Molar um málfar og miðla 223

  Úr kvöldfréttum RÚV sjónvarps (18.12.2009) : Þá er bent á að leiðbeinendur námskeiðsins... Það er sem sé verið að leiðbeina námskeiðinu!  Eðlilegra hefði verið að segja: Leiðbeinendur sem kenna á námskeiðinu...

 Garðapósturinn flytur okkur Garðbæingum margvíslegan fróðleik. En menn þurfa á þeim bæ að vanda málfarið svo við hnjótum ekki um setningar eins og þessa (18.12.2009): ...segir Faraj Shwaiki, sem rekur staðinn ásamt bróðir sínum.

 Sá sem skrifaði þetta í vefmiðilinn visir.is (18.12.2009) skilur ekki muninn á því að kjósa og greiða atkvæði.: .. var undir áhrifum áfengis þegar hann kaus á Alþingi í gær .. Umræddur þingmaður var ekki að kjósa , heldur greiða atkvæði.
Ekki batnar fréttin þegar fram í sækir: Ekki kom fram hvaða mál hann var að kjósa um. Það hefur örugglega gerst nokkur þúsund sinnum sinnum á Alþingi að þingmenn hafa tekið þátt í atkvæðagreiðslu eftir að hafa dreypt á dýrum veigum. Sannarlega er það ekki til fyrirmyndar, en fjölmiðlar þurfa ekki að láta eins og þetta sé eitthvað sem aldrei hafi gerst áður. Blaðamenn vita betur. Molaskrifari skilur Ögmund að  biðjast undan viðtali eftir að hafa dreypt á víni með mat. Það er hinsvegar fráleitt  sem Sigmar Guðmundsson gerði í Kastljós, er hann las okkur pistil um „ölvun"  Ögmundar. Olli Ögmundur hneykslan á þingi? Varð hann sér til skammar ? Nei. Hann hélt fast við reglu ,sem fleiri þingmenn ættu kannski að tileinka sér. Þarna sökk Kastljósið í hyldýpi sorans. Fréttamenn eiga líka að vera manneskjur.

Bjarni Sigtryggsson sendi Molum eftirfarandi pistil: "Skemmtiþátturinn USA Today mælir með Íslandi sem helsta ferðamannastaðnum fyrir næsta ár. Ísland er á lista ásamt fimm öðrum löndum á vefsíðu USA Today." Svo segir á skemmtiþættinum visir.is - eða er það kannski vefsíða. USA Today er nefnilega eitt útbreiddasta dagblað Bandaríkjanna, en ekki skemmtiþáttur.  Takk fyrir þetta, Bjarni. Það er ekki mikilli þekkingu á fjölmiðlaheiminum fyrir að fara hjá þeim,sem þetta skrifar.

Þetta með forsetningarnar af og að er ekki einfalt mál. Í vefmiðlinum visir. is segir í dag (19.12.2009)... Varð uppvís af því í lok ágúst síðastliðinn og baðst afsökunar á því..,. eftir málkennd Molaskrifara verða menn uppvísir að einhverju, ekki af. Menn finna lykt af einhverju, en bragð að einhverju. Svo á auðvitað heldur ekki að  segja: ...í lok ágúst síðastliðinn...

 Gleði hjá ring í allan dag, auglýsir Síminn. Síminn er eitt þeirra fyrirtækja,sem kunna ekki að skammast sín fyrir atlögur gegn íslenskri tungu í auglýsingum.

 Gildismat Morgunblaðsins kemur einkar vel fram í laugardagsblaðinu (19.12.2009). Efst á forsíðu er fjögurra dálka fyrirsögn: Hlutabréf í 365 einskis virði samkvæmt verðmati.Vísað er á frétt á bls. 22 , þriggja dálka frétt þar sem sagt er nákvæmlega það sama og í forsíðufréttinni. Á besta greinastað í blaðinu, leiðaraopnunni, er löng grein eftir Baldur Guðlaugsson fyrrverandi ráðuneytisstjóra, sem  borið er á brýn að hafa nýtt sér innherjaupplýsingar til að hagnast um nær tvö hundruð milljónir á sölu hlutabréfa í Landsbankanum rétt fyrir hrun. Ekki skal fleira um þetta sagt.

Líklega verður um sinn  lítið eitt lengra milli Mola  en verið hefur að jafnaði.

 

 

 

Athugasemdir

[Ómar Ragnarsson, 20.12.2009 kl. 00:24]

Molasíðan þín, Eiður, er mjög þörf á okkar tíð. Svo er að heyra og sjá að í örvæntingarfullri viðleitni til sparnaðar hafi ýmsum af bestu fjölmiðlamönnum okkar verið sagt upp vegna þess að þeir höfðu nokkuð góð laun og í sumum tilfellum hafa verið ráðnir í staðinn viðvaningar sem gera sig stundum seka um málvillur sex ára barna.

Ég set spurningarnerki við slíkar sparnaðarráðstafanir. Mig grunar að í sumum tilfellum afkasti nýliðarnir ekki meiru en svo að útgjöld vinnuveitandans verða jafnvel meiri en ef hann hefði látið hinn þrautreynda mann halda stöðu sinni. 

Síðan reikna þessir eigendur ekki með því tapi á fé sem minnkað traust til fjölmiðilsins hefur í för með sér þegar lakari vinnubrögð blasa við.

Þetta tel ég vera aðal áhyggjuefnið varðandi uppsagnir fjölmiðlamanna í vetur. 

[Eiður Svanberg Guðnason, 20.12.2009 kl. 00:30]

Takk.

[Sigurður Þór Guðjónsson, 20.12.2009 kl. 01:33]

Er það til of mikils mælst að þingmenn láti áfengi vera í vinnunni? Það finnst mér ekki og gengur eiginlega yfir mig hvað alltaf er kóað með þigmönnum sem er að neyta víns. ''Það hefur örugglega gerst nokkur þúsund sinnum sinnum á Alþingi að þingmenn hafa tekið þátt í atkvæðagreiðslu eftir að hafa dreypt á dýrum veigum.'' Þú ættir að vita þetta, fyrrverandi þingmaðurinn. Er þá ekki fremur ástæða til að skera almennilega upp herör gegn því en vera að mæla það upp í þingmönnum með því að vega að þeim sem finnst það ekki í lagi? 

[Guðjón Sigþór Jensson, 20.12.2009 kl. 09:15]

Óhætt má segja að gott aðhald um íslenska tungu sé mikilvægt. Öllum er hollt að fá leiðbeiningar um íslenskt mál.

Því miður hefur hver þátturinn sem tók á þessu verið lagður niður í RÚV sem er ekki nógu gott. RÚV á að vera ein af helstu máttarstoðum íslenskunnar þar sem sérstök áhersla er lögð á vandað mál sem er til fyrirmyndar. Málrækt er okkur mjög nauðsynlegt til að koma þessum sérkennilega arfi víkingaaldar áfram sem minnst breyttum. Íslenskan er lifandi mál og verður vonandi það áfram.

Bestu þakkir Eiður og haltu áfram að benda okkur á það sem betur mætti fara.

Mosi

[Valur Kristinsson, 20.12.2009 kl. 15:57]

Sigurður Þór Guðjónsson

Þú skrifar á góðri íslensku en ert samt að sletta. Hvað þýðir að "kóa"?