Molar um málfar og miðla 224

    Molaskrifari gerir lítið af því að taka texta af fésbókinni og viðra hér. Þessa setningu stóðst hann ekki: Með miklu áti er undirbúið sig fyrir heljarinnar snjóstorm sem er á leiðinni í borgina. Ótrúlega eru þeir margir, sem halda að orðið snjóstormur sé íslenska. Svo er ekki. Þetta er aulaþýðing úr ensku , snowstorm. Á íslensku heitir þetta stórhríð. Aðrar ambögur í þessari setningu eru augljósar.

Hvað finnst þér mest skemmtilegast í skákinni? Svona spurði fréttamaður í fréttatíma Stöðvar tvö (19.12.2009) Dugað hefði að segja: Hvað finnst þér skemmtilegast í skákinni. Aldrei skal nota hæstastig tveggja lýsingarorða í sömu setningunni.

Svolítið er það þreytandi að heyra fréttamenn ítrekað kalla Saab-borgina Trollhättan í Svíþjóð Trollhattan. Bókstafurinn ä er borinn fram eins og e.

 Alltaf finnst Molaskrifara það jafn andkannalegt, eða ankannalegt, þegar orðatiltækið að vinna hörðum höndum er notað um næstum hvað sem er. Í fréttatíma  Stöðvar tvo (19.12.2009) var talað um að vinna hörðum höndum að því að fá aðild að félagasamtökum.

 Hér er verið að skattleggja endanotandann, sagði alþingismaður í ræðustóli Alþingis. Endanotandi ? Er það sá sem notar endann? Auðvitað ekki. Þetta er enn ein aulaþýðingin úr ensku þar sem talað er um end user. Í þessu tilviki átti að skattleggja notendur þeirrar þjónustu ,sem um var verið að ræða.

Sir Alex Ferguson, stjóri United, leist ekki á blikuna, sagði  íþróttafréttamaður  Sjónvarps ríkisins ( 19.12.2009) seint læra menn beygingareglur móðurmálsins á þeim bæ. Orðið stjóri á ekki að vera í nefnifalli, heldur  þágufalli. Honunm leist ekki á blikuna.

 Eftirfarandi er úr dv.is ... hefði greitt atkvæði í ölvunarástandi. Einfaldara og betra hefði verið að segja hefði greitt atkvæði ölvaður, eða hefði verið ölvaður er hann greiddi atkvæði.

 

Athugasemdir

[Börkur Hrólfsson, 21.12.2009 kl. 15:57]

Það er þarft að vera á verði, til verndar Íslenskunni. Það er fleira en málfarsvillur, sem þarf að gæta að. Það fer t.d. óskaplega í taugarnar á mér, þegar fólk fer rangt með staðarnöfn.

Í skjáfréttum MBL. er frétt um ,,Frú Laugu" á Laugalæk, en þar kallar fréttakona götuna ,,Laugarlæk"

,,Laugalækur" var það heillin, þ.e. lækurinn úr laugunum.

Að minnsta kosti tvö fyrirtæki við Laugaveg, vita ekki hvað gatan þeirra heitir, og auglýsa sig við ,,Laugarveg". Það eru Kós leðurvöruverslun, og austurlenskur veitingastaður á ,,Laugarvegi" 60.

Laugavegur heitir svo, vegna þess að hann lá í laugarnar (í fleirtölu).

Eins sést æ oftar að Skógafoss er kallaður Skógarfoss, þetta hefur jafnvel verið prentað í ferðabæklinga og handbækur.

Þeir eru fleiri staðirnir, sem svo er farið með. Kannski er þetta bara eðlileg þróun, og ekkert við að gera, en þetta fer samt í taugarnar í mér.

[Eiður Svanberg Guðnason, 21.12.2009 kl. 16:53]

Tók eftir þessu og tek undir með þér ,Börkur. Var  búinn að  skrifa eina málsgrein um þetta í næstu Mola, síðasta pistil  fyrir jól. .  Má ég kannski bæta   athugasemd þinni við  með nafni þínu ?

[Haukur Kristinsson (IP-tala skráð) 21.12.2009 kl. 17:20]

... hefði greitt atkvæði í ölvunarástandi. Af hverju ekki; hefði greitt atkvæði í ölvunarástandsferli? Þegar ég las að skattleggja skyldi endanotandann, hélt ég að nú ætti að fara að leggja sér skatt á homma greyin.

[Börkur Hrólfsson, 21.12.2009 kl. 20:02]

Jája Eiður, alveg sjálfsagt.

[Eiður Svanberg Guðnason, 21.12.2009 kl. 20:31]

Set þetta inn síðdegis á morgun, börkur. Takk fyrir.

[Eiður Svanberg Guðnason, 21.12.2009 kl. 20:31]

Börkur, -- fyrirgefðu !

[Eygló, 21.12.2009 kl. 21:20]

Þið vissuð að Hreiðar Már Sigurðsson var hæst launaðasti maður á Íslandi.
Ég fæ innantökur!   Ég hlýt þá að hafa verið miklu lægra launað(a)ri.