Molar um málfar og miðla 220

Í sjónvarpsfréttum Skjás eins og mbl. is (11.12.2009) var talað um að versla föt í Kringlunni. Fjölmiðlar gera sitt til að festa þessa ambögu í sessi. Fjölmiðlamenn ættu að kynna sér muninn á merkingu sagnanna að versla og að kaupa. Hann er skýr og málið einfalt, ef menn nenna að leggja sig eftir því að tala og skrifa rétt.  

 

Bæði mbl. is og fréttastofa RÚV (14.12.2009) sögðu frá eldsvoða í bílskúr í Grafarholtshverfi þar sem farið hefði fram uppstoppun. Þá má svo sem vera að þarna hafi verið stoppuð upp dýr, en sá grunur læðist að Molaskrifara, að þarna hafi farið fram bólstrun, húsgagnabólstrun. Nýtt nafn á þeim sem eru menntaðir í þeirri iðngrein er þá líklega húsgagna uppstopparar, - ekki húsgagnabólstrarar, eða hvað ?

   Í sjónvarpsfréttum Stöðvar tvö (14.12.2009) talaði fréttamaður um Landsmót hestamanna í Vindheimamelum. Þegar sagt er í Vindheimamelum læðist að manni sá grunur,að sá sem talar viti ekki hvað melar eru. Sami fréttamaður talaði um framlag til safnhússins í Búðardal.  Molaskrifari er næsta viss um að átt var við Safnahúsið að Miðbraut 8 í Búðardal. Orðið safnhús er oftast notað í merkingunni haughús og  safnahúsið í Búðardal er ekkert haughús. 

     Molaskrifara þykir sjónvarpsauglýsing  sparisjóðanna um  viðskiptahlutdeild þeirra svolítið ótrúleg. Grunar að hún sé dæmi um hvernig hagræða megi sannleikanum með línuritum og súlum án þess beinlínis að segja ósatt. Hve fjölmennt var úrtakið sem byggt er á ? Fróðlegt væri að vita  það. Voru það tvö hundruð manns, eða  tólf hundruð manns? Það skiptir máli.  

 

  Molaskrifari hefur á tilfinningunni að ekki sé langt í að fréttavefnum mbl.is verði lokað og þeir einir fái aðgang, sem kaupi áskrift. Öðrum þræði hefur Morgunblaðið verið að undirbúa jarðveginn með því að flytja fréttir af því að í útlöndum tali menn um að ekki sé hægt að flytja fréttir ókeypis á veraldarvefnum.Fjárhagsstaða Morgunblaðsins er slæm, þrátt fyrir milljarðaafskrift á skuldum er nýir eigendur tóku við. 

    Þessi pistill birtist einnig á www.eidur.is  Þar er líka að finna athugasemdir af öðrum toga.Frá og með 1. janúar 2010 hættir Molaskrifari að birta pistla sína á bloggi Morgunblaðsins.

 

Athugasemdir

[Lana Kolbrún Eddudóttir, 15.12.2009 kl. 15:58]

Hann er nú samt dýra-uppstoppari, nágranni minn í Funafold, svo fréttin var rétt í þetta sinn.

[Eiður Svanberg Guðnason, 15.12.2009 kl. 18:00]

 Takk fyrir þetta, Lana Kolbrún. Þetta svona  hvarflaði að mér, en þarna   var grunur minn sem sé ekki réttur.