Molar um málfar og miðla CXXV

 Molaskrifari heyrði ekki fréttir RÚV (12.08.2009)  klukkan 08 00, en málglöggur áhugamaður um  íslenska  tungu benti   skrifara á að hlusta á þennan fréttatíma á  netinu. Í fréttatímanum var viðtal við   forstöðumann greiningardeildar Íslandsbanka, sem    sagði að  ríkissjóður væri að afla sér fé á innlendum  fjármálamarkaði.  Þessi ambaga  er orðin ótrúlega algeng. Menn kunna ekki að beygja orðið  fé. Bankamaðurinn hefði  auðvitað átt að   segja að  ríkissjóður  væri að afla sér  fjár. Svo geta menn til gamans velt því  fyrir sér  hvort   rétt sé að   treysta banka  fyrir  fé þar sem menn kunna   ekki þessa grunnskólamálfræði.

  En tönnlast fréttamenn á   þeirri ensku  eftiröpun að tala um  síðasta  föstudag,  ekki   föstudaginn  var. Í fréttatíma  RÚV kl 19 00 (12.08.2009) talaði fréttaþulur um síðasta haust (e. last fall) . Auðvitað átti  fréttaþulur að  segja í fyrrahaust. Í sama fréttatíma  var sagt, þegar uppi verður  staðið. Átt var  við, þegar upp verður  staðið (sem mér finnst nú reyndar ekki  mjög fallegt mál) , þegar öllu er á  botninn hvolft, þegar öll kurl  eru komin  til  grafar.  Ekki fleiri orð um það að sinni.

 Lesendum þakka ég athyglisverðar ábendingar og jákvæðar undirtektir  við  það sem  sagt hefur verið í þessum Molum.

Athugasemdir

[Þorsteinn Sverrisson, 12.8.2009 kl. 21:35]

Það er kannski eðlilegt að sleppa því að beygja orðið fé ef það er illa fengið. Hæfir þá skel kjafti.  Einu sinni hafði ég kennara sem notaði talaði alltaf um einkanir ef þær voru undir 5 en einkunnir ef þær foru hærri en 5.

[Haukur Kristinsson (IP-tala skráð) 12.8.2009 kl. 22:04]

Það er margt á sömu bókina lært hjá þessum vesælu bankamönnum. Þeim virðist ekki viðbjargandi.

Bankaþjófarnir (ógæfumennirnir) skulu kallast sparifjárþjófar, en ekki spariféþjófar.

[TJ (IP-tala skráð) 12.8.2009 kl. 23:45]

Eftir atkvæðagreiðslu (ekki kosningu) á Alþingi á dögunum um umsókn að Evrópusambandinu heyrði ég annað hvort eða las að ungliðar einhverrar stjórnmálahreyfingar "fylktu sér á bakvið varaformanninn". Hvort þeir földu sig þar vegna hræðslu við eitthvert skrímsli eða ætluðu í raun að fylkja sér að baki varaformanninum skal ósagt látið.

[Eiður (IP-tala skráð) 13.8.2009 kl. 06:39]

 Rétt er það TJ  að mjög er  algengt að  fréttamenn geri ekki mun á  atkvæðagreiðslu og  kosningu. Það er eins og sumir  þeirra   skilji ekki að þetta er  ekki það sama.  Of oft heyrist   hitt  líka  að   fylkja sér á bak við einhvern , sem er  bara bannsett rugl.