Molar um málfar LXXVI

Tvö dæmi úr fréttum (24.05.09.) Stöðvar tvö: Tveir Íslendingar til  viðbótar  eru nú grunaðir um að hafa smitast af  svínainnflúensu. Þetta  orðalag  ber  vott um  skort á máltilfinningu. Það er  eins og  mennirnir  séu  grunaðir um refsivert athæfi. Eðlilegra  hefði verið að  segja:  Grunur leikur á að tveir Íslendingar  til viðbótar hafi  smitast ... Þannig  var  tekið   til orða  í  sjónvarpsfréttum RÚV,  en í yfirliti um  helstu  fréttir  þar var  sagt , að  grunur  væri uppi  um  að fleiri hefðu  smitast. Það  orðalag  finnst mér   heldur ekki gott.   Hitt atriðið í fréttum Stöðvar  tvö var þetta  orðalag: Þau mál  sem  eftir   eru verður  lokið  með  öðrum hætti.  Enn eitt   dæmið um flaustursleg vinnubrögð.

Skrifað var á  Vefvísi (24.05.09.) : Hann vill lítið gefa upp um næstu skref sem hann segir geta skaðað rannsóknina. Það var og  , -  næstu skref  geta  skaðað  rannsóknina. Snjallir menn,  Vísismenn. Og hér  kemur meira  frá þeim sömu  (25.05.09.): ... en félagsmenn Fisfélagsins telja 160 meðlimi. Eðilegra og  einfaldara hefði verið að  að  segja: Í Fisfélaginu eru  160 manns. Í  sömu frétt  er ítrekað  talað um faratæki þegar átt er  við farartæki

Ég vildi óska þess þjóðkirkjunni hefði borið gæfa til að veita Sigrúnu Pálínu uppreisn æru ... þannig  tekur Kolbrún Baldursdóttir  bloggari (24.05.09.)  til orða  á  síðu sinni. Þetta er  röng   notkun  orðatiltækisins  sem maður sér  býsna    oft.    Einhver ber  gæfu  til... EKKI einhverjum beri gæfa eða gæfu    til.  Sami bloggari  kann  heldur  ekki  muninn á orðunum eftirmáli og  eftirmál, sem  oftlega hefur verið  vikið að  hér í Molum.

Athugasemdir

[Sigurður Grétar Guðmundsson, 27.5.2009 kl. 20:31]

Mæltu manna heilastur. Mér datt það í hug þegar ég heyrði þá frétt að tveir menn til viðbótar væru grunaðir um að hafa smitast af svínainflúensu hvort þeir væru góðkunningjar lögreglunnar.

[Ómar Ragnarsson, 27.5.2009 kl. 20:49]

Áfram, Eiður, gamli vinur! Nú er Pétur Pétursson allur og þá verður einhver að halda uppi merkinu!

Mér sýnist málkennd fjölmiðlamanna hraka ískyggilega um þessar mundir.

[Ben.Ax. (Benedikt Jóhannes Axelsson), 27.5.2009 kl. 21:09]

Þið Ómar eruð báðir gamlir fréttamenn. Hvort voruð þið ráðnir á sínum tíma til ríkisútvarpsins sökum þess að þið voruð góðir í íslensku eða hins að þið voruð fljótir að hlaupa?

[Þóra Guðmundsdóttir, 27.5.2009 kl. 22:33]

"Mennirnir eru Íslenskir að þjóðerni....... annar var sólbrúnn á hörund". Bylgjufréttir í gær af Seltjarnarnesráninu. Ég hlusta oft á fréttir á Bylgjunni yfir daginn og það er hending ef heill fréttatími er í lagi.

[Bjarni Kjartansson, 28.5.2009 kl. 13:45]

Þakka enn spakviturleg ummæli og föðurlegar umvandanir um málfar.

Var að hlusta á morgunfréttir í gærmorgun.  Man ekki í svipin hvort það var Bylgjan eða rás2.

Þar fjallaði fréttamaður um stöðu einhers fyrirtækis sem á í greiðsluerfiðleikum.  Hún sagði að framtíð þess væri í höndum ,,skuldunauta" þess. 

Svo getur auðvitað verið, að slík staða gæti komið til ef allir skuldunautar kæmu  sér saman um,  að greiða ekki skuldir sínar. Ef marka mátti af framhaldi fréttarinnar, var ekki um að villast, að það voru auðvitað Lánadrottnar fyrirtækisins, sem slík völd höfðu.

Þetta er dæmi um, að menn ættu að forðast of hátíðlegt mál, sem þeir ekki ráða við eða er þeim á hraðbergi.

Flyt enn þakkir.

Miðbæjaríhaldið

[Eiður (IP-tala skráð) 28.5.2009 kl. 17:29]

 Kærar þakkir fyrir uppörvun og  góðar undirtektir. Ben.Ax. , ekki getum við Ómar svarað þessu , - þú verður að spyrja þá sem  réðu okkur á sínum tíma !!!

[Kristján P. Gudmundsson, 28.5.2009 kl. 18:19]

Ágæti Eiður, við verðum svo sannarlega að vona, að þeir, sem eiga inneign fyrir skeytum þínum o.fl. aðilja, lesi þessar athugasemdir og reyni í framhaldinu að bæta úr eða sýni einhverja viðleitni í þá veru. Ég vil þakka þér ágætt frumkvæði í málfarsrýni gagnvart fjölmiðlum. Ekki veitir af og svo hafa margir aðrir gott af ap lesa pistla þína.

Með kveðju, KPG.