Molar um málfar LXIII

  Líklega er til  lítils að gera  athugasemdir  við málvillur á bloggsíðum. Sigríður Laufey Einarsdóttir (27.04.) skrifar: „Hvers vegna einhliða áróður þar sem  heildarhagsmunir þjóðarinnar er ekki gerð skil ... " Hér ætti  auðvitað að standa: --  „ ... þar sem  heildarhagsmunum þjóðarinnar eru ekki  gerð  skil".  Ekki  virðist  það  skipta miklu,   þegar að málvillum kemur,  hvort  fólk státar  af háskólagráðum, eður ei. Guðfræðingurinn Sigríður  Laufey er í hópi þeirra  bloggara, sem ekki leyfa  ritun  athugasemda   við bloggfærslur sínar. Það er sérkennilegt og þeir bloggarar skipa sér skör hærra,en  við  sem leyfym að  skoðunum okkar sé  andmælt. Kannski eru þessir  bloggarar bara ekki áhugasamir um skoðanir annarra. Það væri athugandi að  birta lista yfir þá  afkastabloggara sem  ekki leyfa  athugasemdir  við skrif sín.

 Það henti ágætan fréttamann RÚV (27.04.)  að tala um „skipsbrot". Þetta orð er ekki  til. Við  tölum um  skipbrot og  skipbrotsmann, þann sem  bjargast  úr  sjávarháska, þegar skip   strandar  eða ferst. Kannski ekki villa sem kemur á óvart. Villa  samt.

Hafið þið tekið eftir því, ágætur lesendur,  hve  oft er ekki tenging  eða samhengi milli fyrirsagnar fréttar og  textans sem á  eftir fylgir?  Gaman væri að fá send dæmi um þetta.

 

Athugasemdir

[Eygló, 29.4.2009 kl. 00:04]

(bara ætlað til 'skemmtunar'; ekki beint leiðrétting)

Bylgjan í gær, fréttir e.h.

Ellý Ármannsdóttir las... að fæðst hefði tvíhöfða lamb... en það væri í annað skiptið á mjög stuttum tíma. Hið fyrra lifði þó aðeins í hálfan sólarhring áður en það drapst...!

Ég ég eina fíflið sem fannst þessi frásögn drepfyndin? (þótt efnið sé ekkert gleðilegt)

"hlæja"   rosalega margir sem skrifa 'hlægja'. Sennilega er fólk ekki með kennimyndirnar á takteinum. Þá eru orðmyndir sem dregnar eru af þt. auðvitað með "g-i".  Getum við skýrt þetta út?

Margir nota þessa sögn á blogginu og það er svo auðvelt að hafa þetta "rétt" vegna þess að oftar notum við g-lausu myndina.

Takk fyrir  Málfarsmolana - ég er einlægur aðdáandi. Nokkuð góð sjálf, en get alltaf á mig blómum bætt :)

[Stefanía, 29.4.2009 kl. 00:53]

Maður á stundum ekki til orð yfir bæði stafsetningar og málfarsvillum hjá fólki, ekki það að ég telji mig einhvern sérfræðing, en margt af þessu getur " Púkinn" lagað, en það er eins og  sumt fólk hafi engan metnað fyrir að hafa pistla sína og athugasemdir rétt skrifaðar. 

Stundum skilur maður varla það sem skrifað er.

En....ég er ekki alveg að skilja nafnið þitt hér...Maíja !

Púkinn ekki heldur 

[Helgi Kr. Sigmundsson, 29.4.2009 kl. 01:12]

Sæll og takk fyrir þessar athugasemdir.  Það er gott að einhver veitir aðhald og öll umræða um bætt málfar er af hinu góða.  Það virðist vera orðið ekkert tiltökumál að ræða um hækkanir og lækkanir t.d. skatta eða vöruverðs.  Hvað segir þú um þetta?

[Eygló, 29.4.2009 kl. 02:22]

Stefanía, nú ætla ÉG að vera PÚKI  en viltu samt taka því sem stríðni en ekki lasti.

Í athugasemdinni þinni notarðu orðfæri sem fær hárin til að rísa, og það á sköflungunum, á málfarsfasista eins og mér. Bíddu, bíddu, ég bað þig að brosa :)

Ég hef alla þessa fyrirvara af því að margt fólk fer strax í eldtrausta vörn .

Þetta ku vera bein þýðing úr enskri setningamyndun; "I am not getting this"  Nú segir meira en hálf þjóðin:  "Ég er ekki að skilja þetta" (ég er ekki að fatta þetta). Ef þú ert að gera eitthvað,  þá er það ferli, og því ekki lokið.

Íslenska útgáfan er víst:  "En.... ég skil ekki alveg nafnið þitt hér..."

Æi, já þetta er asnalegt "gælunafn". Ég heiti Eygló og fannst þetta líka óskaplega sniðugt að nota fæðingarmánuðinn (maí) sem nefni. Ég ætla að breyta þessu smá, þú ert ekki sú fyrsta finnst þetta ekki 'göre sig'.

EIÐUR Eftir tilvikum, takk eða fyrirgefðu notkun/misnotkun síðunnar þinnar.

[Yngvi Högnason, 29.4.2009 kl. 07:03]

Ég held að frú Eygló ætti ekki skrifa um málfar og málnotkun.

[Sigurveig (IP-tala skráð) 29.4.2009 kl. 10:21]

Aðeins smá leiðrétting, þú skrifar leyfym en á náttúrulega að vera leyfum.

Sem sýnir að á bestu bæjum geta orðið stafsetningavillur ;)

[Valur Kristinsson, 29.4.2009 kl. 11:48]

Frú Eygló, Hveð þýðir þessi setning hjá þér: Ég ætla að breyta þessu smá, þú ert ekki sú fyrsta finnst þetta ekki 'göre sig'. Ertu ekki komin út á hálan ís, málfarslega séð?

[Eygló, 29.4.2009 kl. 13:49]

Yngvi, ekki átta ég mig á því hvað þú átt við með "... ætti ekki ..." Sé ekki útskýringar, leiðbeiningar eða ábendingar : )   Hitt er annað að ég 'ætti' e.t.v. ekki að skrifa á síðuna hans Eiðs .

Oft er notaður titilinn " Fr. " þegar ekki er vitað um hjúskaparstöðu (Valur, Yngvi). Reyndar eru þessir titlar á undanhaldi. (Ég er piparkerling).

"leyfym", "fryir", "hveð" (Sigurveig, Valur) -  virðist nú flokkist undir prentvillu, ekki stafSETNINGarvillu. (leifum, firir, kvað >  > væru stafsetningarvillur)

Veit ekki hvort Valur á við setninguna í heild eða dönskuslettuna. Við höfum allavega ekki samskonar tilfinningu fyrir kímni  enda fólk býsna ólíkt.

Ég vil endilega umræður, en allra helst ábendingar og fræðslu, eins og Eiður veitir.

[Bergsteinn Sigurðsson (IP-tala skráð) 29.4.2009 kl. 17:32]

Mæltu manna heilastur, Eiður! Einu sinni reyndi ég að gera vinsamlegar athugasemdir við ambögur hjá vinsælum bloggara. Hann lét það sem vind um eyru þjóta pg sakaði mig um derring.

[Stefanía, 30.4.2009 kl. 00:33]

Þakka ábendinguna Eygló þú kvittaðir nú eiginlega þegar þú skrifaðir að þú ætlaðir að " breyta þessu smá "  ;)

Mér þykir Maíja flott, þegar ég veit merkinguna.

Og , endilega senda ábendingu þegar  maður skrifar einhvern hroða !

Ég tek því með ánægju.