Molar um málfar LI

 Sumir  segja  að gera eigi  minni kröfur um málfar á  bloggsíðum en  á öðrum opinberum vettvangi. Þessu er Molahöfundur ósammála. Bloggarar  eiga  að  vanda  málfar sitt.  Gott  málfar  hefur góð áhrif á þá  sem  lesa.  Á sama hátt smitar vont málfar út frá  sér  eins og  hver önnur  pest.  Í morgun  (13.04.) las ég  eftirfarandi á   bloggi  konu úr  Vestmannaeyjum. Hún var að gera  athugasemd  við  frétt um skemmtanahald á  Suðurlandi þar sem  Vestmannaeyjar  voru   nefndar. Konan  skrifaði: ,,Hvað er  verið að bendla  Eyjunum við þetta?" Auðvitað hefði þarna átt að  standa:,,Hvað er verið að  bendla Eyjarnar við þetta?". Annars var   tekið ágætlega til orða í umræddri frétt  í Vefmogga , þegar sagt var að skemmtanahald á  Suðurlandi hefði gengið skammlaust fyrir  sig.

Orðalagið  að vera ,,með bakið upp við vegg" er í  tísku í íþróttaheiminum um þessar mundir.  Þessi ambaga  var endurtekin í  RÚV í morgun(14.04.). Þar var líka talað um  tryllingsleg fagnaðarlæti að loknum  leik. Ekki er  það orðalag mér  að  skapi.

Í  fréttum RÚV (14.04)  var talað um  slys í  Perú þar sem hengibrú  hefði ,,slitnað í tvennt" með hörmulegum afleiðingum. Þetta fannst mér   andkannalegt orðalag.Vel er  hugsanlegt að brúin hafi verið úr  reipum  eða  tágum, sem  hafi  slitnað,  en   ekki þurfti að  segja  að  hún hefði   slitnað í tvennt.  Til  dæmis hefði mátt segja  að brúin hefði brostið eða brotnað.

Umsjónarmönnum tónlistarþátta  í RÚV  gengur  illa  að   fallbeygja nöfn flytjenda. Í morgun (14.04) var  sagt:,, Nú heyrum við lag með hljómsveitinni Spaðar". - Lag með  hljómsveitinni  Spöðum hefði  kynnir  betur  sagt. Eða  hljómsveitin Spaðar leikur næsta lag. Varla hefði verið  sagt: Næst heyrum  við lag með Guðmundur Jónsson.

Það var óheppilegt orðalag, vægt  til orða tekið, þegar   annar  stjórnandi  kosningaþáttarins  á  RÚV (14.04)  talaði um  að „fara í  slorið" og átti  þar við  sjósókn og  fiskvinnslu. Það var eins og þetta  væri  eitthvað sérstaklega sóðalegt og ógeðfellt. Trúi því illa að þannig hafi það verið meint.

Ösköp var annars hallærislegt  að hlusta á umsjónarmenn morgunútvarps  Rásar tvö  gera   grín að  færeyska orðinu æl  eða æli  (14.04). Heyrði þetta  fyrir tilviljun. Hlusta annars  ekki á  Rás  tvö á morgnana því  sjálfumgleði ,  fliss og  aulafyndni umsjónarmanna , -  eins og  þetta  með  færeyskuna   höfðar ekki til mín. Allt  annað  að hlusta á  Rás  eitt snemma á morgnana.

Erum við komin af öpum ? Svo er spurt í  fyrirsögn í  Mogga (14.04). Þetta minnir  á gamla  sögu um að  vissulega sé mannkynið komið  af öpum. Nema Íslendingar. Þeir  séu komnir  af Norðmönnum.  Það er  auðvitað sjálfsagt að bæta því við, að Norðmönnum finnst þetta  ekki  vitund fyndið !

Athugasemdir

[Eygló, 15.4.2009 kl. 03:01]

Nú finnst mér ég hafa fundið bróður í (nei, ekki í Drottni) ylhýra.  Þegar ég byrjaði að blogga, fyrir rúmu ári, ætlaði ég einungis að skrifa um mitt hjartans mál, - íslenskt mál.

Ég er nefnilega komin með alvarlega líkamlega kvilla af því að hlusta á útvarp og sjónvarp. Það sama á við um texta í sjónvarpi og prentmiðlunum. Ég kippist við og dreg svo axlirnar upp að eyrum : )   - oft á dag.

Á hverjum degi heyrir maður að margt (flest?) fólk er farið að sleppa eignarfalli ("vegna lagningu vegarins" - "vatnsaflvirkjanir" "til þinglýsingu".  Annað virðist líka útdautt; viðtengingarháttur ("ég held að þetta er það besta) Já, ég hef margoft heyrt þáttastjórnendur og viðmælendur nota málið svona. Hefur fólk aldrei heyrt talað mál eða lesið, þ.e. "réttara" mál.

Það sem gengur þó endanlega frá mér er að fólk kann núorðið ekki að beygja neina (ýkjur) sögn, nema "að vera" . Þannig "mál" heyrði ég fyrst árið 2000:  "Ég er ekki að skilja þetta" "Við vorum ekkert að græða í fyrra"  "Þau voru ekkert að kaupa það að hanni ætlaði að..."

Meira síðar

[Haraldur Bjarnason, 15.4.2009 kl. 08:48]

"Hann er að spila góða vörn," heyrum við íþróttafréttamenn segja og ég tek undir með þér um sagnirnar Maíja. Sérstaklega eru íþróttafréttamenn slæmir með þetta. Mér finnst að menn, sem eru ágætlega máli farnir, detti niður á þetta lélega málfar um leið og þeir fara að fjalla um íþróttir. Eiður. Ég fann í fórum mínum fjölrituð blöð um málfar í útvarpi frá 1987, sem Árni Bö. lét mig hafa þegar ég byrjaði að vinna hjá RÚV 1988. Var að glugga í þetta og nánast allt sem þar er skrifað væri holl lesning fyrir þá sem starfa á fjölmiðlum í dag. Enn er verið að segja sömu vileysurnar og Árni varaði við fyrir rúmum 20 árum.

[Lana Kolbrún Eddudóttir, 15.4.2009 kl. 14:53]

Sæll Eiður. Viltu vera svo vænn að setja okkur umsjónarmenn tónlistarþátta á RÚV ekki öll undir sama hatt, með því að væna okkur um að kunna ekki að fallbeygja íslensku. Mér finnst afar líklegt að þú sért bara að tala um einn ákveðinn dagskrárgerðarmann og því þá ekki frekar að nafngreina hann en að gera lítið úr okkur hinum, að ósekju ?

[Eiður (IP-tala skráð) 15.4.2009 kl. 15:34]

Sæl Lana Kolbrún,

Þetta er  réttmæt ábending. Ég hef verið að reyna að  forðast að nafngreina  bögubósana,  en auðvitað  er það  rétt, að þá  kemur  þetta við þá  sem  allt  gott eiga  skilið og  eru hróss verðir.

Sá  sem ég hef verið að  gagnrýna  er   tónlistarmaðurinn KK sem er   ágætlega  til þess  fallinn að velja lög  en  honum er  mjög ósýnt  um að  hafa kynningarnar á  góðu máli.

[doddý, 15.4.2009 kl. 20:26]

til gamans ætla ég að rifja upp ömurlega fyrirsögn í DV fyrir nokkrum árum. á heilsíðu var mynd af ungum manni sem átti framtíðina fyrir sér. í fyrirsögninni var haft eftir manninum "ég er jákvæður á bjartsýnt svar".

þetta er ekki grín og þessi viðsnúningur var svona í alvörunni. ég hef ekki, fyrr né síðar, séð annað eins bull í rituðu máli. stuttu síðar var talað við fótboltakarl í sjónvarpi. hann sagði "blaðamannafundur verður klukkan átjánhundruð.

svona er ömurlegt. kv d

[ask (IP-tala skráð) 15.4.2009 kl. 20:53]

Í byrjun árs las ég grein eftir sérfræðing í rauðvínum. Eftir stutta stund var mér ljóst að sérfræðingurinn hafði mun öflugri bragðlauka en ég. Í fyrsta sopa fann hann bragð af gúmmíi, mold, hnetum og rúsínum! Mér varð fljótlega ljóst að rauðvínsdrykkja er list og kassavínið mitt er ómerkilegt. Gallinn er bara sá að ég kann ágætlega við bragðið af því. Þegar ég fletti dagblaði í byrjun apríl datt mér í hug hvort þessi sami sérfræðingur væri nú farinn að skrifa um ilmefni, en taktarnir voru svipaðir. Þessi grein er svo sannarlega þyngdar sinnar virði í sérhjóðum.  “Femme l´eau fraiche er létt útgáfa af hinum vinsæla Femmeilmi frá Boss. Ilmurinn er bæði kvenlegur og fíngerður með frísklegum keim með mildum hjartatónum hvítra blóma. Topptónninn er hrífandi, ávaxtakennd blanda tangerínu og sólberja, en grunntónninn mynda kremkenndir tónar viðar og rafs. Femme l´eau fraiche er kjörinn ilmur fyrir hin ýmsu tækifæri og veitir áreynslulausan þokka á komandi sumardögum” Um annan ilm segir: “Hjartatónar fjólu fléttast saman við topptóna villtra jarðarberja og moskus- og vanillu-grunntón.” Um Ocean Lounge segir: “... samanstendur af ríkulegum topptónum frískandi sumaraldina, miðtónar minna á blóm og grunntónarnir eru frá rafi, tonkabaunum, vanillu og tekki.” Ég velti því fyrir mér hvort fólk taki mark á svona texta – sem ég flokka raunar undir bull. Einstaklingar sem geta greint tonkabaunir og tekk í ilmvatni ættu að fá vinnu hjá tollinum á Keflavíkurvelli sem hasshundar eða gefa sig fram við næstu hjálparsveit skáta. Ég dreg mjög í efa að samsuða af þessu tagi hafi jákvæð áhrif á sölu. Svo mikið er víst að ef ég á eftir að kaupa ilmvatn handa dóttur minni eða eiginkonu mun ég forðast ilmvatn með kremkenndum tónum viðar og rafs! Kv. Ask.

[Eiður (IP-tala skráð) 15.4.2009 kl. 21:46]

   Hjartanlega  sammála þessu  með  víndómana. Mér hefur alltaf  fundist þetta argasta  bull og   verið   væri að hafa  lesendur  að  fíflum. Það er flestum auðvelt  að átta  sig á því hvað þeim finnst gott og  hvað  vont.Það er  verið að gera einfalda  hluti  flókna.  Þetta með  ilmvötnin er  auðvitað  sama  ruglið. Þakka þér  fyrir að vekja athygli á þessu.

       K kv   Eiður

[Eygló, 16.4.2009 kl. 01:24]

ASK Takk, þetta var betra en góður brandari. Legg sérstaka áherslu á:  "Hjartatónar fjólu fléttast saman við topptóna villtra jarðarberja og moskus- og vanillu-grunntón"

Það hefur reyndar verið stungið uppá því við mig að ég fengi mér vinnu sem hasshundur (mjaðmirnar leyfa bara ekki mikið klifur upp ferðatöskustafla). Frá því sjónarhorni skil ég að ilmur er ekki bara ilmur... jafnvel þótt hann sé "næstum" eins.

En öll þessi ósköp í kringum ilm og vín (og örugglega fleira? veiðiflugur?) eru í mínum huga, ein tegund/útgáfa af Nýju fötum keisarans