Molar um málfar og miðla 216

 

Vítt og breitt,  morgunþáttur  Rásar eitt er vel undirbúinn og vandaður þáttur. Umsjónarmenn eru vel máli farnir og efni oft einkar athyglisvert. Mjög  fróðlegt viðtal (08.12.2009) við Björn Erlingsson fjallaði um leiðangur á norðurslóðir sem farinn verður á næsta ári til að kanna þykkt hafíss. Ágæti viðtalsins var ekki síst fólgið í því hve vandað mál báðir töluðu, spyrill og viðmælandi,sem þó var að tala um flókin vísindi þar sem auðvelt hefði verið að falla í slettupytinn.  Takk fyrir.  

 

 

 Á Rás tvö er hinsvegar flesta daga annað uppi á teningnum. Þar talaði umsjónarmaður (07.12.2009) um að menn kæmu alveg hellaðir á barina vegna þess hve áfengi væri orðið dýrt. Hann átti líklega við að menn mættu kófdrukknir eða mikið ölvaðir. Væru sem sagt búnir að hella í sig áður en inn væri komið.  Í sama þætti virtist orðið trauðla velkjast fyrir umsjónarmönnum, en í einhverju blaðanna var skrifað um að Sparisjóðnum Byr yrði trauðla bjargað. Trauðla þýðir varla, tæplega eða með erfiðismunum.

  Beygingakerfið á í vök að verjast eins og eftirfarandi dæmi úr mbl.is (07.12.2009) ber með sér: Sigmundi Davíð Gunnlaugssyni, formaður Framsóknarflokksins, var þegar í sumar kunnugt um... Hér ætti að standa: Sigmundi Davíð Gunnlaugssyni, formanni Framsóknarflokksins, var þegar í sumar kunnugt um....  


Í fréttum Stöðvar tvö (07.12.2009) var talað um að fara á bak við samkomulag í merkingunni að rjúfa samkomulag  eða brjóta samkomulag. Þessa orðnotkun hefur Molaskrifari ekki heyrt áður. 

  Í sama fréttatíma var sagt: ... lét ekki sjá sig af kunnuglegum ástæðum. Líklega hefur  sá sem hér á átti í hlut ætlað að segja; Lét ekki sjá sig af alkunnum ástæðum. 

Í sama miðli var verið að kynna efni Íslands í dag , en þar átti meðal annars að  heimsækja Litla Hraun. Umsjónarmaður talaði um að  fara upp á Litla Hraun. Eyrbekkingar sem búa í grennd við Litla Hraun fara upp á Selfoss , eða upp að Selfossi. Selfyssingar bregða sér niður á Eyrarbakka eða Bakka. En að talað sé um að fara úr  Reykjavík upp á Litla Hraun er fráleit málnotkun.   

 

Athugasemdir

[Eygló, 9.12.2009 kl. 00:37]

ao. trauðla.

"Sparisjóðnum Byr yrði trauðla bjargað. Trauðla þýðir varla, tæplega eða með erfiðismunum".
Á "trauðla" ekki heima þarna?

[Eiður Svanberg Guðnason, 9.12.2009 kl. 09:00]

Trauðla á vissulega heima þarna. En  svo  virtist sem  umsjónarmaður  skildi trauðla orðið trauðla!

[Sæmundur Bjarnason, 9.12.2009 kl. 11:38]

Tók líka eftir þessu með Litla-Hraun. Algerlega fráleit málnotkun og án hugsunar.

[Eygló, 9.12.2009 kl. 12:00]

"sjúkkett!"    (gaman væri að vita hvaðan þetta kemur, sem krakkar nota)

[Predikarinn - Cacoethes scribendi , 9.12.2009 kl. 14:25]

Tak skal du have segja menn í Danmörku. Á Íslandi þakka þér fyrir, þökk fyrir, bestu þakkir og svo framvegis.

[Eygló, 9.12.2009 kl. 18:01]

Ekki í beinu samhengi:   Fékk í tölvupósti auglýsingu:

"Drífðu þig út í sólina um jólin og fáðu smá tan!

Plúsferðir ætla að bjóða þér og þínum alveg þrusudíl..."

[Eiður Svanberg Guðnason, 9.12.2009 kl. 20:48]

Eygló, ef til væru skammarverðlaun  fyrir  málsóðaskap  kæmu Plúsferðir sterklega til greina !

[Eygló, 9.12.2009 kl. 21:48]

Er (ekki) hægt að útbúa "svæði/síðu/vef-/hóp" hérna á Netinu þar sem allir gætu sett inn óvandaðar auglýsingar og opinberan málóhroða AUK ÞESS að setja inn það sem okkur þætti til fyrirmyndar. Jah, þó ekki væri nema fallegt.
Gæti það ekki orðið svolítið aðhald, ef fréttist af þessum "umsögnum"

ESG   Hefurðu áður sé hrákasmíð frá þessu fyrirtæki?

[Eiður Svanberg Guðnason, 10.12.2009 kl. 09:25]

 Þessi hugmynd  finnst mér   vel koma til greina, Eygló. Minnist þess ekki að  hafa séð  svipaðan sóðaskap  frá þessu fyrirtæki áður.

[Eygló, 10.12.2009 kl. 17:45]

Slær þó sólbaðsstofunni ekki við!?