Molar um málfar XC

  Garðapósturinn, óháð bæjarblað í Garðabæ og Álftanesi, barst mér í pósti  fyrir nokkrum dögum. Þar er eftirfarandi  að  finna:  Kópavogspóstinum hafði samband fiskiprinsinn,Eyjólf Júlíus Pálsson, eiganda  fiskverslunarinnar Hafið  - Fiskiprinsinn sem staðsett er  að Hlíðarsmára 8  í Kópavogi. Hafið er sérverslun með  fiskafurðir fyrir  kröfuhafa grillneytendur  á  sanngjörnu verði. Prinsinn hvað hann hefur  spennandi fram að  færa á grillið í sumar?  Þetta er    með ólíkindum.  Í sama blaðið  er  reyndar  ótal margt  fleira  athugavert  , eins og  til  dæmis: .. unnu út frá þemanu endursköpun  og nýsköpun, sem kennarinn hafði sett þær  fyrir.

Og ég held að það sé raunar til skammar hvernig  hún hagar sér á bjöllunni. Þetta hefur  Fréttablaðið (17.06.09.) eftir þingmanni  Framsóknarflokks. Ég læt  lesendum  eftir að  dæma   þetta orðalag þingmannsins.

Bjarni Benediktsson, formaður Sjálfstæðisflokksins, sagði í  umræðu um Icesave-samningana, að þingmenn væru ekki að fara að staðfesta þessa samninga (Vefmoggi 18.06.09.). Eru ekki að fara að staðfesta. Varaformaður Sjálfstæðisflokksins  sagði svo  á Morgunvaktinni ( 19.06.09.):  Það er  fyrst núna sem  við erum að fara að sjá.... Erum að fara að  sjá. Einmitt það. Bráðsmitandi. Og þingmenn  Framsóknar halda áfram að  segja : Mér  langar.  (Utandagskrár umræða um Icesave  18.06.09.)

Af   Vefvísi (18.06.09.): Einn fulltrúi frá hagsmunasamtökunum telur að breska ríkið eigi að standa betur við fæturna á þeim sparifjáreigendum sem töpuðu sparifé sínu á falli Landsbankans.  Standa betur  við  fæturna á ! Þeim  bregst ekki bogalistin á Vefvísi. Sá  sem þetta skrifar á líklega við að  yfirvöld eigi  að  styðja  betur  við bakið á  sparifjáreigendum. Standa betur  við fæturna á   einhverjum  gæti líklega nálgast það að troða einhverjum um tær.

Athugasemdir

[Þorsteinn Briem, 19.6.2009 kl. 20:15]

„Það var hrint mér!“ - Ný setningagerð í íslensku.

[Haukur Kristinsson (IP-tala skráð) 20.6.2009 kl. 12:38]

Þakka þér Eiður Svanberg fyrir þína pistla um íslenska tungu. Þú reynir að feta í fótspor Helga Halfdánarsonar, sem er virðingarvert. Helgi sagði að það sýndi menningarstig hverrar þjóðar, hversu annt hún léti sér um að varðveita tungu sína. En menningarstig Íslands hefur að mínu mati aldrei verið lægra en í dag, ein afleiðing gróðærisins. Kæruleysi í málnotkun er með ólíkindum, jafnvel innan veggja Alþingis, enda stór hópur þingmanna með litla menntun og enn minni gáfur.

[Eiður (IP-tala skráð) 20.6.2009 kl. 18:05]

 Þakka þér orðin,Haukur. Ekki ætla ég mér þá dul að feta í fótspor Helga. Það er bara svo oft að maður getur ekki  orða bundist.

Ekki skal ég fjölyrða um  gáfur eða menntun þingmanna. Hinsvegar man ég ekki  til þess þau fimmtán ár sem ég átti sæti á Alþingi, að notað væri orðbragð eins og þingmenn Framsóknarflokksins telja  við  hæfi  nú um stundir.

[Þorsteinn Briem, 20.6.2009 kl. 19:51]

Ólafur Ragnar Grímsson, nú forseti Íslands:

• „Ég hélt satt að segja ekki, og vona að mér fyrirgefist að ég segi það, að svona skítlegt eðli væri inni í hæstv. forsrh. en það kom greinilega hér fram. (Gripið fram í: Hvað sagði ræðumaður?) Ég sagði: svona skítlegt eðli.“

13. febrúar 1992 — Um Davíð Oddsson, „Ræða Ólafs á Alþingi“."

[Eygló, 20.6.2009 kl. 23:37]

"...með  fiskafurðir fyrir kröfuhafa grillneytendur"

"...fyrst núna sem  við erum að fara að sjá..."

" ... standa betur við fæturna á þeim ..."

Þetta er svo víðáttuvitlaust að maður bara hlær (fer yfir "pirr"mörkin)