Molar um málfar LXIX

 Umsjónarmaður hádegisfrétta RÚV (17.05.09. Pálmi Jónasson)  las í  fréttayfirliti.yfirliti : „Orðalag tilllögu um Evrópusambandsaðild verður breytt,segir utanríkisráðherra." Þegar  hlustað var  á   fréttina kom í ljós  að utanríkisráðherra hafði ekki  tekið  svo til  orða,  enda kann Össur  Skarphéðinsson  undirstöðuatriði íslenskrar málfræði og beygingareglur  tungunnar  , -- og vel það. Össur er enginn bögubósi. Það skorti  hinsvegar  á kunnáttu hjá  fréttamanni  sem auðvitað hefði átt að  segja: „ Orðalagi  tillögu....." Það er  slæmt  þegar  fréttamenn   láta  ambögur  sér um munn fara  og verra þegar þeir  eigna  ambögurnar  viðmælendum.    Sömu amböguna endurtók umsjónarmaðurinn í   fréttayfirlitinu í lok hádegisfrétta.

  Um tíma  sendi ég  öðru hverju  það sem ég kallaði  „ vinsamlegar ábendingar" í  tölvupósti  til   fréttastofu  RÚV. Þeim var  nær undantekningarlaust ekki svarað.  Þessvegna hætti ég þessu, enda   eru málfarsleg mistök óþekkt  fyrirbæri í Efstaleitinu, - eins og allir vita.  Þar skjátlast mönnum eigi.

„ Ný lögreglustöð opnar í Grafarvogi - ",  sagði í  fyrirsögn  á vefritinu Pressunnui.   Hvað  skyldi lögreglustöðin hafa opnað ? Ætli hún hafi ekki verið opnuð? Þannig  væri  rétt að  taka  til orða.  Einkennilegt hvað  sömu  ambögurnar  birtast aftur  og  aftur  á  prenti  og í  ljósvaka- og vefmiðlum.

Makalaus  frétt  var á vefvísi (17.05.09.)  Fyrirsögn  fréttarinnar   var:  „ Björguðu manni  fyrir  slysni."  Sá  sem þetta   skrifaði veit   greinilega ekki að  slysni þýðir óheppni   eða klaufaskapur.  Þannig  að  fyrirsögnin  er  út í hött. Hann  hefur líklega   átt  við að  manni  hafi verið  bjargað  fyrir  tilviljun.

Fréttin er  svona: „Meðlimir í Björgunarsveitinni Suðurnes, sem voru á leið heim af landsþingi Slysavarnafélagsins Landsbjargar, sem haldið var á Akureyri um helgina, óku fram á bílveltu rétt sunnan við Staðarskála í Hrútafirði um klukkan hálf fimm í dag.

Ökumaðurinn var einn í bílnum. Hann var á toppnum þegar björgunarsveitina bar að.

Náðu meðlimir hennar manninum úr bílnum, settu í hálskraga og á bakbretti. Hann var svo fluttur í björgunarsveitarbílnum á móti sjúkrabíl sem kom frá Hvammstanga. "

 Þarna er staglast á orðinu „ meðlimir" þegar   tala  hefði  átt um  félaga  eða  björgunarsveitarmenn.  Og  svo er  spurningin:  Hvor var á  toppnum ökumaðurinn  eða  bíllinn? Það er  ekki   hægt að  tala um  skýra hugsun að baki  þessum skrifum. Einkennilegt er  líka að   Vefmoggi,  Vefvís og  Vefdv notuðu öll  sama orðalagið  í  frásögn  af þessum atburði ." ...óku fram á  bílveltu..." Það er   kjánalegt að  tala um að  „aka fram á  bílveltu". Hér   étur  hver  miðillinn vitleysuna  eftir öðrum.  Þetta var skrifað  á sunnudegi (17.05.09.).  Ómar Ragnarsson gerir  þessu  góð skil á bloggi sínu (18.05.09.) svo  og þeir  sem  skrifa  athugasemdir  við  skrif Ómars.

Í  sjónvarpsfréttum RÚV (17.05.09) var talað um  hve   vel  var tekið á móti  okkar sigursælu  Moskvuförum. Sagt  var að  tekið hefði verið „á  móti   hópnum  með kostum og kynjum". Betra hefði  verið að  segja  að Moskvuförunum hefði verið tekið með  kostum og kynjum,  þegar þau komu á Austurvöll eftir  sína  glæsilegu Rússlandsför þar sem þau  sannarlega voru landi og þjóð   til sóma.

Athugasemdir

[Árni Gunnarsson, 18.5.2009 kl. 22:42]

"Hvers á þjóðin skilið?" sagði og endurtók í það minnsta þrisvar hinn nýkjörni þingmaður Sigmundur Ernir Rúnarsson á Alþingi í kvöld.

[Eiður (IP-tala skráð) 19.5.2009 kl. 05:46]

  Ja, hérna,segi ég nú bara. Viðurkenni að ég hætti hlustun  að mestu  eftir   fyrstu umferð. Líklega er  brýnna  að halda íslenskunámskeið fyrir  nýja  þingmenn, - suma hverja að minnsta kosti,  en  kenna þeim klæðaburð ! Það er  auðvitað  skelfilegt að  hlusta á  svona  ambögur úr ræðustóli á  Alþingi. Líklega hefur þingmaðurinn  átt  við Hvers á þjóðin  að  gjalda ?   Þetta er ótrúlegt.

[Jens (IP-tala skráð) 19.5.2009 kl. 09:50]

Sæll Eiður, og þakka þér margar ágætar ábendingar hérna.

Ég er ekki viss um að þetta sé bara léleg kunnátta sem stendur þessu fjölmiðlafólki fyrir þrifum, heldur einfaldlega alger leti.  Sem dæmi um það nefni ég hroðvirkinslega skrifaða og afskaplega illa unna frétt á netmogganum núna, og skeyti inn hér neðst.  Hún er ekki bara illa skrifuð heldur bítur ritarinn höfuðið af skömminni með því að nenna ekki að fletta upp hvað Sæmundargata heitir, nefnir þetta bara "þar sem beygt er inn frá Hringbraut inn að Háskóla Íslands" (sic).

Honum hefði dugað að fletta upp á simaskra.is, það hefði tekið hann 10 sekúndur.

Innlent | mbl.is | 19.5.2009 | 00:11

Vélhjólaslys í Reykjavík

Maður slasaðist í vélhjólaslysi við Þjóðminjasafnið í kvöld. Fjöldi slökkvibíla og lögreglubíla er á vettvangi. Slysið varð þar sem beygt er inn frá Hringbraut inn að Háskóla Íslands.

Vitni segir ökumann vélhjólsins hafa legið hreyfingarlausan á Hringbrautinni fyrir stundu.

Tveimur sjúkrabílum var ekið í skyndi á vettvang slyssins.

Að sögn lögreglunnar á höfuðborgarsvæðinu er talið að maðurinn hafi misst stjórn á vélhjólinu.

Því er ekki talið að um árekstur við annað ökutæki hafi verið að ræða.

[Predikarinn - Cacoethes scribendi , 19.5.2009 kl. 10:58]

Það var skelfilegt að hlýða á ræður sumra þingmannanna í gærkvöldi. Tekið skal undir ábendingu Árna Gunnarssonar, en sérstaklega var tekið eftir umræddu orðfari hins nýja þingmanns geislaBAUGSmiðlanna. Þar var augljóslega ekki um mismæli að ræða, hann endurtók þetta ítrekað.

[Magnús Geir Guðmundsson, 19.5.2009 kl. 23:18]

Eitthvað annað en góður hugur í garð tungunnar, réð för hjá "ræðumanni" hér næst á undan mér, en látum það nú vera. Þetta var jú leitt með Sigmund ERni, en sem ég hef nú bent á, var ræðan samt vel flutt og með vissu stílbragði, er sýndi aðra hlið en fólk hefur allavega oftast séð á fjölmiðlamanninum fyrrverandi.Hef trú á að Simmi eigi eftir að standa sig vel sem þingmaður.