Af hverju misskilja allir Ólaf Ragnar ?

 Breska   Ríkisútvarpið  BBC  er þekkt  fyrir að  misskilja allt  milli  himins og  jarðar og geta  yfirleitt ekki farið  rétt með nokkurn  skapaðan hlut.

Nú  berast þær fregnir af forsetaskrifstofu  lýðveldisins, að BBC  hafi  misskilið  Ólaf Ragnar Grímsson svo  að með ólíkindum er. Hann hafi alls ekki sagst ætla að   höfða   mál   gegn  bresku þjóðinni,  sem  menntaði hann  víst að    hluta og  veitti honum doktorsgráðu  frá Manchesterháskóla  minnir mig.   Ef Ólafur  Ragnar hefði  farið í mál  við  Breta, sem hefði auðvitað verið alveg mátulegt á þá,  hefði sjálfsagt einhver  sagt að  sjaldan launaði kálfur ofeldi, --  eða  þannig. Ólafur  er  dálítið sleipur  í ensku  svo  ekki  ættu  tungumálaerfiðleikar  að vera orsök þessa  misskilnings. Annað hvort  var fréttamaðurinn heyrnardaufur  eða  bara  auli. Þeir  eru víst  margir  slíkir sem  starfa fyrir  BBC, annálaðir  fyrir rangan og  staðlausan fréttaflutning.

Líklega   var þessi   fréttamaður bara einn af þessum BBC aulum, -    rati á  borð  við  erlendu sendiherrana ,sem  misskildu  Ólaf  Ragnar allir  með  tölu  í hádegisverðarboðinu  fræga  í danska  sendiráðinu í Reykjavík.

Meira um    ræðuhöldin í þeirri  veislu  síðar.

 

Málfar !

Enn  eru  viðvaningar látnir  æfa  sig í að  skrifa fréttir  fyrir lesendur mbl.is

Það er  íslensk málvenja að  segja  að ganga  að kjörborðinu, ekki "kjörborðunum".

"Kjósa  til  ritara" ? Af hverju ekki kjósa ritara ?

Þriðja og síðasta  athugasemdin  við  þessa stuttu frétt er  að talað er um "hinar ýmsustu ályktanir". Þetta er málleysa , -  í besta falli barnamál.

Brunabjallan glymur á Framsókn

Úrelt fyrirbæri Evróvisjón

Evrópusöngvakeppnin er löngu  úrelt fyrirbæri. Tónlistin er  einsleit og  hefur lengi  verið.  Umgjörðin alltaf  sú sama. Það  segir mikið um þessa  dagskrárgerð, þegar það  er orðið fjölmiðlum áhugaverðara hverju  þeir sem kynna lögin klæðast, fremur en hvað  er verið að  að kynna.  Þær ágætu ,en alltof notuðu sjónvarpskonur,  Eva María og  Ragnhildur  Steinunn voru  eins og trúðar í  síðasta  þætti þar sem mér varð litið á  skjáinn. Fatafígúrugangurinn hjá  sumu sjónvarpsfólki er löngu orðinn fáránlegur. það er ekki  jafnaðarmerki milli þess að vera í  nýjum fötum á hverjum  degi og að vera vel klæddur.  Umbúðirnar eru orðnar  innihaldinu mikilvægari. Það er kjarni þessa máls.

Það er  hinsvegar makalaust hvað  Sjónvarpinu tekst að gera  miklar langlokur úr þessu moði.Þetta er  ekki ódýrt efni  og  þessvegna  leyfi ég mér að segja að þessi langavitleysa sé  dýrt  spaug. Hvert skyldi áhorfið vera  í tölum talið ?

Sit  og  skrifa þetta í Hreiðri undir  suðurhlíð Hestfjalls þaðan sem    aðeins er hægt að horfa á RÚV.  Þegar langavitleysan byrjar í kvöld, tek ég mér  bók í hönd  og  rifja upp kynnin  af Páli í Pálssögu Ólafs Jóhanns Sigurðssonar. Bókina  keypti  í gær á  990 krónur. tvær skáldsögur í einni kilju . Það eru kjarakaup í kreppunni.

Ólafur Jóhann hefur lengi verið mér hugstæður  höfundur. Allt síðan ég stautaði  mig í  gegn um barnabók hans  Við Álftavatn sem ég  fékk í  sumargjöf  1946. Þar  minnir mig að sé vísa  sem hann ungur  orti um systur sína, held  ég muni hana rétt:

Illa liggur á henni,

að henni sækir  húmið.

Fer hún mamma frá henni

og fleygir henni í rúmið.

Ólafur Jóhann orti sum bestu ljóðanna sem okkur  voru gefin á  síðari helmingi tuttugustu aldar.

Nú er ég kominn hæfilega  langt frá lönguvitleysunni í sjónvarpinu  til að hætta þessu rausi.

"Óumflúið" hvað

Mín mín málkennd  segir mér  að  orðið "óumflúið" sé ekki til í íslensku. "Óumflúið að Gæslan  segi upp". Þetta er  ambaga, málleysa.

Sá  sem  fréttina  skrifaði á  við, að   uppsagnir hjá  Landhelgisgæslunni hafi  verið óhjákvæmilegar eða óumflýjanlegar. Seinna orðið er  reyndar svolítið andkannalegt í þessu  samhengi.

Þá  segir og í  fréttinni að  Gæslan hafi þurft " að  draga  stigmagnandi  úr  öllum okkar umsvifum". Af hverju "stigmagnandi" ?  Þetta er  einhverskonar  öfugmæli. Stigmagnandi er  gegnsætt orð.  Skrifarinn veit  ekki hvað hann er  að  segja.

Vandið málfarið Moggamenn !

 

Óumflúið að Gæslan segi upp

Hudsonfljót

Það er íslensk málvenja  nokkuð gömul  að kalla  Hudson River ,Hudsonfljót og  East River,  Austurá. Vonandi hefur  betur tekist til en áhorfðist og ekki orðið manntjón.

Flugvél hrapaði í Hudsonfljót

Sigurður Kári og Ólafur Ragnar

Rétt er  að vekja athygli á ágætri grein  Ólafs  Sigurðssonar fyrrverandi varafréttastjóra  Sjónvarps á bls.  28 í Fréttablaðinu í dag þar sem   Ólafur  vekur  athygli á  furðulegri  fullyrðingu   alþingismannsins  Sigurðar Kára  Kristjánssonar.

  Þingmaðurinn  sagði í  útvarpsþætti  nýlega, að á  fyrstu árum  Sjónvarpsins  hefðu  ráðherrarnir  samið  spurningarnar fyrir okkur fréttamennina. Nú veit ég ekki alveg hvernig  Sigurður Kári  kemst að þessari niðurstöðu.  Varla  hefur hann séð  mörg   viðtöl í fréttum  fyrstu  sjónvarpsáranna.  Hann fæddist nefnilega ekki fyrr en tæplega  sjö   árum eftir  að  Sjónvarpið  tók  til  starfa.

Þetta er  auðvitað rakinn  óhróður. Rakalaus  sleggjudómur og rugl  eins og  Ólafur   Sigurðsson rekur svo ágætlega.

En  Sigurður  Kári  er    í  góðum félagsskap þegar  hann heldur   þessari  staðleysu fram.

Í  viðtali á  40 ára  afmæli Sjónvarpsins   sagði  Ólafur Ragnar Grímsson   forseti Íslands að  sjónvarpið  hefði fyrstu  árin  bara verið  “þjónustustofnun við þá  sem réðu landinu” og  viðtöl  við ráðamenn  hefðu verið  tekin aftur  og  aftur   þangað  til þeir  voru ánægðir með útkomuna.   Síðan hefði hann  komið  og  gjörbreytt  Sjónvarpinu.   Þessum þvættingi Ólafs Ragnars   gerði ég nokkur  skil  í  2. hefti 3. árgangs tímaritsins Þjóðmála.

Það er kannski  ástæða  til að óska  Sigurði Kára  til hamingju með félagsskapinn,  en ég held ég láti það vera.

 

Enginn ágreiningur - Ágreiningur

 

Makalausa framsetningu  á þessu máli mátti   sjá í fréttum  RÚV í kvöld. Meðan útvarpsstjóri  las  skýrt og  greinilega , að enginn ágreiningur  væri í ríkisstjórn um málið, birtist  texti á  skjánum: Ágreiningur um Gaza.

Þetta  eru ekki þau  faglegu  vinnubrögð sem vegsömuð  eru  í auglýsingu  RÚV um eigið ágæti.

 

Ekki ágreiningur í ríkisstjórn

Dylgjufréttamennska - "Látum þá neita því"

 Undanfarna  daga  hefur maður orðið  vitni að sérkennilegri  dylgjublaðamennsku Fréttastofu Ríkisútvarpsins.  Fyrst koma   fullyrðingar um  óviðurkvæmileg eða jafnvel ólögleg  afskipti þeirra   Tryggva Jónssonar  og Helga Jóhannessonar  af  sölu  fyrirtækja. Þetta er  sagt í fréttum  og því  fylgt  eftir í Kastljósi. Tryggvi og  Helgi  skýra  sín mál, en áfram  er haldið. Svo  koma  seinna  skýringar þeirra  Tryggva  og Helga  á þeirra  afskiptum af málinu,sem  ekkert  virðist  við að athuga.

Þetta minnir óneitanlega á  atburði   frá  árinu 1971 þegar  Nixon   vildi láta dreifa ósönnum  fullyrðingum um andstæðinga sína. Þegar undirmenn hans  hreyfðu  mótmælum,  sagði hann þá  setningu sem hans  verður sennilega  lengst minnst  fyrir: "Let them  deny it". "Látum þá  neita  því."  Leiðrétting hreinsar aldrei  fólk sem í fréttum hefur verið borið  röngum sökum. Það er margsannað.

Þessar fréttir  RÚV  hafa allavega  ekki  verið "unnar af alúð og  fagmennsku"  eins og   Ríkisútvarpið  segir í auglýsingu um eigið ágæti.

Allt  finnst  gömlum fréttamanni  þetta bera mjög  keim  af því að þeir sem  telja  sig hafa  farið halloka í viðskiptum  við bankann séu aðalheimildarmenn  fréttastofunnar  og  séu  þannig að nota  fréttastofuna og  auðtrúa fréttamenn til framdráttar sínum málstað. 

Og  svo að  lokum: Í fréttum  sjónvarps í  kvöld  var   tvísagt:"..að  stolið  hefði verið á annað hundrað gróðurhúsalampa".  Á auðvitað að vera  "..lömpum"

Um frammistöðu skíðamanns  sagði íþróttafréttamaður:  "Honum urðu á  engin mistök". Hann átti  auðvitað að segja:"Honum urðu  ekki á  nein mistök"

Ég segi bara svona.

Undan huliðshjálmi - Sólskinsdrengurinn

Einhverfa var mér ekki  merkingarmikið orð, -- fyrr en í kvöld..Heimildamyndin Sólskinsdrengurinn fer með okkur í ferðalag á slóðir, sem ég  vissi ekki að væru til.

Einhverfa getur verið  margrar gerðar og haft í  för með sér mismikla  röskun.

 

Í þessari  stórkostlegu mynd  sjáum við  hvernig  þrautseigja, þolinmæði ,-  og móðurást  lyfta huliðshjálminum,  opna  dyr á vegg  þar sem  engar  dyr virtust vera. Þar sem ótrúlegir  hæfileikar birtast  hjá  þeim sem  virtust í upphafi allar bjargir bannaðar.

 

Þegar ég  heyrði að okkar  góða vinkona , granni  og heimilisvinur forðum tíð í Fossvogi , hún Margrét Dagmar Ericsdóttir, Rita, ætlaði að gera  mynd um drenginn sinn einhverfa, hann Kela, þá  hugsaði ég eitthvað á þá  leið,  já, einmitt það , erfitt  verður líklega að  fjármagna  slíkt verk..

En Rita lét ekkert  stöðva  sig. Saman hafa hún,fjölskyldan  og  Friðrik Þór og  allt  það ágætis fólk sem kom að  gerð myndarinnar gert  kraftaverk og  opnað okkur  nýjan heim.

 

Keli er tíu ára. Kannski  fáum við aðra  mynd þegar hann verður  fimmtán  -  eða  tvítugur.

Það er óhætt að hvetja  alla til að  gera sér  ferð í kvikmyndahús  til  fundar við  Sólskinsdrenginn. Það svíkur engan.

Kærar þakkir  fyrir ógleymanlega kvöldstund. Þetta var stuttur einn og hálfur tími.

    

"Með leiðindi"

Sumarið  1957  starfaði ég sem  bílstjóri hjá  Innkaupaskrifstofu Varnarliðsins.Skrifstofan var í Tryggvagötu 8.  Starfið  fólst í útréttingum og nær  daglegum ferðum  til Keflavíkur  eftir gamla malarveginum. Þegar ég tók við  bílnum   ,sem  var blár að lit  eins og aðrir  bílar  flughersins og   merktur   flughernum og  Varnarliðinu í bak og  ftyrir  var lögð  rík áhersla á það  við  mig að ég  væri til  fyrirmyndar í umferðinni,því ekki  færi milli mála hver  væri eigandi  bílsins.  Það  tókst bærilega, að minnsta kosti  fékk eg  engar athugasemdir  við  aksturslagið og lenti ekki í neinum óhöppum.

Seinna  hef ég  tekið  eftir því að erlendis  er   víða   skrifað á merkta  fyrirtækjabíla: Ef þú hefur  athugasemdir  við  aksturslag þessa  bíls ,  vinsamlega hringdu  þá í   síma.......

Í morgun  ók ég  á  eftir  stórum dráttarbíl með  tengivagn.  Ökumaður  bílsins  gaf  aldrei   stefnuljós. Var þó þrisvar  tilefni til.  Þegar leiðir  skildi   sá  ég að  bíllinn var  rækilega merktur    flutningafyrirtækinu  GG flutningar  ehf.

 Ég  hringdi  í  fyrirtækið og benti á  að  annað  hvort    væru stefnuljós  þessa    tiltekna  bíls  ekki í lagi  eða  bílstjórinn  væri ekki í lagi.

Þessari ábendingu var  illa  tekið.

Fyrst  hélt  sá sem ég  ræddi  við að  bíllinn hefði   ekið á   mig, en þegar hann  skildi  hvert erindið  var þá  voru  viðbrögðin þessi;:

Hvað, ertu  að hringja  hingað með  leiðindi út  af þessu ?

Ég varð eiginlega kjaftstopp.

Mun seint  leita eftir  þjónustu þessa fyrirtækis.