Eitt það hrikalegasta....

 Í dag varð ég vitni að hrikalegasta framúrakstri sem ég hef  séð. Er þó búinn að hafa  bílpróf  síðan haustið  1956 og meirapróf  síðan haustið  1960.

 Ég var að  koma  að  austan  á leið  til Reykjavíkur á þjóðvegi númer 1 rétt fyrir ofan  Sandskeið. Var  annar eða þriðji í   fjögurra bíla  röð  sem ók á  90-95 km  hraða . Allt í einu  kemur  lítill vinnubíl, sennilega Benz með  stuttum palli og  fer fram úr  mér og  næsta  bíl á  undan. Til  þess hefur hann sjálfsagt þurft  að  fara upp í hundrað km   hraða  eða  svo,sem kannski er  ekki tiltökumál við framúrakstur  en framúrakstur þarna var með öllu ástæðulaus.

En sem þessi  vinnubíll er við hliðina á mér  kemur þriðji  bílllinn  á leið  til  Reykjavíkur,  sennilega Porschejeppi ,  svartur  og  fer  fram úr  okkur  báðum   þannig að skamma  stund   voru þrír   bílar samhliða á leið í sömu átt á þessum vegi þar sem  aðeins er ein akrein í hvora átt.  Jeppinn  þurfti að  fara út  af  slitlaginu með  hjólin   vinstra megin og þyrlaði upp  ryki og  grjóti.  Hann var svo  fljótur  framúr og   fljótur að hverfa að mér þykir líklegt að hann hafi  verið á  140  til 150 km hraða.  Þetta sáu mennirnir á  Suðurverksbílnum  jafnvel og ég  svo og  þeir  sem  voru í næsta    bíl á  eftir en  sá  bíll  var af gerðinni Land Rover  Discovery, sýndist  mér.  Þetta er eitt  það svakalegasta  sem ég hef  séð , og er nema  von að þjóðfélag okkar sé undarlegt  þegar   menn hegða  sér  svona.  Það var  Guðsmildi  að þarna varð  ekki alvarlegt slys.  Númerið á  bíl ökuníðingsins  var mér ógerlegt að sjá  , en sennilega  hafa  þeir á  Suðurverksbílnum séð það, en  ég  sá  ekki betur  en þeir  beygðu  til  hægri út  á línuveg nokkru neðar. Það þarf að hafa hendur í hári  svona manna.

Athugasemdir

[Eygló, 13.8.2009 kl. 01:40]

Vonandi hafa þeir náð bílnúmerinu og tilkynnt glæpaaksturinn.  Á þetta fólk börn? foreldra? systkin? Er því sama um "annað" fólk.  Það má líkja þessu við vanvita að leika sér að skotvopni.

[Eiður Svanberg Guðnason, 13.8.2009 kl. 19:08]

 Ók  framhjá  þessum  stað á austurleið í dag. Sá að þar  voru tvær  háar,gular kantstikur brotnar.Það  skyldi þó aldrei  vera að einhversstaðar væri svartur Porschejeppi  rækilega  rispaður og  beyglaður á  vinstri hlið ?

[Eygló, 13.8.2009 kl. 23:21]

Okkur væri nú sennilega skítt sama um það. En bílstjórinn, farþegarnir og aðrir vegfarendur!

Ekki veit maður hvort þetta hefur verið "ungur ökumaður" eða níræður níðingur, en hvað er hægt að gera? Maður veit aldrei hvenær einhver manni nærkomin verður fórnarlamb.