Molar um málfar og miðla CXLIV

  Fréttaþulur  RÚV  sjónvarps (06.09.2009) sagði  í upphafi  frétta: Þeim sem  dreymir um...  Þetta   endurtók þulur  svo  í yfirliti í fréttalok og  sagði  aftur: Þeim sem  dreymir um....Þetta er  eins og að segja : Mér  dreymdi...... Þarna  átti  auðvitað að  segja : Þá  sem  dreymir um... Í sama  fréttatíma  sagði íþróttafréttamaður um  úrslit  í leik: Lokatölur urðu  tvö eitt  fyrir  Englendingum.  Tvö eitt  fyrir  Englendinga hefði verið rétt að segja.   Meira um íþróttir:  Fréttaþulur  Stöðvar tvö (06.09.2009) sagði:  Þar sem landsleikur Íslands og Norðmanna ber  hæst.  Að minni hyggju hefði hann átt að segja: Þar sem landsleik Íslands og  Noregs  ber  hæst.

 Enn fjölgar átlettunum. Þessi pest  virðist  breiðast hraðar út en  svínaflensan.  Golfátlett var auglýst í útvarpi (06.09.2006). Þegar  Molaskrifari  ók Dalveginn sá hann Factory átlett.  Hugmyndaflug og orðgnótt íslenskra kaupmanna er með ólíkindum.  Í  Skeifunni  eru   ein tvö  átlett  næstum hlið við hlið og  eitthvað er  af þessum ófögnuði vestur á  Granda.

  Í  Íslenskri orðabók er  skilgreining á  sögninni að þinglýsa. Þar kemur líka  fram  að  sögnin stýrir þágufalli, samningi er þinglýst. Ömurlegt var að hlýða á  fréttamann í sjöfréttum RÚV  (05.09.2009) sem var að  segja  frá sölusamningum og leigusamningum sem, hafði verið þinglýst   tala þrisvar sinnum um  samninga sem voru þinglýstir. Átti  auðvitað að  segja -  samningum sem var þinglýst. Þeir sem   svona  tala þurfa að læra betur. Rétt var  farið með þetta í inngangi sem þulur las.  

Að því loknu lét hann sig hverfa út úr íbúðinni, segir  í Vefogga  (05.09.2009) Þetta  hefur verið sannkallaður  töframaður, enda var hann  undir annarlegum áhrifumeins og  það var orðað í fréttinni.

Á vef RÚV (05.09.2009) er  fyrirsögn um  skipið  dularfulla: Varningur  Arctic Sea  enn ráðgáta. Þarna  hefði  farið betur á að tala um  farm  skipsins,  ekki varning  skipsins.

Athugasemdir

[Sveinn (IP-tala skráð) 6.9.2009 kl. 22:01]

Sæll Eiður.

Þessi athugasemd er ekki alveg réttmæt hjá þér. Textinn sem þú vísar til var á þessa leið: "Þeim sem hefur dreymt um að slá í gegn gefst nú gullið tækifæri til að komast í félagsskap þeirra bestu." "Þeim" vísar semsagt þarna til "gefst nú gullið tækifæri..." en tilvísunarfornafnið vísar til "hefur dreymt um". Samkvæmt þinni tillögu hefði textinn hljóðað á þessa leið: "Þá sem hefur dreymt um að slá í gegn gefst nú gullið tækifæri til að komast í félagsskap þeirra bestu." Það gengur augljóslega ekki upp. Það er því alveg óþarfi að ásaka fréttamanninn um þágufallssýki í þessu tilviki þótt seinni ábendingin hjá þér sé sanngjörn.

[Eygló, 7.9.2009 kl. 03:15]

Setningin sem Sveinn bendir á hefði ekki misskilist ef "gamla" kommusetningin hefði verið notuð.

Ef ég e-n tíma set í framleiðslu megrunarfæði ætla ég að vöruheitið:  "átlétt".

Hvernig er staðan í þessu tilviki:  "Þar sem landsleik Íslands og  Noregs  ber  hæst"  Ég er ekki að agnúast út í málfarið, heldur skil ég ekki neitt. Það getur þó bara verið kunnáttuleysi mitt um fótbolta : )   Nú, án þess að vita, kann vel að vera að ég sé UNDIR annarlegum áhrifum!  : )

[Þorsteinn Briem, 7.9.2009 kl. 04:16]

Lánstíminn verður lengdur en ekki: Lengt verður í láninu.

Að framlengja einhvern en ekki að framlengja einhverjum.

„Markús Máni Michalesson Maute, landsliðsmaður í handknattleik og leikmaður þýska liðsins HSG Düsseldorf, hefur nýtt sér ákvæði í samningi sínum við liðið og framlengja honum ekki sjálfkrafa um eitt ár - til loka júní 2007.“

Vill betri samning hjá Düsseldorf - Mbl.is

[Eiður (IP-tala skráð) 7.9.2009 kl. 10:40]

   Fellst á  rök þín,  Sveinn. Var  fullfljótur á mér.

[Jóhanna Geirsdóttir (IP-tala skráð) 7.9.2009 kl. 18:59]

Hirðuleysislegt málfar er dónaskapur við lesendur:

Sagður fullur að halda framhjá
http://www.visir.is/article/20090906/FRETTIR01/44582146

Björgvin G. Sigurðsson þingmaður skrifar áhugaverða grein á bloggsíðu sína í dag þar sem hann veltir fyrir sér níð í skjóli nafnleysis. Björgvin veltir fyrir sér hver það sé sem beri ábyrgð á slíkum níð.

[Þorsteinn Briem, 7.9.2009 kl. 22:06]

Ný BA-ritgerð í lögfræði um ærumeiðingar á Netinu