Deild í Framsóknarflokknum

 Nú vita allir að þetta svokallaða Indefence , er deild í Framsóknarflokknum, rétt eins og UMFÍ.

Furðar sig á ummælum ráðherra

Kúlulánakosning

  Ég fer á kjörstað til að kjósa gegn kúlulánum  forystumanna  gömlu stjórnarflokkanna.

Þjóðin láti ekki kúga sig

Molar um málfar og miðla 266

  Athyglisverð  viðtöl voru flutt í morgunþætti Rásar tvö (03.03.2010) um Herbalife,sem kallað er  fæðubótarefni. Annarsvegar var rætt við  rólegan og yfirvegaðan prófessor, sem ásamt   fleiri læknum  hefur rannsakað aukaverkanir Herbalife.  Hinsvegar var rætt við óðamála, og allt að því dónalegan, höfuðpaur Herbalife innflutnings. Aldeilis dæmalaust.  Þessi  tvö  viðtöl  mundu henta  vel  sem  dæmi í kennslu í  fjölmiðlun. Spyrjendur stóðu sig ágætlega.

 Á Stöð tvö er verið að ginna  fermingarbörn og freista þeirra til að taka þátt í einhverskonar leik og vinna sér inn fé  eða  vöruúttekt. Stöð tvö segir: Auk þess verða  hundrað heppin börn  dregin út.  Það er ekki öfundsvert eða  eftirsóknarvert að verða dreginn út. Það sem við er átt er að nöfn hundrað fermingarbarna  verða  dregin út.

  Í kvikmyndaauglýsingu á  Stöð  tvö ( 26.02.2010) var  svona tekið  til orða: Þarna ertu   enn að dreyma um... Betra  hefði verið að segja: Þarna er þig  enn að dreyma  um, - því ég er ekki að  dreyma um.. heldur er mig að dreyma um,.... að málfar í íslenskum fjölmiðlum  fari batnandi.

  Í fréttum Stöðvar tvö (03.03.2010) var talað um að fella niður höfuðstóla.  Orðið  höfuðstóll er ekki  til í fleirtölu. Því er rangt að tala um höfuðstóla.

  Það leynir sér ekki að  breyting á  eðlilegri orðaröð  er að læðast inn í íslenskuna   úr ensku. Eftirfarandi   þrjú dæmi eru úr nýlegum auglýsingum:   ... fyrir  þína húð, ... komin í þína lúgu.... við  smíðum þínar innréttingar.. Þarftu viðhald á þinni fasteign ?  Dæmin eru örugglega fleiri. Ekki er þetta breyting  til bóta.

 Sjónvarpsstöðvarnar hafa sérfræðinga til að  flytja fréttir að formúlukappakstri, svokölluðum.    Þeim er ýmislegt annað betur gefið en að vanda málfar sitt. Sérfræðingur  Stöðvar tvö  sagði (02.03.2010).  Mótshaldið hefst.  Mótið hefst, hefði   verið betra að segja.

 Í mbl.is  (27.02.2010)  var fjallað um  jarðskjálftana í Síle og minnst á íslenskt fyrirtæki  sem er með starfsemi þar. Netmiðill Moggans  segir: ... sem er með  útgerð og fiskvinnslu á vesturströnd Síle. Muni Molaskrifari  rétt, á  Síle aðeins land  að sjó  til vesturs.

Hin tuttugu ára gamla Yasmine Judge, hefur verið vikið tímabundið úr starfi sínu á leikskóla.. Eins og  svo oft áður, hroðvirkni eða vankunnátta? visir.is (03.03.2010).   Hér átti auðvitað að standa : Hinni tvítugu Yasmine Judge hefur verið vikið....

Molar um málfar og miðla 265

  Kunna menn ekki lengur að leggja saman? Í  kvöldfréttum útvarps  (01.03.2010) var greint frá  afstöðu almennings  til Icesave laganna,sem   forsetinn neitaði  að undirrita.  Sagt var að 74%  væru á móti,  19% með og 8% ætluðu að  skila  auðu.  Þetta eru samtals  101%! Þessar röngu tölur  voru svo  endurteknar á mbl.is  og vísað í fréttir   RÚV   og  til að kóróna vitleysuna  var    birt  prósentukaka í fréttum RÚV  sjónvarps  klukkan 19 00 þar sem tölurnar voru endurteknar. Enn var svo sama prósentukakan birt óleiðrétt í  tíu fréttum sjónvarps. Þetta er eiginlega með ólíkindum.  101% . Halló, RÚV !

   Í tíu fréttum  RÚV sjónvarps (01.03.2010) var okkur  sagt, að  tíu fréttir yrðu hér eftir  með breyttu sniði. Eina breytingin, sem Molaskrifari gat séð, var   aukið rými  fyrir íþróttafréttir, þær  voru næstum helmingur fréttatímans, -  svona á að giska.

  Búið að opna veginn um Hafnarfjall, var sagt í  fyrirsögn á visir.is (26.02.2010). Í fréttinni  var réttilega  talað um þjóðveginn undir  Hafnarfjalli, en málvenja  er að  taka þannig  til orða. Vegurinn er  undir hlíðum Hafnarfjalls,eða í grennd við þær.  Hann er ekki um Hafnarfjall. Ef til vill hefur sá,  sem fyrirsögnina samdi, aldrei farið þessa leið. Sama orðalag var notað um þetta á mbl.is. Étur hér hver eftir öðrum?

  Um herferð  til verndar móðurmálinu  í Þýskalandi segir svo í  þriggja dálka undirfyrirsögn í  Morgunblaðinu (26.02.2010): Utanríkisráðherrann hefur  fengið nóg af ásælni enskunnar.Molaskrifari efaðist í fyrstu um um að  ásælni, væri rétta orðið í þessu samhengi. Orðið ásælni  og sögnin að ásælast  er algengast í merkingunni  að  slægjast eftir e-u. En í Íslenskri orðabók segir að  ásælni  geti líka verið yfirgangur og þá  er þetta rétt orð á réttum stað. En líklega hefði  Molaskrifara verið eðlilegra  að  tala um ágang enskunnar.

Góðvinur sendi Molum þessa athugasemd: „Þulukynning hjá RUV: "Í þættinum Army Wives er fylgst með mökum hermanna, sem búa í herstöð"“  .  Molaskrifari bætir við: Þetta er  ein af ástæðum þess, að rétt er að leggja þulukynningarnar niður. Takk fyrir JÞH.

   Hætti að horfa á Edduþáttinn  (27.02.2010), þegar  okkur var sagt frá  frá mest  hæfu konunni,(hæfustu)  og sá sem það sagði  bauð  svo Kolbrúnu Halldórsdóttir    (dóttur) velkomna. 

Henni urðu á engin mistök í brautinni,   var sagt í íþróttafréttum RÚV (27.02.2010). Hér hefur orðaröð  skolast til, - þetta hefur svo sem heyrst áður. Eðlilegra hefði verið að segja: Henni urðu engin mistök á í brautinni, -  eða: Henni urðu ekki á nein mistök  í brautinni.

Undir fyrirsögninni Hvernig varð hann fyrir  raflostinum? sendi Bjarni Sigtryggsson Molum eftirfarandi:

„Þessi frétt í DV í morgun er einum of biluð til þess að birtast. Feitletrarnir eru mínar", segir Bjarni.

"Roy Messenger slapp með skrekkinn þegar hann klessti bíl sínum á rafmagnsstaur á föstudag í Washington-fylki. Engu að síður fundu fjölskyldumeðlimir Messenger látinn á slysstað. Talið er að Messenger hafi ákveðið að kasta af sér þvagi er hann beið eftir að fjölskyldumeðlimir hans kæmu honum til aðstoðar. Ekki fór það betur en svo að Messenger kastaði þvaginu á rafmagnstaurinn sem hann hafði klesst á og varð þá fyrir gífurlegum raflosti sem dró hann til dauða.

Bifreið Messengers kastaðist út í skurð við áreksturinn og rafmagnstaurinn brotnaði. Rafmagnslínurnar, sem staurinn bar, slitnuðu og enduðu ofan í skurðinum þar sem Messenger aðhafðist við bíl sinn. Talið ar að þvagið hafi lekið í rafmagnslínurnar með þeim afleiðingum að Messenger hlaut banvænann raflost." 

Þeir sem svona skrifa ættu ekki að ganga lausir á neinum miðli.

Molar um málfar og miðla 264

    Konur leyfðar í kafbátum,segir  dv.is (24.02.2010) í fyrirsögn.  Sama dag er svohljóðandi fyrirsögn á dv. is:  Konur leyfðar í réttarsölum.  Sami snillingur hefur sjálfsagt verið að verki í  báðum tilvikum. Konur fá að þjóna í kafbátum,segir á mbl.is  sama dag.  Molaskrifari veit varla hvor fyrirsögnin er verri; báðar eru slæmar.  Fyrirsögn  mbl.is  er aulaþýðing úr ensku ( e. serve).  Konur um borð í kafbáta, hefði verið skárra. Ráðlegg þeim , sem  samdi  þessa fyrirsögn að fletta upp sögninni að þjóna í  íslenskri orðabók.

Góða fyrirsagnir  gleðja lesandann, segir   Bjarni Sigtryggsson og bætir við: "Ókyrrð í lofti vegna deilu um launakjör" segir í glettilega skemmtilegri fyrirsögn um kjaradeilu flugumferðarstjóra í Netmogga í dag (24.02.2010).  Undir þetta skal  tekið.

 Af pressan.is (24.02.2010): Fresturinn sem rannsóknarnefnd Alþingis veitti tólf einstaklingum til að koma á framfæri athugasemdum um afmörkuð efni í skýrslu rannsóknarnefndar lauk klukkan 17:00 í dag. - Menn verða að vita hvaðan  lagt var af stað, þegar punkturinn er settur.  Fresturinn lauk ekki. Frestinum lauk. Eitthvað tekur enda. Einhverju lýkur.

  Á Stöð tvö  (27.02.2010)  sagðist veðurfréttamaður ætla að byrja á því að líta  til veðurs. Auðvitað er ekkert rangt við þetta. Molaskrifari er hinsvegar  íhaldssamur með afbrigðum og hefði  kunnað því betur , að talað  væri um að gá til veðurs. En auðvitað er þetta sparðatíningur. Það skal fúslega viðurennt.

 Sérkennilegt nýyrði (?) var í Morgunblaðinu 25.02.  Þar var talað um glæsilegan reiðhnakk.  Þetta er orð  finnur Molaskrifari  ekki  í  tiltækum orðabókum. Reiðhnakkur?  Af hverju ekki  bara hnakkur ? Hélt  sá  sem skrifaði, að  lesendur  blaðsins skildu ekki orðið  hnakkur ?

  Þegar Stöð tvö  sagði frá  hundi á brimbretti  í fréttum (26.02.2010) var óneitanlega  fyndið að heyra  fréttamanninn  segja  um hundinn ... með manninum, sem hann á !  Þetta er svo sem ekki málfræðilega  rangt , en  orðaröðin gefur  ekki rétta mynd af því, sem verið  er að reyna að segja. Einfaldast hefði verið að segja, að hundurinn hefði verið með eiganda sínum. Fremur ósennilegt er að hundurinn hafi átt manninn,  eða hvað?

Hannes með böggum hildar

  Hannes  Hólmsteinn Gissurarson, æðsti prestur  frjálshyggjunnar, eða  æsti prestur frjálshyggjunnar,eins og einhver sagði,   getur nú ekki á sér heilum  tekið   vegna  nýs ritstjóra Fréttablaðsins. Hannes  fer og mun fara hamförum gegn Ólafi Stephensen. Ólafur  er fagmaður og fínn blaðamaður. Skoðanir hans  voru hinsvegar ekki að skapi  kvótaeigenda Morgunblaðsins. Þessvegna var hann rekinn,. Hannes skrifar  digurbarkalega á blogginu, en leyfir  engum að gera athugasemdir.  Hvað var þessi hirð í kringum hann annars kölluð?  Man  það nokkur?

Tillitslausir ökumenn

  Ómar Ragnarsson skrifar í kvöld  prýðilega  færslu, þar sem hann rekur  samtöl  við  óprúttna og tillitslausa ökumenn, sem leggja í stæði,sem eru sérmerkt  fötluðum. Ótrúlega margir telja sig þurfa   tvö  bílastæði. Ung  stúlka  lagði   stórum Ford pallbíl  í tvö  stæði  við Austurver   á miðvikudaginn. Þegar henni  var bent á að hún væri   að taka  tvö stæði, ver  svarið: Ég er bara  rétt að skreppa, - svo hélt hún áfram inn í verslanamiðstöðina.   Bíllinn er í  eigu  Lýsingar.

 

 

 

 

 

 

 Hinn ökumaðurinn lagði undir sig  gangstéttina fyrir framan Þjóðleikhúsið og tók ekki mikið  tilliti til gangandi vegfarenda í   ófærðinni í gær.  Jeppinn  er   skráður í eigu einkahlutafélags.

Molar um málfar og miðla 263

   Líklega  er  málfarsráðunautur  RÚV búinn að leggja  blessun  sína  yfir það orðalag fréttamanna að tala um síðasta vetur, síðasta  sumar og  síðasta sunnudag. Önnur  ályktun verður vart  dregin  af því ,að  þetta  orðalag skuli nú heyrast næstum í hverjum fréttatíma. Molaskrifara  finnst þetta ekki gott mál.

  Þegar  ég sá út í morgun, vissi ég að það yrði erill,  hefur pressan.is  eftir lögreglumanni (25.02.2010).  Hér hefði verið  eðlilegra að  segja: Þegar ég leit út í morgun... Hinsvegar  segir maður:  Glugginn var svo hélaður að ég sá ekki út. Í þessari  sömu frétt var sagt,  að óveður  hefði  geysað.Líklega  er minni áhersla lögð á  stafsetningarkennslu nú en  áður. Óveður geysar ekki, það geisar. Sá  sem þetta skrifaði geystist hinsvegar fram úr  getu sinni   til að skrifa  rétt mál.   Um og eftir  miðja síðustu öld var reynt á það í hverju einasta stafsetningarprófi í  Gagnfræðaskóla Austurbæjar hvort nemendur  kynnu  skil  á því  hvenær ætti að skrifa  geysa og hvenær geisa. Það er víst af ,sem áður var.

  Sló körlunum ref fyrir rass,sagði í myndatexta í Morgunblaðinu (23.02.2010). Hér  hefði átt að  standa: Skaut  körlunum ref fyrir rass, en það þýðir, - tókst (óvænt) að verða körlunum fremri.  Sjá bls.  672, Mergur málsins, Íslensk orðatiltæki , uppruni, saga og notkun eftir  Jón G. Friðjónsson. Þá bók ættu allir sem skrifa  fréttir að hafa  við höndina.

 Í  sjónvarpsfréttum RÚV (22.02.2010) var  talað um að koma upp tveimur  búðum. Orðið  búðir var  hér notað í merkingunni bækistöð,  ekki sölubúðir. Hallast Molaskrifarin að því að  segja hefði átt, - tvennum búðum.  Þá var í sama fréttatíma  sagt: Vanskil er alvarlegt vandamál.  Hefði átt að  vera: Vanskil eru  alvarlegt vandamál, því vanskil er  fleirtöluorð, -- ekki til í eintölu.

 Í tíu fréttum RÚV sjónvarps (22.02.2010)  var okkur  sagt ,að flugmenn þýska  flugfélagsins Lufthansa  væru í verkfalli. Þá var tæpur klukkutími frá því að frétt var  birt á mbl.is  um að verkfalli flugmanna Lufthansa  hefði verið frestað. Fréttastofa RÚV má aldrei sofa.

Háhyrningar eru ekki gáfuð gæludýr

  Því var á sínum tíma haldið fram á  svokölluðum Hvalavef RÚV ,sem ætlaður er börnum, að háhyrningar væru gáfuð gæludýr, sem  gerðu ekki mönnum mein. Það kostaði nokkrar blaðagreinar og tilvitnanir í skráð  tilvik um árásir háhyrninga á fólk að  fá þetta leiðrétt. Konurnar sem  sáu um vefinn þrjóskuðust lengi  við. Leiðrétting fékkst að lokum eftir að Markúsi Erni útvarpsstjóra hafði verið kynnt málið.  Háhyrningar eru  grimmustu dýr sem hafdjúpin hýsa. Það er ekki að ástæðulausu, að þeir eru kallaðir  „killer whales" ,drápshvalir,á ensku. Séð hef ég  myndir af háhyrningahópi, sem kastar  lifandi kópi  á   milli sín áður en þeir tæta hann í sig.

Háhyrningur í Orlando drap konu

Molar um málfar og miðla 262

 Fjögurra dálka  fyrirsögn var á bls. 7  í Mogga (22.002.2010): Tungumál mega ekki detta út. Vandað málfar? Ekki finnst Molaskrifara það.

Úr dv.is (20.02.2010): Lögreglunni á Suðurnesjum hefur þó ekki borist fleiri tilkynningar um slíkt athæfi í Garðinum. Hér hefði átt að  standa:  Lögreglunni á  Suðurnesjum hafa  þó ekki borist...

Í íþróttafréttum RÚV sjónvarps  var sagt (16.02.2010): Það var  mikil eftirvænting fyrir leiknum.  Réttara hefði verið að  segja: Leiksins var beðið með mikilli eftirvæntingu.

Halló Moggi ! Úr mbl. is (20.02.2010). Fréttin  byrjaði svona: 64 nemendum og áhafnameðlimum var bjargað í gær.Gömul  regla í  fréttaskrifum er að  byrja aldrei  frétt á  tölustöfum. Enn skal  minnst á orðið  áhafnarmeðlimur,  mbl.is   skrifar reyndar áhafnameðlimum.  Skelfilegt orð,  sem  hvorki ætti að sjást né heyrast. Meira úr  mbl.is (21.02.2010) þar segir: Bíllinn er mikið skemmdur og  brotnuðu undan honum  tvö eða þrjú dekk.  Að mati Molaskrifara hefði  hér átt að tala um hjól, en ekki dekk. Annars sýnist kannski sitt  hverjum um það.

  Í fréttum  RÚV  af mannskaðaveðrinu á Madeira (21.02.2010) var sagt , að  aftakaveður hefði gengið yfir  eyna en í fréttum Stöðvar tvö var sagt,  að stormur hefði gengið yfir  eyna. Tvímælalaust betur orðað hjá  RÚV.

  Eftirfarandi frétt  af visir.is  (23.02.2010)  er lýsandi  dæmi um kunnáttuleysi þess sem skrifar. Þá krefjast samtökin einnig að Birnu Einarsdóttur, bankastjóra Íslandsbanka, Árna Tómassyni, formaður skilanefndar Glitnis og Friðriki Sophussyni, stjórnarformaður Íslandsbanka, verði vikið úr bankanum og atvinnulausum aðilum boðið stjórnarstörfin í stað þeirra.