Molar um málfar og miðla 216

 

Vítt og breitt,  morgunþáttur  Rásar eitt er vel undirbúinn og vandaður þáttur. Umsjónarmenn eru vel máli farnir og efni oft einkar athyglisvert. Mjög  fróðlegt viðtal (08.12.2009) við Björn Erlingsson fjallaði um leiðangur á norðurslóðir sem farinn verður á næsta ári til að kanna þykkt hafíss. Ágæti viðtalsins var ekki síst fólgið í því hve vandað mál báðir töluðu, spyrill og viðmælandi,sem þó var að tala um flókin vísindi þar sem auðvelt hefði verið að falla í slettupytinn.  Takk fyrir.  

 

 

 Á Rás tvö er hinsvegar flesta daga annað uppi á teningnum. Þar talaði umsjónarmaður (07.12.2009) um að menn kæmu alveg hellaðir á barina vegna þess hve áfengi væri orðið dýrt. Hann átti líklega við að menn mættu kófdrukknir eða mikið ölvaðir. Væru sem sagt búnir að hella í sig áður en inn væri komið.  Í sama þætti virtist orðið trauðla velkjast fyrir umsjónarmönnum, en í einhverju blaðanna var skrifað um að Sparisjóðnum Byr yrði trauðla bjargað. Trauðla þýðir varla, tæplega eða með erfiðismunum.

  Beygingakerfið á í vök að verjast eins og eftirfarandi dæmi úr mbl.is (07.12.2009) ber með sér: Sigmundi Davíð Gunnlaugssyni, formaður Framsóknarflokksins, var þegar í sumar kunnugt um... Hér ætti að standa: Sigmundi Davíð Gunnlaugssyni, formanni Framsóknarflokksins, var þegar í sumar kunnugt um....  


Í fréttum Stöðvar tvö (07.12.2009) var talað um að fara á bak við samkomulag í merkingunni að rjúfa samkomulag  eða brjóta samkomulag. Þessa orðnotkun hefur Molaskrifari ekki heyrt áður. 

  Í sama fréttatíma var sagt: ... lét ekki sjá sig af kunnuglegum ástæðum. Líklega hefur  sá sem hér á átti í hlut ætlað að segja; Lét ekki sjá sig af alkunnum ástæðum. 

Í sama miðli var verið að kynna efni Íslands í dag , en þar átti meðal annars að  heimsækja Litla Hraun. Umsjónarmaður talaði um að  fara upp á Litla Hraun. Eyrbekkingar sem búa í grennd við Litla Hraun fara upp á Selfoss , eða upp að Selfossi. Selfyssingar bregða sér niður á Eyrarbakka eða Bakka. En að talað sé um að fara úr  Reykjavík upp á Litla Hraun er fráleit málnotkun.   

 

Merkileg forgangsröðun

 Ef svokölluð Hreyfing   hefur  ekkert  merkilegra að  fordæma, en  þessa  tiltölulega lítilvægu  tölvupósta, sýnist hún ekki  eiga  mikið erindi í heim stjórnmálanna. Það  hefur   sannast  rækilega á undanförnum vikum.

Fordæma tölvupósta Indriða

Átroðningur Skjás eins

 

 Við númerið mitt  í símaskránni er  hvítur kross í rauðum ferningi  Það táknar að ég vil ekki að  sölumenn hringi heim til mín  til að  selja mér vörur eða þjónustu. 

 Sölufólk Skjás eins  tekur ekki mark á þessum merkingum. Það hringir  samt. Þegar ég andæfði og kvaðst ekki  kæra mig  um símtöl af þessu tagi þá vitnaði   stúlkan ,sem   hringdi, í   Persónuvernd,  og  sagði að  Persónuvernd  segði það vera í lagi að  hringja í fólk þótt   merkt  væri  við nöfnin í  símaskrá.  Þetta væri leyfilegt vegna þess að ég væri  í viðskiptum við Skjá einn. Sá sem þetta skrifar er ekki í    viðskiptum við Skjá einn ,hefur aldrei  verið í viðskiptum við  Skjá einn og mun  aldrei  verða í viðskiptum við Skjá einn.

Þetta er hámark ósvífninnar.  Persónuvernd  hlýtur að gera athugaemdir  við Skjá einn ,sem misnotar  nafn stofnunarinnar svo  gróflega.

Líklega  hafa einhverjir  fleiri  orðið fyrir  barðinu á þessari dæmalausu  frekju. Sennilega er þetta örvæntingarfull tilraun til að  fjölga áskrifendum sápustöðvarinnar sem nú berst í bökkum og er með fréttatíma sem  hefur  1% áhorf og er þó í skjóli mbl.is !

Höskuldur vekur manni óhug.

  Það setur að manni óhug við að horfa og hlusta á  þingmann  Framsóknarflokksins Höskuld Þórhallsson  glotta  framan í þjóðina  á  sjónvarpsskjánum og segja og  hann  eigi  margt ósagt  um Icesavemálið,  ef ekki verði farið að  vilja hans. Hvað ætli hann sé búinn að halda margar ræður um málið?  fjörutíu, fimmtíu, eða fleiri ?  Hann sagði líka  að málþófið  væri ekki einu sinni byrjað ! Hvernig í ósöpunum á  bera  virðingu  fyrir  þeim sem láta sér annað  eins um munn  fara ?  Þingmenn stjórnarandstöðunnar telja okkur   vera fífl. 

   Það er löngu komin tími  til að meirihlutinn á Alþingi hætti að láta minnihlutinn kúga sig og  atkvæðagreiðsla verði látin  fara  fram  um málið og það  fái   eðilega afgreiðlsu. Það er fullrætt  fyrir löngu. Það er afskræming  lýðræðisins  þegar minnihlutinn hegðar sér svo sem raun ber  vitni á Alþingi þessa dgana.

Átök innan Samfylkingarinnar

Molar um málfar og miðla 215

  

Ríkisútvarpið auglýsir nú grimmt fréttaþjónustu allan sólarhringinn. Er það nokkuð meiri þjónusta en netmiðlarnir , mbl.is, dv.is og visir.is  og raunar fleiri veita ?  Ef skoðuð er vefsíða RÚV sést, að  fréttir eru á miðnætti og aftur klukkan sjö að morgni. Reyndar eru einnig fréttir klukkan eitt og klukkan tvö eftir miðnætti. Síðan hefur verið fréttahlé hjá RÚV frá klukkan tvö til klukkan fimm að morgni. RÚV er því ekki með fréttir á klukkutíma fresti allan sólarhringinn eins og  alvöru útvarpsstöðvar erlendis. Molaskrifari á svolítið erfitt með að skilja hversvegna ekki  er hægt að flytja fréttir á klukkutíma fresti alla nóttina, ef  fréttamaður er á vakt á annað borð.

 Hin breska Helen Dalby lét sem henni hefði verið nauðgað til þess að hylma yfir framhjáhaldi sem hún stóð í.(pressan. is 05.12.2009) Molaskrifari  er vanur því að sögninni að hylma, leyna , fylgi nefnifall, - að hylma yfir eitthvað. Hér er notað þágufall. Það kann skrifari ekki að meta ekki fremur en að standa í framhjáhaldi. eða  taka  svo til orða kona hafi látið sem henni hafi verið nauðgað. 

 Molaskrifari gægðist aðeins á ÍNN sjónvarpið (05.12.2009) Þar var Hrafnaþing. Einn þeirra  sem þar komu fram var í framsóknargrænum jakka og  sterkblárri skyrtu. Hann hefur greinilega aldrei heyrt Englending segja: Blue together with green should never be seen ! – Mjög lauslega þýtt:  Blátt og grænt fer ekki vel saman. 

  Margsagt var í fréttum RÚV klukkan 18 00 (05.12.2009) , .,. að fleiri hundruð manns hafi komið saman til mótmæla á Austurvelli. Fleiri en hvað?  Hlustendur voru engu nær um mannfjöldann. Í fréttum Stöðvar tvö var hinsvegar sagt að þarna hefðu verið á fjórða hundrað manns. Svo segja enn aðrir að þarna hafi verið þúsundir ! 


 Í fréttum Stöðvar tvö (05.12.2009) var ítrekað talað um hamborgarahrygg. Molaskrifari getur alveg hugsað sér að borða hamborgarhrygg svo sem einu sinni á ári. Hann getur líka hugsað sér að borða hamborgara stöku sinnum, en hamborgarahryggur er eitthvað sem Molaskrifari kannast ekki við. 

 Pressan.is (05.12.2009): Um undirleik sjá strengjasveit Hjörleifs Valssonar. Þótt strengjasveit geti verið fjölmenn, er orðið strengjasveit samt eintöluorð. Þess vegna hefði átt að standa: Um undirleik sér strengjasveit Hjörleifs Valssonar.

 Nokkur stórfyrirtæki hafa gert atlögur að íslensku máli, sem nefndar hafa verið í þessum Molum. Toyota-umboðið tönnlaðist á slettunni að smæla.Sparisjóðurinn Byr staglaðist á fjárhagslegri heilsu. Síminn hefur hafið auglýsingaherferð undir  ensku einkunnarorði: Ring, - reyndar álpast fyrirtækið ekki til að nota stóran staf í orðinu. 
 Nú er Toyota umboðið á hvínandi kúpunni og verið að reyna að selja það. Sparisjóðurinn Byr er  í vondum málum og framtíð hans óviss. Hver ætli verði framtíð Símans? Segi bara svona. 

Molar um málfar og miðla 214

   

  Langbestu veðurkortin eru í veðurfréttum Skjás eins og mbl. is. Þau bera af og væru enn betri ,ef hitastiginu í Winnipeg eða Gimli í Nýja Íslandi, væri bætt inn á Norður Ameríku kortið. Tugþúsundir Íslendinga hafa tengsl við þessa staði. Þar að auki  er Siggi stormur,sem svo er kallaður, prýðilega máli farinn og kemur  spánni  skýrt og skilmerkilega til skila.  Nýleg könnun leiddi í ljós, að þessi fréttatími hefur aðeins um 1% áhorf. Fréttatíminn er stuttur og oft heldur þunnur þrettándi. Svo sem   hvorki mjög  vondur né mjög góður.  Líklega stafar þetta litla  áhorf fyrst og fremst af því að fréttatíminn hefur lítt verið kynntur og hringlað hefur verið með útsendingartíma.

  

FIFA hyggst ekki leyfa Maradonna að vera viðstaddan athöfnina , var sagt (02.12.2009) í íþróttafréttum RÚV sjónvarps. Einfaldara, betra og réttara hefði verið að segja: FIFA hyggst ekki leyfa Maradonna að vera við athöfnina.

  

Ekki er Ríkisútvarpið auralaust meðan það getur borgað Jónasi Kristjánssyni fyrir að lesa bloggið sitt nánast orðrétt á Morgunvakt Rásar tvö.

 

    Í fréttum RÚV sjónvarps (02.12.2009) var talað um að blása byrlega hjá...

Molaskrifari er vanari því heyra sagt að ekki blási byrlega fyrir e-u eða e-m, þegar er við andbyr eða mótlæti er að stríða. Má þó vera að þetta sé  einnig algengt orðalag, þótt skrifari sé því ekki kunnugur.

  

Svohljóðandi fyrirsögn er (03.12.2009) er á dv.is: Óttast um öryggi Polanski – færður um fangelsi. Þegar fangi er færður úr einu fangelsi í annað er ekki hægt að taka svo til orða að hann hafi verið færður um fangelsi. Það er ekki í samræmi við góða málnotkun. Þá ætti nafn Polanskis að vera í eignarfalli, - enda á -s.

   

Forsetningar geta verið erfiðar viðfangs. Í fyrirsögn á grein borgarfulltrúa í Fréttablaðinu í (04.12.2009) segir: Réttmæt gagnrýni í Magmatilboð. Hér væri eðlilegra að segja: Réttmæt gagnrýni á Magmatilboð. Hinsvegar er talað um að gera tilboð í, þegar boðið er í eitthvað.

  

Í DV (04.12.2009) er fjallað um eignarhaldsfélag, sem heitir Knerrir hf,. Knörr er norrænt skip að fornu, ætlað til flutninga og langferða. Fleirtölubeyging orðsins er: Knerrir, knerri, knörrum, knarra. Í fréttinni er talað um: 60 milljóna lánafyrirgreiðslu frá bankanum til Knerris. Líklega hefur orðið knörr,  flt.  knerrir verið blaðamanni óþekkt , því orðmyndin knerris er ekki til í íslensku máli. Þarna hefði átt að nota eignarfall fleirtölu, knarra. Í Fjallkirkju Gunnars Gunnarssonar segir frá afa á Knerri. Bærinn hét Knörr.

  Þá komið að vikulegum þökkum til RÚV fyrir hið merka menningarframlag, slúðurfréttir frá Ameríku, sem er fastur liður hjá umsjónarmönnum Morgunvaktar Rásar tvö á föstudögum. Í löngum Ameríkusímtölum er smjattað á framhjáhaldi fræga fólksins í Ameríku og okkur sagt frá  þeim sem kansellera túrum.  Sú ágæta kona ,sem miðlar þessum  fróðleik að vestan, er kölluð  annaðhvort Bíbí, Sísí, Dídí, Gígí, Mímí  eða eitthvað í þeim dúr !   Allt er þetta á enskuskotinni íslensku og mikill menningarauki hjá þeirri þjóðarstofnun, sem á að hafa móðurmálið í hávegum.  

Við biðjumst griða í allri einlægni !

Ræðurnar á prent !

   Var búinn að hugsa  sömu hugsun og Jónas Kristjánsson orðar á vefsíðu sinni. Rétt er að gefa  út á prenti  ræður þeirra  þriggja þingmanna, sem oftast hafa  talað í  Icesave umræðunni, eins úr hverjum stjórnarandstöðuflokki.  Þá fengju kjósendur að  sjá  svart á hvítu hversnkonar endalaust rugl þessi umræða  er , niðurlæging  lýðræðis, niðurlæging þingskapa og niðurlæging Alþingis. Og xsíðast en ekki síst niðurlæging þeirra  flokka,sem standa að þessari einstæðu uppákomu!

Líklega yrðu þetta Gunnar Bragi Sveinsson, Birgir Ármannsson og Birgitta Jónsdóttir.

 Það væri rétt mátulegt á þau.

Gagnrýnir viðbrögð Steingríms

Þeir skildu ekki AGS fulltrúana !

 Fulltrúar Alþjóða gjaldeyrissjóðsins haf nú séð sig knúna til að  senda frá sér yfirlýsingu vegna þess  sem  fulltrúar íhalds og  Framsóknar sögðu um skuldastöðu þjóðarbúsins. Annaðhvort hafa    fulltrúar þessara flokka ekki skilið það sem  fulltrúar AGS sögðu, eða  þeir kunna ekki að segja sannleikann. Nema hvort tveggja sé.

Alvarlegar dylgjur

Skrípaleikurinn við Austurvöll - fíflaþjóðin í landinu

 Þegar þingmenn Sjálfstæðisflokksins Ragnheiður Elín  Árnadóttir , Einar Kr. Guðfinnsson og  fleiri  segjast öll af  vilja gerð  til að greiða  fyrir málum ríkisstjórnarinnar á Alþingi   eru þau að segja að íslenska þjóðin sem  fylgist með störfum þingsins samanstandi  af fíflum , sem ekkert skilji.  Þetta er auðvitað hámark  hræsninnar og það er  rétt að   stjórnarandstaða er nú rúin  allri  sómatilfinningu og  ábyrgðartilfinningu. Hvað varðar stjórnarandstöðuna um þjóðarhag?  Ekkert.   Bara fella  ríkisstjórnina svo  við komumst að. Stjórnarandstaðan er tala okkur niður í ruslflokk í lánshæfismati. Sennilega tekst henni það.

 Það er alvarlegt þegar minnihluti  þingmanna nauðgar  rétt kjörnum  meirihluta  með skipulögðu málþófi. Það er auðvitað  brot á þingskapalögum ,þegar   Framsóknarmenn og  Sjálfstæðismenn búa sér  til stundatöflu um það hverjir  eiga að tala,  í hvaða röð og hve lengi og hverjir  eiga  að veita  andsvör   við  ræðum, sem ekki hafa  verið haldnar!  Hér  eru þingmenn  stjórnarandstöðunnar að draga þingið niður í svaðið.  Þetta eru óvitað  ólíðandi vinnubrögð, misbeiting  þingskapalaga og í fullkominni andstöðu við þingræði og lýðræði. Þetta er til háborinnar skammar.  

 Það var hreint út sagt ömurlegt að fylgjast með ræðum um fundastjórn forseta í morgun. Allra verst var  ræða Birgittu Jónsdóttur. Það var eins og manneskjunni væri ekki sjálfrátt.  Ræða hennar var var fyrir neðan  allar hellur. Það er ofurskiljanlegt að Hreyfingin svokallað mælist nú með  eitt  prósent  fylgi. Líklega hefur Þráinn  Bertelsson einn meira  fylgi en  Hreyfingarþrenningin. 

Molar um málfar og miðla 213

   Engu er líkara en sumar ambögur séu landlægar á fjölmiðlum. Í fréttum Stöðvar tvö (28.11.2009) var sagt frá prófkjöri Framsóknarflokksins í Reykjavík og tekið svo til orða: ... sigraði nokkuð örugglega prófkjör Framsóknarflokksins. Menn sigra ekki prófkjör. Menn sigra í prófkjöri.

 

 Í sjónvarpsauglýsingu (28.11.2009) var sagt: Hjálpar þeim að telja niður til jólanna. Af hverju ekki: Hjálpar þeim að telja dagana til jóla?  

 

 Í kvöldfréttum RÚV (29.12.2009) var sagt að rætt hefði verið við borgarstjórann í Reykjavík og norska sendiherrann á Íslandi, er ljósin voru tendruð á Óslóartrénu á Austurvelli. Það var rangt. Birtir voru stuttir kaflar úr ræðum beggja. Ekki var rætt við neinn.

  Gott innslag um bækur og bókaverð hjá Ingólfi Bjarna Sigfússyni í fréttatíma RÚV sjónvarps. (30.11.2009). Merkilegt hve verðið er líkt hjá forlögunum.  Þau virðast  ramba á sama tug á sama þúsundi Svo er líka eftirtektarvert hve mikið er hægt að spara með því að kaupa bækur í lágvöruverðsverslunum. Eða bíða þar til bak jólum.

 Tendrað á ljósum Óslóartrésins, sagði (29.11.2009) í fyrirsögn á mbl. is. Íslensk málvenja er að tala um að tendra ljós, - ekki tendra á ljósum. Þetta var rétt hjá RÚV þar sem sagt var: Ljósin á Óslóartrénu voru tendruð í dag.

  Í fréttum Stöðvar tvö ( 29.11.2009) töluðu bæði fréttaþulur og fréttamaður um ... að skipta þeim út eftir hentugleika.Verið var að fjalla um illa meðferð íslenskra karla á eignkonum sínum, erlendum.Síðan hefur Molaskrifari heyrt þetta orðalag endurtekið. Molaskrifari er á því að hér hefði átt að segja:.... eftir hentugleikum ekki hentugleika. Vefmiðillinn visir.is notaði sama orðalag og Stöð tvö.

 Ekki getur Molaskrifari  fallist á að það sé gott og gilt mál að tala um að fara inn í fæðingarorlofið (29.11.2009) eins og  alþingismaður tók til orða um þau áform ríkisstjórnarinnar að skerða fæðingarorlof og spara ríkissjóði þannig útgjöld.

   Af dv.is: Eins og greint var frá fyrr í þessum mánuði veittist Mike Tyson að ljósmyndara á LAX-flugvellinum í Los Angeles á dögunum.Að því Molaskrifari best veit er ekkert til sem heitir LAX flugvöllurinn í Los Angeles. LAX er skammstöfun sem notuð er í flugmáli  um áfangastaðinn Los Angeles ,  rétt eins og REK (Reykjavík) og KEF (Keflavík).  

 

Af mbl.is (29.11.2009): ... að framundan eru mikil ferðalög milli landshluta og fólk mikið að fara í jólaverslun.  Þegar skrifað er að fólk sé mikið að fara í jólaverslun, er líklega átt við að margir séu á ferðinni til að versla fyrir jólin.

  Tiger Woods rifur þögnina, segir í fyrirsögn á dv.is (29.11.2009). Eitt er að rífa, annað að rjúfa. Rífðu ekki blaðið. Tiger Woods rauf þögnina. Hann tók til máls, leysti frá skjóðunni. Þess vegna hefði átt að standa þarna: Tiger Woods rýfur þögnina. Til eru ágætar stafsetningarorðabækur, sem rétt er að fletta upp í ,þegar menn eru í vafa um rétta ritun orðanna.