Molar um málfar og miðla CXXXVIII

 Í hádegisfréttum RÚV (30.08.2009) þegar fjallað var um stjórnmál í Japan tvísagði fréttamaður  flokkinum. Þágufall orðsins  flokkur með ákveðnum greini er flokknum ekki flokkinum. Þá  talaði  sami fréttamaður um  stjórnmál í  Japan árið níutíu og þrjú.  Ég  hef  efasemdir um að miklar upplýsingar séu fyrir  hendi um  stjórnmálaástandið í Japan  á því herrans ári 93. Auðvitað átti að segja  árið  nítján hundruð níutíu og  þrjú.  Hitt er letistytting. Þetta er  nokkuð sem kennt var í fyrsta bekk í gagnfræðaskóla  í mínu ungdæmi.

Svo var tekið til orða í fréttum RÚV (29.08.2009) að Obama forseti hefði flutt líkræðu  við útför Teds Kennedys.  Útfararsiðir eru  aðrir í  Bandaríkjunum en  hér hjá okkur. Yfirleitt   flytja nokkrir vinir  hins  látna   stutt minningarorð  eða kveðjuorð við útförina.Svo er einnig í fleiri löndum.  Molaskrifari hefur til dæmis  flutt  minningarorð af þessu tagi  við útför  vinar í Noregi og þar töluðu  fleiri úr  vinahópi hins látna. Mér finnst ekki rétt að kalla þetta líkræður í þeirri merkingu  sem það orð hefur í okkar máli.

Úr frétt á  Vefdv (30.009.2009) : Lík níu ára stúlku fannst í flutningabíl sem lagður var við hraðbraut nálægt Warmington í Englandi. Stúlkan var kyrkt til dauða.  Þetta er afskaplega sorgleg frétt, en hörmulega illa skrifuð. Bíllinn var  ekki lagður. Bílnum var  lagt. Stúlkan var kyrkt. Kyrking  hefur  dauðann í  för með sér.

Óþarft nýyrði var í fréttum Stöðvar  tvö (310.08.2009)   Þar var talað um fiskitogara. Hér á landi  er  málvenja að tala um  togara. Litlir togarar ,  smíðaðir í Austur Þýskalandi fyrir  ævalöngu  voru reyndar kallaðir tappatogarar. Þetta er ekki stórmál, en......

Stundum hittir maður óvart á óvænta skemmtan á skjánum. Þannig var í  gærkveldi (30.08.2009) er ég leit aðeins  við á ÍNN. Þá var  fyrrverandi aðstoðarmaður borgarstjórans í Reykjavík að herma  eftir Ingva Hrafni,sem sagður var í  London. Ingvi Hrafn  er betri ,gretturnar eru stórfenglegri og leikurinn  sannferðugri.  Vita þessir ágætu menn  ekki hve  menn sem   æsa sig og þykjast ógurlega  reiðir  á skjánum  eru hallærislegir í augum  fólks sem situr  í  rólegheitum  í sjónvarpsstólnum sínum í stofunni heima ?

Reiði er alltaf hlægileg í sjónvarpi. Það er ein af grundvallarreglum þessa fjölmiðils.

Athugasemdir

[Þór Jónsson (IP-tala skráð) 31.8.2009 kl. 18:24]

Takk fyrir marga góða mola, Eiður, en ég má til með að gera litla og góðlátlega athugasemd.

Þú tekur svona til orða: „Þannig var í gærkveldi (30.08.2009) er ég leit aðeins við á ÍNN.“

Mér finnst vera munur á því að líta við eða líta inn. Sá sem lítur við horfir um öxl. Þú hefur hins vegar litið inn (eða komið við) á ÍNN.

Nú eru margir sem orða þetta svona samt. Mér finnst það ekki betra fyrir því.

Bestu kveðjur, Þór Jónsson

[Eiður (IP-tala skráð) 31.8.2009 kl. 18:55]

   Sæll Þór,   Þegar ég  skrifaði þetta   var ég handviss um að einhver mundi gera athugasemd. Ég er þér að hluta  til sammála. Ég hefði líka  getað  sagt : Ég leit aðeins á ÍNN í kvöld. Að líta við  er  löngu orðið  fast í málinu í merkingunni  að koma við, eða líta inn , og  mér finnst ekkert  að því. - Ég lít kannski  við  hjá  dóttur minni á  morgun.