Hvað ...?

 Hvað hefur íslenska þjóðin gert til að verðskulda þá stjórnarandstöðu sem nú bullar og veður elginn á  Alþingi? 17 á mælendaskrá um fundarstjórn!  Þið misbjóðið öllu venjulegu fólki með  þessari framkomu þegar minnihlutinn kúgar meirihlutann.

	Mjólkurbíll valt á Suðurlandsvegi
Ábyrgðarmaður færslu Tenging við þessa frétt hefur verið rofin vegna kvartana.

Molar um málfar og miðla 211

Á vefmiðlinum dv.is  er þessi setning ( 30.11.2009):   Jóhannes (í Bónus) sakar Hannes Hólmstein Gissurarson, prófessor í stjórnmálafræði við Háskóla Íslands, um að dreifa fluguritum innan háskólans. Það er ekkert til sem heitir  flugurit. Rétta orðið er flugrit, dreifirit (pésar eða stakir miðar) segir orðabókin. . Prófessorinn  finnur sér ýmislegt að dunda við  eftir að hann lauk  við að skrifa upp úr Halldóri  Laxness.  

 Morgunblaðið segir í fyrirsögn (27.11.2009): Toyotaumboðið í söluferli. Sem sagt: Toyotaumboðið er til sölu. Það hefur verið mikill snillingur sem bjó til orðasambandið að setja í söluferli í stað þess að segja einfaldlega að eitthvað sé til sölu. Þetta orðalag virðist bráðsmitandi.

 Eftirfarandi setning á visir.is (27.11.2009) er sígilt dæmi um vankunnáttu í notkun móðurmálsins: Jóhanna Sigurðardóttir forsætisráðherra vill að forsætisnefnd Alþingis taki það til sérstakrar umræðu hversu oft ráðherrar í ríkisstjórninni hafi verið brigslaðir um landráð. Hér ætti auðvitað að standa: Hversu oft ráðherrum í ríkisstjórninni hafi verið brigslað um landráð. Talað er um að brigsla einhverjum um eitthvað. 

 Í hádegisfréttum RÚV (227.11.2009) var sagt: ... eftir að fleiri hundruð lítrar af bensíni láku út. Molaskrifara var kennt fyrir löngu að nota aldrei miðstig lýsingarorðsins margir með þessum hætti. Fleiri en hvað? Þarna hefði átt að tala um mörg hundruð lítra. Í frétt Morgunblaðsins um þennan sama atburð segir : Dælan er notuð til að ferja bensín úr olíutankinum.Þetta orðalag er rugl. Dæla er notuð til að dæla, hún ferjar hvorki eitt né neitt. Sögnin að ferja þýðir að flytja yfir vatnsfall. Hann ferjaði okkur yfir ána.

  Undarlegt var að heyra umsjónarmenn Morgunvaktar Rásar tvö tala eins og verið væri að brjóta blað í sögu útvarpsins með því að útvarpa beint úr útvarpshúsi tónleikum og kórsöng (27.11.2009) ! Þessi ummæli bera vott um fádæma fáfræði um sögu útvarps á Íslandi. Sögu Ríkisútvarpsins. Í þessu felst líka útblásin sjálfhverfa.  Enn undarlegra var að heyra í þessum þætti snúið út úr orðum Jónasar Hallgrímssonar um Gaimard, sem Háskóli Íslands gerði að einkunnarorðum sínum: Vísindin efla alla dáð. Umsjónarmaður sagði: Viðskiptin efla alla dáð. Misheppnuð tilraun til að vera fyndinn eða bara hreinn bjánaskapur? Nema hvorttveggja sé.

Slúðurfréttaritari Ríkisútvarpsins ,sem sífellt  slettir á okkur ensku vestan frá Ameríku í annarri hverri setningu, var á sínum stað. Ríkisútvarpið okkar stendur svo sannarlega undir nafni sem menningarstofnun. Góða helgi, bæ, voru kveðjuorðin eins og venjulega. Hvar er dómgreind dagskrárstjóra?

 

  Vefmiðillinn visir.is (27.11.2009): að samkynhneigðir fengu ekki að syngja með kórnum. Af samhenginu að dæma, ætti þarna að standa fengju, ekki fengu.    Í almennum prestakosningum, var sagt á Stöð tvö ( 27.11.2009). Hér hefði fréttamaður átt að segja:., í almennum prestskosningum. Það var nefnilega ekki verið að kjósa presta, heldur prest.

Af dv.is (27.11.2009):  því hlutfall of feitra farþega um borð í flugvélum hefur fjölgað talsvert.  Hlutfalli fjölgar ekki. Kannski má segja að hlutfall hækki, eða hafi aukist. En hversvegna ekki að segja: Of feitum farþegum hefur fjölgað talsvert ?

Öfuguggaauglýsingar Símans eru fyrir sannarlega ekki  til sóma, heldur hefur  Síminn skömm af þessu tiltæki. Síminn er í auglýsingaherferð undir  ensku  slagorði: RING. Orðið ring  er  ekki íslenska.  Steininn tekur úr í heilsíðu auglýsingu í Fréttablaðinu (30.11.2009) þar sem  stendur Ringdu!   Orðskrípið Ringdu er ekki til á íslensku. Síminn , þetta  fyrirtæki,sem einu sinni var í eigu þjóðarinna  er nú  vísvitandi að spilla  móðurmálinu. Kenna  íslenskum börnum og  unglingum  nýjan  villurithátt. Síminn á að  skammast  sín og fá sér nýja  ráðgjafa í auglýsingamálum.

Molar um málfar og miðla 210

   - Eruð þið byrjuð að versla jólagjafirnar? Þessa spurningu lagði fréttamaður Stöðvar tvö (26.11.2009) fyrir  par, sem varð á vegi hans í verslanamiðstöð. Ótrúlega mörgum fjölmiðlamönnum virðist ógerlegt að skilja hver munurinn er á sögnunum að versla og að kaupa. Hér hefði fréttamaður átt að segja: Eruð þið byrjuð að kaupa jólagjafirnar?

   Enn er ástæða til að óska eftir minni áherslu á hárgreiðslu og meiri áherslu á málvöndun í Kastljósi RÚV sjónvarps. Umsjónarmaður Kastljóss ( 27.11.2009) talaði um bíræna þjófa. Átti auðvitað vera bíræfna. Sami umsjónarmaður sagði: Við ætlum að fara næst í auglýsingar. Hvað er að því að segja, til dæmis. Nú gerum við stutt auglýsingahlé. Að tala um að fara í auglýsingar er  ekki  góð málnotkun.

  Sjónvarpsmenn RÚV eru við sama heygarðshornið, - að fara sem  skemmst frá Efstaleitinu, þegar fengnir eru viðmælendur.Og best er að halda sig innanhúss.   Þegar leitað var eftir smákökuuppskriftum, þurfti auðvitað að kalla innanhússmann á vettvang. Sjóndeildarhringurinn er þröngur í Efstaleiti og himinn er asklok. Þaðan gæti þó verið víðsýnt.   

 Af fréttavefnum visir.is (26.11.2009): .. til að réttlæta kynferðislegt samband fullorðna við börn, segir Gunnar. Þarna ætti að standa fullorðinna, ekki fullorðna. Ég sá fullorðna konu. Börnum er heimill aðgangur í fylgd fullorðinna.

  Ekki veit Molaskrifari hvað öðrum finnst um nýjar auglýsingar Símans þar sem karlmenn í kvenfötum leika aðalhlutverk. Til hverra er verið að höfða ? Á þetta að vera fyndið ? Molaskrifara finnst þetta eiginlega nýtt met í kjánaskap.

 

 Þegar við stefnum í það að halda fundi inn í miðjar nætur sagði einn af þingmönnum Framsóknarflokksins úr ræðustóli Alþingis (26.11.2009). Í stað þess að segja  inn í miðjar nætur, hefði hann getað sagt: Langt fram á nótt. En í málþófi skiptir vandað málfar  líklega ekki miklu máli.

  Sjónvarpsþættir þeirra Ara Trausta Guðmundssonar og Valdimars Leifssonar Nýsköpun – Íslensk vísindi , eru með allra besta og áhugaverðasta efnis RÚV sjónvarps. Það á jafnt við um efni, efnistök og  myndræna framsetningu. Molaskrifari gætir þess vandlega að missa ekki af þessum þáttum. Þeir fræða og skemmta í senn.

En fyrst minnst er á sjónvarpsefni, hvenær skyldi RÚV leyfa okkur að sjá  hinn ágæta danska myndaflokk   Forbrydelsen (2) sem nú er verið að sýna bæði í Danmörku og Noregi ?

 

 ..munu halda upp á sín fyrstu jól á Íslandi, stendur í jólablaði Morgunblaðsins 2009. Við höldum ekki upp á jólin. Við höldum (heilög) jól. Þess vegna hefði átt að segja : ...halda sín fyrstu jól á Íslandi. Fallegra. Í sama blaði er svohljóðandi texti undir mynd: Það er engu líkara en Karli Sigurðssyni sé farið að hlakka til að smakka jólamatinn. Þetta er með endemum. Þarna ætti að standa : Það er engu líkara en Karl Sigurðsson sé farinn að hlakka til að smakka jólamatinn. Það er meira að hjá Mogga en við blasir við fyrstu sýn. Matthías hefði aldrei látið þetta viðgangast. 

 Fyrirsögn á mbl.is: Jólagleðin yfirtekur Þýskaland. Ekki er þetta orðalag Molaskrifara að skapi. Betra væri: Jólagleðin tekur völdin í Þýskalandi , eða: Jólagleðin ræður ríkjum í Þýskalandi.

Leikhús fáránleikans við Austurvöll

  Stjórnarandstaðan er búin að breyta Alþingi Íslendinga í leikhús fáránleikans.  Sá sem  þetta ritar trúði  eiginlega hvorki augum né  eyrum, þegar hann sá þingmenn í ræðustóli vælandi um hungur, að  þeir  fengju ekki  fundarhlé til að raða í sig réttunum úr hinu ágæta ( og líklega niðurgreidda) mötuneyti þingsins. Fáránleikanum og fíflaganginum virðast engin takmörk sett. Þið misbjóðið þjóðinni með þessari framkomu.

Með skeifu

 Skemmtileg mynd af þremur þingmönnum aðalhrunflokksins. Ekki verður betur séð,en þau séu öll með skeifu. Skiljanlega.

Spyr um Icesave-fundargerðir

Molar: Er þetta það sem koma skal ?

 

Góðvinur og gamall samstarfsmaður  Molaskrifari sendi  það sem hér fer á eftir:  

Eftirfarandi bréf barst stjórnendum MK á dögunum frá nemanda sem vill
koma á nýtískulegum kennsluháttum í skólanum:


Mörgum nemendum finnst kennarar þeirra vera ótrúlega leim og voða mikið bara að kenna eitthvað júsless stöff. Allar bækurnar sem eru lesnar í íslensku eru t.d. most boring bækur ever sem enginn les nema einhverjir proffar!

Án djóks! Svo tala þeir einhvað fokking fornmál
og maður bara VÓ! og skilur ekki rass og svo hrauna þeir bara yfir mann ef maður spyr kannski aftur hvað hafi skeð fyrir einhvern í einhverri sögu!

Kannski ættu kennarar að pæla í því að gleyma gömlu kennsluaðferðunum sem eru nú ekkert til að hlaupa húrra fyrir og þeir eru búnir að nota síðan í örlý seventís og fara að öpdeita sig aðeins.

Þeir gætu t.d. komið sér upp kennslusíðum á feisinu og gætu þá addað nemendum og þá nottla bara þeim sem hafa áhuga. Þá gætukennararnir líka tjattað við nemendur og búið til allskonar quiz og test sem nemendum þætti gaman af í staðinn fyrir að vera alltaf að bögga  nemendur með sjúklega leiðinlegum prófum.

Svo er gegt góð hugmynd að nemendur gætu þá líka alltaf kommentað á t.d heimanámið því það er ógeðslega fúlt að hafa of mikið að gera eða verið með reitings á kennsluna og kannski gætu kennarar sem skora hátt fengið hærri laun eða eikkað.

Kennarar gætu líka verið með til dæmis groups umkjörbókarritgerð og þá gætu þeir bara joinað sem ætluðu að lesa heila bók eða sollis og fá þannig 10% .

Kennaranir gætu líka sett inn events þegar væri að koma próf og sent nemendum bara invitation þá myndu allir pottþétt vita það. Ekki eins og núna þegar stundum er ekki einu sinni sagt manni að það sé próf næsta dag! Kommon!

Svo ef kennarinn sé veikur þá er næs að hann geti bara sett það í statusinn og nemendur sjá það og bara hjúkket! Frí!sjitt hvað það væri osom!

Svo gætu allir sett inn myndir – bara svona normal myndir –ekkert djúsí sem kennarinn má ekki sjá ;) og þá er hægt að tagga aðra nemendur á myndunum og þá væri miklu meira easy skiluru fyrir kennarann að muna hvað allir heita sko.

Kennarar gætu líka kennt bara online og allir fengu mætingu ef þeir væru loggaðir inn. Það væri svít. Þá gætu nemendur bara tjillað heima kannski og dánlódað bara öllu draslinu í tölvurnar eða ipodana sína!

Allavega er aðal issjúið að kennarar átti sig á því að núna eru þeir í tómu tjóni og það sé möst að þeir geri huge breytingar á kennslunni sko! Sorrý en þeir verða að spá í að þeir eru líka í keppni við allt hitt stöffið sem nemendur geta skemmt sér við í tölvunum. Það er audda miklu skemmtilegra að spila tölvuleik eða að horfa á eitthvað á Youtube heldren að hlustá einhvern kennara tala. En whatever...eikkað
er greinilega að og því er skorað á kennara: Reynið að láta
nemendunum hlakka til að mæta í tíma til ykkar og þið rúlið!

Luv,
xoxo 

Þetta er sannarlega umhugsunarefni.
 
 
 

Molar um málþóf á Alþingi

    Það hefur um langa hríð verið ótrúlegt að fylgjast með stjórnarandstöðunni á Alþingi, þar sem reynslulausir foringjar ráða ferð. Stjórnarandstaðan er í minnihluta en heldur meirihlutanum í gíslingu með málþófi út um víðan völl. Málþófi um mál sem búið er að ræða meira og minna í hálft ár. Þar sem búið er að segja allt, oft. Við upplifum minnihlutann nauðga lýðræðinu og meirihluta þingsins. Líka sjáum við stjórnarandstöðuna misbeita þingskapalögum, þegar þingmenn sama flokks leggjast í andsvör hver við annan. Það er alveg ný tegund af  lýðræði ef minnihlutinn á að ráða. 

 

Nú þarf forysta þingsins að taka á sig rögg. Slíta ekki fundi fyrr en umræðum lýkur um Icesave deiluna. Það hefur verið gert áður á Alþingi. Molaskrifari minnist þess fyrir býsna löngu er verið var að breyta kvótalögum í efri deild. Þá héldu þingmenn Alþýðubandalagsins uppi málþófi. Umræður í deildinni hófust síðdegis. Þeim lauk um tíu leytið morguninn eftir. Þá var ekkert gefið eftir. Þeir sem héldu uppi málþófinu lásu m.a. upp úr bókum. Þá var Moggi til húsa í Aðalstræti og um fjögur leytið um nóttina sótti einhver Mogga næsta dags og rétti þingmanni sem var í ræðustóli. Hann byrjaði að lesa úr Mogganum, meðal annars auglýsingar. Auglýst var eftir blaðbera til að bera út Morgunblaðið í heimabyggð þingmannsins. Þá setti að honum svo mikinn hlátur að hann mátti vart mæla og tóku flestir viðstaddir undir.

 

Það er svo hámark hræsninnar að þegar þingmönnum stjórnarandstöðunnar er borið á brýn að halda uppi málþófi ( sem allt sæmilega vitiborið  fólk sér og heyrir að þeir eru að gera) þykjast þeir móðgaðir og særðir. Koma  af fjöllum og  skilja ekkert í þessum ásökunum. Hvað halda þeir að kjósendur séu? Fífl? 

 

 

 Líklega er það einsdæmi að stjórnarandstaða á nokkru þjóðþingi hafi hegðað sér eins og stjórnarandstaðan á Íslandi gerir nú. Þetta er séríslenskt fyrirbæri, rétt eins og Sjálfstæðisflokkur og Framsóknarflokkur.   

Molar um málfar og miðla 209

   Á Morgunvakt Rásar tvö (25.11.2009) var fjallað um hangikjöt. Þá sagði umsjónarmaður: Það er ekki sama hvernig hangikjöt er gert. Þá vaknar spurningin: Gera menn hangikjöt? Spjallað var við starfsmann RÚV eins og alsiða er á þeim bæ, enda óþarfi að leita langt yfir skammt og vera að tala við utanhússfólk, nema í neyðartvikum.  Sá sagði um lyktina af tvíreyktu hangikjöti, að hún ætti að vera það sterk að hún leggi yfir alla sveitina. Molaskrifari er á því að hann hefði átt að segja um lyktina: að hana leggi yfir alla sveitina. Í norðanátt leggur reykinn frá loðnubræðslunni yfir bæinn. 

 

Þegar lögreglumaður lítur svo á að hann haldi ekki utan um ástandið getur það þó gerst að hann nái ekki að vara við. Þetta er haft eftir lögreglumanni (25.11.2009) á mbl.is . Að halda utan um ástandið er ekki vel að orði komist, mildilega orðað. Þarna hefði mátt segja , til dæmis: Þegar lögreglumaður telur, að allt sé að fara úr böndunum, 

 ... sem stelpunum langar í, sagði fréttamaður Stöðvar tvö (25.11.2009) og var þá að tala um forláta kaffivél  fyrir nýja kaffistofu á Akranesi.. Ef hann hefði verið laus við þágufallssýkina hefði hann sagt: .. sem stelpurnar langar í. Örstuttu síðar sagði sami fréttamaður:  ... þeim sem langar... Sjálfum sér samkvæmur í vitleysunni.

 Kynnir Kastljóss tóka svo til  orða (25.11.2009): Gasið spilar einmitt stórt hlutverk í að fyrirbyggja hjartasjúkdóma.  Mætti  Molaskrifari   biðja um minni áherslu á hárgreiðslu en meiri á málvöndun ?

 

   Ekki kunni Molaskrifari að meta að heyra seðlabankastjóra  (25.11.2009) tönnlast á að draga á lán og svo tala menn um að draga á lánalínur.  Sjómenn á línubátum draga línu, oftar þó línuna , með ákveðnum greini en um þessi margumtöluðu lán ætti að nota sagnirnar að nýta  eða taka.

 

 Rás tvö, Ríkisútvarpsins auglýsir nýjan útvarpsþátt undir  nafinu Bergson (með einu s ) og Blöndal. Molaskrifari vissi ekki betur en sá sem fyrra nafnið vísar til sé Bergsson. Það segir símaskráin að minnsta kosti.   Í tíufréttum RÚV sjónvarps (25.11.2009) talaði stjórnmálafræðingur um að hafa sínu fram. Ruglaði saman orðtökunum að fara sínu fram, halda fast við sína stefnu án tillits til annarra og að hafa sitt fram, fá vilja sínum framgengt.

 

 Nýlega var í Molum rætt um það að sum orð eru aðeins til í eintölu, önnur aðeins í fleirtölu. Blaðamaður Morgunblaðsins flaskar á þessu (26.11.2009) og skrifar: Mistök starfsmanns velferðarsviðs varð til þess...  Mistök er fleirtöluorð og þess vegna hefði blaðamaðurinn átt að skrifa: Mistök starfsmanns velferðarsviðs urðu til þess.... 

 

 Ríkisútvarpið hefur í áraraðir fylgt þeirri ágætu reglu að byrja ekki að flytja jólalög í dagskránni fyrr en eftir 1. desember.Umsjónarmenn Morgunvaktar Rásar tvö töldu rétt að brjóta þessa reglu (26.11.2009) og verja löngum tíma í að auglýsa nýja jólaplötu tiltekinnar hljómsveitar. Reglur Ríkísútvarpsins eru líklega bara til að brjóta þær.  

Molar um málfar og miðla 208

  Eftir mikla leit fann hann loks móðir sína, en.. (visir.is 24.11.2009) Greinilegt er að slakað hefur verið á í íslenskukennslu  í grunnskólum landsins. Það var svo staðfest í fréttum Stöðvar tvö sama dag, þegar fréttamaður talaði um lögfræðing föðursins. Í  sama fréttatíma sagði fréttamaður: .. þegar hann kemst í leitirnar. Hann hefði átt að segja : Þegar hann kemur í leitirnar. Ég kemst ekki í leitirnar í haust, hefur allt aðra merkingu, eins og flestir vonandi vita.

   Þegar efni Kastljóss RÚV (24.11.2009) var kynnt í upphafi þáttarins, talaði kynnir um að björgunarafrek hefði verið framkvæmt. Afrek eru unnin , ekki framkvæmd. En kaflinn í Kastljósi um björgunarafrekið við Látrabjarg var fínn.

 

  Það var sögulegt ranghermi í Kastljósi, þegar Toppstöðin, eða varaflstöðin við Elliðaár var nefnd gamla rafstöðin við Elliðaár. Toppstöðin, ömurlega ljótt kassahús á þessum fallega stað,  var reist um eða upp úr 1948  fyrir Marshallfé. Hún var olíuknúin og henni var ætlað að koma til skjalanna, þegar orkunotkun væri hvað mest í Reykjavík. Kölluð Toppstöð af því að henni var ætlað að mæta  svokölluðum  orkutoppum. Gamla rafstöðin við Elliðaár er allt önnur bygging, annarsstaðar við árnar. Hún var tekin í notkun 1921 og hefur síðan malað gull. 

 Hefði ekki verið við hæfi að Síminn kynnti nýja markaðsherferð  á Degi íslenskrar tungu fyrr í þessum mánuði ?  Herferðin er farin undir orðinu ring, sem er ekki íslenska heldur enska. Síminn hefur af þessu lítinn sóma, en talsverða skömm hjá þeim sem unna móðurmálinu. 

Oft hefur hér verið amast við auglýsingum  sparisjóðsins Byrs um eitthvað sem þeir hafa kallað fjárhagslega heilsu. Vonandi er yfirstjórn sparisjóðsins við góða heilsu eftir húsleit og yfirheyrslur (24.11.2009).

 Morgunblaðið birti langa grein (24.11.2009) á besta stað í blaðinu, leiðaraopnunni, eftir Karl Axelsson , lögmann Baldurs Guðlaugssonar fv. ráðuneytisstjóra. Sérstakur saksóknari sendi frá sér yfirlýsingu vegna greinarinnar.  Molaskrifari  vænti  þess að yfirlýsing  saksóknarans mundi birtast á sama stað í blaðinu. Ég fann yfirlýsinguna ekki í Morgunblaðinu (25.11.2009) Það er vegna þess að hún er ekki í blaðinu. Hlýtur hún þó að hafa borist á ritstjórn Morgunblaðsins eins og hún barst öðrum miðlum.  Yfirlýsing sérstaks saksóknara hefur sennilega ekki verið ritstjórum Morgunblaðsins þóknanleg og því ekki birt. Fornaldarblaðamennska í þessum dúr er vísasta leiðin til að ganga af Morgunblaðinu dauðu. Sennilega tekst núverandi ritstjórum það á tiltölulega skömmum tíma, enda leggja þeir sig alla fram. Þeir keppast við  að breyta  Morgunblaðinu í íslenska Prövdu. 

 Í Morgunblaðinu (25.11.2009) er sagt frá slagsmálum á slysavarðstofu. Í fréttinni er þessi setning: Hann segir árásina hafa verið með öllu tilhæfulausa. Orðið tilhæfulaus, þýðir ósannur, rangur. Frétt er tilhæfulaus, ef ekki er fótur fyrir henni, ef hún styðst ekki við staðreyndir. Hér hefur blaðamaður  ruglað saman orðunum tilhæfulaus og tilefnislaus. sem er allt annað.

Molar um málfar og miðla 207

   Í fréttum Stöðvar tvö (22.11.2009) var sagt: Hún segir algengt að menn sem grunaðir séu um nauðgun sé sleppt. Fréttamaðurinn hefði átt að segja: .. að mönnum sem grunaðir séu um nauðgun sé sleppt.

 

  Oft er ástæða til að gera athugasemdir við málfar í auglýsingum.Í Útvarpi Sögu glymja nú auglýsingar um meltingarlyf sem er að hjálpa mörgum og  nafngreindan gullsmið sem er að kaupa gull.  Betur  færi á að tala um lyf sem hjálpar mörgum og  gullsmið sem kaupir gull.... ekkert er að... sem alltof algengt er að heyra tönnlast á. Þá er í sama miðli auglýsing um einhverskonar Kínalífselexír, lyf sem sagt er að  talið sé allra meina bót. Gæti líklega haft verulegan sparnað í för með sér í heilbrigðiskerfinu, ef satt er ! 

 

Umsjónarmenn Morgunvaktar Rásar tvö hjá RÚV halda áfram að bjóða hlustendum upp á gullaldarmálfar. Í morgun (24.11.2009) var sagt: ... og ef maður er böstaður... Átt var við það ef maður væri staðinn að verki við að setja í heimildarleysi litaða olíu á eldsneytisgeymi bifreiðar, - olíu sem ætluð er fyrir  vinnuvélar. Fólk sem svona tekur til orða á ekkert erindi að hljóðnemunum í Efstaleitinu.

 

 Molaskrifari tekur undir með Eiríki Jónssyni, sem  gerir að umtalsefni hið hlægilega ráp  sumra sjónvarpsfréttamanna  fyrir framan myndavélina. Ef þeir halda, að þjóðinni þyki þetta fagmannlegt og flott, þá er Molaskrifari næsta viss að þeir hafa rangt fyrir sér. Þetta er fyrst og fremst hallærislegt og tilgangslaust og dregur athyglina frá því sem verið er að segja og beinir henni að fréttamanninum, sem er líklega tilgangurinn. En í öllum fréttum er fréttamaðurinn aukaatriði. Þá staðreynd skilja ekki allir í Efstaleiti.

 

Netmiðillinn visir.is segir í fyrirsögn (24.11.2009): Lögmanni Baldurs ofbýður vinnubrögð sérstaks saksóknara. Hér er þess að gæta að orðið vinnubrögð er fleirtöluorð, - ekki til í eintölu. Þess vegna hefði fyrirsögnin átt að vera: Lögmanni Baldurs ofbjóða vinnubrögð sérstaks saksóknara. Ef um hefði verið að ræða framkomu sérstaks saksóknara hefði verið rétt að segja: ...ofbýður framkoma sérstaks saksóknara vegna þess að  framkoma er eintöluorð og ekki til í fleirtölu. 

 Úr sama netmiðli , sama dag: Benedikta Jónsdóttir, heilsuráðgjafi, segist aldrei hafa liðið betur... Sá sem þetta skrifar er reyndar samkvæmur sjálfum sér, því hann segir líka: Benedikta segist alltaf hafa verið umhugað um heilsuna. Hér segir Molaskrifari, að betur hefði farið á því að segja: Benedikta Jónsdóttir segir að sér hafi aldrei liðið betur, og: Benedikta segir að sér hafi alltaf verið umhugað um heilsuna.