Molar um málfar og miðla 539

   Í fréttum Stöðvar tvö var talað um, að tannlæknar  væru krafnir um. Hér hefði átt að segja, að tannlæknar væru krafðir um.  Eða þess  væri krafist, að tannlæknar....

  Beygingakerfið er á undanhaldi. Enn eitt  dæmið um  það var í mbl.is (23.02.2011): Ráðuneytið hefur náð samkomulagi við forsvarsmenn skólans um að nemendur sem hófu nám sl. haust verði gert kleift að ljúka námi sínu við skólann á vorönn 2012.  Hér átti auðvitað að segja:  ... nemendum ... verði gert  kleift...

 Dæmi um óþarfa þolmynd úr mbl.is (23.02.2011): Jón segir að fólkið sem komst inn í Túnis hafi verið rænt af mönnum í lögreglubúningum... Um  þetta þarf svo sem ekki að hafa mörg orð.

    Í Ríkissjónvarpinu var enn einu sinni sagt (22.02.2011): ... frá því  forseti synjaði  lögunum.  Molaskrifari er ekki sáttur  við þetta orðalag. Hefði fundist  betra að segja: .. frá því  forseti hafnaði því að  undirrita lögin.  Kannski er  Molaskrifari einn um þá  skoðun að ekki sé  rétt að nota sögnina að synja með þeim hætti, sem Ríkissjónvarpið gerði.

  Dagskrá íþróttahúss þjóðarinnar í Efstaleiti höfðaði ekki til Molaskrifara á þriðjudagskvöldið (22.02.2011). Hann horfði því á Lárus Blöndal hæstaréttarlögmann, fulltrúa  stjórnarandstöðunnar í Icesave  saminganefndinni  útskýra málið í  samtali við Ingva Hrafn í ÍNN  stöðinni. Lárusi tókst einstaklega vel að  útskýra þetta  flókna  mál og þær áhættur sem  felast í  hvorum  þeirra tveggja kosta sem   blasa við. Annarsvegar að  samþykkja þann samning sem  fyrir liggur eða  láta málið fara  fyrir dómstóla. Eftir útlistun Lárusar  er ekki hægt að velkjast í vafa um það hvor kosturinn  sé  betri. En  auðvitað eru  þeir til sem munu halda áfram að  berja hausnum við steininn og  kyrja: Við borgum ekki. Við borgum ekki , undir stjórn Morgunblaðsins og  fyrrum forkólfa Sjálfstæðisflokksins. 

 Ragnar Hall, hæstaréttarlögmaður  gerði Icesave málinu  einnig  mjög  góð skil í Kastljósi Ríkissjónvarpsins (22.02.2011). Hann talaði mannamál, þannig að allir gátu  skilið. Takk fyrir það. 

 Það er til marks um vinnubrögð Morgunblaðsins í Icesave  málinu að í dag (24.02.2011) birtir  blaðið leiðréttingu frá  forstjóra  ESA, Eftirlitsstofnunar EFTA. Hann ber af sér sakir. Leiðarahöfundur Morgunblaðsins  gerði honum upp skoðanir. Laug upp á hann , heitir það á íslensku.  Ný vinnubrögð  á Mogga. Ekki hvarflar að blaðinu að biðja  viðkomandi einstakling afsökunar. Morgunblaðinu er ekkert heilagt í  blindri baráttu gegn  Icesave. Allra síst sannleikurinn.

Athugasemdir

[Kolbrún Kvaran, 24.2.2011 kl. 11:02]

Mikið er ánægjulegt að vita til þess að fleiri en ég sjálf hafi áhuga á málfari í fjölmiðlum!

Vitleysur blaðamanna og fréttamanna fara óstjórnlega í taugarnar á mér. Í mörg ár hef ég mikið velt fyrir mér hvers vegna talað er um að hinn eða þessi sé "hæst launaðasti" íþróttamaðurinn eða þingmaðurinn. 

[Sigurður Antonsson, 24.2.2011 kl. 19:05]

Icesave málið er orðið mikill bálkur. Sama endurtekningin og afneitunin dag eftir dag. Wall Street rökin. Margir nágrannar okkar brosa að okkur eybúum sem ekki vilja hlusta á vini sína. Allur hinn vestræni heimur verður að gjalda fyrir peningaprentun í Bandaríkjunum með ótímabæri verðbólgu og gjaldþroti banka. Við viljum njóta allra réttinda í Evrópu en lítið leggja að mörkum til að viðhalda því frjálsræði og möguleikum sem samvinnan býður upp á. Áframhaldandi óðaverðbólga og ósvissa verður hlutskipti flestra, meðan aðrir viðhalda forréttindum og ótímabærum ótta. Útlistanir þínar í Molum á þessu fyrirbæri eru hugvekjur manns sem hefur dvalið lengi meðal granna.

[Kristinn Dagur Gissurarson (IP-tala skráð) 24.2.2011 kl. 23:30]

Þarft verk sem þú vinnur að, Eiður. Það ber að vanda málfar í fjölmiðlum og víðar. Hvað varðar skoðun þína á Icesave þá er það nú þannig að menn greinir á um hvað réttast er að gera í stöðunni. Fordæming þín á þeim sem vilja hafna samningnum er ekki við hæfi. Það er, í raun, ekkert athugavert við að láta reyna á réttarstöðu ríkisins fyrir dómstólum, ef Bretar og Holllendingar kjósa að fara þá leið.