Molar um málfar LIX

 Sífellt er verið að  rugla  orðatiltækjum  saman eða  fara rangt  með orðasambönd,  sem  eru  föst í málinu. Hér  eru  tvö  dæmi (21.04.) af  bloggsíðum  afkastabloggara á Moggabloggi. „ Í þetta sinn spyrni ég ákveðnum framboðum saman ." Það er  endaleysa  að tala um að  spyrna  einhverju saman.    Sé þetta  innsláttarvilla  og  skrifari hafi ætlað að  skrifa spyrða saman , þá  er þetta  líka rangt því talað er um að  spyrða eitthvað  saman,  (upphaflega  að  binda  fiska  saman  á sporðunum með  spyrðubandi),  ekki  spyrða einhverju saman. Að þessu hefur  verið  vikið áður í Molum.

  Hitt dæmið  er  af bloggsíðu þar sem  talað er um að  „sendiherra  ESB  sé að ganga hagsmuna Brusselvaldsins alræmda."  Bloggarinn eignar þessi orð reyndar  Birni Bjarnasyni alþingismanni ( fram á laugardag) og  fyrrverandi  ráðherra.  Það er  rangt.  Björn Bjarnason  skrifar vandað mál og léti  svona ambögu aldrei  frá sér fara. Það er  ekki talað um að ganga hagsmuna  einhvers. Það er  talað um að reka  erindi einhvers, að  vinna  fyrir  einhvern   eða  gæta hagsmuna  einhvers,  vernda  málstað hans  eða  gæta þess að  ekki sé  gengið á  hlut hans. Einnnig má  tala um að  ganga  erindi fyrir einhvern. Að  ganga  erinda sinna er hinsvegar svolítið annað. Það á að gera  sömu  kröfur um vandað málfar á  bloggi og í blaðagreinum.

Svo  vil ég undir lokin taka undir  hvert orð  sem  Atli Rúnar Halldórsson  skrifaði í bloggi  sínu (19.04.) um Framsóknarbullið um „leiðréttingu" lána  og  fáránlega  málnotkun  Sjálfstæðisflokksins  sem  bauð  fólki í „ bröns". Síðasttalda orðið er  enskusletta. Á ensku er talað um „brunch" (breakfast/lunch).  Gott væri ef einhver  fyndi nothæft orð á íslensku  um  máltíð sem er  bæði   morgunverður og  hádegisverður. Dagverður ? Dögurður ? Máltíð af þessu  tagi er oft á  sunnudögum. Sunnudagssnarl ? Væri ég ekki sá  tölvuglópur sem  ég er  mundi ég  búa  til krækju  hér á þessa  færslu Atla Rúnars.  Kosningabarátta leysir  stjórnmálaflokka  og  stjórnmálamenn  ekki undan þeirri skyldu að tala  mannamál.

 Gleðilegt sumar !

Athugasemdir

[Þorsteinn Briem, 23.4.2009 kl. 00:37]

Mín tillaga er hábítur, dregið af orðunum hádegismatur og árbítur (morgunmatur).

Dæmi: Guðlaugur Þór fékk nábít þegar hann snæddi hábítinn í boði FL Group.

Gleðilegt sumar!

[Gunnar (IP-tala skráð) 23.4.2009 kl. 01:10]

Ég þakka fyrir góða og gagnlega pistla.

Ein spurning til málfróðra manna: Hvort er réttara sem ávarp í upphafi bréfs?

1.  Sæll Jón.

2.  Sæll, Jón.

[Eygló, 23.4.2009 kl. 01:20]

Í gamla daga var kennt að nota kommu á eftir ávarpi, eins og þarna. Núna er reglan (aðeins einfölduð): Aldrei skrifa kommu nema þegar "fjarvera" hennar gæti valdið misskilningi á innihaldi.  M.a.s. má/á sleppa kommum um aukasetningar.

[baldvin berndsen (IP-tala skráð) 23.4.2009 kl. 12:10]

Gleðilegt sumar ! Varðandi ávarp í upphafi bréfs, þá eru bæði röng ! Réttara er:   Sæll Jón,

kveðjur,

Baldvin