Molar um málfar XCV

  Sú sem  fjallaði  byggingu  Tónlistarhússins í Kastljósi RÚV (24.06.09.)  sagði: Samkvæmt  Stefáni Hermannssyni..  Þetta er sami ósiðurinn og  þegar blaðamenn skrifa:  Samkvæmt  lögreglunni...Betur  hefði verið sagt:  Að sögn  Stefáns  Hermannssonar. Það  fór reyndar ekki á milli mála  að umsjónarmaður Kastljóssins var andvígur   framhaldi á byggingu  Tónlistarhússins. Kannski  hafa  fleiri en  Molaskrifari  saknað þess að  ekki var spurt:  Hvað kostar að hætta  við bygginguna ?

Merkileg fyrirsögn á Vefdv (25.06.09.) vakti  forvitni mína.: Hollywood-maddama  handtekin og  stjörnurnar skelfa. Við lestur meginmáls undir þessari  fyrirsögn (á erfitt með að kalla þetta frétt) kom í ljós að  stjörnurnar  voru ekki að  skelfa neinn. Heldur átti að  standa þarna   stjörnurnar skjálfa. Eitt er að skelfa, annað að skjálfa.  Á íslensku  þýðir orðið maddama eiginkona prests, prestsfrú  eða  hefðarfrú. Á ensku er orðið madam notað um konu sem  stjórnar hóruhúsi, hórumömmu.  Það er  því aulaþýðing  að kalla  slíka  konu maddömu. Síðan læt ég lesendum  eftir að  dæma þessa  setningu:  Og er því óhætt að segja að stjörnurnar skelfi nú í skónnum sínum yfir því hvaða upplýsingar Braun gæti haft um þá. Skylt  er að geta þess að  síðar var  skelfa  breytt í  skjálfa. Leiðrétt setningin leit þá  svona út: Og er því óhætt að segja að stjörnurnar skjálfi nú í skónnum sínum yfir því hvaða upplýsingar Braun gæti haft um þá.  Leiðréttingin náði sem sé ekki mjög langt.

Ef veitingahús óviljandi ræður kokk, sem eldar óætan mat, er kokkurinn rekinn. Ráðamönnum  Vefdv finnst greinilega í góðu lagi að  ráða blaðamenn,sem kunna ekki að  skrifa.

Sífellt  er  verið að rugla saman forsetningunum að og  af. Þannig  skrifar  alþingismaður á  bloggsíðu (24.06.09.) sinni um samantekt um Icesavemálið: Dreifi henni hér með, af fengnu leyfi frá höfundi.   Hér á  auðvitað  að standa: ...  að  fengnu leyfi.. Af fengnu leyfi er málleysa og  rökleysa.

Annað sem  oft er   ruglað  með er að ganga á eftir og  að ganga  eftir. Þessu var  ruglað  saman í  tíufréttum RÚV sjónvarps (24.06.09.) þegar  fréttamaður  talaði um að ganga á  eftir  loforðum. Hann  hefði átt að   tala um að ganga  eftir  loforðum. Að krefjast efnda  á loforðum. Að  ganga  á  eftir e-m  er að ganga  fyrir aftan einhvern, en á  ganga eftir e-u hjá e-m er að krefjast e-s  af e-m.

Athugasemdir

[Sigfús (IP-tala skráð) 26.6.2009 kl. 00:13]

Það hefur lengi hrjáð veffréttaritara að vera óskrifandi. Annað sem ég er farinn að taka eftir er að orðin víst og fyrst virðast farin að vefjast fyrir fólki meira en áður. Oft kemur annað, þá aðallega víst, þar sem fyrst ætti að standa. Veit ekki hvort þú hefur fjallað um það, en ég les síðuna þína samt nokkuð reglulega og þakka góð skrif fyrst ég er farinn að skrifa hér eitthvað á annað borð.

[Jón Óskarsson (IP-tala skráð) 26.6.2009 kl. 00:42]

  mbl.is | 25.6.2009 | 23:50

"Lögregla hefur yfirheyrt faðirin ..... en segir að hann sé niðurbrotinn.

 "Lögregla hefur yfirheyrt föðurinn og segir hann vera niðurbrotinn.

Vefmiðlar Mogga og Vísis og DV hafa það að leiðarljósi í sínum fréttum að þær skuli skrifaðar af fólki sem ekki hefur hið minnsta vald á móðurmáli sínu.

[Eygló, 26.6.2009 kl. 01:54]

Ekki vildi ég mæta stjörnu sem skelfir í skónnnnnum, það veit hamingjan.

Sigfús, mig langar svo að skilja það sem þú imprar á. Hef aldrei séð/tekið eftir ruglingi með "víst" / "fyrst".  Lát heyra/lesa :)

Ég les ALLAR molafærslur þínar, Eiður.

[Eiður (IP-tala skráð) 26.6.2009 kl. 08:31]

   Ekki átta ég mig heldur á þessu með víst/fyrst. -  Það er engu líkara  en í grunnskólanum sé  ekki lengur lögð áhersla á að kenna nemendum  beygingu og  notkun orðanna:  Faðir, móðir, systir, bróðir. Sýnist það sorgleg staðreynd.

[Kristján Jón Blöndal (IP-tala skráð) 26.6.2009 kl. 09:29]

Það var nýlega í sjónvarpsfréttum ungur athafnamaður á uppleið sem talaði um að eitthvað væri í uppsigi,blandaði þarna saman að eitthvað væri í aðsigi og að eitthvað væri í uppsiglingu.

Það er næstum hver einasti fjölmiðlamaður sem segir: Við ötlum í stað ætlum,að fara að gera þetta eða hitt,þetta er hvimleitt hjá honum Agli í Silfur Egils t.d.
Og annað: hvað er rétt þegar sífellt er klifað á seinasti og seinasta þetta,er búið að þurrka út orðið síðasti?

Það hlýtur að vera einhver merkingarmunur á notkun þessara orða,en sjálfur er ég ekkert fullkominn.

[Eygló, 26.6.2009 kl. 12:39]

Börn og unglingar. Við fyrirgefum þeim meðan þeir eru það.

Líffræðikennari í MH skrifaði á töfluna:  "Leðurblaðka" ???!!! 

[Eiður Svanberg Guðnason, 26.6.2009 kl. 17:04]

 Fyrir óralöngu, þegar Molahöfundur var formaður menntamálanefndar  efri deildar Alþingis, heimsótti nefndin  einn af menntaskólum höfuðborgarinnar. Komið var inn í  enskutíma, þar sem kennarinn hafði skrifað  stíl á  töfluna. Í  stílnum voru þrjár stafsetningarvillur. Aldrei, aldrei, hefði þetta   hent  mína gömlu enskukennara í  MR fyrir  hálfri  öld og  svolítið  betur, þau Bodil Sahn, Ottó Jónsson, Guðna Guðmundsson og  Gunnar Norland.  Úrvals kennarar öll.