Molar um málfar LXVI

 Þegar farið var yfir  efni dagblaðanna í morgunútvarpi Rásar eitt (14..05.09.) ,þar sem málfar  er yfirleitt til  fyrirmyndar, varð umsjónarmanni á að  rugla   saman orðunum  eftirmál og   eftirmála. Að þessu hefur verið  vikið hér áður.  Umsjónarmaður  talaði um  eftirmála jarðskjálftanna á  Suðurlandi  í  fyrra. Eftirmáli  er niðurlagsorð, eða   stuttur kafli með þökkum  eða skýringum í  bókarlok. Eftirmál  eru  eftirköst eða  afleiðingar. Hann átti  við  eftirmál jarðskjálftanna  ekki eftirmála.

Fyrrum fjölmiðlamaður  benti höfundi á  eftirfarandi á  Vefvísi (13.05.09.): „... á einni mynda hans, sést Tina liggja ofan sjávar, þar sem leiðbeinandi reynir að koma henni til bjargar." Honum  fannst  hér undarlega til orða tekið og er ég honum sammála um það.

Beygingalistin bregst ekki á  Vefdv (14.05.09) : „Lögreglumönnum í Perú sem halda framhjá mökum sínum geta átt von á því að vera sagt upp störfum. "  Snilldin alltaf  söm  við sig á þeim bænum.

 Að næturlagi (14.05.09.) hlustaði höfundur  á  endurtekinn þáttinn Færibandið á  Rás tvö  Rúv. Þar var  rætt  við nýjan  formann VR.  Mörg var þar slettan, --- hjá  báðum.  Umsjónarmaður  talaði  til  dæmis  um „headphones" - heyrnartól  er prýðilegt orð.   Verra var  þegar sá hinn sami  fór  að  tala um  háar fjárhæðir og  talaði um „astrólógískar upphæðir". Ef menn sletta , þá  verða þeir að  vita hvað orðin þýða  sem þeir  sletta. „Astrology"  er  það sem kallað  er  stjörnuspeki,(sem  sumir  telja  reyndar hjáfræði eða gervivísindi) en  „astronomy" er   vísindagreinin   stjörnufræði. Þegar  talað  er  háar tölur  eða eitthvað í þeim dúr       er  stundum    notað  orðið  „stjarnfræðilegt,"  með öðrum orðum himinhátt. Þarna vissi  umsjónarmaður  ekki um hvað hann var að tala.

Athugasemdir

[Jón Óskarsson (IP-tala skráð) 14.5.2009 kl. 23:22]

Það ber allt að sama brunni. 

Fjölmiðlamenn virðast hugsa á ensku áður en þeir koma út úr sér vondum þýðingum.  

Og á þetta verðum við að hlusta.

[Eygló, 15.5.2009 kl. 00:14]

Bubbi er nú "slæmur" (hef samt gaman af þættinum hans), en viðmælandinn var ,eins og þú segir, ekki skárri.  Mér var farið að líða illa. Bubbi notar oft orð/mál (ýmist ensku eða íslensku) sem hann þekkir ekki merkingu á. Man ekkert í augnablikinu en beit of fast á jaxlinn.

[Ben.Ax. (Benedikt Jóhannes Axelsson), 15.5.2009 kl. 14:51]

Því miður er prófarkalestur aflagður að mestu á prentmiðlum og þess vegna rata svona villur á síður blaðanna. Góður fréttamaður þarf ekki endilega að vera góður í stafsetningu.

[Eygló, 15.5.2009 kl. 16:38]

Alveg sammála þér Ben.Ax. Þar að auki hefur kunnátta í stafsetningu og málnotkun, ekkert með manngildi að gera.

Veit um nokkra sem er skapandi og vita mikið um sinn málaflokk. Þeir hafa þó það vit í kollinum að láta aðra fara yfir málfarið.

Þótt einhver sé góður tungumálamaður er hann ekki  þar með sagt líklegur til að skrifa skapandi og fræðandi texta. Vegna þessa vinnum við saman.