Molar um málfar og miðla 228

Bjarni Sigtryggsson sendi Molum eftirfarandi:  Í fréttum RÚV  sjónvarps  las   fréttaþulur  (22.12.20009) eins og  rétt mál væri  að bíða milli ótta og vonar. Ekki venjubundið  orðalag.  Við tölum um að bíða milli vonar og ótta.  Þetta var hinsvegar rétt í skjátexta.

Því er svo við að bæta að í fréttum RUV síðustu tvö dægur hefur ítrekað
verið reynt að sprengja flugvél á flugi "í loft upp."

Ben. Ax. sendi eftirfarandi:

Höfundur: Ben.Ax. (Benedikt  Jóhannes Axelsson) (http://benax.blog.is/)

  Oftar en einu sinni hef ég heyrt talað um að eitthvað sé
hægt og sígandi á uppleið. Það held ég að sé ekki hægt. Sagt hefur verið að
eitt og annað sé kýrskýrt. Í mínu ungdæmi þýddi kýrskýr nautheimskur.
Forðum var frá því sagt að lögreglan hefði handtekið mann sem var með
grunsamlega ávísun. Þá var ort:

Mér finnst lögreglan okkar aldrei treg,
ekki vil ég hana á nokkurn hátt lasta.
En úr því að ávísunin var grunsamleg
af hverju tóku þeir hana þá ekki fasta?

 Annar dyggur lesandi   Mola  sendi eftirfarandi :  Á íþróttasíðum Morgunblaðsins í dag  (28.12.2009) eru leikjum í NBA-deildinni í körfubolta gerð skil. Þar er ítrekað talað um að leikmenn hafi gert stig en ekki skorað stig. Í mínum eyrum hljómar þetta álíka ankannalega og að gera mat í staðinn fyrir að elda hann.  - Já líklega er best að gera sér egg með hamborgaranum í kvöld !

Úr mbl.is (29.12.2009)Utanríkisráðuneytið hefur verið í sambandi við og aðstoðað íslenskan karl og konu sem handtekin voru í Madríd á Spáni í gegnum ræðismann Íslands í borginni.  Ekki mjög skýrt orðað. Úr sama miðli sama dag: Hannesi Sigmarssyni hefur verið sagt upp störfum sem yfirlæknir við Heilsugæslu Fjarðabyggðar á Eskifirði. Orðið yfirlæknir  ætti eftir máltilfinningu  Molaskrifara  þarna að vera í  þágufalli. - yfirlækni.

 Í kvöldfréttum  útvarps  ríksins  (29.12.2009)  var    sagt efnislega  ... þegar skattalagabeytingarnar  byrja að bíta eftir áramót      Að nota   sögnina   að  bíta í þessu  sambandi  er gildishlaðið orðalag,sem ekki á heima í fréttum þar sem menn stæra sig af  af fagmennsku.

Glysgirnin í klæðaburði undirstrikar alvöruleysið í Kastljósi  (29.12.2009) sjónvarps ríkisins.

 

GLEÐILEGT OG GÆFURÍKT ár, - kærar þakkir  fyrir  samskiptin á árinu sem er að kveðja.

Athugasemdir

[Þorsteinn Briem, 30.12.2009 kl. 12:49]

Réttast væri að flengja þetta lið á Austurvelli, svo undan svíði.

Gleðilegt ár!

[Eiður Svanberg Guðnason, 30.12.2009 kl. 13:40]

 Á beran .... Ég hélt að ég væri búinn að missa hæfileikann til að verða kjaftstopp.

[Húsari. (IP-tala skráð) 30.12.2009 kl. 14:09]

Sæll Eiður.

Fróðlegt þætti mér að fá álit þitt á því orðavali
í minningargreinum að e-r kveðji vonum fyrr.
Ég leitaði á timarit.is og fann ekkert dæmi um þetta frá
1880 - 1930.
Hins vegar fann ég eftirfarandi dæmi í Morgunblaðinu
frá 1931 - 2009 (ekki eitt einasta frá 1913 - 1930):

1956>1
1962>1
1972>1
1985>1
1999>1
2004>2
2007>1

Mér kemur orðanotkun þessi nokkuð undarlega fyrir sjónir.

[Eiður Svanberg Guðnason, 30.12.2009 kl. 17:45]

 Sæll Húsari,

Þetta orðalag mundi ég aldrei nota í minningargrein. Í  ágætri bók Jóns G Friðjónssonar , Merg málsins  segir  e-ð gerist ekki vonum fyrr,  e-ð gerist  ekki  fyrr en  væntan mátti, loksins  gerist eitthvað. - Það var ekki vonum fyrr an að hann léti frá sér  heyra. Þar  er  þetta jafnan  notað með  -- ekki.

 Að nota þetta svona í minningargrein  finnst mér andkannalegt. Þótt merkingin  eigi að vera að einhver hafi kvatt þetta  líf  fyrr en  vonir  stóðu  til. Vonast hefði verið til að hann mætti lifa lengur.

[Eygló, 30.12.2009 kl. 21:23]

Við nokkur ræddum klæðaburð ungu konunnar í Kastljósi í gærkveldi. Kom saman um að hún hefði kannski mátt vera í fjallkonubúningnum á aðfangadag eða nýársdag. Ekki fyrsta sinn sem manni fyrir uppdubbunin vera langt yfir markið og yfirskyggja umfjöllunarefni. Nei, frekar kannski óviðeigandi.

Hef sagt það áður, segi það enn, þessi litla dama á að vera á herðatré en ekki í "menningar"-þætti.

[Eiður Svanberg Guðnason, 30.12.2009 kl. 21:40]

 Ærið oft er það sem umbúðirnar bera innihaldið ofurliði. Þarna  var  það svo.

[Haraldur Bjarnason, 31.12.2009 kl. 08:26]

Tók eftir þessu með að sprengja flugvél í loft upp. Það er álíka athyglisvert og þegar illa viðrar þá er talað um að flug liggi niðri. Hvernig flug er það sem liggur niðri?

[Húsari. (IP-tala skráð) 31.12.2009 kl. 10:26]

Sæll Eiður.

Bestu þökk fyrir svarið.
Að mér læddist sá grunur þegar ég þræddi í
gegnum greinar um þetta efni að

uppruna þessa væri að finna í orðasambandinu ekki vonum fyrr.

Einhvers staðar á miðri leið hefur þetta orðið viðskila og trúlega
hefur þar ágirndin orðið skynseminni yfirsterkari eins og svo oft áður!

 

Ég vil nota þetta tækifæri og þakka þér fyrir fróðlega pistla
sem ósjaldan hafa verið íþættir góðlátlegri gamansemi höfundar.
Ég vil biðja þig afsökunar á ærslanda sem ég hafði í frammi
á dögunum
Ég er ekki viss um að meðfædd illkvittni hafi ráðið för
öllu heldur sú síngirni, - ásamt og með öðru, -
að við mættum fá meira að heyra.

Gleðilegt ár.

[Eiður Svanberg Guðnason, 31.12.2009 kl. 12:03]

 Þakka þér fyrir, Húsari. Þú þarft ekki að biðjast afsökunar á einu eða neinu.  Vænt þykir mér að  heyra að þér líka þessar hugleiðingar mín. Mun halda þeim áfram

 Gleðilegt ár.