Molar um málfar og miðla CI

Þeim sem langar í styrju eða fisk.. stóð í myndatexta í Morgunblaðinu (03.07.2009) Og ég sem hélt að Mogginn væri vaxinn upp úr  svona  villum !

 Heyrði  brot úr endurteknum þætti í Útvarpi Sögu (03.07.2009) þar sem  verið var að mæra og auglýsa hvalaskoðunarfyrirtæki í  Reykjavík.  Þar var skemmtileg  ambaga, eða mismæli, þegar önnur konan sem  rætt var  við kallaði hvalbátana ryðkálfa, en ætlaði sér  væntanlega að segja ryðkláfa. Annars hafa mér  sýnst hvalbátar Kristjáns  Loftssonar  bara  líta prýðilega út og vera hafnarprýði þótt komnir séu vel  til ára sinna. Í lokin sagði svo  stjórnandi þáttarins: Við  erum að  verða uppiskroppa með þáttinn. Hann átti  við að þeim tíma sem þættinum var  ætlaður í dagskránni  væri að ljúka. Að verða uppiskroppa með  eitthvað  er að  komast í þrot.  Þannig getur kaupmaður orðið uppiskroppa með  kanil eða kaffi.

Af Vefdv  (03.07.2009): Hann segist vonast til þess að svona lagað endurtaki sig ekki aftur.Það hálfa  hefði verið nóg. Meira af Vefdv (04.07.2009) : Þeir sem ætla að leggja leið sína í Þjórsárdal eða Úthlíð í dag er þó bent á að hafa fyrst samband við.... Fastir liðir eins og venjulega. Skrifari man ekki hvaðan hann lagði af stað.

Í  stuttu viðtali (04.07.2009) í hádegisfréttum  RÚV sagði  embættismaður Reykjavíkurborgar fjórum sinnum: Við erum að sjá.. Minna hefði mátt gagn gera. Sá hinn sami  talaði um að  koma fólki í virkni. Líklega var átt við að virkja hæfileika fólks  til góðs. Margt fleira  mætti segja um þetta stutta  viðtal.  Góðvinur sem einnig  hlustaði á þetta  viðtal sagði að senda ætti  þennan embættismann á námskeið í íslensku fyrir útlendinga !  Í  sama fréttatíma  var haft eftir  formanni  launþegasamtaka að menn væru ekki að ná  lendingu...

 Stundum er hér vikið að orðalagi í auglýsingum. Í heilsíðu auglýsingu  (DV, 03.-05.07.2009) býður  Humarskipið upp á ferskann humar. Sumar auglýsingastofur hafa   ekki vald á  grunnatriðum íslenskrar málfræði. Meira um auglýsingar: Ég verð að játa að ég átta  mig  ekki alveg á  auglýsingu Ríkisútvarps um eigið ágæti  þar sem  notuð   eru  brot úr   frægu Kastljósi  með Davíð Oddssyni og úr ávarpi  Geirs H. Haarde  forsætisráðherra þar sem hann biður  Íslandi  guðsblessunar.  Mér   finnst þessi auglýsing  ógóð. Kannski er ég einn um  þá  skoðun.  Mér finnst ekki í lagi að Ríkisútvarpið noti samtalsbrot og  brot úr  ræðu með þessum hætti.

 Einhverntíma sagði ég að  fjölmiðlamönnum liði best er þeir  töluðu við aðra  fjölmiðlamenn.  Sigmar Guðmundsson talaði við Láru Ómarsdóttur í Kastljósi og Lára  talar  við Sigmar í morgunútvarpi Rásar tvö. Þau eru  bæði starfsmenn Ríkisútvarpsins.  Alltaf er gott að leita ekki langt yfir skammt !

Annars er  firna mikið af  góðu efni í dagskrá   hljóðvarpsins og þar hefur  Sigrún Stefánsdóttir  dagsskrárstjóri breytt mörgu til bóta.Óþarfi fannst mér þó að slátra morgunvaktinni á  Rás eitt. Þar var ekkert að. Þar þurfti ekki að breyta.  En sérstaklega hrósa ég  vel undirbúnum og  vönduðum  tónlistarþáttum, sem eru margir á  Rás eitt. Ekki  er  hægt að  segja  það sama um sjónvarpið. Þrjár bandarískar bíómyndir í  bunu (03.07.2009) Það er ekki dagskrárgerð sem  hægt er að hrósa.

Athugasemdir

[Atli Steinn Guðmundsson (IP-tala skráð) 6.7.2009 kl. 22:03]

Þeim sem langar í styrju eða fisk.. stóð í myndatexta í Morgunblaðinu (03.07.2009) Og ég sem hélt að Mogginn væri vaxinn upp úr  svona  villum !

Ofangreint er rangt hjá þér, Eiður. Í heild sinni hljóðaði setningin svo: „Þeim sem langar í styrju eða fisk í tjörn er bent á að hafa samband við Gunnar Helgason hjá gæludýrabúðinni Dýragarðinum. “ Þarna er um að ræða innskotssetningu en sé hún fjarlægð stendur eftir setningin „Þeim [...] er bent á...“ sem er algjörlega rétt málfræðilega. Hins vegar hefði verið heppilegt að setja kommur utan um innskotið.

Atli Steinn Guðmundsson, íslenskufræðingur og prófarkalesari á Morgunblaðinu fyrir tæpum áratug

[Þorgrímur Gestsson, 6.7.2009 kl. 23:59]

Þar fékkstu á baukinn, Eiður! Að ófyrirsynju. Ég hef alltaf gaman af málfarsaðfinnslum þinum og ýmislegt sem þú nefnir þarna hefur stungið mín eyru líka! En ég ætlaði bara að taka undir það sem þú skrifaðir um Morgunvaktina; það var algjör óþarfi að slá hana af. Blessuð stúlkan sem kom í staðinn situr þarna og les af blaði alltaf það sama, morgun eftir morgun; klukkan hálfátta: Hitastigið í Reykjavík er..... þá slekk ég og kveiki ekki fyrr en á áttafréttum en hlusta á KK með mikilli ánægju. Gott að hann var ekki sleginn af!

Bestu kveðjur

[Eiður (IP-tala skráð) 7.7.2009 kl. 07:57]

  Sjálfsagt er þetta rétt hjá þér,  Atli Steinn.  Enda er ég ekki íslenskufræðingur, aðeins leikmaður,sem hef áhuga á  móðurmálinu. Kannski varð mér  svo um að lesa  þeim sem langar að ég rýndi ekki nægilega í framhaldið. Hvað um það, mér  finnst þetta  óhönduglega orðað. Þakka þér ábendinguna.

Þakka þér orðin, Þorgrímur. Ég kann því ágætlega að heyrast skuli í kirkjuklukkum að lokinni morgunbæn. En ég kann því illa að umsjónarmaður  segi á   hverjum morgni að klukkurnar  sem  við heyrðum  tilheyri  og  svo nafngreinir  hún kirkjuna.  Hún ætti að  segja    við heyrðum klukkur Útskálakirkju eða þetta voru  klukkur dómkirkjunnar í  Reykjavík.  Þá  velti ég því fyrir mér  hvort   fliss sé  óhjákvæmilegur  fylgifiskur  morgunútvarpsins á  Rás 2. Það var  búið að vera lengi í tíð  fyrri umsjónarmanna og  virðist halda áfram með  nýju fólki. Ég endist ekki til að hlusta  á  fólk  hlæja að eigin aulafyndni.

[Atli Steinn (IP-tala skráð) 7.7.2009 kl. 10:49]

Það er allrar lofsemi vert að menn hafi áhuga á móðurmálinu á þessum síðustu og verstu. Þetta er óhönduglega orðað, ég get alveg fallist á það með þér. Ef svona löng innskotssetning er ekki að minnsta kosti innrömmuð með kommum missir lesandinn þráðinn og samhengið glatast. Daglega þarf ég að minna sjálfan mig á þetta þar sem ég starfa við að skrifa útvarpsfréttir þar sem hlustandinn sér engar kommur. Þar þarf sérstaklega að gæta að lengd innskota.

Þorgrímur: Vissulega ánægjulegt að KK var ekki sleginn af:)

Atli