Molar um málfar og miðla CIX

 Í tíu fréttum RÚV  sjónvarps (21.07.2009)  var sagt: Davíð Bragi Konráðsson fornleifafræðingur  brá í brún þegar... Betur hefði  fréttamaður sagt: Davíð Braga Konráðssyni fornleifafræðingi  brá í  brún þegar..  Í sama fréttatíma  var sagt að Icesave málið væri  þungt á  fæti. Rugl. Kannski mætti   segja málið  þungt í vöfum, eða bara erfitt viðfangs.

 Af Vefdv (21.07.2009): ..þar sem gerðar eru athugasemdir við hjólbarða konunnar ...   Það sem  blaðamaður á  við er að gerðar hafi verið athugasemdir  við hjólbarðana  á  bíl konunnar.  Varla hefur konukindin verið á hjólbörðum.

Hvenær rífur þingmaður trúnað? Þannig  spyr bloggari á Moggabloggi. Þjóðin veit að margir þingmenn rífa kjaft. Bloggari  er ekki   góður í stafsetningu. Hann  hefði átt að  skrifa: Hvenær  rýfur þingmaður trúnað?  Rýfur af að rjúfa.

Venjuleg og algeng  ambaga í Vefmogga (22.07.2009): ..á flugvellinum í Toronto hafi heyrst tilkynnt í hátalarakerfinu að þeir sem hefðu keypt áfengi á vellinum væri ráðlagt að skila því.  Hér ætti  auðvitað að standa: ..að þeim sem hefðu keypt áfengi á vellinum væri ráðlagt að skila því.

Fyrirtækið Rekkjan og  auglýsingasmiður þess  halda áfram að misþyrma móðurmálinu í heilsíðuauglýsingum í  dagblöðunum  (Fréttablaðið 22.07.2009) þar sem  auglýst  eru svo kölluð  þrýstjöfnunarsvampsrúm.  Ef   fyrirtækið  væri að  auglýsa trérúm  hétu þau  væntanlega trésrúm í samræmi  við þetta! Að þessu hefur  raunar verið  vikið áður í Molum.

 

Athugasemdir

[Eygló, 23.7.2009 kl. 02:06]

í Sjónvarpsfréttum í kvöld las fréttaþulur, sem ég reyndar hef mætur á, TVISVAR  "óafturkræfanlegur". Svo var fréttin lesin af öðrum fréttamanni. Hjá honum var líka allt "óafturkræfanlegt" líka!!!  "Óafturkræf", ætti að vera nóg, eða hvað?

[Karl Jóhann (IP-tala skráð) 23.7.2009 kl. 14:23]

Af visir.is:

Sló Ásta fjölmörg slög í þingklukkuna og bjölluhljóðin ómuðu um þingsalinn, en þetta er ekki í fyrsta sinn sinn sem forseti hefur neyðst til að áminna þingmenn af þessu tilefni.

Blaðamaðurinn Hafsteinn Gunnar Hauksson ætti að skammast sín.

Frétt Vísis

[Karl Jóhann (IP-tala skráð) 23.7.2009 kl. 14:56]

Meira af visir.is:

Einkunnin byggist á árangri og stöðumati verkefna í hverju landi fyrir sig, en alls tóku 24 EES ríki þátt í könnunni. Jafnframt er yfirlit yfir tíðni dauðaslysa á börnum í þessum löndum.

[...]

Ef tölur Hagstofu Íslands eru skoðaðar, þá er dauðaslysatíðni barna hér á landi 5,1 á hvern 100 þúsund íbúa - einn sá lægsti í EES ríkjunum.

Frétt Vísis