höndina á farsímanum við hægra  eyrað. Í vinstri hendi hélt hún á  epli,sem hún var að gæða sér á. Enda gat hún ekki gefið stefnuljós og  gekk brösuglega að komast inn í umferðina til  Reykjavíkur.  Vonandi hefur hún komist klakklaust á áfangastað.

Úr dv.is (12.07.2010) ...en hún vill koma í veg fyrir að aðrir lendi í sömu örlögum og sonur hennar. Á íslensku er ekki talað um að lenda í örlögum.  Hér hefði  fremur átt að standa:.. en hún vill koma í veg fyrir  að aðrir hljóti sömu örlög.

Í seinni fréttum Ríkissjónvarpsins (12.07.2010) sagði íþróttafréttamaður frá  þeim getspaka kolkrabba Páli í Þýskalandi og  tók svo til orða: ... vilja fjölmargir ... festa kaup á  kolkrabbann getspaka.  Við  tölum ekki um að festa kaup á eitthvað  heldur festum við kaup á einhverju. hann hefði því átt að segja okkur ,að  fjölmargir vildu festa kaup á kolkrabbanum getspaka.

Myken er lítil eyja við Norður-Noreg. Eyjan liggur rétt 25 kílómetrum neðan við heimskautsbaug.(Morgunblaðið 13.07.2010) Hér er átt við að  eyjan Myken sé  25 kílómetrum  sunnan við  heimskautsbauginn. Molaskrifari  veit að  algengt er  til dæmis í talmáli þeirra  sem starfa við  flug að tala um að fara  niður  til Jeddah eða niður til Jóhannesarborgar.  En orðalag  eins og   þetta  á ekki heima í Morgunblaðinu. Þetta er  ekki vandað mál.    Hvað ætli Húsavík sé annars langt fyrir neðan   heimskautsbauginn að mati Moggans.

Þegar ég joinaði  grúbbuna,skrifar ung stúlka á Fésbókarsíðuna sína (13.07.2010). Fólk á líka að vanda mál sitt á  Fésbókinni.

  Flest verður nú grunsamlegt. Í fréttum Ríkisútvarpsins (13.07.2010) var  talað um grunsamlegan vettvang. Orðalagið er að líkindum  tekið beint úr lögregluskýrslu.  

SS er með sjónvarpsauglýsingu  þar sem boðað er  að  pulsur henti við öll tækifæri, brúðkaup  og allt hvað eina , -  og í  næstu viku erfisdrykkju. Þar er á ferðinni maður,sem borðaði bara  pulsur,-  segir  í auglýsingunni. Það vantar ekkert  hér nema að bæta við: Og þess vegna er hann dauður !