Röng og villandi auglýsing

 Hér  hefur  stundum verið  vikið  að  auglýsingum.

Eftirfarandi má lesa á heimasíðu  bókaútgáfunnar Veraldar í dag:
"30. 11. 2008
Óþekkt alþýðukona skekur forsetabók
- Brýtur auglýsing um bókina lög sem forsetinn skrifaði undir?
Í Morgunblaðinu í dag segir í auglýsingu um Sögu af forseta eftir Guðjón Friðriksson að bókin sé "mest selda ævisagan á Íslandi". Þetta er rangt og stangast á við metsölulista Morgunblaðsins frá 26. nóvember en hann mælir alla bóksölu á Íslandi, alls í sjötíu bókaverslunum og stórmörkuðum um land allt. Mest selda ævisagan á Íslandi samkvæmt honum er ævisaga Magneu Guðmundsdóttur eftir Sigmund Erni Rúnarsson.

Það er athyglisvert að útgefandi forsetabókarinnar þurfi að grípa til rangra og villandi upplýsinga til að hefja hana upp yfir ævisögu óþekktrar alþýðukonu, Magneu Guðmundsdóttur, en bók hennar hefur unnið hug og hjörtu lesenda, enda mest selda ævisagan á Íslandi. Og kannski er ber þetta vott um talsverða bíræfni því að auglýsingin virðist brjóta í bága við breytingalög sem forseti Íslands – aðalpersóna bókarinnar – hefur sjálfur skrifað undir. Í lögum sem hann undirritaði 5. júní árið 2008 segir meðal annars að óheimilt sé að veita rangar, ófullnægjandi eða villandi upplýsingar í auglýsingum."

Svo mörg voru þau orð á  heimasíðu Veraldar. Það er svo  spurning um smekk hvað   fólki finnst um það að einkamál  forseta  Íslands  séu  markaðssett  með þeim hætti  sem  gert  er  í þessari  auglýsingu.

Nú  er fullyrt  í mín eyru  að gömlu bankarnir þrír ,Glitnir , Kaupþing og Landsbankinn hafi greitt   ritlaun Guðjóns Friðrikssonar við  ritun þessarar bókar. Að minnsta kosti meginhluta  ritlaunanna. Getur það  verið rétt ?

Og  sé  það rétt, - er það þá  bara allt í lagi ?

 
 

Svo bregðast.....

Svo bregðast krosstré sem önnur tré.  Ótrúlegt að að  hið gamalsterka Morgunblað og  Árvakur  skuli nú   glíma  við  erfiðustu  fjárhagskreppu  frá upphafi. Þegar sá sem þetta rritar var að byrja í blaðamennsku  snemma  á  sjöunda  áratug  síðustu  aldar  voru  þeir sem  réðust til   Mogga  taldir   hólpnir, --  fjárhagslega  hólpnir. Mogginn   sagði  fólki ekki upp. Í þeim  efnum  þurfti   eitthvað mikið til að koma.  Þar fengu menn líka launin sín  skilvíslega um hver mánaðamót ,meðan á  Alþýðublaðinu var verið að reita í okkur hundraðkalla  fram  eftir öllum mánuði.  Nú á Moggi erfitt með að greiða laun um mánaðamótin.  Ég er  eiginlega enn að átta mig  á þessu.

Þótt ég hafi   ekki alltaf verið  sammála  Morgunblaðinu þá  viðurkenni ég hiklaust  Mogginn er  blað  sem  hefur gert og  gerir   margt vel, - mjög  vel.  Moggalygin á kaldastríðsárunum reyndist því miður  sannleikur   þar sem  fremur var van sagt en ofsagt. Ristjórar Þjóðviljans  sem  daglega   níddu  Moggann, - þeir sem enn lifa  eru  nú komnir til annarra  verka.

Einu sinni reiddist ég Morgunblaðinu heiftarlega  og  sagði því  upp.man ekki lengur hvert  tilefnið var.  Áður en vikan  var liðin hafði mín   góða  kona   endurnýjað áskriftina  á  sínu nafni og þannig var það lengi.

Morgunblaðið er auðvitað ekki óhlutdrægur fjölmiðill. Kannski er óhlutdrægur  fjölmiðill ekki  til. Maður verður   bara að  læra  að lesa og  sía og meta.

Vonandi kemst blaðið klakklaust úr þessari kreppu  og getur haldið   haldið áfram að  ergja okkur (stöku sinnum) og   gleðja og  fræða.

Unnið að fjárhagslegri endurskipulagningu Árvakurs

Misskilningur og rangnefni

Það er misskilningur hjá Mbl.is að  samtökin  sem kalla  sig PETA  séu  dýraverndarsamtök. Þetta  eru  margdæmd umhverfishryðjuverkasamtök ,sem  staðið hafa   fyrir stórfelldum  skemmdarverkum,  innbrotum  og  íkveikjum og  oftlega stofnað mannslífum í hættu.

Í eigin skinni á Lækjartorgi

Hvað segir Blaðamannafélagið ?

Forvitnilegt væri að heyra um afstöðu Blaðamannafélags til þess er   félagsmaður tekur ófrjálsri hendi  efni  sem aldrei hefur verið sýnt og  notar til  að   ná sér  niðri á  stjórnmálamanni. Blaðamannafélagið hefur  látið til sín heyra  af minna tilefni.

   Eitthvað kynni Vegagerð  ríkisins líka að hafa að segja um málið en  er það   ekki svo að   þessi  fyrrverandi fréttamaður,sem hér um ræðir   er kynningarfulltrúi Vegagerðarinnar ?

Krafa um að viðtali við Geir verði skilað

Kampavín Kvenréttindafélagsins í kreppunni !

Gaman  væri að  heyra hvað  fólki finnst um það  framtak Kvenréttindafélags  Íslands að  efna  til víndrykkju um miðjan  dag   fyrir framan norska sendiráðið í tilefni af  tiltekinni  samþykkt  norska  Stórþíngsins. Kvenréttindafélagið  er  greinilega  vel  statt fjárhagslega  fyrst það á   fyrir kampavíni eða  freyðivíni í kreppunni ,sem nú bitnar hart á mörgum íslenskum heimilum.

Mér finnst þetta einstaklega illa til fundið  og ósmekklegt  hjá Kvenréttindafélagi   Íslands,  en kannski er ég einn um þá  skoðun.

Jólabókin í ár ?

Rak nefið inn í  bókabúð í Reykjavík í  gær. Þar voru meðal annars á  boðstólum ýmsar leiðbeininga- og  sjálfshjálparbækur. Þar á meðal  þýdd  bók eftir  ofurfjárfestinn Warren  Buffet. Það hefði  kannski   dugað að vitna í  fræg ummæli hans er  hann var beðinn um leiðbeiningar  fyrir  fjárfesta. Hann á  að  hafa svarað: Buy low, sell high. Með öðrum  orðum: Kauptu ódýrt, seldu dýrt !

En þarna var önnur bók sem  vakti meiri athygli mína. Hún var  íslensk og heitir: Hlutabréf og  eignastýring , undirtitill: Að velja  hlutabréf.   Verð kr. 5.530   Útgefandi ,  Glitnir.

Ég  efast reyndar um að hún verði  jólabókin í ár.

Athyglisvert - og dapurlegt !

Það var  athyglisvert að heyra  í fréttum, að  íslensk börn nytu minni móðurmálskennslu í grunnskóla en  börn í ýmsum grannlöndum okkar. Það var því  kannski  skiljanlegt, en um leið  dapurlegt  að heyra  íþróttafréttamann sjónvarpsins  tala um   "heildarupphæð verðlaunafésins...."

Til hamingju !

Það var sannarlega vel til fundið og verðskuldað að heiðra  Herdísi Egilsdóttur með þessum verðlaunum.

Herdís Egilsdóttir fær verðlaun Jónasar Hallgrímssonar

Tunga um tönn

Manni  vefst nú  eiginlega tunga um tönn  við að lesa, að hjá  lögreglustjóraembætti höfuðborgarsvæðisins "sé í dag starfræktur einn hundur...." 

Tveggja ára gamlar upplýsingar

"Framtakið heillaði mig"

Alþingismaður  skrifar: "Var staddur á Austurvelli í gær þegar Bónusfáninn var dreginn að húni á þaki Alþingishússins. Þó svo að lögbrot við mótmælaaðgerðir heilli mig sjaldan þá sé ég enga ástæðu til að liggja á því að framtakið heillaði mig". 

Hvað var svona heillandi  við  það að vanvirða þinghúsið?

Vonandi er  Bjarni  Harðarson  eini alþingismaðurinn sem er þessarar skoðunar.