Molar um málfar LXXX

Hefur  feðrað 21 barn  segir í fyrirsögn á  Vefvísi (30.05.09.) í frétt um mann  sem  eignast  hefur   21 barn með 11 konum og er ekki orðinn  þrítugur. Á íslensku er það  að feðra barn að  segja  hver  faðir  barns  er, benda  á  föður.  Á ensku  er  sögnin to  father  notuð í merkingunni  að  geta börn  að  eignast  börn. Þessi orðnotkun  á vefvísi  er andstæði íslenskri málvenju. Aulaþýðing úr ensku. Skylt er að geta þess að  fyrirsögninni var seinna  breytt  í: Hefur  gengist við 21 barni, sem er ólíkt  betra.

 Það verður fróðlegt að heyra hvort ríkisstjórnin hafi eitthvað hugsað um hvort koma eigi eitthvað til móts við þessa skuldara.  Þessi meitlaða  setning  er úr  þingskjali, fyrirspurn Birkis Jóns Jónssonar,alþingismanns,  til  viðskiptaráðherra  um það  hvort  ríkisstjórnin ætli að aðstoða þá  sem  tekið hafa  þá áhættu  að  taka  gengistryggt lán  til  bílakaupa.  Eitthvað hugsað  um að gera  eitthvað. Hnitmiðað  orðalag. Þessi  þingmaður á það  reyndar sameiginlegt með nokkrum öðrum þingmönnum að  leyfa lesendum/kjósendum ekki að  gera athugasemdir  á  bloggsíðu sinni.  Það finnst mér bera vott um   hroka.

  Ríkisútvarpið  heldur áfram  að brjóta  sínar eigin reglur. Dag  eftir   dag  heyrum  við auglýsinguna: Reunion - Skíðaskálinn í Hveradölum. Þessi auglýsing er að hálfu á  ensku og hálfu á íslensku. Auglýsingar í  Ríkisútvarpinu eiga að vera á lýtalausri íslensku , segir í auglýsingareglum RÚV. Þar stendur  svart á  hvítu:

3. gr.

Skilyrði fyrir birtingu auglýsingar

Auglýsingar sem ætlaðar eru til flutnings í hljóðvarpi eða sjónvarpi skulu fullnægja eftirtöldum skilyrðum:

1. 1. Auglýsingar skulu ekki brjóta í bága við almennt velsæmi.
2. 2. Auglýsingar skulu vera á lýtalausu íslensku máli. Heimilt er þó að erlendir söngtextar séu hluti auglýsingar.

 Til hvers  er að hafa reglur  ef þær  eru þverbrotnar á hverjum einasta degi ?

Ræður útvarpsstjóri ekkert  við  auglýsingadeildina ?  Vill hann  ekki  fara að þeim reglum,sem  stofnunin hefur  sett sér ?  Mér finnst þetta með ólíkindum.

  Í kranaviðtali við  forseta íslands í Mannlífi , segir  forsetinn:  Ef  friðurinn héldi áfram að slitna  í sundur  í átökum.... Þarna er óbeint  verið að  vitna  til  orða Þorgeirs Ljósvetningagoða við  kristnitökuna: Það  mun og verða satt, er vér slítum  í sundur lögin, að  vér munum einnig slíta friðinn.  Að tala um að  ef  friðurinn  héldi áfram að  slitna í sundur er     dæmi  um tilgerðarlega uppskrúfun.

 

 

Molar um málfar LXXIX

 Í  tíufréttum RÚV sjónvarps (28.05.09.) var þannig tekið  til orða að hross hefðu  drepist vegna vanfóðrunar. Eðlilegra  hefði verið að segja að hrossin hefðu drepist af því þau voru í  svelti.

Í fréttum  Stöðövar tvö (29.05.09.) var sagt, að Össur Skarphéðinsson utanríkisráðherra  hefði neitað  viðtali í dag.  Ekki finnst mér  það gott orðalag. Betra  og  skýrara  hefði verið að  segja  að Ö.S. utanríkisráðherra hefði  ekki viljað koma  í  viðtal  í dag.  Í sama  fréttatíma  er  fjallað var um  Suðurlandsskjálftann, sem varð  fyrir  ári,  sagði  fréttamaður á Hveragerði. Það er ekki rík máltilfinning    til  staðar hjá þeim sem  notar  forsetninguna á   með  Hveragerði. Auðvitað  er  sagt  í Hveragerði.

Gömlum fréttamanni finnst það fáránlegt, þegar Vefdv (29.05.09.) skrifar að fréttamaður   Stöðvar tvö hafi  brotið blað í íslenskri fréttamennsku, þegar hann lét    tæknimann  sprauta  vatni upp í  afturendann á sér á  stólpípuhóteli  Jónínu Benediktsdóttur á  Miðnesheiði. Sjálfur líkir  fréttamaðurinn sér  við  blaðamann  í bandaríska  sjónvarpsþættinum  60 Minutes sem hafi  farið í  ristilspeglun og það verið  sýnt í sjónvarpi. Hér  er ólíku  saman að  jafna.  Ristilskolun á  Miðnesheiði er framkvæmd af manni sem  ekki  er  læknir. Þetta  er skottulækning sem er í besta  falli skaðlaus  fyrir annað  en  pyngju þess  sem er skolaður.  Ristilspeglun  framkvæmir  læknir   annað hvort á  sjúkrahúsi  eða í læknastöð. Ristilspeglun er læknisfræðileg  leit  að meini í  ristli í þeim  tilgangi  að  finna illkynja mein á  frumstigi  áður en það dreifir sér. Að líkja þessu tvennu saman  er  gjörsamlega út í  hött og  er  annaðhvort gert  vegna  fáfræði eða   þetta er vísvitandi blekking.

Molar um málfar LXXVIII

 Málsubbuauglýsingin frá  fyrirtækinu Andersen & Lauth  birtist aftur óbreytt  í Morgunblaðinu (29.05.09.) Fyrirtækið  og  auglýsingastofan ,sem gert hefur  þessa   auglýsingu, eru  bæði  gersneydd allri  sómatilfinningu. Auglýsingin er  full  af slettum og villum.

 Vikið  var að  ambögunni  að   eitthvað  sé   samkvæmt Sameinuðu þjóðunum  eða  samkvæmt  ráðuneytinu í  síðustu  Molum.  Í Morgunblaðinu (29.05.09.) stendur  í  smáfrétt  samkvæmt  lögreglunni. Finnst  lesendum þetta allt í lagi ?

Þegar sagt er í sjónvarpsfréttum (27.05.09.) RÚV á morgun og  hinn er verið að tala við okkur á  barnamáli. Eðlilegra  hefði verið að segja: Á morgun og   föstudag.  Einhversstaðar var líka  í  fréttum talað um að  bílþjófar hefðu klesst á  vegg. Það er líka barnamál.

Vefdv (27.05.09.): ... mun málið hins vegar ekki hafa neina eftirmála samkvæmt upplýsingum frá Íslandsbanka. Enn rugla menn saman orðunum  eftirmáli kk. = niðurlagsorð, texti  aftan  við meginmál ( Ísl.orðabók)  og  eftirmál  hk. =  eftirköst, afleiðing, rekistefna vegna  einhvers  atferlis (Islensk orðabók) Það liggur  við að það sé  orðið  daglegt  brauð að  sjá þetta  rugl í netmiðlunum. Um þetta var reyndar fjallað í Molum um málfar LXVI.

Mig langar  til að gera  tvær  athugasemdir  við  Heineken bjórauglýsingu   (27.05.09.)  sem  sýnd var á  Stöð tvö. Í  fyrsta lagi  niðurlægir  auglýsingin  konur, - konur  eru  látnar  æpa og  skrækja  af hrifningu er  þær  sjá  inn í  herbergi   þar sem  eru  býsn  af  fötum og  skóm. Í öðru  lagi er  verið að auglýsa  áfengi, sem  er bannað með  lögum.  Það breytir  engu um  eðli  og efni auglýsingarinnar þótt orðið  léttöl  birtist í   tvær  sekúndur  eða   svo með örsmáu letri   neðst í hægra horni á  skjánum. Það er verið  að  auglýsa áfengi. Bjór er áfengi.

ES -  Ökumenn BMW þeir verstu í umferðinni,  segir í fyrirsögn (29.05.09.) í bílablaði Morgunblaðsins. Á leiðinni    í Garðabæ  síðdegis sá ég í speglinum að  fyrir  aftan mig  var ljóslaus og  númerslaus bíll og  bílstjórinn blaðraði í símann sem mest hann mátti. Hann   fór  fram úr mér og skipti um akrein  án þess að  gefa  stefnuljós.  Hann  gaf mér  hinsvegar  alþjóðlega   dónamerkið þegar  við námum staðar hlið  við  hlið  við umferðarljós og  ég   bar hendina upp   að  eyranu og  hristi höfuðið. Þetta var reyndar  BMW , MP 902 . Auðvitað aka margir  fyrirmyndarökumenn um á  BMW. Mér fannst þetta   svolítið  fyndið, hafandi lesið  fréttina í Mbl.  um morguninn !

Það rifjaðist reyndar upp fyrir mér  gömul vísa af þessu  tilefni.

Hann sem átti ekki föt,

eða  fyrir kaffi,

ekur nú um allar göt-

ur á   bé emm vaffi.

Molar um málfar LXXVII

 Myndirnar sem  fylgja  þessari  færslu eru  ekki teknar í útlöndum. Þær  voru  teknar í Kringlunni  í Reykjavík þriðjudaginn  26. maí.  Þar erum  við ávörpuð á  ensku þegar  við  komum þangað  í verslunarerindum   eða  til að  fá okkur kaffisopa.

Spaugileg fyrirsögn um alvarlegt atvik  var á forsíðu  Fréttablaðsins (26.05.09.) Fyrirsögnin er  svona:  Bankaræningi í hjartastoppi:Sparkaði sér leið inn í banka. Þarna  hefur  sannarllega ekki verið neinn  aukvisi á  ferð.

Það gerist æ  oftar að málglöggir  menn   víkja sér að mér á   förnum  vegi og benda  á ýmislegt sem betur  mætti  fara í málfari  í  fjölmiðlum. Þannig  var  athygli mín  nýlega   vakin á þeim  ósið  fjölmiðla  að   segja,  samkvæmt utanríkisráðuneytinu,  samkvæmt Landsbankanum og  svo   framvegis. Ég verð  að  viðurkenna  að  þetta hafði  farið  framhjá  mér. En  ekki  leið á löngu  þar til ég heyrði í  Ríkisútvarpinu   samkvæmt  Sameinuðu þjóðunum.  Ég tek undir  að þetta  er ekki boðlegt orðalag. Í  fréttum RÚV sjónvarps (27.05.09.) var sagt:  Samkvæmt lögreglunni.  Þetta er  greinilega smitandi pest.

Nú er það svart. ....hafa gert alvarlegar athugasemdir við aðbúnað hrossa á tveimur bæjum á Mýrum í Borgarnesi. Vefvísir 27.05.09. Mýrarnar allt í einu komnar niður í Borgarnes !!! Ekki er ég viss um að Mýramenn  fallist á þetta.  Eitthvað er landafræðikunnáttunni  áfátt hjá þeim Vísismönnum.

Í fréttum Stöðvar tvö (27.05.09.) um taumlaust óhóf í veisluhöldum bankanna forðum  daga þar sem  menn hámuðu í sig  gullflögur, var sagt: ... var þá  engu  til sparað. Þetta   stríðir gegn minni máltilfinningu. Mér  finnst eðlilegt að  segja:  var þá  ekkert   til  sparað,  til að kæta  sérstaka vildarvini bankastjóranna, -  en  hinsvegar,  það var  engu  til kostað, -  þegar almennir  viðskiptavinir bankanna áttu í hlut.

Í fréttum  annarrar hvorrar  sjónvarpsstöðvarinnar (26.05.09.)  var  sagt:... í  þessum vörubíl ... og   samtímis sýnd  mynd  af  þeirri  gerð  bíla,sem  við köllum   venjulega sendibíl eða  sendiferðabíl  en  heitir   varebil á  norsku og líklega  dönsku líka.  Vörubíll á íslensku  hefur  til þessa   verið pallbíl  ætlaður til  vöruflutninga.  En   allt   er þetta  að breytast.  Nú eru   bílarnir sem á  ensku eru   kallaðir  pick-up trucks  eða pickups ( í Suður  Afríku heita slíkir bílar :  backie) kallaðir  pallbílar ,oft litlir pallbílar, en hinir   gömlu  vörubílar,   pallbílar ,  eru nánast horfnir.  Í stað þeirra eru komnir malar-  eða  efnisflutningabílar oft átján hjóla  með  festivagni, eða  tólf hjóla með  tveimur  framöxlum.  Svona breytast  hlutirnir.

Molar um málfar LXXVI

Tvö dæmi úr fréttum (24.05.09.) Stöðvar tvö: Tveir Íslendingar til  viðbótar  eru nú grunaðir um að hafa smitast af  svínainnflúensu. Þetta  orðalag  ber  vott um  skort á máltilfinningu. Það er  eins og  mennirnir  séu  grunaðir um refsivert athæfi. Eðlilegra  hefði verið að  segja:  Grunur leikur á að tveir Íslendingar  til viðbótar hafi  smitast ... Þannig  var  tekið   til orða  í  sjónvarpsfréttum RÚV,  en í yfirliti um  helstu  fréttir  þar var  sagt , að  grunur  væri uppi  um  að fleiri hefðu  smitast. Það  orðalag  finnst mér   heldur ekki gott.   Hitt atriðið í fréttum Stöðvar  tvö var þetta  orðalag: Þau mál  sem  eftir   eru verður  lokið  með  öðrum hætti.  Enn eitt   dæmið um flaustursleg vinnubrögð.

Skrifað var á  Vefvísi (24.05.09.) : Hann vill lítið gefa upp um næstu skref sem hann segir geta skaðað rannsóknina. Það var og  , -  næstu skref  geta  skaðað  rannsóknina. Snjallir menn,  Vísismenn. Og hér  kemur meira  frá þeim sömu  (25.05.09.): ... en félagsmenn Fisfélagsins telja 160 meðlimi. Eðilegra og  einfaldara hefði verið að  að  segja: Í Fisfélaginu eru  160 manns. Í  sömu frétt  er ítrekað  talað um faratæki þegar átt er  við farartæki

Ég vildi óska þess þjóðkirkjunni hefði borið gæfa til að veita Sigrúnu Pálínu uppreisn æru ... þannig  tekur Kolbrún Baldursdóttir  bloggari (24.05.09.)  til orða  á  síðu sinni. Þetta er  röng   notkun  orðatiltækisins  sem maður sér  býsna    oft.    Einhver ber  gæfu  til... EKKI einhverjum beri gæfa eða gæfu    til.  Sami bloggari  kann  heldur  ekki  muninn á orðunum eftirmáli og  eftirmál, sem  oftlega hefur verið  vikið að  hér í Molum.

Molar um málfar LXXV

 Meira um  auglýsingar. Makalaus  heilsíðuauglýsing frá  fyrirtækinu  Andersen & Lauth birtist í  Fréttablaðinu 23.05.09.  Undir  nafni  fyrirtækisins stendur á  ensku: Outlet, Vintage & One off. Hversvegna    enska ? Er ekki verið að höfða  til  Íslendinga ?

Efst í auglýsingunni er orðið  verslun  skrifað með  z . Það er  einnig gert í  fyrstu línu meginmáls  auglýsingatextans.   Neðar í textanum er talað um  kvenverslun með  s og herraverslun með z. Hvílíkt endemisrugl !!  Hvað er  annars kvenverslun ?  Í auglýsingatextanum er einnig  sletturnar (innan  gæsalappa, -  engin  afsökun)    one off  flíkur og  vintage flíkur. Þar  er og  orðið  fjársjóðskista,-  sem ég kann ekki að meta. Venjulegra  er að tala um  fjársjóðakistu.

Ég held  næstum því  að þessi  auglýsing  sé  nýtt met í subbuskap.  Auglýsingastofan sem  ber ábyrgð á þessari  auglýsingu er  svo metnaðarlaus  sem  mest má  verða og  veit ekki hvað  vönduð vinnubrögð  eru.

Það er engu líkara en eigendur  sumra  verslana og veitingastaða  leggi metnað sinn í að  finna  ensk nöfn á  fyrirtæki  sín. Dæmi um þetta er  veitingastaður, sem  opnaður var ekki alls  fyrir   löngu í Reykjavík og heitir  Just  Food  -  to  go. 

Að öðru: Í  Vefvísi (25.05.09.) stendur: Innbrotstilfelli voru 22 um helgina hjá lögreglunni á höfuðborgarsvæðinu. Innbrotstilfelli er líklega  það  sama og innbrot. Þá er   þessi  setning  þannig orðuð að allt eins  mætti ætla  að  brotist hefði verið   tuttugu og tvisvar sinnum inn hjá  lögreglunni  á höfuðborgarsvæðinu. Svo var þó líklega ekki.

Í  sínum sérkennilega  sjónvarpsþætti   Hrafnaþingi  á ÍNN bölsótast  stjórnandinn Ingvi Hrafn  Jónsson út í allt og  alla, hermir eftir  fólki  og uppnefnir  fólk  eins og  honum  sýnist.  Þegar hann  nýlega  var að tala um Jöhönnu Sigurðardóttur  forsætisráðherra hét  hún í hans munni Jóhanna gamla. Ingvi Hrafn er  fæddur  27. júlí  1942. Jóhanna  Sigurðardóttir  er  fædd  4. október 1942.

Molar um málfar LXXIV

 Oft er firnagott  efni að finna í  dagskrá RÚV. Gott  dæmi um það er þáttur Jónasar Jónassonar Sumarraddir. Að þættinum loknum (24.05.09.) voru flutt  tvö  dönsk  sönglög ,sem  var  viðeigandi, meðal annars vegna þess að í þætti Jónasar var sögulegt viðtal  við  tengdason Íslands  leikarann Poul Reumert.  Að þessu loknu komu stuttar  auglýsingar. Þar var  þessi  auglýsing: Reunion - Skíðaskálinn í Hveradölum.  Þessi auglýsing  er atlaga að  íslenskri  tungu . Hún er  að hálfu á  ensku. Eiga ekki auglýsingar í íslensku útvarpi að vera á íslensku ?  Það er  greinilegt að  tekið er  við  hverju sem er  gagnrýnilaust hjá  auglýsingadeild  RÚV. Þar  virðist lítið hugsað, - allavega ekki um málvernd.

Einu sinni var í gildi  reglugerð um auglýsingar og kostun dagskrárefnis í Ríkisútvarpinu,  gefin út í menntamálaráðherratíð Svavars Gestssonar. Þar  sagði  í  3. gr.  tölulið 2 : Auglýsingar  skulu vera á lýtalausu íslensku máli. Sé þessi  reglugerð enn í   gildi er ljóst að  RÚV  hefur þverbrotið hana  með  ofangreindri auglýsingu.  Enska orðið  reunion er ekki lýtalaus íslenska.Það er lýtalaus enska.    Orðið endurfundir, sem  samsvarar enska orðinu  reunion, er  hinsvegar lýtalaus íslenska.Kannski er  búið að  fella þessa  reglugerð úr gildi. Kannski hefur það gerst með OHF-væðingu RÚV .

Dæmi um aðrar enskuslettur í  auglýsingum  RÚV  eru  Brunch á  sunnudögum - Hótel Loftleiðir  og   Tax-free  á  öllum  garðhúsgögnum - Húsasmiðjan.  Seinni auglýsingin  er  reyndar efnislega  röng.  Húsasmíðjan hefur ekki  frekar en önnur fyrirtæki rétt  til að  fella niður  virðisaukaskatt af  seldum  vörum.  Þótt veittur sé  afsláttur  sem  nemur  virðisaukaskattinum   hefur það  ekkert  með  skattleysi  að  gera.

Það er að bera í bakkafullan lækinn að tala  enn einu sinni um enskuslettuna Outlet  sem  nokkrir íslenskir  kaupahéðnar hafa tekið  sérstöku ástfóstri við. Í Fréttablaðinu (23.05.09.) er  stór  auglýsing þar sem  lesa má um Merkjaoutlet sem  sé  stærsta  outlet landsins.  Þeir  sem  svona  auglýsa og þeir sem   semja  svona  auglýsingar eru  íslensku máli miklir óþurftarmenn.

Eitt orð enn um  enskuslettur. Í Fréttablaðinu er fyrirsögn (23.05.09.) Eighties mætir átjándu öld.  Í textanum undir þessari  fyrirsögn (get ómögulega kallað það frétt) er raunar ekkert sem  skýrir fyrirsögnina.  Svona  skrifa  bara málsóðar.

Á forsíðu Morgunblaðsins (25.05.09.)  er mynd  frá löndun á   Arnarstapa. Þar er  talað um veiðitúr. Það er  andstætt málvenju að segja  að bátar af þeirri  stærð sem myndin sýnir  fari í veiðitúr. Þeir  fara í  róður.  Þegar um er að  ræða stærri  skip, sem  eru lengur á  sjó, er stundum  talað um túra. Til dæmis  heyrist sagt um  vel heppnaða  veiðiferð togara: Við gerðum góðan túr.

ES Þegar ég fjallaði um að  Morgunblaðið  væri  hætt  að  birta   reglulega  þætti um íslenskt mál hefði ég átt að geta þess að  Gísli Jónsson menntaskólakennari á  Akureyri  skrifaði árum  saman  vinsæla þætti um íslenskt  mál í Morgunblaðið. Mér  finnst óskiljanlegt að   þetta  aldna og  virðulega blað  skuli  ekki sýna móðurmálinu meiri  virðingu en  raun ber  vitni.

 

Molar um málfar LXXIII

Árna Þór setur niður með því að setja þetta herbergismál í pólitískt samhengi. Þetta  skrifar  skrifstofustjóri  Framsóknarflokksins í vefritið Pressuna (22.05.09.). Hann er  er að  skrifa  um  húsnæðismál innan veggja   Alþingishússins, sem  eru  Framsóknarmönnum hugleiknari en húsnæðismál almennt þessa dagana.  Talað er um að  einhver  setji niður , ef hann  lækkar í áliti . Það á ekki  að  segja  að  Árna Þór  setji niður. Heldur  ætti þarna  að  standa  Árni  Þór  setur niður.  Svo geta  menn  deilt um  hvort svo sé  eður ei. Þessi  villa  er orðin býsna algeng.

Hér  hefur  að minnsta kosti  tvisvar sinnum verið  vikið   að  merkingarmun  orðanna   eftirmál og  eftirmáli.  Þessu  er sífellt  ruglað  saman.   Á  Vefvísi  stendur (22.05.09.) Kaupin áttu sér stað skömmu fyrir fall Kaupþings s.l. haust og hafa töluverðir eftirmálar orðið síðan. Hér á  að  sjálfsögðu að  standa: .. og hafa   töluverð  eftirmál   orðið  síðan. Þetta er  reyndar   ekki mjög   þjált  orðalag. Skárra hefði verið að  segja:... og hafa orðið  af þeim  töluverð eftirmál.  Eftirmáli   er  hinsvegar stuttur kafli,  skýring  eða  þakkir  í bókarlok.

Fréttamaður Stöðvar tvö sagði  (22.05.09.)um  nýopnað  stólpípuhótel á Miðnesheiði, að herbergin  gætu rúmað  tvo einstaklinga.  Það var greinilega  pláss fyrir   fleira  fólk í  því herbergi sem  sýnt  var. En herbergið var það sem  á venjulega máli er  kallað  tveggja manna herbergi. Stöð tvö  féll í þann pytt  að  auglýsa  skottulækningar   í  fréttatímanum  þetta kvöld.    Það var annars óborganlegt  að heyra  ameríska sérfræðinginn segja   frá því að ef maður  hefði  étið Barbídúkku eða  einhvern líkamspart  slíkrar dúkku sem  barn gæti hann látið þetta  ganga niður með  stólpípunni!  Hvar ætli menn    læri  til sérfræðingsgráðu í stólpípufræðum ?  Enn stendur  sú  staðreynd að  enginn íslenskur læknir  hefur  viljað leggja  nafn  sitt  eða  starfsheiður við þetta  plokk. Sem er  skiljanlegt.

Verkalýðsfélag styrkir skottulækningar

  Það er  hreint  með ólíkindum að  verkalýðsfélag  skuli fara inn á þá  braut  að  styrkja   skottulækningar með þeim hætti sem  Verkalýðsfélag  Húsavíkur  ætlar nú  að gera.  Það hefur  líklega  farið framhjá verkalýðsfélaginu að   fyrirtækið sem  rekur  þetta „klósettkompaní" hefur nýlega orðið uppvíst að því að  misnota  heilbrigðiskerfið og láta  skattgreiðendur  niðurgreiða  blóðrannsóknir  vegna þeirra sem   kaupa þessa þjónustu.

  Enginn íslenskur læknir  hefur  viljað leggja nafn sitt  eða  vísindaheiður við þessar skottulækningar sem  kenndar eru  við  „detox" eða  afeitrun. Þetta  mun í  besta falli vera  meinlaust en  í versta falli skaðlegt.   Á erlendum vefsíðum  hefur  verið  tekið svo  til orða að  það eina  sem léttist   við þessa   svokölluðu meðferð  sé  pyngja þeirra sem, láta plata sig  til þátttöku.

Niðurgreiðir Detox meðferð

Molar um málfar LXXII

  Móðurmálið fær ekki mikla umfjöllun í  fjölmiðlum. Lengi vel  birti Morgunblaðið  reglulega þætti  dr. Jóns G. Friðjónssonar prófessors   um mál og málnotkun. Þessir   þankar,- þessi þarfa  umfjöllun er  einhverra hluta  vegna  horfin  af  síðum blaðsins. Það  samræmist líklega ekki nýrri  ritstjórnarstefnu að  fjalla um notkun tungunnar með  reglubundnum hætti. Skyldi ritstjórnin hafa kannað hve margir  lásu þessa  pistla áður en ákveðið  var að úthýsa  þeim ?

 Hversvegna þarf að  auglýsa íslenskt lambakjöt með  enskuslettum? Það er  mér  hulin  ráðgáta. Í grillveðrinu  hefur  gömul og gölluð  auglýsing  íslenskra  sauðfjárbænda  verið  dregin fram í  dagsljósið.   Come on,krakkar , segir grillpabbinn. Er nokkur  þörf á  að nota enskuslettur  til að  mæra  lambakjötið ? Held  ekki.

 Jackson frestar fjórum tónleikum,skrifar  Vefdv (21.05.09.) Tónleikar er fleirtöluorð,  einir tónleikar, tvennir  tónleikar og svo framvegis. þessvegna á auðvitað að   standa  þarna , ...frestar fernum  tónleikum.

 Heilt yfir er  í  tísku hjá   fjölmiðlafólki.  Í bakþankagrein í Fréttablaðinu (20.05.09) notar höfundur þetta  orðatiltæki tvisvar . Þetta  merkir  það  sama  og  enska  orðtakið  on the  whole,  eða þegar á  heildina  er litið,  þegar allt  kemur  til  alls, þegar öllu er á botninn hvolft,þegar á  allt  er  litið, í  það  heila (i det hele) og   svo  mætti áfram  telja.  Molahöfundi er þetta framandi,  en líklega  eru  fjölmiðlamenn að  festa þetta í málinu, því  þetta heyrist æ oftar. Ég er ekki  fullsáttur  við að  taka  svo  til orða og enn kemur þar líklega  sérviska mín til sögunnar.

Á  fólk peninga  til að  versla þetta?  Svona  spurði fréttamaður  RÚV (21.05.09.) í kvöldfréttum  sjónvarps. Það er öldungis makalaust að  fólk  skuli ráðið  í fréttamennsku hjá  Ríkisútvarpinu sem    þekkir  ekki muninn á  sögnunum   að kaupa og  að versla.

Miklir snillingar eru menn á   Vefvísi. Nú hafa þeir  fundið nýja  fuglategund, en  eftirfarandi var skrifað í Vefvísi í dag, 21.05.09.: Vísbendingar eru um að varp andarfugla við Reykjavíkurtjörn muni heppnast betur í sumar en á fyrri árum. Andarfuglar!  Það var og. Það  skyldu þó aldrei  vera endur ?