Molar um málfar LXVII

  Ekki kunni ég  við það  orðalag í ræðu   forseta Íslands  við  setningu Alþingis, er hann talaði um  „djúpstæða gjá. "  Talað er um   djúpa  gjá eða   hyldýpisgjá , en   að tala um  djúpstæða gjá      finnst  mér  vera uppskrúfað bull.  Þetta er  reyndar ekki í  fyrsta skipti, sem í ljós kemur að vandað málfar er ekki sterkasta hlið þjóðhöfðingjans. 

Nýr þingmaður, Þór Saari ,  notar  orðið  „slímsetur"  í bloggfærslu (15.05.06.) Orðið  slímseta  er  mér  vitanlega  ekki til. Í íslenskri orðabók er  hinsvegar orðið  slímusetur (kvk. flt.), að  sitja slímusetur  er að sitja lengur  sem  gestur en sæmilegt þykir, lengur en orlofsnæturnar,  en þær  voru þrjár að fornum sið.Ef litið  er á málið með ítrustu velvild ,þá er  þetta kannski bara innsláttarvilla.

Merkilegt er  í ljósi  frétta af  innbyrðis átökum og  bágri stöðu  sparisjóðsins Byrs  að í auglýsingum  skuli  enn  tönnlast á  ensku hugsuninni um „fjárhagslega heilsu". Það kórónar svo  vitleysuna  þegar poppsöngvarinn þeirra  er látinn segja  í auglýsingu ( SAM bíó í Kringlunni ,15.05.09.) : „Þetta er  fjárhagsleg heilsa  fyrir mér." Hvílík lágkúra !  

Athugasemdir

[Eygló, 17.5.2009 kl. 00:40]

Ágæti Eiður, enn stelurðu af mér glæpnum. Ert reyndar vel að honum kominn :)

Eins og mér er hlýtt til "poppsöngvarans" góð er hann með öllu ónothæfur til að fara með íslenskt mál opinberlega. Sennilega hefur "fyrir mér" samt verið texti sem honum hefur verið færður (jafn hallærislegur fyrir það) 

[Hákon (IP-tala skráð) 17.5.2009 kl. 08:29]

Kæri Eiður, takk fyrir áhugavert blogg, um málfar og fleira. 

Mér datt í hug að benda á ranga notkun orðsins "vergangur" í fréttum útvarpsins 13. 5. kl 10,00. Þar var sagt: "Fjöldi dýrahræja liggur út á vergangi". Þetta tengdist frásögn af flóðum í Brasilíu í lok fréttatímans. Raunar var orðið notað að ég held tvisvar sinnum áður í fréttatímanum, en þá í réttri merkingu. Ég hlustaði aftur á fréttirnar áðan, til að ég væri nú örugglega að fara rétt með, fyrst ég fór að skrifa þér þessar línur:)  Ég er líka hjartanlega sammála þér um uppskafið málfar forsetans. Ég tók líka eftir að við þingsetninguna var nýr tónn í röddinni, Hann er kannski búinn að leggja til hliðar hástemmda 2007 tóninn, sem hæfði útrásarvíkingum og fína fólkinu.

[Eiður (IP-tala skráð) 17.5.2009 kl. 22:27]

Alveg rétt, Hákon. Þarna var ruglað saman orðunum víðavangi og vergangi. Þetta er svona ámóta og í frétt á Vefvísi í dag þar sem talað var um að manni hefði verið bjargað af „slysni". Fjalla nánar um það síðar.