Molar um málfar LVII

Reyni Traustasyni,ritstjóra, þakka ég  athugasemdir  við  Mola gærdagsins. Þið á  Vefdv  verðið  að vanda ykkur meira. Skoðum  eftirfarandi  skrif (19.04.):

„Strandhelgisgæslan í Bandaríkjunum leitar nú að 39 ára gömlum karlmanni sem féll útbyrðis af norsku skemmtiferðaskipi undan ströndum Bahamas –eyja. Atvikið átti sér stað snemma morguns á laugardaginn.

Ekki hefur tekist að bera kennsl á manninn en nokkrir farþegar sáu hann falla útbyrðis. Fjölmör skemmtiferðaskip aðstoða strandhelgisgæsluna við leitina." Það er margt sem  er  gagnrýnivert  í þessum fáu línum. 

1. „Strandhelgisgæslan". Hér  hefði átt að  standa   strandgæslan  eða  landhelgisgæslan  (e. coast guard). Það er  ekkert til sem  heitir  strandhelgi.´Samræmi er í  vitleysisganginum því orðið  er  notað  tvisvar.

2. „Bahamas-eyjar". Íslensk  málvenja  er  að tala um Bahamaeyjar (e. The  Bahamas)

3. „Ekki  hefur  tekist að bera kennsl á manninn". Sá  sem skrifar á  sennilega  við að  ekki hafi tekist að  finna manninn, leitin að honum hafi ekki borið árangur. Að bera kennsl á , er að þekkja.

Hér  er  svo meira  af Vefdv: „ Ofurfyrirsætan Kate Moss (35) hefur verið bannað að drekka eftir að hún fékk sveppasýkingu í aðra stóru tánna. Kate áskotnaðist sýkingin er hún fór í fótsnyrtingu í Bandaríkjunum og er á svo sterkum sýklalyfjum."

1. Þarna  ætti að  standa:  Ofurfyrirsætunni ...hefur  verið  bannað að  drekka.

 2. „..áskotnaðist  sýkingin.."  Sögnin  að áskotnast  er jákvæð og  er  notuð um  að  fá eitthvað óvænt, eitthvað  gott. Það getur varla  átt við um sýkingu.

 3. „...og er á  svo  sterkum  sýklalyfjum."  Að hvað ? Setningin endar í lausu lofti.

 Aftur og enn segi ég: Þetta er ekki boðlegt.Um það hljótum við  Reynir Traustason að vera sammála. - Sleppi því að gera  athugasemdir  við  stafsetningarvillur, - eða augljósar innsláttarvillur.

Myndaflokkurinn sem  RÚV  sýnir  um þessar mundir um „Villta Kína" er  afar  vel gerður. Hreint  konfekt fyrir áhugamenn um Kína og  Miðasíu. Ekki  spillir  að   íslenski  textinn er einstaklega vandaður og prýðilega fluttur. Það er  til fyrirmyndar.

Og svo  aðeins um fréttamat. Einkennilegt  var að það  skyldi ekki þykja fréttnæmt í  sjónvarpsfréttum RÚV klukkan 1900 né klukkan 2200  (20.04.)  sem  sendiherra  ESB  gagnvart  Íslandi sagði um tillögu  Sjálfstæðismanna um  Evruna og  Alþjóða  gjaldeyrissjóðinn.  Sendiherrann sagði um  þá  tillögu Sjálfstæðismanna að  AGS ætti að hafa  milligöngu um það við ESB  að  við  tækjum upp Evru  einhliða  að  hún  væri  hrein vitleysa,  (e. sheer nonsense) Raunar  væri  réttara  að   þýða  ummæli sendiherrans  um  tillöguna  að hún væri   „arfavitlaus" ,  „tóm tjara" eða  „algjör della".   Þetta hefði  víðast hvar þótt fréttnæmt.

Í auglýsingatíma  RÚV  fyrir  fréttir blandast saman   auglýsingar frá  stjórnmálaflokkum og  steypustöð,sem er að selja  steypu. Í kvöld  fannst mér  endilega  vera sagt: Kaupið  steypuna hjá okkur.,Sjálfstæðisflokkurinn. Líklega misheyrðist mér. En gæti þetta ekki  verið rétt?

Athugasemdir

[Lana Kolbrún Eddudóttir, 21.4.2009 kl. 01:40]

Sammála þér með Gunnar Þorsteinsson, þýðanda og prýðilegan þul í Villta Kína. Hann er af gamla þurra og vandaða skólanum, sem ég tengi alltaf við Jón O. Edwald.

[Brjánn Guðjónsson, 21.4.2009 kl. 10:54]

mér hefur sýnst næg steypa vera boðin fram af Sjálfstæðisflokknum, svo líklega misheyrðist þér ekki.

[Valur Kristinsson, 21.4.2009 kl. 11:08]

 Er einnig sammála með Gunnar Þorsteinsson, frábær þýðandi og þulur í Villta Kína, en það er eitt sem varðar útsendinguna á tónlistinni í þættinum, er að hún er of hávær á köflum og yfirgnæfir tal þularins.

Þetta skerðir einbeitinguna hjá heyrnarskertum gamlingja eins og mér, þó er ég með góð heyrnartól.

 Með kærri þökk fyrir Molana Eiður, ég les þá reglulega og læri af.

VK

[Sveinn Birkir Björnsson (IP-tala skráð) 21.4.2009 kl. 12:41]

Ég hef tekið saman nokkra mola um mola um málfar. Hér þarf ýmislegt að athuga.

[Eiður (IP-tala skráð) 21.4.2009 kl. 14:08]

Góð ráð  eru alltaf vel þegin. Þakka  þér  fyrir, Sveinn Birkir.

[corvus corax, 21.4.2009 kl. 17:35]

Varðandi málfar í frétt um Kate Moss og sýkinguna, þá fékk leikkonan sýkingu í tána með einu n-i en ekki tveimur. Það er ótrúlegt hve margir virðast ekki geta lært að beygja tá, á, rá, skrá, brú, skór og fleiri orð. Öll þessi orð hafa aðeins eitt n í þolfalli svo við tölum um tána, ána, rána, skrána, brúna, skóna, o.s.frv.
Þetta er sérstaklega áberandi þessa dagana í umræðu um stjórnarskrána sem oftar en ekki verður stjórnarskránna í meðförum málsóða.
Þá vil ég einnig benda á notkun á sögninni vilja í 1. persónu, eintölu sem er vil en ekki vill.
Og svo væri að æra óstöðugan að fara að fjalla hér um málsóðaskapinn að vera að gera, þ.e. að nota nafnhátt sagna á rangan hátt. Dæmi um það er, ég er ekki að skilja þetta, hann er ekki að fara rétta leið, hann er að vinna mjög vel..... í stað þess að tala og skrifa íslensku sem er þannig: ég skil þetta ekki, hann fer ekki rétta leið, hann vinnur mjög vel. Nóg að sinni.

 Hrafn Hrafnsson

[Eiður Svanberg Guðnason, 21.4.2009 kl. 18:00]

Sæll Hrafn, þakka þér athugasemdina. Ég sá þetta með „tánna" en af meðfæddri góðvild leit ég á það sem innsláttarvillu !! Þetta er hárrétt með nafnháttarsýkina. Var til dæmis áberandi í þætti þar sem nokkrar konur úr frambjóðendaflokki Sjálfstæðisflokksins voru að ræða saman á ÍNN. Sá ég þó bara brot úr þættinum.

[Sverrir Einarsson, 21.4.2009 kl. 20:47]

Mest(a) steypan í kosningarbaráttunni er jú í boði SjálfstæðisFLokksins og hún hefur verið okkur nógu dýr fram að þessu, þannig að ég er ekki að eyða peningum í að kaupa aðra steypu í bili.